ಜೇಮ್ಸ್ ಬಾಂಡ್ ಮೋದಿ 007: ಪ್ರಧಾನಿ ಏಳು ವರ್ಷಗಳ ಸಾಧನೆ ಶೂನ್ಯ ಎಂದ ಟಿಎಂಸಿ!

ಕೋಲ್ಕತ್ತಾ: ವಿರುದ್ಧದ ತನ್ನ ಟೀಕೆಯನ್ನು ಮುಂದುವರರೆಸಿರುವ ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ನೇತೃತ್ವದ , ಈ ಬಾರಿ ಪ್ರಧಾನಿ ಮೋದಿ ಅವರನ್ನು ಹಾಲಿವುಡ್‌ ಜನಪ್ರಿಯ ಚಿತ್ರ ಜೇಮ್ಸ್ ಬಾಂಡ್ ವ್ಯಕ್ತಿತ್ವಕ್ಕೆ ಹೋಲಿಸಿದೆ. ಈ ಕುರಿತು ತಮ್ಮ ಫೇಸ್‌ಬುಕ್ ಖಾತೆಯಲ್ಲಿ ಫೋಟೋ ಹಂಚಿಕೊಂಡಿರುವ ಟಿಎಂಸಿ ರಾಜ್ಯಸಭಾ ಸಂಸದ ಡರೇಕ್ ಓಬ್ರಿಯನ್, ಈ ಚಿತ್ರ ಪ್ರಧಾನಿ ಮೋದಿ ಅವರ ಏಳು ವರ್ಷಗಳ ಶೂನ್ಯ ಸಾಧನೆಯನ್ನು ಎತ್ತಿ ತೋರಿಸುತ್ತದೆ ಎಂದಿದ್ದಾರೆ. ಡರೇಕ್ ಅವರು ಹಂಚಿಕೊಂಡಿರುವ ಚಿತ್ರದಲ್ಲಿ ಪ್ರಧಾನಿ ಮೋದಿ ಅವರನ್ನು ಹಾಲಿವುಡ್‌ನ ಜನಪ್ರಿಯ ಜೇಮ್ಸ್ ಬಾಂಡ್‌ ಚಿತ್ರಗಳಲ್ಲಿ ಬಳಸುವ ಪೋಸ್ಟರ್‌ನಲ್ಲಿ ಚಿತ್ರಿಸಲಾಗಿದೆ. ಅಲ್ಲದೇ ಜೇಮ್ಸ್ ಬಾಂಡ್‌ ಗುಪ್ತಚರ ಅಧಿಕಾರಿಯ ಗುಪ್ತ ಸಂಕೇತವಾದ 007 ಸಂಖ್ಯೆಯನ್ನು ಕೂಡ ಬಳಸಲಾಗಿದೆ. 007ಗೆ ವಿವರಣೆ ನೀಡಲಾಗಿದ್ದು, 0 ಅಥವಾ ಶೂನ್ಯ ಅಭಿವೃದ್ಧಿ, 0 ಅಥವಾ ಶೂನ್ಯ ಆರ್ಥಿಕ ಬೆಳವಣಿಗೆ ಮತ್ತು 7 ವರ್ಷಗಳ ಹಣಕಾಸಿನ ತಪ್ಪು ನಿರ್ವಹಣೆ ಎಂದು ವಿವರಣೆ ನೀಡಲಾಗಿದೆ. ಮೋದಿ ಕೇಂದ್ರ ಸರ್ಕಾರದ ಚುಕ್ಕಾಣಿ ಹಿಡಿದು ಏಳು ವರ್ಷಗಳಾಗಿದ್ದು, ಈ ಏಳು ವರ್ಷಗಳಲ್ಲಿ ದೇಶದ ಅಭಿವೃದ್ಧಿ ಶೂನ್ಯ ಎಂದು ಟಿಎಂಸಿ ಕಿಡಿಕಾರಿದೆ. ಅಲ್ಲದೇ ಮೋದಿ ಆಡಳಿತಾವಧಿಯಲ್ಲಿ ದೇಶದ ಆರ್ಥಿಕ ಸ್ಥಿತಿ ಹದಗೆಟ್ಟಿದ್ದು, ಈ ಏಳು ವರ್ಷಗಳ ಅವಧಿಯಲ್ಲಿ ಆರ್ಥಿಕತೆ ಪಾತಾಳ ತಲುಪಿದೆ ಎಂದು ಟಿಎಂಸಿ ಗುಡುಗಿದೆ. ಪಶ್ಚಿಮ ಬಂಗಾಳ ವಿಧಾನಸಭೆ ಚುನಾವಣೆಯ ಬಳಿಕ ಬಿಜೆಪಿ ವಿರುದ್ಧದ ತನ್ನ ಪ್ರಚಾರವನ್ನು ತೀವ್ರಗೊಳಿಸಿರುವ ಟಿಎಂಸಿ, 2024ರ ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿಗೆ ಪ್ರಬಲ ಪೈಪೋಟಿ ನೀಡಬಲ್ಲ ಪಕ್ಷ ಎಂದು ಬಿಂಬಿಸಿಕೊಳ್ಳುವಲ್ಲಿ ನಿರತವಾಗಿದೆ. ಪಶ್ಚಿಮ ಬಂಗಾಳ ವಿಧಾನಸಭೆಯಲ್ಲಿ ಭರ್ಜರಿ ಗೆಲುವು ಸಾಧಿಸಿರುವ ಟಿಎಂಸಿ, ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಅವರನ್ನು ಭವಿಷ್ಯದ ಪ್ರಧಾನಿ ಎಂದೇ ಬಿಂಬಿಸುತ್ತಿದೆ. ಅಲ್ಲದೇ ಮೋದಿ ಅವರನ್ನು ಮಣಿಸಲು ಸಾಧ್ಯವಿರುವ ನಾಯಕಿ ಎಂತಲೂ ಮಮತಾ ಅವರ ಬಗ್ಗೆ ಟಿಎಂಸಿ ಪ್ರಚಾರ ಮಾಡುತ್ತಿದೆ. ಮಮತಾ ಪ್ರತಿಪಕ್ಷಗಳ ನೇತೃತ್ವದ ಒಕ್ಕೂಟವನ್ನು ಮುನ್ನಡೆಸಬಲ್ಲ ಸಾಮರ್ಥ್ಯ ಹೊಂದಿದ್ದು, ಅವರು ಭವಿಷ್ಯದ ಪ್ರಧಾನಿ ಎಂದು ಟಿಎಂಸಿ ನಾಯಕರು ಅವಕಾಶ ಸಿಕ್ಕಾಗಲೆಲ್ಲಾ ಹೇಳುತ್ತಲೇ ಇದ್ದಾರೆ. 2024ರ ಲೋಕಸಭೆಯಲ್ಲಿ ಇಂತಹ ಯಾವುದೇ ಒಕ್ಕೂಟ ರಚನೆಯಾಗಲಿದೆಯೇ ಎಂಬುದು ಇದುವರೆಗೂ ಖಚಿತವಾಗಿಲ್ಲ.