ಜನಸಾಮಾನ್ಯರಿಗೆ ಡಬಲ್ ಶಾಕ್: ಪೆಟ್ರೋಲ್, ಡೀಸೆಲ್ ಜತೆಗೆ LPG ಸಿಲಿಂಡರ್ ಮತ್ತೆ ದುಬಾರಿ

ಹೊಸದಿಲ್ಲಿ: ಜನಸಾಮಾನ್ಯರಿಗೆ ಬುಧವಾರ ತೈಲ ಕಂಪೆನಿಗಳು ಡಬಲ್ ಶಾಕ್ ನೀಡಿವೆ. ಸತತ ಎರಡನೇ ದಿನ ಪೆಟ್ರೋಲ್ ಮತ್ತು ಡೀಸೆಲ್ ದರದಲ್ಲಿ ಹೆಚ್ಚಳವಾಗಿದ್ದರೆ, ಗೃಹ ಬಳಕೆಯ ಎಲ್‌ಪಿಜಿ ಅಡುಗೆ ಅನಿಲದ ದರ ಕೂಡ 15 ರೂಪಾಯಿ ತುಟ್ಟಿಯಾಗಿದೆ. ವಾಣಿಜ್ಯ ಬಳಕೆಯ 19.5 ಕೆಜಿ ತೂಕದ ದರ ಹೆಚ್ಚಳವಾದ ಕೆಲವೇ ದಿನಗಳಲ್ಲಿ 14.2 ಕೆಜಿ ತೂಕದ ಗೃಹ ಬಳಕೆ ಸಿಲಿಂಡರ್ ಬೆಲೆಯೂ ಏರಿಕೆಯಾಗಿದೆ. ಸಬ್ಸಿಡಿ ಹಾಗೂ ಸಬ್ಸಿಡಿ ರಹಿತ ಎರಡೂ ಬಗೆಯ ಅಡುಗೆ ಅನಿಲಗಳ ದರದಲ್ಲಿ ಹೆಚ್ಚಳವಾಗಿದೆ. ರಾಜಧಾನಿ ದಿಲ್ಲಿಯಲ್ಲಿ 14.2 ಕೆಜಿ ತೂಕದ ಗೃಹ ಬಳಕೆ ಅಡುಗೆ ಅನಿಲ ದರ 15 ರೂಪಾಯಿ ಹೆಚ್ಚಳದೊಂದಿಗೆ 899.50 ರೂಪಾಯಿ ಆಗಿದೆ. ಐದು ಕೆಜಿ ತೂಕದ ಸಣ್ಣ ಗಾತ್ರದ ಸಿಲಿಂಡರ್ ಬೆಲೆ 502 ರೂಪಾಯಿ ಇದೆ. ಈ ಪರಿಷ್ಕೃತ ದರಗಳು ಬುಧವಾರದಿಂದಲೇ ಅನ್ವಯವಾಗುತ್ತಿದೆ. ಕಳೆದ ಎರಡು ತಿಂಗಳಿಗೂ ಕಡಿಮೆ ಅವಧಿಯಲ್ಲಿ ಎಲ್‌ಪಿಜಿ ಸಿಲಿಂಡರ್ ದರ ಏರಿಕೆಯಾಗಿರುವುದು ಇದು ನಾಲ್ಕನೇ ಬಾರಿ. ಅಕ್ಟೋಬರ್ 1ರಂದು ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ಬೆಲೆ 43 ರೂಪಾಯಿ ಏರಿಕೆಯಾಗಿತ್ತು. ಈ ಹೊಸ ಬೆಲೆಯೊಂದಿಗೆ, ಸಬ್ಸಿಡಿ ಸಹಿತ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆ ಜನವರಿ 1ರಿಂದ 205 ರೂಪಾಯಿಯಷ್ಟು ತುಟ್ಟಿಯಾಗಿದೆ. ದಿಲ್ಲಿಯಲ್ಲಿ ಇದಕ್ಕೂ ಮುನ್ನ ಪ್ರತಿ ಎಲ್‌ಪಿಜಿ ಸಿಲಿಂಡರ್ ದರ 884.50 ರೂಪಾಯಿ ಇತ್ತು. ಮುಂಬಯಿಯಲ್ಲಿ ಕೂಡ 15 ರೂ ಏರಿಕೆಯೊಂದಿಗೆ ಪ್ರತಿ ಸಿಲಿಂಡರ್ ದರ 899.50 ರೂಪಾಯಿ ಆಗಿದೆ. ಪೆಟ್ರೋಲ್ ಮತ್ತು ಏರಿಕೆಪೆಟ್ರೋಲ್ ಮತ್ತು ಡೀಸೆಲ್ ದರಗಳಲ್ಲಿ ಸತತ ಎರಡನೇ ದಿನ ಏರಿಕೆಯಾಗಿದೆ. ರಾಜಧಾನಿ ದಿಲ್ಲಿಯಲ್ಲಿ ಪೆಟ್ರೋಲ್ ಬೆಲೆ 30 ಪೈಸೆ ಹೆಚ್ಚಳವಾಗಿದ್ದು, ಒಂದು ಲೀಟರ್ 102.64 ರೂ ದಿಂದ 102.94 ರೂಪಾಯಿಗೆ ಮುಟ್ಟಿದೆ. ಇನ್ನು ಡೀಸೆಲ್ ಬೆಲೆ ಲೀಟರ್‌ಗೆ 35 ಪೈಸೆ ಏರಿಕೆ ಕಂಡಿದ್ದು, 91.07 ರಿಂದ 91.42 ರೂಪಾಯಿಗೆ ಹೆಚ್ಚಳ ಕಂಡಿದೆ. ಮೆಟ್ರೋ ನಗರಗಳ ಪೈಕಿ ಅತಿ ಹೆಚ್ಚಿನ ತೈಲ ಬೆಲೆ ಹೊಂದಿರುವ ನಗರವಾಗಿ ಮುಂಬಯಿ ಮುಂದುವರಿದಿದೆ. ವಾಣಿಜ್ಯ ನಗರಿಯಲ್ಲಿ ಪೆಟ್ರೋಲ್ ದರ 108.96 ರೂ ಹಾಗೂ ಡೀಸೆಲ್ ದರ 99.17 ರೂಪಾಯಿ ಇದೆ. ಚೆನ್ನೈನಲ್ಲಿ ಪೆಟ್ರೋಲ್ 100.49 ಮತ್ತು ಡೀಸೆಲ್ 95.93 ರೂ ತಲುಪಿದೆ. ಕೋಲ್ಕತಾದಲ್ಲಿ ಪೆಟ್ರೋಲ್ ಒಂದು ಲೀಟರ್‌ಗೆ 103.65 ರೂ ಹಾಗೂ ಡೀಸೆಲ್ 94.53 ರೂ ಇದೆ. ಬೆಂಗಳೂರಿನಲ್ಲಿ ಒಂದು ಲೀಟರ್ ಪೆಟ್ರೋಲ್ ದರ 31 ಪೈಸೆ ಹೆಚ್ಚಳ ಕಂಡಿದೆ. ಇದರಿಂದ ಲೀಟರ್ ಪೆಟ್ರೋಲ್ ದರ 106.52 ರೂಪಾಯಿ ಇದೆ. ಹಾಗೆಯೇ ಡೀಸೆಲ್ ದರ 37 ಪೈಸೆ ಹೆಚ್ಚಳದೊಂದಿಗೆ 97.03 ರೂಪಾಯಿಗೆ ಮುಟ್ಟಿದೆ.