ಟೈಮ್ಸ್ ಸಮೂಹದ ಅಧ್ಯಕ್ಷೆ ಶ್ರೀಮತಿ ಇಂದು ಜೈನ್‌ ನಿರ್ವಾಣ

ಹೊಸದಿಲ್ಲಿ: ಆಧ್ಯಾತ್ಮಿಕ ಅನ್ವೇಷಕಿ, ಉದಾರ ದಾನಿ, ಕಲಾ ಪೋಷಕಿ ಮತ್ತು ಮಹಿಳಾ ಹಕ್ಕುಗಳ ಪ್ರತಿಪಾದಕಿಯಾಗಿದ್ದ ಟೈಮ್ಸ್‌ ಗ್ರೂಪ್‌ನ ಅಧ್ಯಕ್ಷೆ ಇಂದು ಜೈನ್‌ ಗುರುವಾರ ರಾತ್ರಿ 9.35 ಕ್ಕೆ ಕೋವಿಡ್ ಸಂಬಂಧಿತ ಅನಾರೋಗ್ಯದಿಂದ ದಿಲ್ಲಿಯಲ್ಲಿ ನಿರ್ವಾಣರಾಗಿದ್ದಾರೆ. ಅವರಿಗೆ 84 ವರ್ಷ ವಯಸ್ಸಾಗಿತ್ತು. ಅವರ ನಿಧನಕ್ಕೆ ಪ್ರಧಾನಿ ಆದಿಯಾಗಿ, ರಾಜಕಾರಣಿಗಳು, ಉದ್ಯಮಿಗಳು, ಆಧ್ಯಾತ್ಮಿಕ ಗುರುಗಳು ಹಾಗೂ ಹಲವು ಗಣ್ಯರು ಕಂಬನಿ ಮಿಡಿದಿದ್ದಾರೆ. ಇಂದು ಜೈನ್‌ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿ ಟ್ಟೀಟ್‌ ಮಾಡಿರುವ ಪ್ರಧಾನಿ ನರೇಂದ್ರ ಮೋದಿ, "ಟೈಮ್ಸ್ ಗ್ರೂಪ್ ಅಧ್ಯಕ್ಷೆ ಶ್ರೀಮತಿ ಇಂದುಜಿ ಜೈನ್‌ ಅವರ ನಿಧನದಿಂದ ಬೇಸರವಾಯಿತು. ಸಮಾಜ ಸೇವೆ, ಭಾರತದ ಪ್ರಗತಿಯ ಬಗೆಗಿನ ಅವರ ಉತ್ಸಾಹ ಮತ್ತು ನಮ್ಮ ಸಂಸ್ಕೃತಿಯ ಬಗೆಗಿನ ಆಳವಾದ ಆಸಕ್ತಿಯ ಕಾರಣಕ್ಕೆ ಅವರು ಯಾವತ್ತೂ ನೆನಪಿನಲ್ಲಿ ಉಳಿಯುತ್ತಾರೆ. ನಾನು ಅವರೊಂದಿಗಿನ ನನ್ನ ಸಂವಹನಗಳನ್ನು ನೆನಪಿಸಿಕೊಳ್ಳುತ್ತಿದ್ದೇನೆ. ಅವರ ಕುಟುಂಬಕ್ಕೆ ಸಂತಾಪಗಳು. ಓಂ ಶಾಂತಿ,” ಎಂದಿದ್ದಾರೆ. 1999ರಿಂದ ಅಧ್ಯಕ್ಷೆ 1999ರಲ್ಲಿ ಟೈಮ್ಸ್ ಗ್ರೂಪ್‌ನ ಅಧ್ಯಕ್ಷರಾದ ನಂತರ ಅವರು ಸಹಾನುಭೂತಿ ಮತ್ತು ಅಂತರ್ಗತತೆಯಿಂದ ಕೂಡಿದ ವಿಶಿಷ್ಟ ನಾಯಕತ್ವ ಶೈಲಿಯನ್ನು ವಿಕಸಿಸಿದರು. ಇದು ಟೈಮ್ಸ್‌ ಗ್ರೂಪ್‌ನ್ನು ಹೊಸ ಎತ್ತರಕ್ಕೇರಿಸಲು ಸಹಾಯ ಮಾಡಿತು. ಸುಸ್ಥಿರ ಅಭಿವೃದ್ಧಿ ಮತ್ತು ಪರಿವರ್ತನೆಯ ಬದಲಾವಣೆಯ ಗುರಿಯೊಂದಿಗೆ ಅವರು 2000ರಲ್ಲಿ ಟೈಮ್ಸ್ ಫೌಂಡೇಶನ್‌ನ್ನು ಸ್ಥಾಪಿಸಿದರು. ಇವತ್ತು ದೇಶದಲ್ಲೇ ಪ್ರಮುಖ ಲಾಭ ರಹಿತ ಸಂಸ್ಥೆಯಾಗಿ ಇದು ಹೆಸರುವಾಸಿಯಾಗಿದೆ. ಅವರು ಹುಟ್ಟುಹಾಕಿದ ಹೆಮ್ಮೆಯ ಸಂಸ್ಥೆಯು ಜನ ಸಮುದಾಯಕ್ಕೆ ಸೇವೆಗಳನ್ನು ನೀಡುತ್ತಿರುವುದಲ್ಲದೆ ಚಂಡಮಾರುತಗಳು, ಭೂಕಂಪಗಳು, ಪ್ರವಾಹಗಳು, ಸಾಂಕ್ರಾಮಿಕ ರೋಗಗಳು ಮತ್ತು ಇತರ ಬಿಕ್ಕಟ್ಟುಗಳ ಸಮಯದಲ್ಲಿ ಸಹಾಯ ನೀಡಲು ಟೈಮ್ಸ್ ರಿಲೀಫ್ ಫಂಡ್‌ನ್ನೂ ನಡೆಸುತ್ತಿದೆ. ಫಿಕ್ಕಿ ಮಹಿಳಾ ಸಂಸ್ಥೆಯ ಸ್ಥಾಪಕಾಧ್ಯಕ್ಷೆ ಇಂದು ಜೈನ್‌ ಅವರು, ಭಾರತದಲ್ಲಿ ಮಹಿಳೆಯರಲ್ಲಿ ಉದ್ಯಮಶೀಲತೆ ಮತ್ತು ವೃತ್ತಿಪರ ಶ್ರೇಷ್ಠತೆಯನ್ನು ಉತ್ತೇಜಿಸಲು 1983ರಲ್ಲಿ ಸ್ಥಾಪಿಸಲಾದ ಫಿಕ್ಕಿ ಲೇಡೀಸ್ ಆರ್ಗನೈಸೇಶನ್ (FLO)ನ ಸ್ಥಾಪಕ ಅಧ್ಯಕ್ಷರಾಗಿದ್ದರು. 1999ರಿಂದ ಭಾರತೀಯ ಜ್ಞಾನಪೀಠ್‌ ಟ್ರಸ್ಟ್‌ನ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದ್ದಾರೆ. ಭಾರತೀಯ ಭಾಷೆಗಳಲ್ಲಿ ಸಾಹಿತ್ಯವನ್ನು ಉತ್ತೇಜಿಸಲು 1944ರಲ್ಲಿ ಅವರ ಮಾವ ಸಾಹು ಶಾಂತಿ ಪ್ರಸಾದ್ ಜೈನ್ ಅವರು ಈ ಟ್ರಸ್ಟ್‌ ಸ್ಥಾಪಿಸಿದ್ದರು. ಟ್ರಸ್ಟ್‌ನಿಂದ ವಾರ್ಷಿಕವಾಗಿ ನೀಡಲಾಗುವ ಜ್ಞಾನಪೀಠ ಪ್ರಶಸ್ತಿಯನ್ನು ಭಾರತೀಯ ಭಾಷೆಗಳಲ್ಲಿ ಬರೆಯುವ ಲೇಖಕರಿಗೆ ನೀಡುವ ಅತ್ಯಂತ ಪ್ರತಿಷ್ಠಿತ ಗೌರವವೆಂದೇ ಪರಿಗಣಿಸಲಾಗಿದೆ. ವಿಶ್ವದ ಏಕತೆಯನ್ನು ಉತ್ತೇಜಿಸಲು 2003ರಲ್ಲಿ ಪ್ರಾರಂಭಿಸಲಾದ ಒನ್‌ನೆಸ್ ಫೋರಂನ ಮಾರ್ಗದರ್ಶಕ ಶಕ್ತಿಯೂ ಇವರಾಗಿದ್ದರು. ಮಹಾತ್ಮ ಗಾಂಧಿಯವರ ಅಹಿಂಸಾ ತತ್ವವನ್ನು ಉತ್ತೇಜಿಸಲು ಮಹಾವೀರ-ಮಹಾತ್ಮ ಪ್ರಶಸ್ತಿಯನ್ನು ಇದೇ ವೇದಿಕೆಯ ಆಶ್ರಯದಲ್ಲಿ ಸ್ಥಾಪಿಸಲಾಯಿತು. ಜೀವಮಾನದುದ್ದಕ್ಕೂ ಪರೋಪಕಾರಿಯಾಗಿದ್ದ ಇಂದು ಜೈನ್‌ ಅವರಿಗೆ ತಮ್ಮ ಅಂಗಾಂಗಗಳನ್ನು ದಾನ ಮಾಡಬೇಕೆಂಬುದ ಆಸೆ ಇತ್ತು. ಆದರೆ ಬೇಸರದ ಸಂಗತಿಯೆಂದರೆ ಕೋವಿಡ್ -19 ನಿಂದ ಉಂಟಾದ ತೊಡಕುಗಳ ಕಾರಣಕ್ಕೆ ಇದನ್ನು ಪೂರೈಸಲು ಸಾಧ್ಯವಾಗಿಲ್ಲ. ಪದ್ಮಭೂಷಣ ಸೇರಿ ಹಲವು ಪ್ರಶಸ್ತಿಗಳಿಗೆ ಭಾಜನ ತಮ್ಮ ಜೀವಿತಾವಧಿಯಲ್ಲಿ ಅವರು ಹಲವು ಪ್ರಶಸ್ತಿ, ಪುರಸ್ಕಾರಗಳಿಗೆ ಭಾಜನರಾಗಿದ್ದಾರೆ. ಜನವರಿ 2016ರಲ್ಲಿ ದೇಶದ ಮೂರನೇ ಅತ್ಯುನ್ನತ ಪ್ರಶಸ್ತಿ ಪದ್ಮಭೂಷಣ ಪ್ರಶಸ್ತಿ, 2019 ರಲ್ಲಿ ಇನ್ಸ್ಟಿಟ್ಯೂಟ್ ಆಫ್ ಕಂಪನಿ ಸೆಕ್ರೆಟರೀಸ್ ಆಫ್ ಇಂಡಿಯಾದಿಂದ ಜೀವಮಾನ ಸಾಧನೆ ಪ್ರಶಸ್ತಿ, ಮಾಧ್ಯಮ ಕ್ಷೇತ್ರಕ್ಕೆ ನೀಡಿದ ಜೀವಮಾನದ ಕೊಡುಗೆಗಾಗಿ ಆಲ್ ಇಂಡಿಯಾ ಮ್ಯಾನೇಜ್ಮೆಂಟ್ ಅಸೋಸಿಯೇಷನ್‌ನಿಂದ 2018ರಲ್ಲಿ ಪ್ರಶಸ್ತಿ, ಭಾರತೀಯ ಮಹಿಳಾ ಕಾಂಗ್ರೆಸ್‌ನಿಂದ ಜೀವಮಾನ ಸಾಧನೆಗಾಗಿ 2000ನೇ ಇಸವಿಯಲ್ಲಿ ಪ್ರಶಸ್ತಿಗಳು ಅವರಿಗೆ ಸಂದಿವೆ. ಮಿಲೇನಿಯಮ್ ವಿಶ್ವ ಶಾಂತಿ ಶೃಂಗಸಭೆಯಲ್ಲಿ ವಿಶ್ವಸಂಸ್ಥೆಯನ್ನುದ್ದೇಶಿಸಿಯೂ ಅವರು ಮಾತನಾಡಿದ್ದರು.