ಹಾಲು ಕೊಟ್ಟ ರೈತನಿಗೆ ತುಪ್ಪ ಕೊಟ್ಟ ಬಮೂಲ್‌: ಕೋವಿಡ್‌ನಿಂದ ಮೃತಪಟ್ಟವರಿಗೆ ₹50 ಸಾವಿರ ಪರಿಹಾರ!

ವೆಂಕಟರಾಜು ಎಸ್‌ ದೊಡ್ಡಬಳ್ಳಾಪುರ ಹಾಲು ಉತ್ಪಾದಕರಿಂದ ಕೇವಲ ಹಾಲನ್ನು ಖರೀದಿಸಿಕೊಳ್ಳುವ ವ್ಯವಹಾರ ಮಾತ್ರ ಮಾಡದೆ ಅವರ ಕಲ್ಯಾಣಕ್ಕಾಗಿ ಹಲವಾರು ಯೋಜನೆಗಳನ್ನು ರೂಪಿಸಿದೆ. ಕೊರೊನಾ ಮಹಾಮಾರಿಗೆ ತುತ್ತಾಗಿ ಮೃತಪಟ್ಟ ಹಾಲು ಉತ್ಪಾದಕ ಸಹಕಾರ ಸಂಘಗಳ ಸದಸ್ಯರ ಕುಟುಂಬಕ್ಕೆ ತಲಾ 50 ಸಾವಿರ ಪರಿಹಾರ ಹಾಗೂ ಪೌಷ್ಟಿಕ ಆಹಾರವನ್ನು ನೀಡುವ ದೃಷ್ಟಿಯಿಂದ ಎಲ್ಲಾ ರೈತರಿಗೂ ತಲಾ ಒಂದು ಕೆ.ಜಿ ತುಪ್ಪವನ್ನು ನೀಡಿದೆ. ಅಲ್ಲದೆ ವಿವಿಧ ಯೋಜನೆಗಳಡಿ ವಿವಿಧ ಪರಿಹಾರ ಚೆಕ್‌ಗಳನ್ನು ನೀಡಿದೆ. ಎಂಪಿಸಿಎಸ್‌ ಸದಸ್ಯರಿಗೆ ತುಪ್ಪ ವಿತರಣೆ: ತಾಲೂಕಿನಲ್ಲಿ ಕಾರ್ಯನಿರ್ಹಹಣೆ ಮಾಡುತ್ತಿರುವ 199 ಡೇರಿಗಳಿಗೆ ಹಾಲನ್ನು ಹಾಕುತ್ತಿರುವ 11,600 ಮಂದಿ ರೈತರಿಗೆ ಬಮೂಲ್‌ ವತಿಯಿಂದ ಒಂದು ಕೆ.ಜಿ ತುಪ್ಪವನ್ನು ನೀಡಲಾಗಿದೆ. ಕೊರೊನಾದಿಂದ ಉಂಟಾದ ಲಾಕ್‌ಡೌನ್‌ ಸಮಯದಲ್ಲಿ ಹಾಲು ಮಾರಾಟ ಮಾಡಲಾಗಿದೆ. ಸಾಕಷ್ಟು ತೊಂದರೆಗೆ ಸಿಲುಕಿದ್ದರು. ಅವರ ನೆರವಿಗೆ ಧಾವಿಸಿ ಪೌಷ್ಟಿಕಾಂಶ ಆಹಾರ ನೀಡುವ ಉದ್ದೇಶದಿಂದ ತಾಲೂಕಿನಲ್ಲಿ 38 ಲಕ್ಷದ 88 ಸಾವಿರ ಮೌಲ್ಯದ ಶುದ್ಧ ತುಪ್ಪವನ್ನು ವಿತರಣೆ ಮಾಡಲಾಗಿದೆ. 50 ಸಾವಿರ ಸಹಾಯ ಧನ: ಮಹಾಮಾರಿ ಕೋವಿಡ್‌ ನಿಂದ ಮೃತಪಟ್ಟ ರೈತರಿಗೆ ವಿಶೇಷ ಪರಿಹಾರ ಧನವಾಗಿ ತಲಾ 50 ಸಾವಿರ ರೂಪಾಯಿ ನೀಡಲು ಬಮೂಲ್‌ ಯೋಜನೆ ರೂಪಿಸಿದೆ. ಈಗಾಗಲೇ 19 ಮಂದಿ ಅರ್ಜಿಗಳು ತಲುಪಿದ್ದು, ತಾಲೂಕಿನ ರೈತರು ಕೋವಿಡ್‌ ನಿಂದ ಮೃತಪಟ್ಟಿದ್ದಲ್ಲಿ ಶೀಘ್ರವಾಗಿ ಬಮೂಲ್‌ ಕಚೇರಿಗೆ ದಾಖಲಾತಿಗಳನ್ನು ಸಲ್ಲಿಸಿ ಎಂದು ಕೆಎಂಎಫ್‌ ನಿರ್ದೇಶಕ ಬಿ.ಸಿ ಆನಂದ್‌ ಕುಮಾರ್‌ ತಿಳಿಸಿದ್ದಾರೆ. ಚೆಕ್‌ಗಳ ವಿತರಣೆ: ಇನ್ನೂ ಪ್ರತಿವರ್ಷ ಬಮೂಲ್‌ನ ವಿವಿಧ ಯೋಜನೆಯಡಿ ನೀಡಲಾಗುವ ಪರಿಹಾರ ಧನವನ್ನು ಈಗಾಗಲೇ ವಿತರಣೆ ಮಾಡಲಾಗಿದೆ. ತಾಲೂಕಿನಲ್ಲಿ 48 ಮಂದಿಗೆ ಸುಮಾರು 4 ಲಕ್ಷ ನೆರವನ್ನು ನೀಡಲಾಗಿದೆ. ಇನ್ನೂ ತಾಲೂಕಿನಲ್ಲಿ ಕೆಲಸ ಮಾಡುತ್ತಿರುವ ಆಶಾ ಕಾರ್ಯಕರ್ತೆಯರು ಮತ್ತು ಎಂಪಿಸಿಎಸ್‌ ಸಿಬ್ಬಂದಿಗಳಿಗೆ ಬಮೂಲ್‌ ಕಲ್ಯಾಣ ಟ್ರಸ್ಟ್‌ ವತಿಯಿಂದ 13 ಪದಾರ್ಥಗಳುಳ್ಳ ದಿನಸಿ ಕಿಟ್‌ ವಿತರಣೆ ಮಾಡಲಾಗಿದೆ. ಯಾವುದೇ ಸಂಕಷ್ಟ ಸಮಯದಲ್ಲೂ ಹೈನುಗಾರಿಕೆ ರೈತನ ಕೈಬಿಡುವುದಿಲ್ಲ. ಮುಂದಿನ ದಿನಗಳಲ್ಲಿ ಹಾಲಿನ ಬೆಲೆ ಮತ್ತಷ್ಟು ಹೆಚ್ಚಿಸಲು ಪ್ರಯತ್ನಿಸುತ್ತಿದ್ದೇವೆ. ಯುವಕರು ಉದ್ಯೋಗ ಸಿಗಲಿಲ್ಲ ಎಂದು ಕೊರಗುವ ಬದಲು ಹೈನುಗಾರಿಕೆ ಮೂಲಕ ಸ್ವಾಭಿಮಾನಿ ಬದುಕನ್ನು ಕಟ್ಟಿಕೊಳ್ಳಿ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೈನುಗಾರಿಕೆಯನ್ನು ಉತ್ತೇಜಿಸುವಲ್ಲಿ ಒಕ್ಕೂಟ ಶ್ರಮಿಸುತ್ತಿದೆ. ಈ ಹಂತದಲ್ಲಿ ಹೈನುಗಾರಿಕೆಗೆ ಒಳ್ಳೆಯ ದಿನಗಳು ಬರುತ್ತವೆ. ರೈತರ ಏಳಿಗೆಗೆ ಬಮೂಲ್‌ ಸದಾ ಕೆಲಸ ಮಾಡುತ್ತದೆ. - ಬಿ.ಸಿ. ಆನಂದ್‌ ಕುಮಾರ್‌, ಕೆಎಂಎಫ್‌, ಬಮೂಲ್‌ ನಿರ್ದೇಶಕ.