ಬ್ಯಾಂಕ್‌ಗಳಲ್ಲಿ ಭ್ರಷ್ಟಾಚಾರ ತಡೆಗೆ 10 ದಿನಗಳ 'ಅಚ್ಚರಿ ರಜೆ'ಯ ಅಸ್ತ್ರ ಮುಂದಿಟ್ಟ ಆರ್‌ಬಿಐ!
ಬ್ಯಾಂಕ್‌ಗಳಲ್ಲಿ ಭ್ರಷ್ಟಾಚಾರ ತಡೆಗೆ ಕಡ್ಡಾಯ ರಜೆಯ ಸೂತ್ರ ಮುಂದಿಟ್ಟಿರುವ ಆರ್‌ಬಿಐ, ಪೂರ್ವ ಸೂಚನೆ ಇಲ್ಲದೆ ಪ್ರಮುಖ ಬ್ಯಾಂಕ್‌ ಸಿಬ್ಬಂದಿಗೆ ಕನಿಷ್ಠ 10 ದಿನ ಕಡ್ಡಾಯ ರಜೆ ನೀಡುವಂತೆ ಬ್ಯಾಂಕ್‌ಗಳಿಗೆ ಸೂಚನೆ ನೀಡಿದೆ.
Admin
0
5
ಹೊಸದಿಲ್ಲಿ: ಬ್ಯಾಂಕ್‌ಗಳಲ್ಲಿ ಭ್ರಷ್ಟಾಚಾರವನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಆಯಕಟ್ಟಿನ ಹುದ್ದೆಗಳಲ್ಲಿ ಇರುವ ಅಧಿಕಾರಿಗಳಿಗೆ ಪ್ರತಿ ವರ್ಷ ಯಾವುದೇ ಪೂರ್ವ ಸೂಚನೆ ನೀಡದೆ ಕನಿಷ್ಠ 10 ದಿನಗಳ ಕಡ್ಡಾಯ ರಜೆ ನೀಡಿ ಕಳುಹಿಸಬೇಕು ಎಂದು ಬ್ಯಾಂಕ್‌ಗಳಿಗೆ ತಿಳಿಸಿದೆ.
2015ರಿಂದ ಈ ಕಡ್ಡಾಯ ರಜೆ ಪದ್ಧತಿ ಇದ್ದರೂ, ಪರಿಣಾಮಕಾರಿಯಾಗಿರಲಿಲ್ಲ. ಹಲವು ಪ್ರಕರಣಗಳಲ್ಲಿ ಆಯಕಟ್ಟಿನ ಹುದ್ದೆಯಲ್ಲಿರುವವರಿಂದ ಅವ್ಯವಹಾರಗಳು ಮುಂದುವರಿದಿತ್ತು. ಈ ಹಿನ್ನೆಲೆಯಲ್ಲಿ ಆರ್‌ಬಿಐ, ಯಾವುದೇ ಪೂರ್ವ ಸೂಚನೆ ನೀಡದೆ ಕಡ್ಡಾಯ ರಜೆ ನೀಡಬೇಕು ಎಂದು ತಿಳಿಸಿದೆ.
ಪ್ರಾದೇಶಿಕ ಗ್ರಾಮೀಣ ಬ್ಯಾಂಕ್‌ಗಳನ್ನು ಹೊರತುಪಡಿಸಿ, ಉಳಿದ ಎಲ್ಲ ವರ್ಗೀಕೃತ ಬ್ಯಾಂಕ್‌ಗಳಿಗೆ ಇದು ಅನ್ವಯವಾಗಲಿದೆ. ತಕ್ಷಣದಿಂದಲೇ ಅನ್ವಯವಾಗುವಂತೆ ಆಯಕಟ್ಟಿನ ಹುದ್ದೆಗಳಲ್ಲಿರುವ ಸಿಬ್ಬಂದಿಯನ್ನು ನಿಯಮಿತವಾಗಿ ಬದಲಾವಣೆ ಮಾಡುವ ವ್ಯವಸ್ಥೆ ಅಳವಡಿಸಬೇಕು. ಇದರ ಜತೆಗೆ ಯಾವುದೇ ಪೂರ್ವಸೂಚನೆ ಇಲ್ಲದೆ ಕನಿಷ್ಠ 10 ದಿನಗಳಿಗೆ ಕಡಿಮೆ ಇಲ್ಲದಂತೆ ಒಟ್ಟಿಗೆ ರಜೆ ನೀಡಬೇಕು ಎಂದು ಆರ್‌ಬಿಐ ಸೂಚಿಸಿದೆ.
ಯಾವುದು ಆಯಕಟ್ಟಿನ ಹುದ್ದೆ?
ಬ್ಯಾಂಕ್‌ಗಳಲ್ಲಿ ಟ್ರೆಶರಿ, ಕರೆನ್ಸಿ ಚೆಸ್ಟ್‌, ರಿಸ್ಕ್‌ ಮಾಡೆಲಿಂಗ್‌, ಮೋಡೆಲ್‌ ವ್ಯಾಲಿಡೇಶನ್‌ ಇತ್ಯಾದಿ ಆಯಕಟ್ಟಿನ ವಿಭಾಗದ ಹುದ್ದೆಗಳಿವೆ. ಈ ವಿಭಾಗಗಳಲ್ಲಿ ಕಡ್ಡಾಯ ರಜೆ ನೀತಿ ಅನ್ವಯವಾಗಲಿದೆ. ಈ ಕಡ್ಡಾಯ ರಜೆಯ ಅವಧಿಯಲ್ಲಿ ಉದ್ಯೋಗಿಗೆ ತನ್ನ ಡೆಸ್ಕ್‌ನ ಯಾವುದೇ ಸಂಪನ್ಮೂಲ ಮತ್ತು ಜವಾಬ್ದಾರಿಯ ಸಂಪರ್ಕ ಇರಕೂಡದು.
ತಡೆಗೆ ರಜೆಯ ಕಾರ್ಯತಂತ್ರ
ಬ್ಯಾಂಕ್‌ಗಳ ಆಯಕಟ್ಟಿನ ವಿಭಾಗಗಳಲ್ಲಿ ಕಡ್ಡಾಯ ರಜೆ ನೀತಿಯನ್ನು ಅಳವಡಿಸುವುದರಿಂದ, ಬ್ಯಾಂಕ್‌ಗಳಲ್ಲಿ ನಡೆಯುವ ಭ್ರಷ್ಟಾಚಾರಗಳನ್ನು ಪತ್ತೆ ಹಚ್ಚಲು ಹಾಗೂ ತಡೆಗಟ್ಟಲು ಅನುಕೂಲವಾಗಬಹುದು. ಲೆಕ್ಕಪತ್ರಗಳು, ದಾಖಲಾತಿಗಳ ಪರಿಶೀಲನೆ, ಆಂತರಿಕ ಲೆಕ್ಕಪರಿಶೋಧನೆ ಮತ್ತು ತನಿಖೆಗೆ ಸಹಕಾರಿಯಾಗಲಿದೆ ಎಂದು ಆರ್‌ಬಿಐ ಅಭಿಪ್ರಾಯಪಟ್ಟಿದೆ.
