ಕೋವಿಡ್ 19 ಲಸಿಕೆ ಪಡೆದ ಕೆಲವರಲ್ಲಿ ರಕ್ತ ಹೆಪ್ಪುಗಟ್ಟುವುದು ಏಕೆ?: ಅಧ್ಯಯನ ವರದಿ ನೀಡಿದ ಮಾಹಿತಿ

ಹೊಸದಿಲ್ಲಿ: ಕೋವಿಡ್ 19 ಪಡೆದ ಬಳಿಕ ರಕ್ತ ಹೆಪ್ಪುಗಟ್ಟುವಿಕೆಯ ಅಡ್ಡ ಪರಿಣಾಮದ ಪ್ರಕರಣಗಳು ವರದಿಯಾಗುತ್ತಿರುವುದಕ್ಕೆ ಕಾರಣವೇನು ಎನ್ನುವುದನ್ನು ಅಧ್ಯಯನವೊಂದು ಬಹಿರಂಗಪಡಿಸಿದೆ. ತಪ್ಪು ಚುಚ್ಚುಮದ್ದು ತಂತ್ರಗಳು ರಕ್ತ ಹೆಪ್ಪುಗಟ್ಟಲು ಕಾರಣಗಳಲ್ಲಿ ಒಂದು ಎಂದು ಜರ್ಮನಿಯ ಮ್ಯೂನಿಚ್ ವಿವಿ ಮತ್ತು ಇಟಲಿಯ ಸಂಸ್ಥೆಯೊಂದರ ಸಂಶೋಧಕರು ನಡೆಸಿದ ಅಧ್ಯಯನ ತಿಳಿಸಿದೆ. ಆಸ್ಟ್ರಾಜೆನಿಕಾ, ಜಾನ್ಸನ್ ಆಂಡ್ ಜಾನ್ಸನ್ ಮತ್ತು ಸ್ಪುಟ್ನಿಕ್ ಸೇರಿದಂತೆ ವಿವಿಧ ಅಡೆನೊ ವೈರಸ್ ಕೋವಿಡ್ ಲಸಿಕೆಗಳನ್ನು ಪಡೆದುಕೊಂಡ ಅನೇಕರಲ್ಲಿ ಕಂಡುಬಂದಿತ್ತು. ಇದು ಕೆಲವರ ಸಾವಿಗೂ ಕಾರಣವಾಗಿತ್ತು. ಈ ಲಸಿಕೆಗಳನ್ನು ಸ್ನಾಯುವಿಕೆ ನೀಡುವ ಬದಲು ತಪ್ಪಾಗಿ ರಕ್ತನಾಳಗಳಿಗೆ ನೀಡುವುದು ಕೂಡ ರಕ್ತ ಹೆಪ್ಪುಗಟ್ಟುವಿಕೆಗೆ ಎಡೆಮಾಡಿಕೊಡುತ್ತದೆ ಎಂದು ಅದು ಹೇಳಿದೆ. ಅಡೆನೊ ವೈರಸ್ ಲಸಿಕೆಗಳನ್ನು ರಕ್ತದ ಹರಿವಿನೊಳಗೆ ಸೇರ್ಪಡೆ ಮಾಡುವುದರಿಂದ ಈ ವಿರಳ ಸಂಕೀರ್ಣ ಸಮಸ್ಯೆಗಳು ಉಂಟಾಗುತ್ತಿರಬಹುದು ಎಂದು ಬಯೋಆರ್‌ಎಕ್ಸ್‌ವಿ ವೆಬ್‌ಸೈಟ್‌ನಲ್ಲಿ ಪ್ರಕಟವಾಗಿರುವ ವರದಿ ತಿಳಿಸಿದೆ. ಆಕಸ್ಮಿಕವಾಗಿ ರಕ್ತನಾಳಕ್ಕೆ ಲಸಿಕೆಯನ್ನು ಚುಚ್ಚಿದಾಗ ಅದು ಲಸಿಕೆ ನಂತರದ ಥ್ರೊಂಬೊಸಿಟೊಪೆನಿಕ್ ಸಿಂಡ್ರೋಮ್ (ಟಿಟಿಎಸ್) ಸಮಸ್ಯೆಗೆ ಮುಖ್ಯವಾಗಿ ಕಾರಣವಾಗುತ್ತದೆ. ಸೂಚಿಯ ಮೊನೆಯು ಸ್ನಾಯುವಿನ ಆಳದ ಒಳಗೆ ಸಾಕಷ್ಟು ತಲುಪದೆ ಇದ್ದರೆ ಅಥವಾ ಅದು ರಕ್ತನಾಳಕ್ಕೆ ತಗುಲಿದರೆ ಲಸಿಕೆಯು ನೇರವಾಗಿ ರಕ್ತ ಹರಿವಿನೊಳಗೆ ಸೇರ್ಪಡೆಯಾಗುತ್ತದೆ. ಸರಿಯಾಗಿ ತರಬೇತಿ ಹೊಂದಿರದ ಆರೋಗ್ಯ ಕಾರ್ಯಕರ್ತರು ಚರ್ಮವನ್ನು ಹಿಸುಕಿ ಲಸಿಕೆ ನೀಡಿದಾಗ ಇದು ಉಂಟಾಗಬಹುದು ಎಂದು ವರದಿ ಹೇಳಿದೆ. ಸ್ನಾಯುವಿನ ಒಳಗೆ ನೀಡುವ ಲಸಿಕೆಗಳನ್ನು ಚರ್ಮವನ್ನು ಹಿಸುಕಿ ಕೊಡಬಾರದು. ಇದರಿಂದ ಲಸಿಕೆಯ ಸೂಜಿಮೊನೆ ಸ್ನಾಯುವನ್ನು ತಲುಪುತ್ತದೆ. ಚರ್ಮವನ್ನು ಮೇಲೆ ಒತ್ತಿದಾಗ ಸೂಜಿಯ ಮೊನೆ ಚರ್ಮದಡಿಯ ಕೋಶಗಳನ್ನು ಮಾತ್ರ ತಲುಪುತ್ತವೆ. ಇಂತಹ ಸಂದರ್ಭದಲ್ಲಿ ಲಸಿಕೆಯನ್ನು ಸರಿಯಾಗಿ ಹೀರುವುದಿಲ್ಲ. ಮಾತ್ರವಲ್ಲ, ಅದು ಚರ್ಮ ಮತ್ತು ಸ್ನಾಯುಗಳ ನಡುವೆ ಇರುವ ಸಣ್ಣ ಪದರದ ಮೂಲಕ ರಕ್ತನಾಳಗಳಿಗೂ ತಗುಲಬಹುದು ಎಂದು ಐಎಂಎಯ ರಾಷ್ಟ್ರೀಯ ಕಾರ್ಯಪಡೆಯ ಡಾ. ರಾಜೀವ್ ಜಯದೇವನ್ ಹೇಳಿದ್ದಾರೆ.