ಕಾಶ್ಮೀರದಲ್ಲಿ ಮತ್ತಿಬ್ಬರು ನಾಗರಿಕರ ಹತ್ಯೆ: ಹೊರ ರಾಜ್ಯದವರೇ ಉಗ್ರರ ಟಾರ್ಗೆಟ್..!

ಶ್ರೀನಗರ: ಜಮ್ಮು - ಕಾಶ್ಮೀರದಲ್ಲಿ ನಾಗರಿಕರು, ಅದರಲ್ಲೂ ಹೊರ ರಾಜ್ಯದ ನಾಗರಿಕರನ್ನು ಗುರಿಯಾಗಿಸಿ ಉಗ್ರರು ದಾಳಿ ಮುಂದುವರಿಸಿದ್ದು, ಭಾನುವಾರ ಮತ್ತಿಬ್ಬರು ಹೊರ ರಾಜ್ಯದ ಕಾರ್ಮಿಕರನ್ನು ಹತ್ಯೆಗೈದಿದ್ದಾರೆ. ಕಳೆದ 48 ಗಂಟೆಗಳಲ್ಲಿ ಹೊರ ರಾಜ್ಯದವರನ್ನು ಗುರಿಯಾಗಿಸಿ ನಡೆಸಿದ ಮೂರನೇ ದಾಳಿ ಇದಾಗಿದ್ದು, ಒಟ್ಟು ನಾಲ್ವರು ಹತರಾಗಿದ್ದಾರೆ. ಅಲ್ಲದೆ, ಕಳೆದ 17 ದಿನಗಳಲ್ಲಿ ಉಗ್ರರ ಗುಂಡೇಟಿನಿಂದ 11 ನಾಗರಿಕರು ಬಲಿಯಾದಂತಾಗಿದೆ. ಕುಲ್ಗಾಮ್‌ ಜಿಲ್ಲೆ ವಾನ್‌ಪೋಹ್‌ ಪ್ರದೇಶದಲ್ಲಿ ಉಗ್ರರು ಕಾರ್ಮಿಕರ ಮೇಲೆ ಗುಂಡಿನ ಸುರಿಮಳೆಗೈದಿದ್ದು, ಸ್ಥಳದಲ್ಲಿಯೇ ಇಬ್ಬರು ಮೃತಪಟ್ಟಿದ್ದಾರೆ. ಮತ್ತೊಬ್ಬ ಗಾಯಗೊಂಡಿದ್ದು, ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹತ್ಯೆಗೀಡಾದ ಕಾರ್ಮಿಕರನ್ನು ರಾಜಾ ರೇಶಿ ಹಾಗೂ ಜೋಗಿಂದರ್‌ ರೇಶಿ ದೇವ್‌ ಎಂದು ಗುರುತಿಸಲಾಗಿದ್ದು, ಇಬ್ಬರೂ ಬಿಹಾರದವರು ಎಂದು ತಿಳಿದು ಬಂದಿದೆ. ಕಣಿವೆಯಲ್ಲಿ ಇತ್ತೀಚೆಗೆ ನಾಗರಿಕರನ್ನು ಗುರಿಯಾಗಿಸಿ ಮಾಡುತ್ತಿರುವ ದಾಳಿಗಳ ಸಂಖ್ಯೆ ಹೆಚ್ಚಾಗಿದೆ. ಅದರಲ್ಲೂ, ಹೊರ ರಾಜ್ಯದಿಂದ ಕಾಶ್ಮೀರಕ್ಕೆ ಬಂದು ಸಣ್ಣ - ಪುಟ್ಟ ವ್ಯಾಪಾರ ಮಾಡಿಕೊಂಡಿರುವವರು, ಕಾರ್ಮಿಕರನ್ನೇ ಗುರಿಯಾಗಿಸಿ ಗುಂಡಿನ ದಾಳಿ ಮಾಡಲಾಗುತ್ತಿದೆ. ಇದೇ ತಿಂಗಳಲ್ಲಿ ಇದುವರೆಗೆ ಕಣಿವೆಯಲ್ಲಿ ಹತರಾದ 11 ನಾಗರಿಕರಲ್ಲಿ ಬೇರೆ ರಾಜ್ಯದವರು ಐವರಿದ್ದಾರೆ. ಶನಿವಾರವಷ್ಟೇ ಶ್ರೀನಗರ ಹಾಗೂ ಪುಲ್ವಾಮದಲ್ಲಿ ಬಿಹಾರ ಹಾಗೂ ಉತ್ತರ ಪ್ರದೇಶದ ಇಬ್ಬರು ಕಾರ್ಮಿಕರನ್ನು ಮಾಡಲಾಗಿತ್ತು. ಮತ್ತೊಂದೆಡೆ, ನಾಗರಿಕರನ್ನು ಗುರಿಯಾಗಿಸಿ ಉಗ್ರರು ಮಾಡುತ್ತಿರುವ ದಾಳಿಗೆ ಪ್ರತಿಯಾಗಿ ಸೇನೆಯೂ ಸಾಲು ಸಾಲು ಕಾರ್ಯಾಚರಣೆ ಕೈಗೊಳ್ಳುತ್ತಿದ್ದು, ಇದುವರೆಗೆ 13 ಉಗ್ರರನ್ನು ಹೊಡೆದುರುಳಿಸಿದ್ದಾರೆ. ಆದರೂ, ಉಗ್ರರು ಜನರ ಮೇಲೆ ದಾಳಿ ಮಾಡುತ್ತಲೇ ಇದ್ದಾರೆ. ಮೂವರು ಶಂಕಿತರ ಬಂಧನ: ಕಾಶ್ಮೀರದಲ್ಲಿಉಗ್ರರ ವಿರುದ್ಧ ಭದ್ರತಾ ಸಿಬ್ಬಂದಿ ನಡೆಸುತ್ತಿರುವ ಶೋಧ ಕಾರ್ಯಾಚರಣೆ ಏಳನೇ ದಿನಕ್ಕೆ ಕಾಲಿಟ್ಟಿದ್ದು, ಭಾನುವಾರ ತಾಯಿ - ಮಗ ಸೇರಿ ಮೂವರು ಶಂಕಿತರನ್ನು ಬಂಸಲಾಗಿದೆ. ಯೋಧರು ಕಾರ್ಯಾಚರಣೆ ಕೈಗೊಳ್ಳುವಾಗ ಪೂಂಚ್‌ ಹಾಗೂ ರಾಜೌರಿ ಗಡಿಯ ಅರಣ್ಯ ಪ್ರದೇಶದಲ್ಲಿ ಒಬ್ಬ ವ್ಯಕ್ತಿ, 45 ವರ್ಷದ ಮಹಿಳೆ ಹಾಗೂ ಆಕೆಯ ಮಗನನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ಇವರು ಉಗ್ರರಿಗೆ ಸರಕು ಸಾಗಣೆ ಮಾಡುತ್ತಿದ್ದರು ಎನ್ನಲಾಗಿದೆ. ಶಾಂತಿ ಕದಡಲು ಜನರೇ ಗುರಿ: ಇದುವರೆಗೆ ಸೈನಿಕರನ್ನು ಗುರಿಯಾಗಿಸಿ ದಾಳಿ ಮಾಡುತ್ತಿದ್ದ ಉಗ್ರರು ಈಗ ನಾಗರಿಕರನ್ನೇ ಗುರಿ ಮಾಡುತ್ತಿದ್ದಾರೆ. ಇವರು ಸುಲಭದ ಗುರಿಯಾಗಿರುವುದರಿಂದ ದಾಳಿ ಮಾಡುತ್ತಿದ್ದು, ಕಾಶ್ಮೀರದಲ್ಲಿ ಹೊರ ರಾಜ್ಯದವರಿಗೆ ಭಯ ಹುಟ್ಟಿಸಲು, ಇಲ್ಲಿನ ಶಾಂತಿ ಕದಡಲು ಹಾಗೂ ಕಣಿವೆಯ ವ್ಯಾಪಾರಕ್ಕೆ ಧಕ್ಕೆ ತರಲು ಪಾಕಿಸ್ತಾನದ ಉಗ್ರರು ಸಂಚು ರೂಪಿಸಿದ್ದಾರೆ ಎಂದು ತಿಳಿದುಬಂದಿದೆ. ಅದರಲ್ಲೂ, ಇತ್ತೀಚೆಗೆ ಗಡಿ ನಿಯಂತ್ರಣ ರೇಖೆ (ಎಲ್‌ಒಸಿ) ಬಳಿ ಪಾಕ್‌ ಆಕ್ರಮಿತ ಕಾಶ್ಮೀರದ ಉಗ್ರರ ನುಸುಳುವಿಕೆ, ಡ್ರೋನ್‌ಗಳ ಮೂಲಕ ಚೀನಾದ ಬಂದೂಕುಗಳು ಕಣಿವೆಯ ಉಗ್ರರಿಗೆ ಲಭಿಸುತ್ತಿರುವುದು ಅವರಿಗೆ ಜನರನ್ನು ಗುರಿಯಾಗಿಸಿ ದಾಳಿ ಮಾಡಲು ಸುಲಭವಾಗಿದೆ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ.