ಡಿ. 15ರಿಂದ ಎಂದಿನಂತೆ ವಿದೇಶಿ ವಿಮಾನಯಾನ ಆರಂಭ, 14 ದೇಶಗಳಿಗೆ ಮಾತ್ರ ಇಲ್ಲ ಸಾಮಾನ್ಯ ಹಾರಾಟ!
ಡಿಸೆಂಬರ್‌ 15ರಿಂದ ಭಾರತದಿಂದ ಹಲವಾರು ರಾಷ್ಟ್ರಗಳಿಗೆ ಎಂದಿನಂತೆ ನಿಯಮಿತವಾಗಿ ಅಂತಾರಾಷ್ಟ್ರೀಯ ವಿಮಾನ ಹಾರಾಟ ಪುನರಾರಂಭವಾಗಲಿವೆ. ಆದರೆ ಬ್ರಿಟನ್‌, ಫ್ರಾನ್ಸ್‌, ಸಿಂಗಾಪುರ ಸೇರಿ 14 ರಾಷ್ಟ್ರಗಳಿಗೆ ಮಾತ್ರ ಸಾಮಾನ್ಯ ಹಾರಾಟ ಇರುವುದಿಲ್ಲ.
Admin
0
6
ಹೊಸದಿಲ್ಲಿ: ಮುಂದಿನ ತಿಂಗಳ ಮಧ್ಯಭಾಗದಿಂದ ಅಂದರೆ ಡಿಸೆಂಬರ್‌ 15ರಿಂದ ಭಾರತದಿಂದ ಹಲವಾರು ರಾಷ್ಟ್ರಗಳಿಗೆ ಎಂದಿನಂತೆ ನಿಯಮಿತವಾಗಿ ಹಾರಾಟ ಪುನರಾರಂಭವಾಗಲಿದೆ.
ಬ್ರಿಟನ್‌, ಫ್ರಾನ್ಸ್‌, ಸಿಂಗಾಪುರ ಸೇರಿ 14 ರಾಷ್ಟ್ರಗಳಿಗೆ ಮಾತ್ರ ಸಾಮಾನ್ಯ ಹಾರಾಟ ಇರದಿದ್ದರೂ, 'ಏರ್‌ ಬಬಲ್‌' ವ್ಯವಸ್ಥೆಯ ಅಡಿಯಲ್ಲಿ ಹಾರಾಟ ಇರಲಿದೆ.
ವಿಶ್ವಾದ್ಯಂತ ಕೋವಿಡ್‌-19 ಸ್ಥಿತಿಗತಿಯನ್ನು ಪರಿಶೀಲಿಸಿ, ಆರೋಗ್ಯ ಸಚಿವಾಲಯದ ಜತೆ ಸಮಾಲೋಚಿಸಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. ದಕ್ಷಿಣ ಆಫ್ರಿಕಾ ಹೊರತುಪಡಿಸಿ ಇಸ್ರೇಲ್‌, ಹಾಂಕಾಂಗ್‌ನಲ್ಲಿ ಕೋವಿಡ್‌ - 19ರ ಹೊಸ ಮಾದರಿ ಪತ್ತೆಯಾಗಿದೆ.
ಕೋವಿಡ್‌ ಬಿಕ್ಕಟ್ಟಿನ ನಂತರ 2020ರ ಮಾರ್ಚ್‌ನಿಂದ ಅಂತಾರಾಷ್ಟ್ರೀಯ ವಿಮಾನ ಹಾರಾಟವನ್ನು ನಿರ್ಬಂಧಿಸಲಾಗಿತ್ತು. ಕಳೆದ ಬೇಸಗೆಯಿಂದ 31 ರಾಷ್ಟ್ರಗಳ ನಡುವೆ 'ಏರ್‌ ಬಬಲ್‌' ಒಪ್ಪಂದದ ಮೇರೆಗೆ ವಿಮಾನ ಹಾರಾಟ ನಡೆಯುತ್ತಿದೆ. ಅಂದರೆ ಕೋವಿಡ್‌ ನಿರ್ಬಂಧಗಳನ್ನು ಸಡಿಲಗೊಳಿಸಿದ ನಂತರ ವಿಮಾನ ಹಾರಾಟವನ್ನು ಉತ್ತೇಜಿಸಲು ಒಪ್ಪಂದ ಏರ್ಪಡಿಸಲಾಗಿತ್ತು. ಹೀಗಿದ್ದರೂ ಏರ್‌ ಬಬಲ್‌ ಒಪ್ಪಂದವಿರುವ 14 ದೇಶಗಳಲ್ಲಿ ಕೋವಿಡ್‌ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿರುವುದರಿಂದ ಎಚ್ಚರಿಕೆ ವಹಿಸಲಾಗಿದೆ. ವರ್ಷಾಂತ್ಯ ಮತ್ತು ಕ್ರಿಸ್‌ಮಸ್‌ ಸಮೀಪಿಸುತ್ತಿರುವುದರಿಂದ ಪ್ರವಾಸೋದ್ಯಮ ವಲಯವು ಅಂತಾರಾಷ್ಟ್ರೀಯ ವಿಮಾನ ಹಾರಾಟವನ್ನು ಮುಕ್ತವಾಗಿಸಲು ಒತ್ತಾಯಿಸುತ್ತಿದೆ.
ಭಾರತದ ಪ್ರಯಾಣಿಕರಿಗೆ ಸೌದಿ ಮುಕ್ತ
ಭಾರತ ಸೇರಿದಂತೆ 6 ದೇಶಗಳಿಂದ ಬರುವ ಪ್ರಯಾಣಿಕರಿಗೆ ಸೌದಿ ಅರೇಬಿಯಾ ತನ್ನೆಲ್ಲ ನಿರ್ಬಂಧಗಳನ್ನು ತೆರವುಗೊಳಿಸುವುದಾಗಿ ತಿಳಿಸಿದೆ. ಇದರಿಂದ ನೇರವಾಗಿ ಅಲ್ಲಿಗೆ ಪ್ರವೇಶಿಸಬಹುದಾಗಿದೆ. 14 ದಿನಗಳ ಕೋವಿಡ್‌-19 ಕ್ವಾರಂಟೈನ್‌ ನಿರ್ಬಂಧಗಳು ಇರುವುದಿಲ್ಲ.
ಸಂಪೂರ್ಣ ಲಸಿಕೆ ಹಾಕಿಸಿಕೊಂಡ ಭಾರತೀಯರು 14 ದಿನಗಳ ನಿರ್ಬಂಧ ಇಲ್ಲದೆ ಸೌದಿಗೆ ನೇರವಾಗಿ ಬರಲು ಅವಕಾಶ ಸಿಗಲಿದೆ ಎಂದು 'ಅರಬ್‌ ನ್ಯೂಸ್‌' ವರದಿ ತಿಳಿಸಿದೆ.
ಈ ಹಿಂದೆ ಕೋವಿಡ್‌ ಸಂಖ್ಯೆ ಹೆಚ್ಚಿದ್ದ ಹಿನ್ನೆಲೆಯಲ್ಲಿ ಲೆಬನಾನ್‌, ಯುಎಇ, ಈಜಿಫ್ಟ್‌, ಟರ್ಕಿ, ಅಮೆರಿಕ, ಬ್ರಿಟನ್‌, ಜರ್ಮನಿ, ಫ್ರಾನ್ಸ್‌, ಇಟಲಿ, ಐರ್ಲೆಂಡ್‌, ಪೋರ್ಚುಗಲ್‌, ಸ್ವಿಜರ್ಲೆಂಡ್‌, ಸ್ವಿಡನ್‌, ಬ್ರೆಜಿಲ್‌,ಅರ್ಜೆಂಟೀನಾ, ಪಾಕಿಸ್ತಾನ, ದಕ್ಷಿಣ ಆಫ್ರಿಕಾ, ಭಾರತ, ಇಂಡೊನೇಷ್ಯಾ ಮತ್ತು ಜಪಾನ್‌ನಿಂದ ಬರುವ ಪ್ರಯಾಣಿಕರಿಗೆ ಸೌದಿ ಅರೇಬಿಯಾ ನಿರ್ಬಂಧಿಸಿತ್ತು.
ಯಾವ ರಾಷ್ಟ್ರಗಳಿಗೆ ಸಾಮಾನ್ಯ ಹಾರಾಟ ಇಲ್ಲ?
ಬ್ರಿಟನ್‌, ಫ್ರಾನ್ಸ್‌, ಜರ್ಮನಿ, ನೆದರ್ಲೆಂಡ್ಸ್‌, ಫಿನ್ಲೆಂಡ್‌, ದಕ್ಷಿಣ ಆಫ್ರಿಕಾ, ಬ್ರೆಜಿಲ್‌, ಬಾಂಗ್ಲಾದೇಶ, ಬೋಟ್ಸ್‌ವಾನಾ, ಚೀನಾ, ಮಾರಿಷಸ್‌, ನ್ಯೂಜಿಲೆಂಡ್‌, ಜಿಂಬಾಬ್ವೆ, ಸಿಂಗಾಪುರ. ಈ ರಾಷ್ಟ್ರಗಳಿಗೆ ಮಾತ್ರ ಸಾಮಾನ್ಯ ಹಾರಾಟ ಇರದಿದ್ದರೂ, 'ಏರ್‌ ಬಬಲ್‌' ವ್ಯವಸ್ಥೆಯ ಅಡಿಯಲ್ಲಿ ಪ್ರಯಾಣ ಮಾಡಬಹುದಾಗಿದೆ.
