ಕೋವಿಡ್‌ನಿಂದ ಮುಗ್ಗರಿಸಿದ್ದ ಆರ್ಥಿಕತೆಯ ಚೇತರಿಕೆ ಪ್ರಕ್ರಿಯೆ ಆರಂಭ - ಕೇಂದ್ರ ಸರಕಾರ
ಹೆಚ್ಚುವರಿ ನೆರವಿನ ಪ್ಯಾಕೇಜ್‌, ಸರಕಾರ ಹಾಗೂ ಆರ್‌ಬಿಐನ ಹಣಕಾಸು ನೀತಿ ಮತ್ತು ಲಸಿಕೆ ವಿತರಣೆಯ ಅಭಿಯಾನ ತ್ವರಿತವಾಗಿರುವುದರಿಂದ ಆರ್ಥಿಕತೆಯ ಚಟುವಟಿಕೆಗಳು ಚುರುಕಾಗಿವೆ ಎಂದು ಹಣಕಾಸು ಸಚಿವಾಲಯದ ವರದಿ ಹೇಳಿದೆ.
Admin
0
7
ಹೊಸದಿಲ್ಲಿ: ಕೋವಿಡ್‌ ಎರಡನೆಯ ಅಲೆಯ ಪರಿಣಾಮಗಳಿಂದ ಮಂದಗತಿಯಲ್ಲಿದ್ದ ಆರ್ಥಿಕ ಚಟುವಟಿಕೆಗಳು ಚೇತರಿಸುತ್ತಿರುವ ಲಕ್ಷಣಗಳು ಕಾಣಿಸಿವೆ ಎಂದು ಶುಕ್ರವಾರ ಹೇಳಿದೆ.
ಹೆಚ್ಚುವರಿ ನೆರವಿನ ಪ್ಯಾಕೇಜ್‌, ಸರಕಾರ ಮತ್ತು ಆರ್‌ಬಿಐನ ಹಣಕಾಸು ನೀತಿ ಹಾಗೂ ಲಸಿಕೆ ವಿತರಣೆಯ ಅಭಿಯಾನ ತ್ವರಿತವಾಗಿರುವುದರ ಪರಿಣಾಮ ಆರ್ಥಿಕತೆಯ ಚಟುವಟಿಕೆಗಳು ಚುರುಕಾಗಿವೆ ಎಂದು ಸಚಿವಾಲಯ ತನ್ನ ಮಾಸಿಕ ಪರಾಮರ್ಶೆ ವರದಿಯಲ್ಲಿ ತಿಳಿಸಿದೆ.
ಕೋವಿಡ್‌ ಎರಡನೆಯ ಅಲೆಯನ್ನು ಹತ್ತಿಕ್ಕಲು ಸರಕಾರ ಒಟ್ಟಾರೆ 6.29 ಲಕ್ಷ ಕೋಟಿ ರೂ.ಗಳ ಹೆಚ್ಚುವರಿ ನೆರವಿನ ಪ್ಯಾಕೇಜ್‌ ಪ್ರಕಟಿಸಿತ್ತು. ಆರ್‌ಬಿಐ ಮಾರುಕಟ್ಟೆಯ ಹಾಗೂ ನಾನಾ ವಲಯಗಳ ಚೇತರಿಕೆಗೆ ಹಣಕಾಸು ನೀತಿಗಳನ್ನು ಜಾರಿಗೊಳಿಸಿರುವುದಾಗಿ ತಿಳಿಸಿದೆ.
ನೆರವಿನ ಪ್ಯಾಕೇಜ್‌ನಿಂದ ವೈಯಕ್ತಿಕವಾಗಿ ಜನತೆಗೆ ಹಾಗೂ ಉದ್ದಿಮೆ ಸಮುದಾಯಕ್ಕೆ ಸಹಕರಿಸಲಾಗಿತ್ತು. ಕೋವಿಡ್‌ನಿಂದ ತೀವ್ರ ಪೀಡಿತವಾಗಿದ್ದ ಆರೋಗ್ಯ ಮತ್ತು ಇತರ 8 ವಲಯಗಳಿಗೆ ನೆರವು ಘೋಷಿಸಲಾಗಿತ್ತು. ಸರಕಾರದ ಬಂಡವಾಳ ವೆಚ್ಚ, ಮುಖ್ಯವಾಗಿ ರಸ್ತೆ ಮತ್ತು ರೈಲ್ವೆ ಯೋಜನೆಗಳ ಅನುಷ್ಠಾನ ಆರ್ಥಿಕ ಚಟುವಟಿಕೆಗಳಿಗೆ ಪುಷ್ಟಿನೀಡಿದೆ. ಉತ್ಪಾದನೆ ಆಧರಿತ ಪಿಎಲ್‌ಐ ಯೋಜನೆಯಿಂದ ಉತ್ಪಾದನಾ ಕ್ಷೇತ್ರಕ್ಕೆ ಉತ್ತೇಜನ ಸಿಕ್ಕಿದೆ. ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದ ಯೋಜನೆಗಳು, ಆಸ್ತಿ ನಗದೀಕರಣ ಯೋಜನೆಗಳ ಸರಳೀಕರಣ ಚೇತರಿಕೆಗೆ ಮತ್ತಷ್ಟು ಪುಷ್ಟಿ ನೀಡಲಿದೆ ಎಂದು ವರದಿ ವಿವರಿಸಿದೆ.
ನಗರದಲ್ಲಿ ಉದ್ಯೋಗ ಸೃಷ್ಟಿಗೆ ಉತ್ತೇಜಿಸಲು ಆತ್ಮನಿರ್ಭರ್‌ ಭಾರತ್‌ ರೋಜ್‌ಗಾರ್‌ ಯೋಜನೆ (ಎಎನ್‌ಬಿಆರ್‌ವೈ), ಕಿರು ಹಣಕಾಸು ಸಂಸ್ಥೆಗಳಿಗೆ ಕ್ರೆಡಿಟ್‌ ಖಾತರಿ ಯೋಜನೆ, ಎಂಎಸ್‌ಎಂಇಗಳಿಗೆ ಸಾಲದ ನೆರವು, ಉಚಿತ ಆಹಾರ ಧಾನ್ಯ ವಿತರಣೆ, ರಸಗೊಬ್ಬರ ಸಬ್ಸಿಡಿ ಹೆಚ್ಚಳ, ಡಿಜಿಟಲೀಕರಣದ ವಿಸ್ತರಣೆ, ನರೇಗಾದ ಮುಂದುವರಿಕೆ ಸಕಾರಾತ್ಮಕ ಪ್ರಭಾವ ಬೀರಿದೆ ಎಂದಿದೆ.
ಆಹಾರ ಹಣದುಬ್ಬರ ಇಳಿಕೆ ನಿರೀಕ್ಷೆ
ಉತ್ತಮ ಮುಂಗಾರು ಆಗುತ್ತಿರುವುದರಿಂದ ಬಿತ್ತನೆಯ ಪ್ರಮಾಣ ಹೆಚ್ಚಳವಾಗಿದೆ. ಹೀಗಾಗಿ ಮುಂಬರುವ ತಿಂಗಳುಗಳಲ್ಲಿಆಹಾರ ಹಣದುಬ್ಬರ ಮತ್ತು ಹಣದುಬ್ಬರ ತಗ್ಗಲಿದೆ. ಹೀಗಿದ್ದರೂ ಜಾಗತಿಕ ಮಟ್ಟದಲ್ಲಿಆರ್ಥಿಕತೆಯ ಅನಿಶ್ಚಿತತೆಯ ಅಪಾಯಗಳು ಮತ್ತು ಅದರ ಪರಿಣಾಮಗಳ ಬಗ್ಗೆ ಎಚ್ಚರಿಕೆ ವಹಿಸಬೇಕಾಗಿದೆ ಎಂದು ವರದಿ ವಿವರಿಸಿದೆ.
