ಕೋವಿಡ್-19 ಸಂಕಷ್ಟ: ಭಾರತಕ್ಕೆ 510 ಕೋಟಿ ರೂ ಮೌಲ್ಯದ ಔಷಧ ನೀಡಲಿದೆ ಫೈಜರ್

: ಜಾಗತಿಕ ಔಷಧ ಕಂಪನಿ , ಭಾರತಕ್ಕೆ ಬೃಹತ್ ಪ್ರಮಾಣದ ಔಷಧಗಳ ನೆರವು ಒದಗಿಸುತ್ತಿದೆ. ಅಮೆರಿಕ, ಯುರೋಪ್ ಮತ್ತು ಏಷ್ಯಾಗಳಲ್ಲಿನ ತನ್ನ ವಿತರಣಾ ಕೇಂದ್ರಗಳಿಂದ 510 ಕೋಟಿ ರೂಪಾಯಿಗೂ ಅಧಿಕ ಮೌಲ್ಯದ ಸಾಮಗ್ರಿಗಳನ್ನು ಭಾರತಕ್ಕೆ ರವಾನಿಸಲು ಗುರುತಿಸಲಾಗಿದೆ ಎಂದು ಕಂಪನಿಯ ಅಧ್ಯಕ್ಷ ಮತ್ತು ಸಿಇಒ ಆಲ್ಬರ್ಟ್ ಬೌರ್ಲಾ ಸೋಮವಾರ ತಿಳಿಸಿದ್ದಾರೆ. 'ಭಾರತದಲ್ಲಿನ ಗಂಭೀರ ಕೋವಿಡ್-19 ಪರಿಸ್ಥಿತಿ ನಮಗೆ ತೀವ್ರ ಕಳವಳ ಮೂಡಿಸಿದೆ. ಭಾರತದಲ್ಲಿನ ನಿಮ್ಮ ಪ್ರೀತಿಪಾತ್ರರು ಮತ್ತು ಎಲ್ಲ ಜನರಿಗಾಗಿ ನಮ್ಮ ಹೃದಯ ಮಿಡಿಯುತ್ತಿದೆ' ಎಂದು ಅವರು ಫೈಜರ್ ಇಂಡಿಯಾದ ಉದ್ಯೋಗಿಗಳಿಗೆ ರವಾನಿಸಿರುವ ಇ-ಮೇಲ್‌ನಲ್ಲಿ ಹೇಳಿದ್ದಾರೆ. 'ಈ ಕಾಯಿಲೆ ವಿರುದ್ಧದ ಭಾರತದ ಹೋರಾಟದ ಸಹಭಾಗಿಯಾಗಿ ನಾವು ಬದ್ಧರಾಗಿದ್ದೇವೆ ಮತ್ತು ನಮ್ಮ ಕಂಪನಿಯ ಇತಿಹಾಸದಲ್ಲಿಯೇ ಅತ್ಯಂತ ದೊಡ್ಡ ಪರೋಪಕಾರದ ಮಾನವೀಯ ಕಾರ್ಯವನ್ನು ನಡೆಸಲು ತ್ವರಿತವಾಗಿ ಕೆಲಸ ಮಾಡುತ್ತಿದ್ದೇವೆ' ಎಂದು ಬೌರ್ಲಾ ತಿಳಿಸಿದ್ದಾರೆ. ಅಮೆರಿಕ, ಯುರೋಪ್ ಮತ್ತು ಏಷ್ಯಾಗಳ ವಿತರಣಾ ಕೇಂದ್ರಗಳಲ್ಲಿನ ಫೈಜರ್ ಸಹೋದ್ಯೋಗಿಗಳು, ಭಾರತ ಸರ್ಕಾರವು ತನ್ನ ಕೋವಿಡ್-19 ಚಿಕಿತ್ಸೆ ಶಿಷ್ಟಾಚಾರಗಳ ಭಾಗವಾಗಿ ಗುರುತಿಸಿರುವ ಫೈಜರ್ ಔಷಧಗಳನ್ನು ರವಾನಿಸಲು ಕಠಿಣ ಪರಿಶ್ರಮ ಪಡುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ. 'ದೇಶದ ಪ್ರತಿ ಸಾರ್ವಜನಿಕ ಆಸ್ಪತ್ರೆಗಳಲ್ಲಿನ ಪ್ರತಿ ಕೋವಿಡ್ ರೋಗಿಗೂ ಫೈಜರ್ ಔಷಧಗಳು ಉಚಿತವಾಗಿ ಸಿಗುವಂತೆ ಮಾಡುವ ಉದ್ದೇಶದಿಂದ ಸಹಾಯ ಮಾಡಲು ನಾವು ಈ ಔಷಧಗಳನ್ನು ದೇಣಿಗೆಯಾಗಿ ನೀಡುತ್ತಿದ್ದೇವೆ' ಎಂದಿದ್ದಾರೆ. ಈ ನಡುವೆ ಫೈಜರ್ ಸಂಸ್ಥೆಯು ಭಾರತದಲ್ಲಿ ತನ್ನ ಕೋವಿಡ್ ಲಸಿಕೆಯ ತುರ್ತು ಬಳಕೆಗೆ ಅನುಮೋದನೆ ಪಡೆಯುವ ಸಂಬಂಧ ಭಾರತ ಸರ್ಕಾರದೊಂದಿಗೆ ಚರ್ಚೆ ನಡೆಸುತ್ತಿದೆ. ಕೆಲವು ದಿನಗಳ ಹಿಂದೆಯೇ ನಮ್ಮ ಅರ್ಜಿಯನ್ನು ಸಲ್ಲಿಸಿದ್ದರೂ ನಮ್ಮ ಲಸಿಕೆಯನ್ನು ನೋಂದಣಿ ಮಾಡಿಕೊಳ್ಳಲಾಗದೆ ಇರುವುದು ದುರದೃಷ್ಟಕರ ಎಂದು ಫೈಜರ್ ತಿಳಿಸಿದೆ. 'ಭಾರತದಲ್ಲಿ ಫೈಜರ್-ಬಯೋಎನ್‌ಟೆಕ್ ಲಸಿಕೆಯ ಬಳಕೆಗೆ ಅನುಮತಿ ನೀಡುವಂತೆ ಭಾರತ ಸರ್ಕಾರದ ಜತೆಗೆ ಪ್ರಸ್ತುತ ಮಾತುಕತೆ ನಡೆಸುತ್ತಿದ್ದೇವೆ' ಎಂದು ಬೌರ್ಲಾ ತಿಳಿಸಿದ್ದಾರೆ.