ಕಚ್ಚಾ ತೈಲ ದರ 73 ಡಾಲರ್‌ಗೆ ಕುಸಿತ: ಪೆಟ್ರೋಲ್, ಡೀಸೆಲ್ ಬೆಲೆ ಇಳಿಯುವ ನಿರೀಕ್ಷೆ!

ಹೊಸದಿಲ್ಲಿ: ಭಾರತದಲ್ಲಿ ಪೆಟ್ರೋಲ್‌ ಮತ್ತು ದರಗಳಲ್ಲಿ ಸ್ವಲ್ಪ ಇಳಿಕೆಯಾಗುವ ನಿರೀಕ್ಷೆ ಇದೆ. ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರ ಪ್ರತಿ ಬ್ಯಾರೆಲ್‌ಗೆ 76ರಿಂದ 73 ಡಾಲರ್‌ಗೆ ಶುಕ್ರವಾರ ಇಳಿಕೆಯಾಗಿರುವುದು ಇದಕ್ಕೆ ಕಾರಣ. ಈ ನಡುವೆ ಬೆಂಗಳೂರಿನಲ್ಲಿ ಪೆಟ್ರೋಲ್‌ ದರ ಶನಿವಾರ ಪ್ರತಿ ಲೀಟರ್‌ಗೆ 105.25 ರೂ.ಗೆ ಏರಿಕೆಯಾಗಿದೆ. ಅಂದರೆ 30 ಪೈಸೆ ಹೆಚ್ಚಳವಾಗಿದೆ. ಡೀಸೆಲ್‌ ದರ ಲೀಟರ್‌ಗೆ 95.26 ರೂ.ಗೆ ವೃದ್ಧಿಸಿದೆ. ಮುಂಬಯಿನಲ್ಲಿ 107 ರೂ.ಗೆ ಜಿಗಿದಿದೆ. ಕಳೆದ ಮೇ 1ರಿಂದ ಇಲ್ಲಿಯವರೆಗೆ 41 ಸಲ ತೈಲ ದರ ಹೆಚ್ಚಳವಾಗಿದ್ದು, ತೈಲ ದರ ಹೆಚ್ಚಳದಿಂದ ಗ್ರಾಹಕರು ಕಂಗಾಲಾಗಿದ್ದಾರೆ. ಸೌದಿ ಅರೇಬಿಯಾ ಮತ್ತು ಯುಎಇ ನಡುವೆ ತೈಲೋತ್ಪಾದನೆ ಹೆಚ್ಚಿಸುವ ಸಂಬಂಧ ಉಂಟಾಗಿದ್ದ ಬಿಕ್ಕಟ್ಟು ತಿಳಿಯಾಗುತ್ತಿದ್ದು, ಮಾತುಕತೆಯ ನಂತರ ಒಪ್ಪಂದ ಏರ್ಪಟ್ಟಿದೆ. ಈ ಹಿನ್ನೆಲೆಯಲ್ಲಿ ತೈಲೋತ್ಪಾದನೆ ಏರಿಕೆಯಾಗಿ ದರಗಳು ಇಳಿಮುಖವಾಗುವ ಸಾಧ್ಯತೆ ಇದೆ. ಒಟ್ಟು 23 ತೈಲೋತ್ಪಾದಕ ರಾಷ್ಟ್ರಗಳ ಒಕ್ಕೂಟವಾದ ಒಪೆಕ್‌ನಲ್ಲಿ ಯುಎಇ ಕಚ್ಚಾ ತೈಲ ಉತ್ಪಾದನೆ ಹೆಚ್ಚಿಸಬೇಕು ಎಂದು ಬಲವಾಗಿ ವಾದಿಸಿತ್ತು. ಕಳೆದ ಎರಡು ತಿಂಗಳಿನಿಂದ ಒಪೆಕ್‌ನಲ್ಲಿ ಭವಿಷ್ಯದ ತೈಲೋತ್ಪಾದನೆಯ ಪ್ರಮಾಣ ನಿಗದಿ ಬಗ್ಗೆ ಗೊಂದಲ ಇತ್ತು. ಒಪೆಕ್‌ ತನ್ನ ಭವಿಷ್ಯದ ತೈಲೋತ್ಪಾದನೆ ಮತ್ತು ದರ ನಿರ್ಧಾರಕ್ಕೆ ಸಂಬಂಧಿಸಿ ಭಾನುವಾರ ಸಭೆ ನಡೆಸಲಿದೆ. ಈ ಮಾತುಕತೆಯ ನಂತರ ಅಂತಿಮ ತೀರ್ಮಾನ ಕೈಗೊಳ್ಳುವ ಸಾಧ್ಯತೆ ಇದೆ. ಕೋವಿಡ್‌ ಪೂರ್ವ ಮಟ್ಟಕ್ಕೂ ಹೆಚ್ಚು ಪೆಟ್ರೋಲ್‌ ಮಾರಾಟ: ದೇಶದಲ್ಲಿ ಜುಲೈ ಮೊದೆರಡು ವಾರದಿಂದ ಪೆಟ್ರೋಲ್‌ ಮಾರಾಟವು ಕೋವಿಡ್‌ ಪೂರ್ವ ಮಟ್ಟಕ್ಕಿಂತಲೂ ಹೆಚ್ಚಿನ ಮಟ್ಟಕ್ಕೆ ತಲುಪಿದೆ. ಪೆಟ್ರೋಲ್‌ಗೆ ಬೇಡಿಕೆ ಶೇ.18 ಏರಿಕೆಯಾಗಿದೆ ಎಂದು ಸಾರ್ವಜನಿಕ ತೈಲ ಕಂಪನಿಗಳ ಅಂಕಿ ಅಂಶಗಳು ತಿಳಿಸಿವೆ. ಡೀಸೆಲ್‌ ಕೂಡ ಬೇಡಿಕೆ ಹೆಚ್ಚಿಸಿಕೊಳ್ಳುತ್ತಿದ್ದರೂ, ಕೋವಿಡ್‌ ಪೂರ್ವ ಮಟ್ಟಕ್ಕಿಂತಲೂ ಕೆಳ ಮಟ್ಟದಲ್ಲಿದೆ. ಡೀಸೆಲ್‌ ಮಾರಾಟ ಶೇ.12ರಷ್ಟು ಚೇತರಿಸಿದೆ. ಅಡುಗೆ ಅನಿಲ ಬಳಕೆ ಶೇ.2.2ರಷ್ಟು ಏರಿಕೆಯಾಗಿದೆ.