ಕ್ವಾಡ್‌ ರಾ‍ಷ್ಟ್ರಗಳ ನಾಯಕರ ಮೊದಲ ಮುಖಾಮುಖಿ ನಂತರ ‘ಇಂಡೋ-ಪೆಸಿಫಿಕ್‌’ನಲ್ಲಿ ಹೊಸ ಸಮೀಕರಣ ಶುರು!

‘We the leaders of Australia, India, Japan and the United States, convened today in person as " the Quad" for the first time. On this historic occasion we recommit to our partnership and to a region that is a bedrock of our shared security and prosperity- a free and open Indo- Pacific, which inclusive and resilient.’ ಶ್ವೇತಭವನದಲ್ಲಿ 2021ರ ಸೆಪ್ಟೆಂಬರ್ 24 ರಂದು, ಕ್ವಾಡ್ ರಾಷ್ಟ್ರಗಳ ನಾಯಕರ ಮೊದಲ ಮುಖಾಮುಖಿ ಸಭೆಯಲ್ಲಿ, ಅಮೆರಿಕ ಅಧ್ಯಕ್ಷ ಜೋ ಬೈಡೆನ್, ಭಾರತದ ಪ್ರಧಾನಿ , ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್ ಮಾರಿಸನ್ ಮತ್ತು ಜಪಾನ್ ಪ್ರಧಾನಿ ಯೋಶಿಹಿಡೆ ಸಗಾ ಅವರ ಜಂಟಿ ಘೋಷಣೆಯಲ್ಲಿ ಮುಕ್ತ, ಸಮಗ್ರ, ಪ್ರಗತಿಶೀಲ ಇಂಡೊ-ಪೆಸಿಫಿಕ್ ವಲಯವನ್ನು ಕಟ್ಟಲು ಸಂಕಲ್ಪಿಸಲಾಗಿದೆ. ಕಳೆದ ಕೆಲ ವರ್ಷಗಳಿಂದ ಟ್ರಂಪ್, ಮೊದಿ, ಬೈಡೆನ್, ಶಿಂಜೊ ಅಬೆ ಮೊದಲಾದ ನಾಯಕರು ಏಷ್ಯಾ- ಪೆಸಿಫಿಕ್ ಎನ್ನುತ್ತಿಲ್ಲ. ಈ ಹಿಂದೆ ಪ್ರಸ್ತಾಪವಾಗುತ್ತಿದ್ದ ಏಷ್ಯಾ - ಪೆಸಿಫಿಕ್ ಜಾಗದಲ್ಲಿ ಇಂಡೊ- ಪೆಸಿಫಿಕ್ ಎಂಬ ಪದ ಈಗ ಮುನ್ನೆಲೆಗೆ ಬಂದಿದೆ. ಇದಕ್ಕೆ ಕಾರಣ ಏಷ್ಯಾ- ಪೆಸಿಫಿಕ್‌ನಲ್ಲಿ ಉಂಟಾಗಿರುವ ಹೊಸ ಸಮೀಕರಣ. ಒಂದು ಕಡೆ ಚೀನಾ ಮತ್ತದರ ಮಿತ್ರ ರಾಷ್ಟ್ರಗಳಿದ್ದರೆ, ಮತ್ತೊಂದು ಕಡೆ ಅಮೆರಿಕ- ಭಾರತ- ಆಸ್ಟ್ರೇಲಿಯಾ- ಜಪಾನ್ ಕೈಜೋಡಿಸಿವೆ. ಪ್ರಬಲ ರಾಷ್ಡ್ರಗಳ ಈ ಧ್ರುವೀಕರಣದಿಂದ ಸಿಡಿಮಿಡಿಗೊಂಡಿರುವ ಚೀನಾ ಪ್ರತಿಯಾಗಿ ಕ್ವಾಡ್ ನ ಸದಸ್ಯ ರಾಷ್ಟ್ರಗಳನ್ನು ಬೆದರಿಸುತ್ತಿದೆ. ಆದರೆ ಈ ನಾಲ್ಕೂ ರಾಷ್ಟ್ರಗಳ ನಾಯಕರು ಅದಕ್ಕೆ ಸೊಪ್ಪು ಹಾಕಿಲ್ಲ. ಕ್ವಾಡ್ ನ ಜಂಟಿ ಹೇಳಿಕೆಯಲ್ಲಿ ಎಲ್ಲೂ ನೇರವಾಗಿ ಚೀನಾದ ಉಲ್ಲೇಖ ಇಲ್ಲವಾದರೂ, ಇಂಡೊ-ಪೆಸಿಫಿಕ್ ವಲಯದಲ್ಲಿ ಕಮ್ಯುನಿಸ್ಟ್ ಸರ್ವಾಧಿಕಾರಿ ಚೀನಾದ ಸಾಮ್ರಾಜ್ಯ ವಿಸ್ತರಣೆಯ ವಿರುದ್ಧ, ದಕ್ಷಿಣ ಚೀನಾ ಸಮುದ್ರ ವ್ಯಾಪ್ತಿಯಲ್ಲಿ ಅದರ ಪಾರಮ್ಯಕ್ಕೆ ಕಡಿವಾಣ ಹಾಕಲು ಕ್ವಾಡ್ ಸಜ್ಜಾಗುತ್ತಿದೆ. ದಕ್ಷಿಣ ಚೀನಾ ಸಮುದ್ರದಲ್ಲಿ ಚೀನಾದ ಆಕ್ರಮಣಶೀಲ ವರ್ತನೆಯನ್ನು, ಏಷ್ಯಾ- ಪೆಸಿಫಿಕ್ ವ್ಯಾಪ್ತಿಯಲ್ಲಿ ಪಾರಮ್ಯಕ್ಕಾಗಿ ಚೀನಾ ಮತ್ತು ಅಮೆರಿಕ ನಡುವೆ ಉಂಟಾಗಿರುವ ಶೀತಲಸಮರ ಈಗ ಗಮನಾರ್ಹ. ಭೂಗೋಲವನ್ನು ಗಮನಿಸಿದರೆ ಶಾಂತ ಮಹಾಸಾಗರ ಅಥವಾ ಪೆಸಿಫಿಕ್ ಸಾಗರದ ಸುತ್ತಮುತ್ತಲಿನ ರಾಷ್ಟ್ರಗಳು ಏಷ್ಯಾ-ಪೆಸಿಫಿಕ್ ವ್ಯಾಪ್ತಿಯಲ್ಲಿವೆ. ಭಾರತ ಹಿಂದೂ ಮಹಾಸಾಗರದ ವ್ಯಾಪ್ತಿಯಲ್ಲಿದೆ. ಯಾವಾಗ ಏಷ್ಯಾ-ಪೆಸಿಫಿಕ್ ನಲ್ಲಿ ಚೀನಾದ ಆಕ್ರಮಣಶೀಲತೆ, ಸಾಮ್ರಾಜ್ಯ ವಿಸ್ತರಣಾವಾದ ಹೆಡೆ ಎತ್ತಿಕೊಂಡಿತೋ, ಅಮೆರಿಕ ಪ್ರತಿತಂತ್ರ ಹೂಡಿದೆ. ಇದುವರೆಗೆ ಏಷ್ಯಾ- ಪೆಸಿಫಿಕ್ ನಲ್ಲಿ ಇರದಿದ್ದ ಭಾರತವನ್ನು, ಹಿಂದೂ ಮಹಾಸಾಗರವನ್ನು ಸೇರಿಸಿ ವಿಶಾಲ ವ್ಯಾಪ್ತಿಯ ಇಂಡೊ- ಪೆಸಿಫಿಕ್ ಅನ್ನು ಮುನ್ನೆಲೆಗೆ ತರಲಾಗಿದೆ. 1920ರಲ್ಲಿ ಜರ್ಮನಿಯ ರಾಜಕೀಯ ಚಿಂತಕ ಕಾರ್ಲ್ ಹೌಶೋಫರ್ ಮೊದಲ ಬಾರಿಗೆ ' ಇಂಡೊ-ಪೆಸಿಫಿಕ್ ' ಪದವನ್ನು ಬಳಸಿದರು. ಆದರೆ ಸಮಕಾಲೀನವಾಗಿ 2000ರಲ್ಲಿ ಎರಡು ಮಹಾ ಸಾಗರಗಳ ಭದ್ರತೆಗೆ ಸಂಪರ್ಕ ಕಲ್ಪಿಸಲು ಚಾಲ್ತಿಗೆ ಬಂದಿತು. 2007ರಲ್ಲಿ ಜಪಾನ್ ನ ಅಂದಿನ ಪ್ರಧಾನಿ ಶಿಂಜೊ ಅಬೆ ಭಾರತಕ್ಕೆ ಭೇಟಿ ನೀಡಿದಾಗ ಬಳಸಿದರು. 2010ರಿಂದೀಚೆಗೆ ದೇಶಿ- ವಿದೇಶಿ ರಾಜತಾಂತ್ರಿಕ ವಲಯದಲ್ಲಿ ಇಂಡೊ-ಪೆಸಿಫಿಕ್ ವ್ಯಾಖ್ಯಾನ ವ್ಯಾಪಕವಾಗಿದೆ. ಅಮೆರಿಕದ ರಕ್ಷಣಾ ಇಲಾಖೆ ಇಂಡೊ- ಪೆಸಿಫಿಕ್ ವಲಯದಲ್ಲಿ ತನ್ನ ಕಾರ್ಯತಂತ್ರದ ಬಗ್ಗೆ, ಚೀನಾದ ಕಾರುಬಾರುಗಳ ಬಗ್ಗೆ ವಿವರಿಸಿದೆ. 2019ರ ವರದಿಯಲ್ಲಿ, ‘ಅಮೆರಿಕದ ಪಶ್ಚಿಮ ಕರಾವಳಿಯಿಂದ ಭಾರತದ ಪಶ್ಚಿಮ ಕರಾವಳಿಯ ತನಕ ವಿಶಾಲವಾಗಿ ಹರಡಿಕೊಂಡಿರುವ ಇಂಡೊ-ಪೆಸಿಫಿಕ್, ಅಮೆರಿಕದ ಭವಿಷ್ಯಕ್ಕೆ ನಿರ್ಣಾಯಕ’ ಎಂದಿದೆ. ‘ಇಂಡೊ-ಪೆಸಿಫಿಕ್ ನಲ್ಲಿ ವಿಶ್ವದ ಅತಿ ಹೆಚ್ಚು ಜನಸಂಖ್ಯಾ ಸಾಂದ್ರತೆಯ ರಾಷ್ಟ್ರಗಳಿವೆ. ಜನಪ್ರಿಯ ಪ್ರಜಾಪ್ರಭುತ್ವ ದೇಶಗಳಿವೆ. ಅತಿ ದೊಡ್ಡ ಮುಸ್ಲಿಂ ಬಹುಸಂಖ್ಯಾತ ರಾಷ್ಟ್ರವಿದೆ. ಜಗತ್ತಿನ 10 ಅತಿ ದೊಡ್ಡ ಸೇನಾಪಡೆಗಳಲ್ಲಿ 7 ಇಲ್ಲಿವೆ. ಜಗತ್ತಿನ ಶೇ.60 ಸಾಗರೋತ್ತರ ವಹಿವಾಟು ನಡೆಯುತ್ತದೆ. ಮೂರನೇ ಒಂದರಷ್ಟು ಹಡಗುಗಳು ದಕ್ಷಿಣ ಚೀನಾ ಮೂಲಕ ಸಂಚರಿಸುತ್ತವೆ. ಅಮರಿಕವು ಈ ವಲಯದಲ್ಲಿ ವಾರ್ಷಿಕ ದ್ವಿಪಕ್ಷೀಯವಾಗಿ 2.3 ಲಕ್ಷ ಕೋಟಿ ಡಾಲರ್ ವಹಿವಾಟು ನಡೆಸುತ್ತದೆ. ಮಾತ್ರವಲ್ಲದೆ 1.3 ಲಕ್ಷ ಕೋಟಿ ಡಾಲರ್ ಬಂಡವಾಳವನ್ನೂ ಹೂಡಿಕೆ ಮಾಡಿದೆ. ಇದು ಚೀನಾ, ಜಪಾನ್, ದಕ್ಷಿಣ ಕೊರಿಯಾ ಒಟ್ಟಾಗಿ ಹೂಡಿರುವುದಕ್ಕಿಂತಲೂ ಹೆಚ್ಚು. ಜಾಗತಿಕ ಜಿಡಿಪಿಯಲ್ಲಿ ಇಂಡೊ-ಪೆಸಿಫಿಕ್, ಮೂರನೇ ಎರಡರಷ್ಟು ಕೊಡುಗೆ ನೀಡುತ್ತದೆ. ಈ ವಲಯ ವಿಶ್ವದ ಅತಿ ದೊಡ್ಡ ಆರ್ಥಿಕತೆಗಳಾದ ಅಮೆರಿಕ, ಚೀನಾ ಮತ್ತು ಜಪಾನ್ ಅನ್ನು ಹೊಂದಿದೆ. ವೇಗವಾಗಿ ಬೆಳೆಯುತ್ತಿರುವ ಭಾರತವನ್ನು ಹೊಂದಿದೆ. ಚೀನಾ ಮತ್ತು ಭಾರತಕ್ಕೆ ಅಮೆರಿಕದ ರಫ್ತು ಕಳೆದೊಂದು ದಶಕದಿಂದ ಇಮ್ಮಡಿಯಾಗಿದೆ. ಅಮೆರಿಕಕ್ಕೂ ಇಂಡೊ-ಪೆಸಿಫಿಕ್ ನಡುವಣ ವ್ಯಾಪಾರ ಮತ್ತು ವಾಣಿಜ್ಯ ಸಂಬಂಧಕ್ಕೆ ಎರಡು ಶತಮಾನಗಳ ಇತಿಹಾಸವಿದೆ ಎನ್ನುತ್ತದೆ ವರದಿ. ‘ಬಹುಶಃ ಬೇರಾವುದೇ ದೇಶಕ್ಕಿಂತಲೂ ಹೆಚ್ಚು ಲಾಭವನ್ನು ಚೀನಾ, ಮುಕ್ತ ವ್ಯಾಪಾರ ನೀತಿ, ಜಾಗತೀಕರಣ ವ್ಯವಸ್ಥೆ ಗಳಿಂದ ಪಡೆದಿದೆ. ಹೀಗಾಗಿ ಕೋಟ್ಯಂತರ ಚೀನೀಯರು ಬಡತನದಿಂದ ಶ್ರೀಮಂತಿಕೆಗೆ ಮಗ್ಗುಲು ಬದಲಿಸಿದ್ದಾರೆ. ಇಷ್ಟಾದರೂ ಚೀನಾದ ಕಮ್ಯುನಿಸ್ಟ್ ಪಾರ್ಟಿ ನೇತೃತ್ವದ ಸರಕಾರ, ಅಂತಾರಾಷ್ಟ್ರೀಯ ನಿಯಮಗಳನ್ನು ಗಾಳಿಗೆ ತೂರಿದೆ. ದಕ್ಷಿಣ ಚೀನಾ ಸಮುದ್ರದಲ್ಲಿ ಮಿಲಿಟರಿ ದುಸ್ಸಾಹಸಗಳನ್ನು ಕೈಗೊಂಡಿದೆ. ಬೌದ್ಧಿಕ ಸಂಪತ್ತಿನ ಮೇಲೆ ಸೈಬರ್ ದಾಳಿ ಎಸಗುತ್ತಿದೆ. ವಿವಾದಿತ ದ್ವೀಪಗಳಲ್ಲಿ ಅರೆ ಸೇನಾ ಪಡೆಗಳನ್ನು ನಿಯೋಜಿಸಿದೆ. ಕ್ಷಿಪಣಿಗಳನ್ನು ಅಳವಡಿಸಿದೆ. ತೈವಾನನ್ನು ಗುರಿಯಾಗಿಟ್ಟುಕೊಂಡು ಸೇನೆಯ ಗಸ್ತನ್ನು ಹೆಚ್ಚಿಸಿದೆ. ದಕ್ಷಿಣ ಚೀನಾ ಸಮುದ್ರದಲ್ಲಿ ಕೃತಕವಾಗಿ ದ್ವೀಪವನ್ನು ಸೃಷ್ಟಿಸಿ ಸಮರ ನೌಕೆಗಳನ್ನು ಅಲ್ಲಿ ನಿಯೋಜಿಸಿದೆ. ಚೀನಾ ತನ್ನ ಆರ್ಥಿಕ ಪ್ರಚೋದನೆಗಳ ಮೂಲಕ, ಮಿಲಿಟರಿ ಬೆದರಿಕೆಗಳಿಂದ ಇತರ ರಾಷ್ಟ್ರಗಳ ಮೇಲೆ ಅಧಿಕಾರ ಚಲಾಯಿಸಲು ಹೊರಡುತ್ತದೆ. ವ್ಯಾಪಾರದಿಂದ ಚೀನಾ ಮತ್ತು ಇತರ ದೇಶಗಳಿಗೆ ಲಾಭವಾದರೂ, ಆರ್ಥಿಕ ಸಾಮರ್ಥ್ಯದ ದುರ್ಬಳಕೆ, ತಂತ್ರಜ್ಞಾನಗಳ ವರ್ಗಾವಣೆಯಲ್ಲಿ ಅಕ್ರಮ ಇತ್ಯಾದಿಗಳ ಮೂಲಕ ಪಾಲುದಾರರಿಗೆ ಅಪಾಯಕಾರಿಯಾಗಿ ಪರಿಣಮಿಸುತ್ತದೆ. ಚೀನಾದ ಹೂಡಿಕೆಯಿಂದಾಗಿ, ಅದನ್ನು ಪಡೆಯುವ ರಾಷ್ಟ್ರಗಳಿಗೆ ಲಾಭವಾದರೂ ಅದರ ಪ್ರತಿಕೂಲ ಪರಿಣಾಮಗಳು ಗಂಭೀರವಾಗಬಹುದು. ದೇಶಗಳ ಸಾರ್ವಭೌಮತೆಗೇ ಧಕ್ಕೆ ತರಬಹುದು. ಉದಾಹರಣೆಗೆ ಭಾರಿ ಆರ್ಥಿಕ ಬಿಕ್ಕಟ್ಟಿನ ಲ್ಲಿದ್ದ ಶ್ರೀಲಂಕಾದ ಅಸಹಾಯಕತೆಯನ್ನು ಚೀನಾದ ಸಾರ್ವಜನಿಕ ಕಂಪನಿಯೊಂದು ಅಲ್ಲಿನ ಆಯಕಟ್ಟಿನ ಬಂದರನ್ನು 99 ವರ್ಷಗಳಿಗೆ ಲೀಸ್ ಗೆ ಖರೀದಿಸಿತ್ತು. ಹೂಡಿಕೆಯ ವೇಳೆ ಚೀನಾ ಸ್ಥಳೀಯ ಕಾನೂನುಗಳನ್ನು ಬೈಪಾಸ್ ಮಾಡುತ್ತದೆ. ಇದರಿಂದ ಗುಣಮಟ್ಟ ಕುಸಿಯುತ್ತದೆ. ಏಕಪಕ್ಷೀಯ ಡೀಲ್ ಗಳನ್ನು ಕುದುರಿಸುತ್ತದೆ. ಇದೆಲ್ಲವೂ ಇಂಡೊ-ಪೆಸಿಫಿಕ್ ವಲಯದಲ್ಲಿ ಅಸ್ಥಿರತೆಗೆ ಕಾರಣವಾಗಬಹುದು. 2018ರಲ್ಲಿ ಬಾಂಗ್ಲಾದೇಶವು ಚೀನಾದ ಕಂಪನಿಯೊಂದನ್ನು ಲಂಚ ಸ್ವೀಕಾರ ಪ್ರಕರಣದಲ್ಲಿ ನಿಷೇಧಿಸಿತ್ತು. ಮಾಲ್ಡೀವ್ಸ್ ನಲ್ಲೂ ಚೀನಾದ ಕಾಮಗಾರಿಗಳು ದುಬಾರಿಯಾಗುತ್ತಿರುವ ಬಗ್ಗೆ ಅಲ್ಲಿನ ಸಚಿವರೇ ದೂರಿದ್ದಾರೆ. ಚೀನಾ ಹೂಡಿಕೆ ಮಾಡುವುದು ತಪ್ಪಲ್ಲ. ಆದರೆ ನಂತರ ಪಾಲುದಾರ ದೇಶವನ್ನು ಸಾಲದ ಬಲೆಗೆ ಸಿಲುಕಿಸಿ ತನ್ನ ಮಿಲಿಟರಿ ಮತ್ತು ವ್ಯೂಹಾತ್ಮಕ ಉದ್ದೇಶಗಳಿಗೆ ಬಳಸುವುದು ಕಳವಳಕಾರಿ ಎನ್ನುತ್ತದೆ ಅಮೆರಿಕ. ಸೋವಿಯತ್ ಒಕ್ಕೂಟದ ಪತನ ಮತ್ತು ಉದಾರೀಕರಣ ನೀತಿಗಳನ್ನು ಜಾರಿಗೊಳಿಸಿದ ನಂತರ ಭಾರತ ಮತ್ತು ಅಮೆರಿಕದ ಸಂಬಂಧ ಸುಧಾರಿಸಿತು. ಕಳೆದ ಎರಡು ದಶಕಗಳಿಂದ ಈ ಬದಲಾವಣೆಯನ್ನು ಗಮನಿಸಬಹುದು. ಅಮೆರಿಕ 2002ರ ಗುಜರಾತ್ ಗಲಭೆಯ ನೆಪದಲ್ಲಿ ಮೋದಿಯವರಿಗೆ 2005ರಿಂದ ವೀಸಾ ನಿರಾಕರಿಸಿ ಅವಮಾನಿಸಿತ್ತು. ಆದರೆ 2014ರಲ್ಲಿ ಪ್ರಧಾನಿಯಾದ ನಂತರ ಉಭಯ ದೇಶಗಳ‌ ಸಂಬಂಧ ಹೊಸ ಎತ್ತರಕ್ಕೆ ಏರಿದೆ. ಬರಾಕ್ ಒಬಾಮಾ, ಡೊನಾಲ್ಡ್‌ ಟ್ರಂಪ್, ಜೋ ಬೈಡೆನ್ ಆಗಿರಲಿ, ಭಾರತಕ್ಕೆ ಏನಾದರೂ ಅನುಕೂಲವಾಗುವ ಸಾಧ್ಯತೆ ಇದ್ದರೆ, ಯಾರೊಡನೆ ಬೇಕಾದರೂ, ವೈಯುಕ್ತಿಕ ಮಾನಾಪಮಾನಗಳನ್ನು ಲೆಕ್ಕಿಸದೆ ಭೇಟಿ- ದ್ವಿಪಕ್ಷೀಯ ಮಾತುಕತೆಗೆ ಮೋದಿಯವರು ಹಿಂಜರಿಯುವುದಿಲ್ಲ. ಇದರ ಪರಿಣಾಮ ಯುಪಿಎಯ ಎರಡನೇ ಅವಧಿಯಲ್ಲಿ ಹಳಸಿದ್ದ ಅಮೆರಿಕ ಜತೆಗಿನ ಸಂಬಂಧ ಕಳೆದ 7 ವರ್ಷಗಳಲ್ಲಿ ಕ್ವಾಡ್ ಮೈತ್ರಿಕೂಟದ ತನಕ ವೃದ್ಧಿಸಿದೆ. ಅಮೆರಿಕವು 2016ರ ಜೂನ್ ನಲ್ಲಿ ಭಾರತ ವನ್ನು ತನ್ನ 'ಪ್ರಮುಖ ರಕ್ಷಣಾ ಪಾಲುದಾರ' ಎಂದು ಘೋಷಿಸಿತ್ತು. ಇದರಿಂದಾಗಿ ಅಮೆರಿಕ ತನ್ನ ಅಪ್ತ ರಾಷ್ಟ್ರಗಳೊಡನೆ ಹೊಂದಿರುವಂತೆ ರಕ್ಷಣಾ ಸಹಕಾರವನ್ನು ಭಾರತದ ಜತೆಗೂ ಹೊಂದಲಿದೆ. 2018ರಲ್ಲಿ ಅಮೆರಿಕ- ಭಾರತ 2+2 ಸಚಿವರುಗಳ ಮಟ್ಟದ ಮಾತುಕತೆ ನಡೆಯಿತು. ಅದೇ ವರ್ಷ ಮಲಬಾರ್ ತೀರದ ಸಮುದ್ರದಲ್ಲಿ ನೌಕಾಪಡೆಗಳ ಜಂಟಿ ಸಮರಾಭ್ಯಾಸ ನಡೆಯಿತು. 2008ರಿಂದ ಉಭಯ ದೇಶಗಳ ನಡುವೆ 16 ಶತಕೋಟಿ ಡಾಲರ್ ರಕ್ಷಣಾ ವಹಿವಾಟು ನಡೆದಿದೆ. ಕ್ವಾಡ್ ಮೈತ್ರಿಕೂಟಕ್ಕೆ ಭಾರತ ಸೇರ್ಪಡೆಯಾಗಿದ್ದರೂ, ಜಾಣ್ಮೆಯ ನಡೆಯಾಗಿ ಮಿಲಿಟರಿ ಪಾಲುದಾರಿಕೆ ಹೊರತುಪಡಿಸಿದ ಸಹಭಾಗಿತ್ವಕ್ಕೆ ಮಾತ್ರ ಸಮ್ಮತಿಸಿದೆ. ಆಸ್ಟ್ರೇಲಿಯಾ, ಬ್ರಿಟನ್ ಮತ್ತು ಅಮೆರಿಕದ ಅಕುಸ್ ಎಂಬ ಮತ್ತೊಂದು ಮೈತ್ರಿಕೂಟದಲ್ಲಿ ಭಾರತ ಏಕಿಲ್ಲ ಎಂಬ ಪ್ರಶ್ನೆಯೂ ಇದೆ. ಆದರೆ ಅಕುಸ್ ಇಂಡೊ-ಪೆಸಿಫಿಕ್ ಗಿಂತಲೂ ಅಟ್ಲಾಂಟಿಕ್ ವಲಯಕ್ಕೆ ಆದ್ಯತೆ ನೀಡಿರುವುದರಿಂದ ಭಾರತಕ್ಕೆ ಅದರ ಅಗತ್ಯವಿಲ್ಲ. ‘ನಾವು ಯಾವುದೇ ರಾಷ್ಟ್ರದ ವಿರುದ್ಧ ಕ್ವಾಡ್ ಗೆ ಸೇರ್ಪಡೆಯಾಗಿಲ್ಲ. ಶಾಂತಿ, ಸುರಕ್ಷೆ, ಅಭಿವೃದ್ಧಿ, ಸ್ಥಿರತೆಗೋಸ್ಕರ ಬೆಂಬಲಿಸುತ್ತಿದ್ದೇವೆ" ಎಂದಿದ್ದಾರೆ ವಿದೇಶಾಂಗ ಸಚಿವ ಜೈಶಂಕರ್. ಕೊನೆಯದಾಗಿ ಯಾವುದೇ ದೇಶಗಳ ನಡುವಣ ಸಂಬಂಧ, ಕೊಡುಕೊಳ್ಳುವಿಕೆಯಲ್ಲಿ ಸರಕಾರಗಳ ಮಾತುಕತೆ, ಒಪ್ಪಂದಗಳಷ್ಟೇ ಮುಖ್ಯ ಜನರ ನಡುವಿನ ಸಂಪರ್ಕ. ಅದನ್ನೇ ಪ್ರಧಾನಿ ಮೋದಿಯವರು , ಅಮೆರಿಕದ ಕಾರ್ಪೊರೇಟ್ ಕಂಪನಿಗಳ ಸಿಇಒಗಳ ಜತೆಗಿನ ಮಾತುಕತೆ ಬಳಿಕ, " ಅಮೆರಿಕ- ಭಾರತ ಬಾಂಧವ್ಯ ವೃದ್ಧಿಯಲ್ಲಿ ಜನತೆಯ ಪರಸ್ಪರ ಸಂಪರ್ಕ ( People to people linkges) ದೊಡ್ಡ ಆಸ್ತಿಯಾಗಿದೆ ಎಂದು ಸ್ಮರಿಸಿದ್ದಾರೆ.