ಬೆಂಗಳೂರಿನ ಇಡ್ಲಿ ಪ್ರಿಯರಿಗೊಂದು ಗುಡ್ ನ್ಯೂಸ್; ಶೀಘ್ರದಲ್ಲೇ ಎಟಿಐ ಯಂತ್ರದಲ್ಲಿ ಬರಲಿದೆ ಬಿಸಿಬಿಸಿ ಇಡ್ಲಿ!

: ಇಡ್ಲಿಯನ್ನು ಇಷ್ಟಪಡುವ ಬೆಂಗಳೂರಿಗರಿಗೆ ಇಲ್ಲೊಂದು ಸಿಹಿ ಸುದ್ದಿ ಇದೆ. ಅದೇನೆಂದರೆ ಸದ್ಯದಲ್ಲೇ ಎಟಿಎಂ ಹಣ ನೀಡುವಂತೆ ಇಡ್ಲಿಯನ್ನು ನೀಡುವ ಎಟಿಐ() ಯಂತ್ರ ಬರಲಿದೆ. ಈ ಯಂತ್ರಗಳು ಕೇವಲ ಇಡ್ಲಿಯನ್ನು ಬೇಯಿಸುವುದಷ್ಟೇ ಅಲ್ಲ, ಅವುಗಳನ್ನು ಪ್ಯಾಕ್‌ ಮಾಡಿ ಗ್ರಾಹಕರಿಗೂ ತಲುಪಿಸಲಿದೆ. '' ಹೆಸರಿನ ಈ ಎರಡು ಯಂತ್ರಗಳಲ್ಲಿ ಒಂದು ಇಡ್ಲಿಯನ್ನು ಬೇಯಿಸಿದರೆ ಮತ್ತೊಂದು ಇಡ್ಲಿ, ಚಟ್ನಿ ಮತ್ತು ಸಾಂಬಾರ್‌ ಒದಗಿಸಲಿದೆ. ಕೋವಿಡ್‌ ನಂತರದ ಪರಿಸ್ಥಿತಿಯಲ್ಲಿ ಸಂಪರ್ಕರಹಿತ ಆಹಾರ ಪೂರೈಕೆ ಅತ್ಯಗತ್ಯವಾಗಿದೆ. ಮೂಲತಃ ಈ ಯೋಜನೆ 2019ರ ಫೆಬ್ರವರಿಯಲ್ಲಿಆರಂಭವಾಯಿತು ಎನ್ನುತ್ತಾರೆ ಫ್ರೆಶ್‌ ಹಾಟ್‌ ರೋಬೋಟಿಕ್ಸ್‌ ಪ್ರೈ. ಲಿಮಿಟೆಡ್‌ನ ಸಂಸ್ಥಾಪಕ ಮತ್ತು ಸಿಒಇ ಶರಣ್‌ ಹಿರೇಧಿಮಧಿಠ್‌. ''ಒಮ್ಮೆ ನನ್ನ ಮಗಳಿಗೆ ಅನಾರೋಗ್ಯವಾಗಿತ್ತು. ರಾತ್ರಿ 10.30ರಲ್ಲಿ ಇಡ್ಲಿ ಸಿಗಲಿಲ್ಲ. ಆಗ ನನಗೆ ಎಟಿಎಂನಲ್ಲಿ ದಿನದ 24 ಗಂಟೆಯೂ ಹಣ ಸಿಗುವಂತೆ, ಇಡ್ಲಿಯೂ ಕೂಡ ಏಕೆ ಸಿಗುವಂತೆ ಮಾಡಬಾರದೆಂಬ ಆಲೋಚನೆ ಬಂದಿತು,''ಎಂದು ಹೇಳಿದರು. ಕಂಪನಿಯ ಸಹ ಸಂಸ್ಥಾಪಕ ಸುರೇಶ್‌ ಚಂದ್ರಶೇಖರನ್‌, ''ಇಡ್ಲಿಹಿಟ್ಟನ್ನು ಸಿದ್ಧಪಡಿಸಿ ಅದನ್ನು ಡ್ರಮ್‌ಗಳಲ್ಲಿ ಪೂರೈಸಲಾಗುವುದು. ಇಡ್ಲಿ ಯಂತ್ರಗಳನ್ನು ಕ್ಲೌಡ್‌ ಕಿಚನ್‌ಗಳ ಜತೆ ಸಂಯೋಜಿಸಲಾಗುವುದು. ಇಡ್ಲಿಹಿಟ್ಟು ಕಡಿಮೆಯಾಗುತ್ತಿದ್ದಂತೆಯೇ ಅಲರ್ಟ್‌ ಸಂದೇಶ ಬರುತ್ತದೆ. ನಂತರ ಇಡ್ಲಿಬೋಟ್‌ಗಳಿಗೆ ಹಿಟ್ಟನ್ನು ತುಂಬಲಾಗುವುದು,'' ಎಂದು ವಿವರಿಸಿದರು. ''ನಗರದಲ್ಲಿ ತಾಜಾ ಇಡ್ಲಿ ನೀಡುವ ಹಲವು ದರ್ಶಿನಿಗಳು ಮತ್ತು ಸಣ್ಣ ಹೋಟೆಲ್‌ಗಳಿದ್ದರೂ ನಾವು ಅವುಗಳ ಜತೆ ಸ್ಪರ್ಧೆ ಮಾಡುತ್ತಿಲ್ಲ. ನಾವು ಈವರೆಗೆ ಯಾರೂ ಕೈಹಾಕದಂತಹ ಮಾರುಕಟ್ಟೆಯನ್ನು ಪ್ರವೇಶಿಸಲು ಮುಂದಾಗಿದ್ದೇವೆ. ನಗರದಲ್ಲಿ ರಾತ್ರಿ ವೇಳೆ ಲಕ್ಷಾಂತರ ಜನರು ಕಾರ್ಯನಿರ್ವಹಿಸುತ್ತಾರೆ. ಆಸ್ಪತ್ರೆ, ರೈಲು ನಿಲ್ದಾಣ, ವಿಮಾನ ನಿಲ್ದಾಣ ಮತ್ತು ಹೆದ್ದಾರಿಗಳಲ್ಲಿ ರಾತ್ರಿ ವೇಳೆ ಹೆಚ್ಚು ಜನ ಸಂಚಾರವಿರುತ್ತದೆ. ಅಂತಹ ಜನರು ಇಡ್ಲಿಬೋಟ್‌ಗೆ ಹೋಗಿ ಅಲ್ಲಿಂದ ಬಿಸಿ ಬಿಸಿ ಇಡ್ಲಿಯನ್ನು ಪಡೆದುಕೊಳ್ಳಬಹುದು. ಜತೆಗೆ ಇಲ್ಲಿ ಜನ ಸಂಪರ್ಕವೇ ಇರುವುದಿಲ್ಲ. ಹಾಗಾಗಿ ಅಡುಗೆಯಲ್ಲಿ ಶುಚಿತ್ವ ಖಾತ್ರಿಯಾಗಿರುತ್ತದೆ. ಇದಕ್ಕೆ ಉತ್ತಮ ಮಾರುಕಟ್ಟೆ ದೊರಕುವ ನಿರೀಕ್ಷೆ ಇದೆ,'' ಎಂದು ಚಂದ್ರಶೇಖರನ್‌ ಭರವಸೆ ವ್ಯಕ್ತಪಡಿಸಿದರು. ಇಡ್ಲಿ ಸಂಸ್ಥಾಪಕರು ಆ್ಯಪ್‌ ಅಭಿವೃದ್ಧಿಪಡಿಸುತ್ತಿದ್ದು, ಅದರ ಮೂಲಕ ಯಾರು ಬೇಕಾದರೂ ಇಡ್ಲಿಗೆ ಆರ್ಡರ್‌ ಮಾಡಬಹುದು. ಇಡ್ಲಿಗೆ ಇನ್ನೂ ದರ ನಿಗದಿಪಡಿಸಿಲ್ಲ. ಆದರೆ ಸುಮಾರು 25ರಿಂದ 30 ರೂ.ಗೆ ಎರಡು ಇಡ್ಲಿ ದೊರಕುವ ಸಾಧ್ಯತೆ ಇದೆ. ''ಇಡ್ಲಿ ಜತೆಗೆ ವಡೆಗಳನ್ನೂ ನೀಡಲು ಮತ್ತೊಂದು ಯಂತ್ರವನ್ನೂ ಸಿದ್ಧಪಡಿಸಲಾಗುತ್ತಿದೆ. ನಾವು ಸಮೀಕ್ಷೆ ಮಾಡಿದಾಗ ಇಡ್ಲಿ ಜತೆಗೆ ಉದ್ದಿನ ವಡೆ ಇದ್ದರೆ ಒಳ್ಳೆಯದು ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ವಡೆ ಕೂಡ ನೀಡುವ ಆಲೋಚನೆ ಇದೆ. ಖಾರಾ ಬಾತ್‌ ಮತ್ತು ಇತರೆ ತಿಂಡಿಗಳನ್ನೂ ಪಟ್ಟಿಯಲ್ಲಿ ಸೇರಿಸುವ ಆಲೋಚನೆಯೂ ಇದೆ,'' ಎಂದು ತಿಳಿಸಿದರು. ಈ ಯೋಜನೆ 10 ತಿಂಗಳ ಹಿಂದೆಯೇ ಜಾರಿಗೆ ಬರಬೇಕಾಗಿತ್ತು. ಆದರೆ, ಕೋವಿಡ್‌ನಿಂದಾಗಿ ವಿಳಂಬವಾಗಿದೆ. ಆದರೆ, ಸಂಸ್ಥಾಪಕರು 2022ರ ಏಪ್ರಿಲ್‌ ಒಳಗೆ ಇಡ್ಲಿ ಯಂತ್ರಗಳನ್ನು ಪರಿಚಯಿಸುವ ಯೋಜನೆ ಹಾಕಿಕೊಂಡಿದ್ದಾರೆ. ಇಡ್ಲಿಬೋಟ್‌ಗಳಿಗೆ ಸುಮಾರು 200ರಿಂದ 300 ಚದರ ಅಡಿ ಜಾಗದ ಅವಶ್ಯಕತೆ ಇದ್ದು, ಮಾಲ್‌ ಮತ್ತು ಮೆಟ್ರೊ ನಿಲ್ದಾಣಗಳಲ್ಲೂ ಅವುಗಳನ್ನು ಅಳವಡಿಸಬಹುದಾಗಿದೆ.