38 ಪತ್ನಿಯರು, 89 ಮಕ್ಕಳು!: ವಿಶ್ವದ ಅತಿ ದೊಡ್ಡ ಕುಟುಂಬದ ಮುಖ್ಯಸ್ಥ ಮಿಜೋರಾಂನಲ್ಲಿ ನಿಧನ

ಹೊಸದಿಲ್ಲಿ: ವಿಶ್ವದ ಅತ್ಯಂತ ದೊಡ್ಡ ಹೊಂದಿರುವ ವ್ಯಕ್ತಿ ಎಂದೇ ಖ್ಯಾತರಾಗಿದ್ದ ಮಿಜೋರಾಂನ ಜಿಯೊನಾ ಚಾನಾ ತಮ್ಮ 76ನೇ ವಯಸ್ಸಿನಲ್ಲಿ ಮೃತಪಟ್ಟಿದ್ದಾರೆ. ಚಾನಾ ಅವರು 38 ಪತ್ನಿಯರನ್ನು ಹೊಂದಿದ್ದು, 89 ಮಕ್ಕಳು ಮತ್ತು 33 ಮೊಮ್ಮಕ್ಕಳನ್ನು ಪಡೆದಿದ್ದರು. ಮುಖ್ಯಮಂತ್ರಿ ಜೊರಾಂತಗಾ ಅವರು ಚಾನಾ ಅವರ ನಿಧನದ ಸುದ್ದಿಯನ್ನು ಟ್ವಿಟ್ಟರ್‌ನಲ್ಲಿ ಖಚಿತಪಡಿಸಿದ್ದಾರೆ. ಅವರ ಗ್ರಾಮ ಬಕ್ತಾಂವ್ಗ್ ತ್ಲಂಗ್ನುಮ್ ರಾಜ್ಯದಲ್ಲಿ ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಲು ಅವರ ಕುಟುಂಬವೇ ಕಾರಣವಾಗಿತ್ತು ಎಂದು ಹೇಳಿದ್ದಾರೆ. 'ಭಾರವಾದ ಹೃದಯದೊಂದಿಗೆ, 38 ಪತ್ನಿಯರು ಮತ್ತು 89 ಮಕ್ಕಳನ್ನು ಹೊಂದುವ ಮೂಲಕ ಜಗತ್ತಿನ ಅತಿ ದೊಡ್ಡ ಕುಟುಂಬದ ಮುಖ್ಯಸ್ಥ ಎಂದು ನಂಬಲಾಗಿರುವ ಜಿಯೊನಾ (76) ಅವರಿಗೆ ಮಿಜೋರಾಂ ಅಂತಿಮ ವಿದಾಯ ಸಲ್ಲಿಸುತ್ತಿದೆ. ಅವರ ಕುಟುಂಬದ ಕಾರಣದಿಂದಾಗಿ ಮಿಜೋರಾಂ ಮತ್ತು ಅವರ ಗ್ರಾಮ ಬಕ್ತಾಂವ್ಗ್ ತ್ಲಂಗ್ನುಮ್ ರಾಜ್ಯದಲ್ಲಿನ ಪ್ರಮುಖ ಪ್ರವಾಸಿ ಆಕರ್ಷಣೆಯಾಗಿತ್ತು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ' ಎಂದು ಮುಖ್ಯಮಂತ್ರಿ ಟ್ವೀಟ್ ಮಾಡಿದ್ದಾರೆ. ಜಿಯೋನಾ ಎಂದೇ ಹೆಸರಾಗಿದ್ದ ಜಿಯೊಂಘಕಾ ಅವರು ಐಜ್ವಾಲ್‌ನ ಟ್ರಿನಿಟಿ ಆಸ್ಪತ್ರೆಯಲ್ಲಿ ಭಾನುವಾರ ಮಧ್ಯಾಹ್ನ 3 ಗಂಟೆಗೆ ನಿಧನರಾದರು. ಅವರು ಮಧುಮೇಹ ಮತ್ತು ರಕ್ತದೊತ್ತಡ ಸಮಸ್ಯೆಗಳಿಂದ ಬಳಲುತ್ತಿದ್ದರು. ಅವರು ತಮ್ಮ ಗ್ರಾಮದಲ್ಲಿನ 'ಚಾನಾಸ್ ಸೆಕ್ಟ್' ಎಂದು ಕರೆಯಲಾಗುವ ಧಾರ್ಮಿಕ ಸಮುದಾಯವೊಂದರ ಮುಖ್ಯಸ್ಥರಾಗಿದ್ದರು. ಈ ಪಂಥದಲ್ಲಿ ಸುಮಾರು 400 ಸದಸ್ಯರಿದ್ದು, ಪುರುಷ ಸದಸ್ಯರಿಗೆ ಬಹುಪತ್ನಿತ್ವಕ್ಕೆ ಅವಕಾಶವಿದೆ. ಜಿಯೋನಾ ಅವರದು ಜಗತ್ತಿನ ಅತಿ ದೊಡ್ಡ ಕುಟುಂಬ ಎಂದು ಹೇಳಲಾಗಿತ್ತು. 1945ರ ಜುಲೈ 21ರಂದು ಜನಿಸಿದ್ದ ಜಿಯೋನಾ, ತಮ್ಮ 17ನೇ ವಯಸ್ಸಿನಲ್ಲಿ ತಮಗಿಂತ ಮೂರು ವರ್ಷ ದೊಡ್ಡವರಾದ ಮಹಿಳೆಯನ್ನು ಮದುವೆಯಾಗಿದ್ದರು. ಬೆಟ್ಟದ ತುದಿಯಲ್ಲಿರುವ ಗ್ರಾಮದಲ್ಲಿನ ಸುಮಾರು 100 ಕೊಠಡಿಗಳಿರುವ 'ಚುವಾನ್ ಥಾರ್ ರನ್' ಅಥವಾ 'ನವ ಪೀಳಿಗೆಯ ಮನೆ' ಎಂಬ ಹೆಸರಿನ ನಾಲ್ಕಂತಸ್ತಿನ ಮನೆಯಲ್ಲಿ ಅವರ ಕುಟುಂಬ ವಾಸವಿತ್ತು. ಜಿಯೋನಾ ಅವರ ಮಕ್ಕಳು ಮತ್ತು ಅವರ ಕುಟುಂಬದವರೆಲ್ಲರೂ ಒಂದೇ ಕಟ್ಟಡದ ಬೇರೆ ಬೇರೆ ಕೊಠಡಿಗಳಲ್ಲಿ ವಾಸವಿದ್ದರು. ಆದರೆ ಒಂದೇ ಅಡುಗೆಕೋಣೆಯಲ್ಲಿ ಅಡುಗೆ ತಯಾರಿಸುತ್ತಿದ್ದರು. ಅವರು ತಮ್ಮದೇ ಆದಾಯದ ಮೂಲಗಳನ್ನು ಹೊಂದಿದ್ದರು. ಜತೆಗೆ ಪಂಥದ ಅನುಯಾಯಿಗಳಿಂದ ಆಗಾಗ ದೇಣಿಗೆ ಬರುತ್ತಿತ್ತು. ಜನಪ್ರಿಯ ಕಾರ್ಯಕ್ರಮ 'ರಿಪ್ಲೈಸ್ ಬಿಲೀವ್ ಇಟ್ ಆರ್ ನಾಟ್' ಶೋದಲ್ಲಿ 2011 ಮತ್ತು 2013ರಲ್ಲಿ ಎರಡು ಬಾರಿ ಈ ಕುಟುಂಬ ಕಾಣಿಸಿಕೊಂಡಿತ್ತು. ಚಾನಾಸ್ ಕುಟುಂಬ ಈ ಮನೆ ರಾಜ್ಯದ ಪ್ರಮುಖ ಪ್ರವಾಸಿ ತಾಣವಾಗಿತ್ತು.