ಪುನೀತ್ ಅವರ ಆಲೋಚನೆಯನ್ನ ಬಹಿರಂಗ ಪಡಿಸಿ ಕೊನೆಯ ಸೆಲ್ಫಿ ಹಂಚಿಕೊಂಡ ರಾಘಣ್ಣ
ತಮ್ಮ ಕಿರಿಯ ಸಹೋದರ ಪುನೀತ್ ರಾಜ್‌ಕುಮಾರ್ ಜೊತೆಗೆ ಕ್ಲಿಕ್ ಮಾಡಿಕೊಂಡ ಕೊನೆಯ ಸೆಲ್ಫಿಯನ್ನು ರಾಘವೇಂದ್ರ ರಾಜ್‌ಕುಮಾರ್ ಶೇರ್ ಮಾಡಿಕೊಂಡಿದ್ದಾರೆ. ಜೊತೆಗೆ, ಪುನೀತ್ ರಾಜ್‌ಕುಮಾರ್ ಅವರಿಗೆ ಹೊಳೆದಿದ್ದ ಒಂದು ಅದ್ಭುತ ಆಲೋಚನೆಯನ್ನು ರಾಘವೇಂದ್ರ ರಾಜ್‌ಕುಮಾರ್ ಬಹಿರಂಗ ಪಡಿಸಿದ್ದಾರೆ.
Admin
0
6
ಸದಾ ವ್ಯಾಯಾಮ ಮಾಡುತ್ತಾ ಫಿಟ್ ಆಗಿದ್ದ ಪವರ್ ಸ್ಟಾರ್ ಇಷ್ಟು ಬೇಗ ಇಹಲೋಕ ತ್ಯಜಿಸುತ್ತಾರೆ, ಉತ್ಸಾಹದ ಚಿಲುಮೆಯಾಗಿದ್ದ ಅಪ್ಪು ನಮ್ಮನ್ನೆಲ್ಲಾ ಅಗಲುತ್ತಾರೆ ಅಂತ ಯಾರೂ ಊಹಿಸಿರಲೇ ಇಲ್ಲ. ಯಾರೂ ನಿರೀಕ್ಷಿಸದ ಘೋರ ದುರಂತ ನಡೆದೇ ಹೋಯ್ತು. ವಿಧಿ ಕ್ರೂರಿ ಅನ್ನೋದು ಪುನಃ ಸಾಬೀತು ಆಗೇ ಹೋಯ್ತು.
ಪುನೀತ್ ರಾಜ್‌ಕುಮಾರ್ ಅವರ ನಿಧನ ಸುದ್ದಿ ಕೇಳಿ ತೀರಾ ನೊಂದರೂ, ದುಃಖದಲ್ಲಿದ್ದರೂ, ನೋವನ್ನ ನುಂಗಿಕೊಂಡು ಕಲ್ಲುಬಂಡೆಯಂತಿದ್ದವರು . ‘’ನಾನು ಮೊದಲು ಹೋಗಬೇಕಿತ್ತು. ಆದರೆ ಮಿಸ್ ಆಗೋಯ್ತು. ಅಪ್ಪ ಅಮ್ಮನನ್ನು ನೋಡಬೇಕು ಅಂತ ಅವನು ಮೊದಲು ಹೋಗಿಬಿಟ್ಟ. ನಮ್ಮ ಮನೆಯಲ್ಲಿ ಅಪ್ಪು ಚಿಕ್ಕವನು. ನಮಗೆಲ್ಲ ಅವನು ಮಗು ಇದ್ದ ಹಾಗೆ. ಎರಡು ಬಾರಿ ನನಗೆ ಆರೋಗ್ಯ ಸಮಸ್ಯೆ ಆದಾಗಲೂ ಅವನೇ ನನ್ನನ್ನ ಉಳಿಸಿಕೊಂಡ. ಆದರೆ ನನ್ನ ಹತ್ತಿರ ಅವನನ್ನು ಉಳಿಸಿಕೊಳ್ಳಲು ಆಗಲಿಲ್ಲ. ಅವನನ್ನು ಶಾಂತ ರೀತಿಯಲ್ಲಿ ಕಳುಹಿಸಿಕೊಡೋಣ. ಏನೂ ತೊಂದರೆ ಆಗೋದು ಬೇಡ’’ ಎನ್ನುತ್ತಾ ಸ್ಪಷ್ಟ ಸೂಚನೆಗಳನ್ನು ಕೊಟ್ಟಿದ್ದರು.
ಇದೀಗ ಮುದ್ದಿನ ಅಪ್ಪುರನ್ನ ಕಳೆದುಕೊಂಡ ದುಃಖದಲ್ಲಿ ಇರುವ ರಾಘವೇಂದ್ರ ರಾಜ್‌ಕುಮಾರ್ ಫೋಟೋವೊಂದನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ತಮ್ಮ ಕಿರಿಯ ಸಹೋದರ ಪುನೀತ್ ರಾಜ್‌ಕುಮಾರ್ ಜೊತೆಗೆ ಕ್ಲಿಕ್ ಮಾಡಿಕೊಂಡ ಕೊನೆಯ ಸೆಲ್ಫಿಯನ್ನು ರಾಘವೇಂದ್ರ ರಾಜ್‌ಕುಮಾರ್ ಶೇರ್ ಮಾಡಿಕೊಂಡಿದ್ದಾರೆ. ಜೊತೆಗೆ, ಪುನೀತ್ ರಾಜ್‌ಕುಮಾರ್ ಅವರಿಗೆ ಹೊಳೆದಿದ್ದ ಒಂದು ಅದ್ಭುತ ಆಲೋಚನೆಯನ್ನು ರಾಘವೇಂದ್ರ ರಾಜ್‌ಕುಮಾರ್ ಬಹಿರಂಗ ಪಡಿಸಿದ್ದಾರೆ.
ರಾಘವೇಂದ್ರ ರಾಜ್‌ಕುಮಾರ್ ಟ್ವೀಟ್
‘’ಇತ್ತೀಚೆಗೆ ನನಗೆ ದಾದಾ ಸಾಹೇಬ್ ಫಾಲ್ಕೆ ಎಂಎಸ್‌ಕೆ ಟ್ರಸ್ಟ್ ವತಿಯಿಂದ ‘ಜೀವಮಾನ ಸಾಧನೆ ಪ್ರಶಸ್ತಿ’ ಬಂದ ಸಂದರ್ಭದಲ್ಲಿ ಅಪ್ಪುವಿಗೆ ಎಲ್ಲಿಲ್ಲದ ಸಂತೋಷ. ನನ್ನನ್ನು ತಕ್ಷಣ ಭೇಟಿ ಮಾಡಿ ಈ ಸೆಲ್ಫಿ ತೆಗೆದು ‘’ರಾಘಣ್ಣ ನಾವು ಸಹ ಈ ಮೂರ್ತಿಯ ರೂಪದ ಹಾಗೆ ಅಪ್ಪಾಜಿಯವರ ಮೂರ್ತಿಯನ್ನು ಮಾಡಿ ಎಂದಿನಂತೆ ಡಾ.ರಾಜ್‌ಕುಮಾರ್ ಟ್ರಸ್ಟ್‌ನಿಂದ ನೀಡುವ ಪ್ರಶಸ್ತಿಯನ್ನು ಇದೇ ರೂಪದಲ್ಲಿ ಮಾಡೋಣ’’ ಎಂದು ಹೇಳಿದ್ದರು. ಅಪ್ಪು ನಿನ್ನ ಈ ಆಲೋಚನೆಗೆ ನನ್ನದೊಂದು ನಮನ. ಲವ್ ಯೂ ಮಗನೇ’’ಎಂದು ರಾಘವೇಂದ್ರ ರಾಜ್‌ಕುಮಾರ್ ಟ್ವೀಟ್ ಮಾಡಿದ್ದಾರೆ. ಜೊತೆಗೆ ಅಪ್ಪು ಜೊತೆಗೆ ಕ್ಲಿಕ್ ಮಾಡಿಕೊಂಡ ಕೊನೆಯ ಸೆಲ್ಫಿಯನ್ನೂ ಟ್ವೀಟಿಸಿದ್ದಾರೆ.
‘ರಾಜಕುಮಾರ’ನಿಲ್ಲದ ಅರಮನೆ
ಪುನೀತ್ ನಿಧನದ ನಂತರ ಅವರ ಮನೆಯಲ್ಲಿ ಫೋಟೋವೊಂದನ್ನು ಇರಿಸಲಾಗಿದೆ. ಅಪ್ಪು ಅವರ ಭಾವಚಿತ್ರಕ್ಕೆ ಹೂವಿನ ಹಾರ ಹಾಕಿರುವ ಫೋಟೋ ನೋಡಿದ ಯಾರಿಗಾದರೂ ದುಃಖ ಉಮ್ಮಳಿಸಿ ಬರುತ್ತದೆ. ಸಾಮಾಜಿಕ ಜಾಲತಾಣದಲ್ಲಿ ಇದೇ ಫೋಟೋ ವೈರಲ್ ಆಗುತ್ತಿದೆ. 'ಅಪ್ಪು ಅವರ ಫೋಟೋವನ್ನು ಈ ರೀತಿ ನೋಡಲಾಗುತ್ತಿಲ್ಲ' ಎಂದು ಅಭಿಮಾನಿಗಳು ಭಾವುಕರಾಗುತ್ತಿದ್ದಾರೆ. ಮೂರು ದಿನಗಳ ಹಿಂದಷ್ಟೇ ರಾಜನಂತೆ ಆ ಮನೆಯಲ್ಲಿ ಓಡಾಡಿಕೊಂಡಿದ್ದ ಅಪ್ಪು, ಈಗಿಲ್ಲ ಅಂದರೆ, ನಂಬುವುದಾದರೂ ಹೇಗೆ? 'ಅಪ್ಪು ಸಾರ್.. ನಿಮ್ಮ ಕಟೌಟ್‌, ಫೋಸ್ಟರ್‌ಗಳಿಗೆ ಹಾರ ಹಾಕಿ, ಸಂಭ್ರಮಿಸುತ್ತೇವೆ. ಆದರೆ, ಈ ರೀತಿ ನಿಮ್ಮ ಫೋಟೋಗೆ ಹಾರ ಹಾಕಲು ಮನಸ್ಸು ಒಪ್ಪುತ್ತಿಲ್ಲ..' ಎಂದು ಕಣ್ಣೀರು ಹಾಕುತ್ತಿದ್ದಾರೆ ಅಭಿಮಾನಿಗಳು.
