ಬೆಂಗಳೂರಿನಲ್ಲಿ 19-40 ವರ್ಷ ವಯಸ್ಸಿನವರಲ್ಲೇ ಕೊರೊನಾ ಸೋಂಕು ಹೆಚ್ಚು!

ಬೆಂಗಳೂರು: ನಗರದಲ್ಲಿ 19 - 40 ವರ್ಷ ವಯಸ್ಸಿನವರಲ್ಲಿ ಕೋವಿಡ್‌ ಸೋಂಕು ಪ್ರಕರಣಗಳು ಹೆಚ್ಚಿವೆ. ಬೃಹತ್‌ ಮಹಾನಗರ ಪಾಲಿಕೆ (ಬಿಬಿಎಂಪಿ) ವ್ಯಾಪ್ತಿಯಲ್ಲಿ ದಾಖಲಾಗಿರುವ ಒಟ್ಟು ಕೋವಿಡ್‌ - 19 ಪ್ರಕರಣಗಳಲ್ಲಿ ಅರ್ಧದಷ್ಟು ಸಂಖ್ಯೆ ಈ ವಯಸ್ಸಿನ ಗುಂಪಿಗೆ ಸೇರಿದ್ದಾಗಿದೆ. ಬಿಬಿಎಂಪಿಯ ಕಳೆದ ಮೂರು ತಿಂಗಳ ದಾಖಲೆಗಳ ಪ್ರಕಾರ, ಈ ಮಾಹಿತಿ ತಿಳಿದುಬಂದಿದೆ. ಕಚೇರಿಗಳು, ಕೈಗಾರಿಕೆಗಳು ಆರಂಭವಾಗಿರುವುದು, ಗುಂಪು ಸೇರುವಿಕೆ, ಸಾರ್ವಜನಿಕ ಸಾರಿಗೆ ಪುನರಾರಂಭ, ಕೋವಿಡ್‌ ನಿಯಮಗಳ ಉಲ್ಲಂಘನೆ, ಈ ವಯಸ್ಸಿನ ಗುಂಪಿನಲ್ಲಿ ಕೋವಿಡ್‌ ಪ್ರಕರಣಗಳು ಹೆಚ್ಚಲು ಪ್ರಮುಖ ಕಾರಣಗಳಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸೆಪ್ಟೆಂಬರ್‌ನಲ್ಲಿ ಬೆಂಗಳೂರಿನಲ್ಲಿಒಟ್ಟು 8,593 ಕೋವಿಡ್‌ ಪ್ರಕರಣಗಳು ದಾಖಲಾಗಿವೆ. ಈ ಪೈಕಿ 4,238 ಪ್ರಕರಣಗಳು 19 - 40 ವಯಸ್ಸಿನ ಗುಂಪಿನವರದ್ದಾಗಿದೆ. ಒಟ್ಟು ಪ್ರಕರಣಗಳಲ್ಲಿ ಶೇ. 49.3ರಷ್ಟು ಪ್ರಕರಣಗಳು ಈ ವಯೋಮಾನದವರದ್ದಾಗಿದೆ. ಅದೇ ರೀತಿ ಜುಲೈ ಮತ್ತು ಆಗಸ್ಟ್‌ನಲ್ಲಿ ಈ ವಯೋಮಾನದವರು ನಗರದ ಒಟ್ಟು ಸೋಂಕಿತರಲ್ಲಿ ಕ್ರಮವಾಗಿ ಶೇ. 54 ಮತ್ತು ಶೇ. 52ರಷ್ಟಿದ್ದಾರೆ. ಈ ಕುರಿತು ಮಾಹಿತಿ ನೀಡಿದ ಬಿಬಿಎಂಪಿ ಮುಖ್ಯ ಆರೋಗ್ಯಾಧಿಕಾರಿ ಬಿ. ವಿಜಯೇಂದ್ರ, ''ಕಚೇರಿಗಳು, ಕೈಗಾರಿಕೆಗಳು ಕಾರ್ಯನಿರ್ವಹಿಸುತ್ತಿದ್ದು, ಎಲ್ಲವೂ ಸಹಜ ಸ್ಥಿತಿಗೆ ಮರಳುತ್ತಿದೆ. 19 - 40 ವರ್ಷ ವಯಸ್ಸಿನವರು ಹೊರಗೆ ಹೆಚ್ಚು ಓಡಾಡುವುದರಿಂದ ಕೊರೊನಾ ಸೋಂಕು ತಗಲುವ ಸಾಧ್ಯತೆ ಹೆಚ್ಚಿದೆ. ಅಲ್ಲದೇ ಯುವಕರು ಹೆಚ್ಚಾಗಿ ಕೋವಿಡ್‌ ನಿಯಮಗಳನ್ನು ಉಲ್ಲಂಘಿಸುತ್ತಾರೆ. ಇದು ಕೂಡ ನಗರದಲ್ಲಿ ಕೊರೊನಾ ಪ್ರಕರಣಗಳು ಹೆಚ್ಚಲು ಕಾರಣವಾಗಿದೆ,'' ಎಂದು ತಿಳಿಸಿದರು. ''ಸೋಂಕು ಹರಡದಂತೆ ತಡೆಯಲು ಕಚೇರಿಗಳಲ್ಲಿ ಉದ್ಯೋಗಿಗಳು ಕಡ್ಡಾಯವಾಗಿ ಮಾಸ್ಕ್‌ ಧರಿಸುವುದು ಮತ್ತು ಸಾಮಾಜಿಕ ಅಂತರ ಕಾಪಾಡುವುದನ್ನು ಖಾತ್ರಿಪಡಿಸಿಕೊಳ್ಳಬೇಕು. 18 - 35 ವಯಸ್ಸಿನ ಯುವಕರು ಹೆಚ್ಚಾಗಿ ಪಾರ್ಟಿಗಳಲ್ಲಿ ಭಾಗವಹಿಸುವುದು, ಗುಂಪು ಹೆಚ್ಚಿರುವ ಕಡೆಗಳಲ್ಲಿ ಸೇರುವುದು ಕೂಡ ಈ ಗುಂಪಿನವರಲ್ಲಿ ಸೋಂಕು ಹೆಚ್ಚಲು ಕಾರಣವಾಗಿದೆ,'' ಎಂದು ಹೇಳಿದರು. ವಿದ್ಯಾರ್ಥಿಗಳಲ್ಲೂಸೋಂಕು ಹೆಚ್ಚಳ ದಾಖಲೆಗಳ ಪ್ರಕಾರ, 13-18 ವಯಸ್ಸಿನ ಗುಂಪಿನವರ ಪೈಕಿ ಜುಲೈನಲ್ಲಿ 623 ಪ್ರಕರಣಗಳು ದಾಖಲಾಗಿವೆ. ಆಗಸ್ಟ್‌ನಲ್ಲಿ ಇದು ಕೊಂಚ ತಗ್ಗಿದ್ದು 496 ಪ್ರಕರಣಗಳು ದೃಢಪಟ್ಟಿದೆ. ಆದರೆ ಪುನಃ ಸೆಪ್ಟೆಂಬರ್‌ನಲ್ಲಿ ಈ ಸಂಖ್ಯೆ ಏರಿಕೆಯಾಗಿದ್ದು, 533 ಪ್ರಕರಣಗಳು ವರದಿಯಾಗಿದೆ. ''ಶಾಲೆ ಮತ್ತು ಕಾಲೇಜುಗಳು ಆರಂಭವಾಗಿರುವುದರಿಂದ ವಿದ್ಯಾರ್ಥಿಗಳು ಗುಂಪು ಗೂಡುವುದು ಹೆಚ್ಚುತ್ತಿದೆ. ಹಾಗಾಗಿ ಈ ವಯೋಮಾನದವರಲ್ಲಿ ಕೊರೊನಾ ಪ್ರಕರಣಗಳು ಹೆಚ್ಚುತ್ತಿವೆ. ಅದರಲ್ಲೂ ಪಿಯು ವಿದ್ಯಾರ್ಥಿಳಲ್ಲಿ ಹೆಚ್ಚಾಗಿ ಕೋವಿಡ್‌ ಪ್ರಕರಣಗಳು ವರದಿಯಾಗುತ್ತಿವೆ. ಮುಂಚಿತವಾಗಿ ಕೊರೊನಾ ಪ್ರಕರಣಗಳನ್ನು ಪತ್ತೆಹಚ್ಚಿದ್ದರೆ ಸೋಂಕು ಹರಡುವುದನ್ನು ತಡೆಗಟ್ಟಬಹುದು. ಜತೆಗೆ ಗುಂಪು ಸೇರುವುದನ್ನು ನಿಯಂತ್ರಿಸಬೇಕು. ಸಾಮಾಜಿಕ ಅಂತರ ಕಾಪಾಡಿಕೊಂಡು ಕೋವಿಡ್‌ ನಿಯಮಗಳನ್ನು ಪಾಲಿಸಬೇಕು,'' ಎಂದು ಬಿಬಿಎಂಪಿ ವಿಶೇಷ ಆಯುಕ್ತರಾದ (ಆರೋಗ್ಯ) ಡಿ. ರಂದೀಪ್‌ ಸಲಹೆ ನೀಡಿದರು.