ಭಾರತಕ್ಕೆ ಪುನರುಜ್ಜೀವನಗೊಂಡ ಕಾಂಗ್ರೆಸ್‌ನ ಅಗತ್ಯವಿದೆ: ಕಪಿಲ್ ಸಿಬಲ್

ಹೊಸದಿಲ್ಲಿ: ಪಕ್ಷವು ತಾನು ಇನ್ನೂ ಜಡತ್ವದಲ್ಲಿ ಉಳಿದುಕೊಂಡಿಲ್ಲ ಮತ್ತು ಬಿಜೆಪಿಗೆ ತಾನು ಪ್ರಮುಖ ಪರ್ಯಾಯ ಆಯ್ಕೆ ಎಂದು ಬಿಂಬಿಸಿಕೊಳ್ಳಲು ಸಂಸ್ಥೆಯ ಎಲ್ಲ ಮಟ್ಟಗಳಲ್ಲಿಯೂ ವ್ಯಾಪಕ ಸುಧಾರಣೆ ತರಬೇಕಿದೆ ಎಂದು ಪಕ್ಷದ ಹಿರಿಯ ಮುಖಂಡ ಭಾನುವಾರ ಹೇಳಿದ್ದಾರೆ. ಪಕ್ಷದ ನಾಯಕತ್ವ ಬದಲಾವಣೆಗೆ ಮತ್ತು ಸಮಗ್ರ ಪುನಾರಚನೆಗೆ ಬೇಡಿಕೆ ಇರಿಸಿ ಕಳೆದ ವರ್ಷ ಸೋನಿಯಾ ಗಾಂಧಿ ಅವರಿಗೆ ಪತ್ರ ಬರೆದಿದ್ದ 23 ಮುಖಂಡರ ತಂಡದಲ್ಲಿ ಒಬ್ಬರಾಗಿರುವ ಕಪಿಲ್ ಸಿಬಲ್, ಪಕ್ಷವು ಬಿಜೆಪಿಗೆ ರಾಜಕೀಯ ಪರ್ಯಾಯವಾಗಿ ಉಳಿದಿಲ್ಲ ಎಂದು ಒಪ್ಪಿಕೊಂಡಿದ್ದಾರೆ. ಆದರೆ ಪ್ರಧಾನಿ ನರೇಂದ್ರ ಮೋದಿ ಅವರಿ ಆಡಳಿತ ನಡೆಸುವ ನೈತಿಕತೆ ಕಳೆದುಕೊಂಡಿದ್ದಾರೆ. ದೇಶದ ಪ್ರಸ್ತುತದ ವಾತಾವರಣದ ಕಾರಣದಿಂದ ಕಾಂಗ್ರೆಸ್ ತಾನು ಪರ್ಯಾಯ ಎಂದು ತೋರಿಸಿಕೊಳ್ಳಬಹುದಾಗಿದೆ ಎಂದಿದ್ದಾರೆ. ಭಾರತಕ್ಕೆ ಪುನರುಜ್ಜೀವನಗೊಂಡ ಕಾಂಗ್ರೆಸ್‌ನ ಅಗತ್ಯವಿದೆ. ಆದರೆ ಪಕ್ಷವು ತಾನು ಸಕ್ರಿಯವಾಗಿದ್ದೇನೆ ಮತ್ತು ಅರ್ಥಪೂರ್ಣವಾಗಿ ತೊಡಗಿಸಿಕೊಳ್ಳುವ ಮನಸ್ಥಿತಿಯಲ್ಲಿದ್ದೇನೆ ಎಂದು ತೋರಿಸುವ ಅಗತ್ಯವಿದೆ ಎಂದಿದ್ದಾರೆ. ಚುನಾವಣೆಗಳ ಸೋಲುಗಳ ಪರಾಮರ್ಶೆಗಾಗಿ ಸಮಿತಿಗಳನ್ನು ರಚಿಸುವುದು ಉತ್ತಮ ನಡೆ. ಆದರೆ ಸೂಚಿಸಲಾದ ಪರಿಹಾರ ಮಾರ್ಗಗಳು ಜಾರಿಯಾಗದೆ ಹೋದರೆ ಅವುಗಳಿಂದ ಯಾವ ಪರಿಣಾಮವೂ ಉಂಟಾಗುವುದಿಲ್ಲ ಎಂದು ಹೇಳಿದ್ದಾರೆ. ಅಸ್ಸಾಂನಲ್ಲಿ ಎಐಯುಡಿಎಫ್ ಮತ್ತು ಪಶ್ಚಿಮ ಬಂಗಾಳದಲ್ಲಿ ಐಎಸ್ಎಫ್ ಜತೆಗಿನ ಮೈತ್ರಿಗಳು ಸೂಕ್ತ ಆಲೋಚನೆ ಮೂಲಕ ನಡೆದಿಲ್ಲ. ಅಲ್ಪಸಂಖ್ಯಾತ ಮತ್ತು ಬಹುಸಂಖ್ಯಾತ ಕೋಮುವಾದಗಳೆರಡೂ ದೇಶಕ್ಕೆ ಅಪಾಯಕಾರಿ ಎಂಬ ಅಂಶವನ್ನು ಗಮನದಲ್ಲಿಟ್ಟುಕೊಂಡು ಮುಂದೆ ಸಾಗುವಲ್ಲಿ ಕಾಂಗ್ರೆಸ್ ವಿಫಲವಾಯಿತು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಯುವ ನಾಯಕರು ಪಕ್ಷ ತೊರೆಯುತ್ತಿದ್ದಾರೆ. ಆಗ ಜ್ಯೋತಿರಾದಿತ್ಯ ಸಿಂಧಿಯಾ, ಈಗ ಜಿತಿನ್ ಪ್ರಸಾದ ಬಿಜೆಪಿಗೆ ಸೇರಿದ್ದಾರೆ. ಅನುಭವಿಗಳು ಮತ್ತು ಯುವಜನರ ನಡುವೆ ಸಮತೋಲನ ಸಾಧಿಸಲು ತಕ್ಷಣದ ಕಾರ್ಯಯೋಜನೆ ಅಗತ್ಯ ಎಂದು ಪ್ರತಿಪಾದಿಸಿದ್ದಾರೆ.