ಕೋವಿಶೀಲ್ಡ್ ಲಸಿಕೆ ಡೋಸ್‌ಗಳ ಅಂತರ ಇಳಿಕೆ?: ಮೂರನೇ ಬಾರಿ ಪರಿಷ್ಕರಣೆಗೆ ಮುಂದಾದ ಸರ್ಕಾರ
ದೇಶಾದ್ಯಂತ ಬಳಕೆಯಾಗುತ್ತಿರುವ ಸೀರಮ್ ಇನ್‌ಸ್ಟಿಟ್ಯೂಟ್‌ನ ಕೋವಿಶೀಲ್ಡ್ ಕೋವಿಡ್ ಲಸಿಕೆಯ ಎರಡು ಡೋಸ್‌ಗಳ ನಡುವಿನ ಅಂತರವನ್ನು 84 ದಿನಗಳಿಂದ ತಗ್ಗಿಸುವ ಕುರಿತು ಸರ್ಕಾರ ಚಿಂತನೆ ನಡೆಸಿದೆ.
Admin
0
6
ಹೊಸದಿಲ್ಲಿ: ಲಸಿಕೆಯ ಎರಡು ಡೋಸ್‌ಗಳ ನಡುವಿನ ಅಂತರವನ್ನು ಮತ್ತೊಮ್ಮೆ ಪರಾಮರ್ಶಿಸಲು ಮುಂದಾಗಿದೆ. ಪ್ರಸ್ತುತ ಈ ಲಸಿಕೆಯ ಎರಡು ಡೋಸ್‌ಗಳ ನಡುವಿನ ಅಂತರ 84 ದಿನಗಳಿವೆ. ಎರಡು ಬಾರಿ ಈ ಅಂತರವನ್ನು ಹೆಚ್ಚಿಸಲಾಗಿತ್ತು. ಮೂರನೇ ಪರಾಮರ್ಶೆಯಲ್ಲಿ ಅಂತರ ತಗ್ಗಿಸುವ ಬಗ್ಗೆ ಚಿಂತನೆ ನಡೆದಿದೆ.
'ಕೋವಿಶೀಲ್ಡ್ ಲಸಿಕೆಯ ಎರಡು ಡೋಸ್‌ಗಳ ಅಂತರವನ್ನು ತಗ್ಗಿಸುವ ಕುರಿತು ಪರಿಗಣಿಸಲಾಗುತ್ತಿದೆ. ಇದನ್ನು ಎನ್‌ಟಿಎಜಿಐನಲ್ಲಿ (ರಾಷ್ಟ್ರೀಯ ತಾಂತ್ರಿಕ ಪ್ರತಿರಕ್ಷಣಾ ಸಲಹಾ ಸಮೂಹ) ಹೆಚ್ಚಿನ ಚರ್ಚೆಗೆ ಒಳಪಡಿಸಲಾಗಿದೆ' ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.
ಆಕ್ಸ್‌ಫರ್ಡ್-ಆಸ್ಟ್ರಾಜೆನೆಕಾ ತಯಾರಿಸಿರುವ ಲಸಿಕೆಯ ಭಾರತೀಯ ಆವೃತ್ತಿ, ಸೀರಮ್ ಇನ್‌ಸ್ಟಿಟ್ಯೂಟ್ ಆಫ್ ಇಂಡಿಯಾ ಉತ್ಪಾದಿಸುತ್ತಿರುವ ಕೋವಿಶೀಲ್ಡ್ ಲಸಿಕೆಯನ್ನು, ಜನವರಿ ಆರಂಭದಲ್ಲಿ ತುರ್ತು ಬಳಕೆಗೆ ಅನುಮೋದನೆ ನೀಡಿದ ಸಂದರ್ಭದಲ್ಲಿ ಎರಡು ಡೋಸ್‌ಗಳ ನಡುವಿನ ಅಂತರವನ್ನು ನಾಲ್ಕರಿಂದ ಆರು ವಾರಗಳೆಂದು ನಿಗದಿಗೊಳಿಸಲಾಗಿತ್ತು. ನಂತರ ಆರರಿಂದ ಎಂಟು ವಾರಗಳಿಗೆ ಹೆಚ್ಚಿಸಲಾಗಿತ್ತು.
ದೇಶದಲ್ಲಿ ಕೋವಿಡ್ ಕೊರತೆ ಉಂಟಾಗಿರುವ ಸಂದರ್ಭದಲ್ಲಿಯೇ, ಲಸಿಕೆಯ ಪರಿಣಾಮಕಾರಿತನದ ಕಾರಣ ಮುಂದಿಟ್ಟು ಸರ್ಕಾರ ಮೇ ತಿಂಗಳಲ್ಲಿ ಡೋಸ್‌ಗಳ ಅಂತರವನ್ನು 12-16 ವಾರಗಳಿಗೆ ಪರಿಷ್ಕರಿಸಿತ್ತು. ಬ್ರಿಟನ್‌ನಲ್ಲಿ ಈ ಪ್ರಯೋಗ ಯಶಸ್ವಿಯಾದ ಉದಾಹರಣೆಯನ್ನು ನೀಡಿತ್ತು. ಭಾರತ್ ಬಯೋಟೆಕ್‌ನ ಕೋವ್ಯಾಕ್ಸಿನ್ ಲಸಿಕೆಯ ಡೋಸ್‌ಗಳ ಅಂತರದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ.
