ಚೀನಾ ಮೂಲದ ಸ್ಮಾರ್ಟ್‌ಫೋನ್‌ ಕಂಪನಿಗಳಿಗೆ ಕೇಂದ್ರ ಸರಕಾರದ ನೋಟಿಸ್‌!

ಹೊಸದಿಲ್ಲಿ: ಚೀನಾ ಮೂಲದ ಸ್ಮಾರ್ಟ್‌ಫೋನ್‌ ತಯಾರಕ ಕಂಪನಿಗಳಿಗೆ ನೋಟಿಸ್‌ ಜಾರಿಗೊಳಿಸಿದೆ ಎಂದು ವರದಿಯಾಗಿದೆ. ಸ್ಮಾರ್ಟ್‌ಫೋನ್‌ಗಳಲ್ಲಿ ಬಳಸುವ ಬಿಡಿಭಾಗಗಳು ಮತ್ತು ತಂತ್ರಜ್ಞಾನಗಳಿಗೆ ಸಂಬಂಧಿಸಿ ಹೆಚ್ಚಿನ ವಿವರಗಳನ್ನು ಕೋರಿ ಕೇಂದ್ರ ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆ ಇತ್ತೀಚೆಗೆ ನೋಟಿಸ್‌ ನೀಡಿದೆ ಎಂದು ಈ ಬೆಳವಣಿಗೆಯ ಬಗ್ಗೆ ಬಲ್ಲ, ಹೆಸರು ಹೇಳಲು ಬಯಸದ ಮೂವರು ಉನ್ನತ ಅಧಿಕಾರಿಗಳು ತಿಳಿಸಿದ್ದಾರೆ. ಮುಂಬರುವ ವಾರಗಳಲ್ಲಿಇದೇ ರೀತಿಯ ಮತ್ತೊಂದು ನೋಟಿಸ್‌ ಹೊರಡುವ ನಿರೀಕ್ಷೆಯೂ ಇದೆ. ಮೊಬೈಲ್‌ ಫೋನ್‌ಗಳ ಕಡ್ಡಾಯ ಟೆಸ್ಟಿಂಗ್‌ಗೆ ಹಾಗೂ ನಿಯಂತ್ರಕ ವ್ಯವಸ್ಥೆ ರೂಪಿಸುವ ಬಗ್ಗೆ ಸರಕಾರ ಪರಿಶೀಲಿಸುತ್ತಿದೆ ಎಂದು ಮೂಲಗಳು ತಿಳಿಸಿವೆ. ದಿ ಮಾರ್ನಿಂಗ್‌ ಕಾನ್‌ಟೆಕ್ಸ್ಟ್‌ ಸಂಸ್ಥೆಯ ವರದಿಯ ಪ್ರಕಾರ, ವಿವೊ, ಒಪ್ಪೊ, ಕ್ಸಿಯೊಮಿ ಮತ್ತು ಒನ್‌ಪ್ಲಸ್‌ ಕಂಪನಿಗಳಿಂದ ವಿವರಗಳನ್ನು ಸರಕಾರ ನಿರೀಕ್ಷಿಸಿದೆ. ನೋಟಿಸ್‌ ಉದ್ದೇಶವೇನು?: ಚೀನಾ ಮೂಲದ ಕಂಪನಿಗಳು ಭಾರತದಲ್ಲಿ ಮಾರಾಟ ಮಾಡುವ ಸ್ಮಾರ್ಟ್‌ಫೋನ್‌ಗಳು ಬಳಕೆದಾರರಿಗೆ ಸುರಕ್ಷಿತವೇ ಎಂಬುದನ್ನು ಪರಿಶೀಲಿಸುವುದು ನೋಟಿಸ್‌ನ ಉದ್ದೇಶವಾಗಿದೆ. ಈ ಸ್ಮಾರ್ಟ್‌ಫೋನ್‌ಗಳ ಟೆಸ್ಟಿಂಗ್‌ ಅಗತ್ಯಕ್ಕೆ ಸಂಬಂಧಿಸಿ ಮತ್ತೊಂದು ನೋಟಿಸ್‌ ಜಾರಿಗೊಳಿಸುವ ಸಾಧ್ಯತೆ ಇದೆ. ಕಳೆದ ವರ್ಷ ಸರಕಾರವು 220 ಚೀನಾ ಆ್ಯಪ್‌ಗಳನ್ನು ನಿಷೇಧಿಸಿತ್ತು. ನಂತರ ಚೀನಾದ ಸ್ಮಾರ್ಟ್‌ಫೋನ್‌ ಕಂಪನಿಗಳು ಸ್ಥಳೀಯ ಉತ್ಪಾದನೆ ಮತ್ತು ಹೂಡಿಕೆಯನ್ನು ಘೋಷಿಸಿದ್ದವು. ಹೀಗಿದ್ದರೂ ನಾಲ್ಕು ಕಂಪನಿಗಳು ಹೂಡಿಕೆಯ ಭರವಸೆಯನ್ನು ಈಡೇರಿಸಿರಲಿಲ್ಲ ಎಂದು ವರದಿಯಾಗಿದೆ. ಟೆಸ್ಟಿಂಗ್‌ ಕಡ್ಡಾಯ?: ಭಾರತ ಚೀನಾ ಮೂಲದ ಸ್ಮಾರ್ಟ್‌ಫೋನ್‌ಗಳಿಗೆ ಟೆಸ್ಟಿಂಗ್‌ ಕಡ್ಡಾಯಗೊಳಿಸಲು ಚಿಂತನೆ ನಡೆಸಿದೆ. ಭಾರತದ ನಾಗರಿಕರ ಮೇಲೆ ಈ ಸ್ಮಾರ್ಟ್‌ಫೋನ್‌ಗಳಲ್ಲಿ ಅಳವಡಿಸಿರುವ ಆ್ಯಪ್‌ಗಳು ಪತ್ತೆದಾರಿಕೆ ನಡೆಸದಂತೆ ನೋಡಿಕೊಳ್ಳಲು ಟೆಸ್ಟಿಂಗ್‌ ಕಡ್ಡಾಯಗೊಳಿಸಲು ಚಿಂತನೆ ನಡೆಯುತ್ತಿದೆ ಎಂದು ಮೂಲಗಳು ತಿಳಿಸಿವೆ. ರಿಲಯನ್ಸ್‌ ಉತ್ತಮ ಉದ್ಯೋಗದಾತ ಕಂಪನಿ ಮುಂಬಯಿ: ಫೋರ್ಬ್ಸ್‌ ನಿಯತಕಾಲಿಕೆ ಪ್ರಕಟಿಸಿರುವ ವಿಶ್ವದ ಅತ್ಯುತ್ತಮ ಉದ್ಯೋಗದಾತ ಕಂಪನಿಗಳ ಪಟ್ಟಿಯಲ್ಲಿ ರಿಲಯನ್ಸ್‌ ಇಂಡಸ್ಟ್ರೀಸ್‌ ಭಾರತದ ಅತ್ಯುತ್ತಮ ಉದ್ಯೋಗದಾತ ಕಂಪನಿ ಎನ್ನಿಸಿದೆ. ಒಟ್ಟಾರೆ 750 ಕಂಪನಿಗಳ ರ್ಯಾಂಕಿಂಗ್‌ ಪಟ್ಟಿಯಲ್ಲಿ ರಿಲಯನ್ಸ್‌ ಇಂಡಸ್ಟ್ರೀಸ್‌ 52ನೇ ಸ್ಥಾನದಲ್ಲಿದ್ದು, ಭಾರತೀಯ ಕಂಪನಿಗಳಲ್ಲಿ ಮುಂಚೂಣಿಯಲ್ಲಿದೆ. ಟಾಪ್‌ 100 ರ್ಯಾಂಕಿಂಗ್‌ನಲ್ಲಿ ಭಾರತದ ಐಸಿಐಸಿಐ ಬ್ಯಾಂಕ್‌ (65), ಎಚ್‌ಡಿಎಫ್‌ಸಿ ಬ್ಯಾಂಕ್‌ (77), ಎಚ್‌ಸಿಎಲ್‌ ಟೆಕ್ನಾಲಜೀಸ್‌ (90) ಸ್ಥಾನದಲ್ಲಿದೆ. ಎಸ್‌ಬಿಐ 119 ಮತ್ತು ಲಾರ್ಸನ್‌ ಆ್ಯಂಡ್‌ ಟೂಬ್ರೊ 127ನೇ ಸ್ಥಾನದಲ್ಲಿದೆ. ಇನ್ಫೋಸಿಸ್‌ 588, ಟಾಟಾ ಗ್ರೂಪ್‌ 746, ಎಲ್‌ಐಸಿ 504ನೇ ರ್ಯಾಂಕ್‌ ಗಳಿಸಿದೆ. ಜಾಗತಿಕ ಪಟ್ಟಿಯಲ್ಲಿ ದಕ್ಷಿಣ ಕೊರಿಯಾದ ತಂತ್ರಜ್ಞಾನ ದಿಗ್ಗಜ ಸ್ಯಾಮ್‌ಸಂಗ್‌ ಎಲೆಕ್ಟ್ರಾನಿಕ್ಸ್‌ ಮೊದಲ ಸ್ಥಾನದಲ್ಲಿದೆ. ನಂತರ ಅಮೆರಿಕ ಐಬಿಎಂ, ಮೈಕ್ರೊಸಾಫ್ಟ್‌, ಅಮೆಜಾನ್‌, ಆ್ಯಪಲ್‌, ಆಲ್ಫಬೆಟ್‌, ಡೆಲ್‌ ಟೆಕ್ನಾಲಜೀಸ್‌ ಇದೆ. ಚೀನಾದ ಹುವೈ 8ನೇ ರ್ಯಾಂಕ್‌ ಗಳಿಸಿದೆ. ಪಟ್ಟಿಯಲ್ಲಿರುವ ಇತರ ಭಾರತೀಯ ಮೂಲದ ಕಂಪನಿಗಳಲ್ಲಿ ಬಜಾಜ್‌ (215), ಎಕ್ಸಿಸ್‌ ಬ್ಯಾಂಕ್‌ (254), ಇಂಡಿಯನ್‌ ಬ್ಯಾಂಕ್‌ (314), ಒಎನ್‌ಜಿಸಿ( 404), ಕೋಟಕ್‌ ಮಹೀಂದ್ರಾ ಗ್ರೂಪ್‌ (418), ಬ್ಯಾಂಕ್‌ ಆಫ್‌ ಇಂಡಿಯಾ (451), ಐಟಿಸಿ(453), ಸಿಪ್ಲಾ (460) ಮತ್ತು ಬ್ಯಾಂಕ್‌ ಆಫ್‌ ಬರೋಡಾ (496) ಸೇರಿವೆ. ಬಂಗಾರದ ಆಮದು ಶೇ.252 ಹೆಚ್ಚಳಹೊಸದಿಲ್ಲಿ: ಕಳೆದ ಏಪ್ರಿಲ್‌-ಸೆಪ್ಟೆಂಬರ್‌ನಲ್ಲಿಬಂಗಾರದ ಆಮದು ಗಣನೀಯ ಹೆಚ್ಚಳವಾಗಿದೆ. ಸುಮಾರು 24 ಶತಕೋಟಿ ಡಾಲರ್‌ (1.77 ಲಕ್ಷ ಕೋಟಿ ರೂ.) ಮೌಲ್ಯದ ಚಿನ್ನವನ್ನು ಆಮದು ಮಾಡಿಕೊಳ್ಳಲಾಗಿದೆ ಎಂದು ವಾಣಿಜ್ಯ ಸಚಿವಾಲಯದ ಅಂಕಿ ಅಂಶಗಳು ತಿಳಿಸಿವೆ. ಆರ್ಥಿಕತೆ ಕ್ರಮೇಣ ಚೇತರಿಸುತ್ತಿರುವುದು, ಹಬ್ಬಗಳ ಋುತುವಿನ ಬೇಡಿಕೆ ಚಿನ್ನದ ಆಮದು ಹೆಚ್ಚಳಕ್ಕೆ ಕಾರಣವಾಗಿದೆ. ಸೆಪ್ಟೆಂಬರ್‌ ತಿಂಗಳಲ್ಲೇ 5.11 ಶತಕೋಟಿ ಡಾಲರ್‌ (37,814 ಕೋಟಿ ರೂ.) ಮೌಲ್ಯದ ಚಿನ್ನ ಆಮದಾಗಿತ್ತು. ಸರಕಾರ 2021-22ರ ಬಜೆಟ್‌ನಲ್ಲಿ ಚಿನ್ನದ ಆಮದು ಸುಂಕವನ್ನು ಶೇ.12.5ರಿಂದ ಶೇ.7.5ಕ್ಕೆ ತಗ್ಗಿಸಿರುವುದು ಕೂಡ ಕಾರಣವಾಗಿದೆ. ಚಿನ್ನದ ಆಮದು 2020ರಲ್ಲಿ ಶೇ.35ರಷ್ಟು ಕುಸಿದಿತ್ತು. (446 ಟನ್‌) 1994ರಿಂದ ಇದು ಕನಿಷ್ಠ ಮಟ್ಟದ್ದಾಗಿತ್ತು. ಕೋವಿಡ್‌ ನಿಯಂತ್ರಣ ಕುರಿತ ಲಾಕ್‌ ಡೌನ್‌ ಪರಿಣಾಮ ಆಮದು ಕುಸಿದಿತ್ತು. ಏರ್‌ ಇಂಡಿಯಾ ಮಾರಾಟಕ್ಕೆ ಐಎಂಎಫ್‌ ಸ್ವಾಗತವಾಷಿಂಗ್ಟನ್‌: ಏರ್‌ ಇಂಡಿಯಾ ಮಾರಾಟ ಭಾರತದ ಖಾಸಗೀಕರಣ ಪ್ರಕ್ರಿಯೆಯಲ್ಲಿ ಮಹತ್ವದ ಮೈಲುಗಲ್ಲುಎಂದು ಐಎಂಎಫ್‌ ಹೇಳಿದೆ.''ನಷ್ಟದಲ್ಲಿದ್ದ ಏರ್‌ ಇಂಡಿಯಾವನ್ನು ಟಾಟಾ ಗ್ರೂಪ್‌ಗೆ ಮಾರಾಟ ಮಾಡಿರುವುದನ್ನು ನಾವು ಸ್ವಾಗತಿಸುತ್ತೇವೆ,'' ಎಂದು ಐಎಂಎಫ್‌ ಇಂಡಿಯಾದ ಪ್ರಾದೇಶಿಕ ನಿರ್ದೇಶಕ ಅಲ್‌ ಫ್ರೆಡ್‌ ಸ್ಚಿಪ್ಕೆ ಹೇಳಿದ್ದಾರೆ. ಭಾರತದ ಆರ್ಥಿಕ ಪ್ರಗತಿಗೆ ಮತ್ತಷ್ಟು ಉದಾರೀಕರಣ ನೀತಿಯ ಅಗತ್ಯ ಇದೆ ಎಂದು ಅವರು ಹೇಳಿದ್ದಾರೆ. ಟಾಟಾ ಸಮೂಹ 18,000 ಕೋಟಿ ರೂ.ಗಳ ಡೀಲ್‌ನಲ್ಲಿ ಏರ್‌ ಇಂಡಿಯಾವನ್ನು ಖರೀದಿಸಿದೆ. ಮಾರ್ಚ್ ಒಳಗೆ ಎಲ್‌ಐಸಿ ಐಪಿಒಹೊಸದಿಲ್ಲಿ: ಸರಕಾರ ಎಲ್‌ಐಸಿಯ ಆರಂಭಿಕ ಷೇರು ಬಿಡುಗಡೆಯನ್ನು (ಐಪಿಒ) ಮುಂದಿನ ವರ್ಷ ಮಾರ್ಚ್ ಒಳಗೆ ನೆರವೇರಿಸಲು ಬದ್ಧವಾಗಿದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಸೋಮವಾರ ತಿಳಿಸಿದ್ದಾರೆ. ''ಒಂದು ವೇಳೆ ಇದರಲ್ಲಿವಿಳಂಬ ಸಂಭವಿಸಿದರೆ ಅದು ರಾಜಕೀಯ ಇಚ್ಚಾಶಕ್ತಿಯ ಕೊರತೆಯಿಂದ ಆಗಿರುವುದಿಲ್ಲ. ಸರಕಾರ ನಿಗದಿತ ಅವಧಿಯೊಳಗೆ ಪೂರೈಸಲು ಬದ್ಧವಾಗಿದೆ,'' ಎಂದು ಅವರು ಹೇಳಿದರು. ''ಎಲ್‌ಐಸಿಯ ಆಂತರಿಕ ಮೌಲ್ಯ ಮಾಪನ ಇನ್ನೂ ನಡೆದಿಲ್ಲ. 65 ವರ್ಷ ಹಳೆಯ ವಿಮೆ ಕಂಪನಿಯ ಮೌಲ್ಯಮಾಪನ ಇದುವರೆಗೆ ನಡೆದಿಲ್ಲ. ಹೀಗಾಗಿ ಇದಕ್ಕೆ ಸಮಯ ಬೇಕಾಗುತ್ತದೆ. ಆದ್ದರಿಂದ ಇದರ ಪರಿಣಾಮ ಕಾಲಾವಕಾಶ ಬೇಕಾಗಬಹುದೇ ಹೊರತು, ರಾಜಕೀಯ ಇಚ್ಛಾಶಕ್ತಿಯ ಕೊರತೆಯಿಂದ ವಿಳಂಬ,'' ಆಗದು ಎಂದರು. ಪ್ರಸಕ್ತ ಸಾಲಿನಲ್ಲಿ ಬಂಡವಾಳ ಹಿಂತೆಗೆತದ ಮೂಲಕ 1.75 ಲಕ್ಷ ಕೋಟಿ ರೂ. ಸಂಗ್ರಹಿಸಲು ಸರಕಾರ ಯೋಜಿಸಿದ್ದು, ಎಲ್‌ಐಸಿ ಐಪಿಒ ನಿರ್ಣಾಯಕವಾಗಿದೆ.