2021-22ರ ಜಿಡಿಪಿ ಬೆಳವಣಿಗೆ ದರ ಶೇ.9ಕ್ಕೆ ಜಿಗಿಯಲಿದೆ: ಐಸಿಆರ್‌ಎ

ಹೊಸದಿಲ್ಲಿ: ಭಾರತದ ಒಟ್ಟು ದೇಶೀಯ ಉತ್ಪನ್ನ (ಜಿಡಿಪಿ) ಬೆಳವಣಿಗೆಯ ಅಂದಾಜನ್ನು ರೇಟಿಂಗ್ ಏಜೆನ್ಸಿ ಇಕ್ರಾ () ಪರಿಷ್ಕರಿಸಿದೆ. 2021-22ರಲ್ಲಿ ದೇಶದ ನೈಜ ಬೆಳವಣಿಗೆ ಶೇ9ರಷ್ಟು ಇರಲಿದೆ ಎಂದು ಅಂದಾಜಿಸಿದೆ. ಈ ಮೊದಲು ಶೇ.8.5ರಷ್ಟು ಜಿಡಿಪಿ ಬೆಳವಣಿಗೆ ಆಗಲಿದೆ ಎಂದು ಹೇಳಿತ್ತು. ಕೋವಿಡ್ -19 ಲಸಿಕೆ ನೀಡಿಕೆಯಲ್ಲಿ ಏರಿಕೆಯಾಗದೆ. ಖಾರಿಫ್ (ಬೇಸಿಗೆ) ಬೆಳೆ ಕೂಡ ಉತ್ತಮವಾಗಿರಲಿದೆ ಎಂದು ಅಂದಾಜಿಸಲಾಗಿದೆ. ಇವೆಲ್ಲ ಸರ್ಕಾರದ ಖರ್ಚುಗಳ ಪರಿಷ್ಕರಣೆಗೆ ಕಾರಣವಾಗಿವೆ ಎಂದು ಇಕ್ರಾ ಸಂಸ್ಥೆ ಪ್ರಕಟಣೆಯಲ್ಲಿ ತಿಳಿಸಿದೆ. 2020-21ರಲ್ಲಿ ಶೇ.7.3ರಷ್ಟು ಇಳಿಕೆಯಾಗಿತ್ತು. ನಂತರ, 2021-22 ರಲ್ಲಿ ಹೆಚ್ಚಿನ ಬೆಳವಣಿಗೆಯನ್ನು ನಿರೀಕ್ಸಿಸಲಾಗಿದೆ. ಆದಾಗ್ಯೂ, ಪ್ರಸ್ತುತ ಹಣಕಾಸಿನ ವರ್ಷದ ಆರಂಭದಲ್ಲಿ ಕೋವಿಡ್ -19 ಸೋಂಕಿನ ಎರಡನೇ ಅಲೆ ಇತ್ತು. ಇದು ದೇಶಾದ್ಯಂತ ಹರಡಿದ ಕಾರಣ, ವಿಶ್ಲೇಷಕರನ್ನು ಹೆಚ್ಚು ಜಾಗರೂಕರನ್ನಾಗಿ ಮಾಡಿತು. ಭಾರತೀಯ ರಿಸರ್ವ್ ಬ್ಯಾಂಕ್‌ (ಆರ್‌ಬಿಐ) ಕೂಡ ಶೇ.9.5ರ ಜಿಡಿಪಿ ಬೆಳವಣಿಗೆಯನ್ನು ನಿರೀಕ್ಷಿಸಿದೆ. ಪ್ರಸ್ತುತ ಆರ್ಥಿಕ ವರ್ಷದ ದ್ವಿತೀಯಾರ್ಧದಲ್ಲಿ ಉತ್ತಮ ಆರ್ಥಿಕ ಬೆಳವಣಿಗೆಯನ್ನು ನಿರೀಕ್ಷಿಸಲಾಗಿದೆ ಎಂದು ಇಕ್ರಾ ಸೋಮವಾರ ಹೇಳಿದೆ. "ಕೋವಿಡ್ -19 ಲಸಿಕೆ ವಿತರಣೆಯನ್ನು ಮತ್ತಷ್ಟು ವಿಸ್ತರಿಸಿರುವುದು ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ. ಇದು ಸೇವಾ ಕ್ಷೇತ್ರಗಳ ಬೇಡಿಕೆಯನ್ನು ಪುನಶ್ಚೇತನಗೊಳಿಸುತ್ತದೆ. ಕೋವಿಡ್‌ ಸೋಂಕು ಹೆಚ್ಚು ಪರಿಣಾಮ ಬೀರಿದ್ದ ಆರ್ಥಿಕ ಕ್ಷೇತ್ರಗಳ ಪುನರುಜ್ಜೀವನಕ್ಕೆ ಸಹಾಯ ಮಾಡುತ್ತದೆ" ಎಂದು ಮುಖ್ಯ ಅರ್ಥಶಾಸ್ತ್ರಜ್ಞೆ ಅದಿತಿ ನಾಯರ್ ತಿಳಿಸಿದರು. ಖಾರಿಫ್ ಬೆಳೆ ಉತ್ತಮವಾಗಿರುವುದರಿಂದ ಕೃಷಿ ವಲಯದಿಂದ ಅನುಬೋಗ ಮತ್ತು ಬೇಡಿಕೆ ಸುಸ್ಥಿರವಾಗಿರಲಿದೆ. ಪರಿಸ್ಥಿತಿ ಹೀಗೆಯೇ ಮುಂದುವರಿದರೆ, ಜಿಡಿಪಿ ಬೆಳವಣಿಗೆ ಶೇ.9ರಷ್ಟು ಇರಲಿದೆ. ಆದರೆ, ಇದಕ್ಕೆ ಕೋವಿಡ್‌ 3ನೇ ಅಲೆ ಅತಿ ದೊಡ್ಡ ತೊಡಕಾಗಲಿದೆ. ಒಂದು ವೇಳೆ ಕೋವಿಡ್‌ 3ನೇ ಅಲೆ ಬಂದರೆ, ನಿರೀಕ್ಷೆಯ ಮಟ್ಟದಲ್ಲಿ ಜಿಡಿಪಿ ಬೆಳವಣಿಗೆ ಸಾಧ್ಯವಿಲ್ಲ ಎಂದು ತಿಳಿಸಿದೆ. ಅಲ್ಲದೆ ಸಂಭಾವ್ಯ ಮೂರನೇ ಅಲೆ ಮತ್ತು ಕೋವಿಡ್‌ ವೈರಸ್‌ನ ಹೊಸ ರೂಪಾಂತರಿ ತಳಿಗಳ ವಿರುದ್ಧ ಅಸ್ತಿತ್ವದಲ್ಲಿರುವ ಲಸಿಕೆಗಳು ಪರಿಣಾಮಕಾರಿಯಲ್ಲ ಎನ್ನಲಾಗುತ್ತಿದೆ. ಇದೇನಾದರೂ ಸಂಭವಿಸಿದರೆ ಆರ್ಥಿಕತೆಗೆ ಮತ್ತೆ ಹಿನ್ನಡೆಯಾಗುವ ಸಾಧ್ಯತೆ ಇದೆ ಎಂದು ಹೇಳಿದ್ದಾರೆ. ಏಪ್ರಿಲ್‌ - ಜೂನ್‌ ತ್ರೈಮಾಸಿಕದಲ್ಲಿ ಶೇ.20.1ರಷ್ಟು ಜಿಡಿಪಿ ಬೆಳವಣಿಗೆ 2021-22ರ ಏಪ್ರಿಲ್‌ - ಜೂನ್‌ ತ್ರೈಮಾಸಿಕದಲ್ಲಿ ಭಾರತದ ನಿವ್ವಳ ದೇಶಿ ಉತ್ಪನ್ನ (ಜಿಡಿಪಿ) ಬೆಳವಣಿಗೆ ದರ ದಾಖಲೆಯ ಶೇ. 20.1ಕ್ಕೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ ಕಳೆದ ವರ್ಷ ದೇಶದ ಜಿಡಿಪಿ ದಾಖಲೆಯ ಕುಸಿತ ಕಂಡಿತ್ತು. ಇದಕ್ಕೆ ಹೋಲಿಸಿದರೆ ಗಮನಾರ್ಹ ಪ್ರಮಾಣದಲ್ಲಿ ಜಿಡಿಪಿ ಬೆಳವಣಿಗೆ ದಾಖಲಿಸಿದೆ. 2020-21ರ ಏಪ್ರಿಲ್‌ -ಜೂನ್‌ ತ್ರೈಮಾಸಿಕದಲ್ಲಿ ಕೊರೊನಾ ವೈರಸ್‌ ಕಾರಣಕ್ಕೆ ಹೇರಿದ್ದ ಲಾಕ್‌ಡೌನ್‌ನಿಂದ ಒಂದೇ ಬಾರಿ ಶೇಕಡಾ (ಮೈನಸ್‌) 24.4ರಷ್ಟು ಕುಸಿತವಾಗಿತ್ತು. ಬಳಿಕ ನಿಧಾನವಾಗಿ ಆರ್ಥಿಕತೆ ಚೇತರಿಸಿಕೊಂಡಿತ್ತು. ಇದೀಗ ಸತತ ಮೂರನೇ ತ್ರೈಮಾಸಿಕದಲ್ಲಿ ಭಾರತದ ಜಿಡಿಪಿ ಧನಾತ್ಮಕವಾಗಿ ಮುಂದುವರಿದಿದೆ. 2020 - 21ರ ಮೂರನೇ ತ್ರೈಮಾಸಿಕದಲ್ಲಿ ಜಿಡಿಪಿ ಶೇ. 0.4ರಷ್ಟು ಬೆಳವಣಿಗೆ ದಾಖಲಿಸಿತ್ತು. ಅದೇ ವರ್ಷ ನಾಲ್ಕನೇ ತ್ರೈಮಾಸಿಕದಲ್ಲಿ ಜಿಡಿಪಿ ಬೆಳವಣಿಗೆ ದರ ಮತ್ತಷ್ಟು ಏರಿಕೆಯಾಗಿ ಶೇ. 1.6ಕ್ಕೆ ಹೆಚ್ಚಳವಾಗಿತ್ತು. ಇದೀಗ ಮತ್ತಷ್ಟು ವೇಗದಲ್ಲಿ ಜಿಡಿಪಿ ಬೆಳವಣಿಗೆ ಕಂಡಿದೆ.