ಕ್ರಿಪ್ಟೋ ಕರೆನ್ಸಿ ಅಳವಡಿಕೆಯಲ್ಲಿ ಭಾರತದ ಮುನ್ನಡೆಗೆ ಕಾರಣವೇನು? ತಿಳಿಯಲೇಬೇಕಾದ ಅಂಶಗಳಿವು

ಹೊಸದಿಲ್ಲಿ: ಕ್ರಿಪ್ಟೋಕರೆನ್ಸಿಗಳನ್ನು ಅಳವಡಿಸಿಕೊಳ್ಳುವಲ್ಲಿ ಏಷ್ಯಾ ರಾಷ್ಟ್ರಗಳೇ ಮುಂದಿವೆ. ವಿಶೇಷವಾಗಿ ಪ್ರಪಂಚದ ಇತರ ರಾಷ್ಟ್ರಗಳಿಗಿಂತ ಭಾರತವು ಮುಂಚೂಣಿಯಲ್ಲಿದೆ. ಅಂತಾರಾಷ್ಟ್ರೀಯ ಸಂಶೋಧನಾ ಸಂಸ್ಥೆ 'ಫೈಂಡರ್‌' ನಡೆಸಿದ ಇತ್ತೀಚಿನ ಸಮೀಕ್ಷಾ ವರದಿ ಪ್ರಕಾರ, ಕ್ರಿಪ್ಟೋ ಕರೆನ್ಸಿ ಅಳವಡಿಕೆಯಲ್ಲಿ ಭಾರತ ಎರಡನೇ ಸ್ಥಾನಕ್ಕೇರಿದೆ. ಕ್ರಿಪ್ಟೋ ಕರೆನ್ಸಿ ಮಾಲೀಕತ್ವ ಹೊಂದಿರುವ ಅಗ್ರ ಐದು ದೇಶಗಳು ಏಷ್ಯಾ ರಾಷ್ಟ್ರಗಳೇ ಆಗಿವೆ. ಆರಂಭದಲ್ಲಿ ಈ ದೇಶಗಳನ್ನು ಕ್ರಿಪ್ಟೋ ಕರೆನ್ಸಿಗೆ ಸಂಬಂಧಿಸಿದಂತೆ ಅಮುಖ್ಯ ಎನ್ನಲಾಗಿತ್ತು. ಆದರೀಗ ಪರಿಸ್ಥಿತಿ ಬದಲಾಗಿದೆ. ಪ್ರಸ್ತುತ ಏಷ್ಯಾ ರಾಷ್ಟ್ರಗಳು ಫಿನ್‌ಟೆಕ್ ಕ್ಷೇತ್ರದಲ್ಲಿ ಪ್ರಮುಖ ಪಾತ್ರವಹಿಸುತ್ತಿವೆ. 2021ರ ಜಾಗತಿಕ ಕ್ರಿಪ್ಟೋ ಅಳವಡಿಕೆ ಸೂಚ್ಯಂಕದಲ್ಲಿ ವಿಯೆಟ್ನಾಂ ಮೊದಲ ಸ್ಥಾನದಲ್ಲಿದೆ. ವಿಯೆಟ್ನಾಂ ತನ್ನ ಜನಸಂಖ್ಯೆಯ ಸುಮಾರು ಶೇ. 40 ಮಂದಿ ಕ್ರಿಪ್ಟೋ ಕರೆನ್ಸಿಗಳನ್ನು ಹೊಂದಿದ್ದಾರೆ. ನಂತರದ ಸ್ಥಾನದಲ್ಲಿ ಭಾರತ, ಇಂಡೋನೇಷ್ಯಾ, ಮಲೇಷ್ಯಾ ಮತ್ತು ಫಿಲಿಪೈನ್ಸ್ ರಾಷ್ಟ್ರಗಳಿವೆ. ಇಂಡೋನೇಷ್ಯಾ ಮತ್ತು ಭಾರತದಲ್ಲಿ ಸಮೀಕ್ಷೆಗೆ ಒಳಪಟ್ಟ ಶೇ.30ರಷ್ಟು ವ್ಯಕ್ತಿಗಳು ಹೊಂದಿರುವುದಾಗಿ ಹೇಳಿದ್ದಾರೆ. ವರದಿಗಳ ಪ್ರಕಾರ, ಕ್ರಿಪ್ಟೋಕರೆನ್ಸಿಗಳನ್ನು ಹೆಚ್ಚು ಬಳಸುವ ದೇಶಗಳ ಪೈಕಿ ಭಾರತ ಎರಡನೇ ಸ್ಥಾನದಲ್ಲಿದೆ. ಈ ನಡುವೆ ಅಮೆರಿಕ ಮತ್ತು ಬ್ರಿಟನ್‌ಗಳನ್ನೇ ಹಿಂದಿಕ್ಕಿದೆ. ಯುಎಸ್ಎ ಮತ್ತು ಯುಕೆ ಕ್ರಮವಾಗಿ ಶೇ.8 ಮತ್ತು ಶೇ.9ರಷ್ಟು ಮಂದಿ ಕ್ರಿಪ್ಟೋಕರೆನ್ಸಿ ಹೊಂದಿದ್ದಾರೆ. ಭಾರತದ ಕ್ರಿಪ್ಟೋ ವಹಿವಾಟುಗಳ ಮೇಲೆ ರಿಸರ್ವ್ ಬ್ಯಾಂಕಿನ ನಿಷೇಧವನ್ನು ಸುಪ್ರೀಂ ಕೋರ್ಟ್ ತಳ್ಳಿಹಾಕಿದೆ. ಇದಾದ ನಂತರ ದೇಶದಲ್ಲಿ ಕಳೆದೊಂದು ವರ್ಷದಲ್ಲಿ ಕ್ರಿಪ್ಟೋ ವಲಯ ಭಾರೀ ಬೆಳವಣಿಗೆ ಕಂಡಿದೆ. ಹೊಸ ಬಳಕೆದಾರು, ವಿಶೇಷವಾಗಿ ಚಿಲ್ಲರೆ ವ್ಯಾಪಾರಿಗಳು ಕ್ರಿಪ್ಟೋ ಕರೆನ್ಸಿ ಕಡೆಗೆ ಹೆಚ್ಚು ಆಕರ್ಷಿತರಾಗಿದ್ದಾರೆ. ಉದಾಹರಣೆಗೆ, ದೇಶದ ಅತಿದೊಡ್ಡ ಎಕ್ಸ್‌ಚೇಂಜ್‌ಗಳಲ್ಲಿ ಒಂದಾದ ಕಾಯಿನ್‌ಸ್ವಿಚ್‌ ಕುಬೇರ್‌ ಕಳೆದ ವರ್ಷದಲ್ಲಿ ಸುಮಾರು 8 ಮಿಲಿಯನ್ ಬಳಕೆದಾರರನ್ನು ಸೇರಿಸಿದ್ದಾರೆ. ಭಾರತದಲ್ಲಿ ಕ್ರಿಪ್ಟೋ ಕರೆನ್ಸಿ ಮುಖ್ಯವಾಹಿನಿಗೆ ಬಂದಿದೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಈ ಅಂಕಿಅಂಶಗಳು ಸಾಕು. ವಿಶ್ವದಲ್ಲೇ ಎರಡನೇ ಅತಿ ಹೆಚ್ಚು ಜನಸಂಖ್ಯೆಯುಳ್ಳ ರಾಷ್ಟ್ರ ಭಾರತ. ಇಲ್ಲಿ ಅಗ್ಗವಾದ ಮತ್ತು ವಿಶ್ವಾಸಾರ್ಹ ಇಂಟರ್ನೆಟ್ ಸೌಲಭ್ಯವೂ. ಕಳೆದ ಒಂದೂವರೆ ವರ್ಷದಿಂದ ಲಾಕ್‌ಡೌನ್‌ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಸಂದರ್ಭದಲ್ಲಿ ಜನರು ಇತರೆ ಆದಾಯ ಮೂಲಗಳನ್ನು ಸರ್ಚ್‌ ಮಾಡಿದ್ದಾರೆ. ಹೆಚ್ಚು ಜನರು ಕ್ರಿಪ್ಟೋ ಕರೆನ್ಸಿಗೆ ಒಡ್ಡಿಕೊಳ್ಳಲು ಇದೂ ಒಂದು ಕಾರಣ. ಒಟ್ಟಾರೆ ಡಿಜಿಟಲ್ ಜಾಗತಿಕರಣದ ಈ ಯುಗದಲ್ಲಿ ಹಳೆತಾಗಿರುವ ಆರ್ಥಿಕ ವ್ಯವಸ್ಥೆಗೆ ನಾವೀನ್ಯತೆ ತರುವಂತಿದೆ ಈ ಕ್ರಿಪ್ಟೋ ಕರೆನ್ಸಿ. ಕ್ರಿಪ್ಟೋಕರೆನ್ಸಿ ಹೊಂದುವವರಲ್ಲಿ ಯುವಕರೇ ಹೆಚ್ಚು ಕ್ರಿಪ್ಟೋ ಕರೆನ್ಸಿ ಹೊಂದುವವರಲ್ಲಿ ಯುವಕರೇ ಹೆಚ್ಚಿದ್ದಾರೆ. ಫೈಂಡರ್‌ ಸಂಸ್ಥೆಯ ಸಮೀಕ್ಷೆ ಪ್ರಕಾರ ಕ್ರಿಪ್ಟೋಕರೆನ್ಸಿ ಹೊಂದಿರುವ ವಿಶ್ವದ ಒಟ್ಟು ಜನರಲ್ಲಿ ಶೇ.40ರಷ್ಟು ಮಂದಿ 18ರಿಂದ 34 ವರ್ಷ ವಯಸ್ಸಿನವರಿದ್ದಾರೆ. ಈ ವಯಸ್ಸಿನವರು ಡಿಜಿಟಲ್ ಸೇವೆಗಳಿಗೆ ಹೆಚ್ಚು ಪರಿಚಯವಿರುವ ಕಾರಣ ಕ್ರಿಪ್ಟೋಕರೆನ್ಸಿ ಖರೀದಿ, ಮಾರಾಟ ಮಾಡಲು ಅಥವಾ ವ್ಯಾಪಾರ ಮಾಡಲು ಅತ್ಯಂತ ಸುಲಭವಾಗಿದೆ. ಸಣ್ಣ ಪಟ್ಟಣಗಳು ಮತ್ತು ನಗರಗಳಿಗೂ ಪರಿಚಿತ ಇತ್ತೀಚಿನ ವರ್ಷಗಳಲ್ಲಿ ದೇಶ 2 ಮತ್ತು 3ನೇ ಹಂತದ ನಗರಗಳು ಮತ್ತು ಸಣ್ಣ ಪಟ್ಟಣಗಳಲ್ಲೂ ಕ್ರಿಪ್ಟೋ ಕರೆನ್ಸಿ ಪರಿಚಯವಾಗುತ್ತಿದೆ. ಇಲ್ಲಿನ ಜನರೂ ಕೂಡ ಕ್ರಿಪ್ಟೋ ಕರೆನ್ಸಿ ಹೊಂದಲು ಮುಂದಾಗಿದ್ದಾರೆ. ಕಳೆದ ಒಂದು ವರ್ಷದಲ್ಲಿ ಈ ಪ್ರದೇಶಗಳಲ್ಲಿ ಕ್ರಿಪ್ಟೋ ವಹಿವಾಟು ಶೇ. 2000 ಕ್ಕಿಂತ ಹೆಚ್ಚಿನ ಬೆಳವಣಿಗೆ ಸಾಧಿಸಿದೆ. ಭಾರತದಲ್ಲಿ ಕ್ರಿಪ್ಟೋ ಕರೆನ್ಸಿ ಭವಿಷ್ಯವೇನು? ಒಂದು ಸಮೀಕ್ಷೆ ಪ್ರಕಾರ ಭಾರತ ಕ್ರಿಪ್ಟೋ ವಲಯದ ನಾಯಕ ಎನಿಸುವ ಎಲ್ಲ ಸಾಧ್ಯತೆಗಳೂ ಇವೆ. ಪ್ರಸ್ತುತ ಭಾರತದಲ್ಲಿ 1.5 ಕೋಟಿಗೂ ಹೆಚ್ಚು ಮಂದಿ ಕ್ರಿಪ್ಟೋಕರೆನ್ಸಿ ಹೊಂದಿದ್ದಾರೆ. ಅಥವಾ ಕ್ರಿಪ್ಟೋಕರೆನ್ಸಿಯಲ್ಲಿ ಹೂಡಿಕೆ ಮಾಡಿದ್ದಾರೆ. ಕಳೆದ ಒಂದು ವರ್ಷದಲ್ಲಿ ಕ್ರಿಪ್ಟೋ ವಹಿವಾಟು 5 ಪಟ್ಟು ಹೆಚ್ಚಾಗಿದೆ. ಆದರೆ, ಸರಕಾರವು ಕ್ರಿಪ್ಟೋ ಕರೆನ್ಸಿಗೆ ಇದುವರೆಗೂ ಮಾನ್ಯತೆ ನೀಡಿಲ್ಲ. ಈ ಕುರಿತು ಹಲವು ಆಯಾಮಗಳಲ್ಲಿ ಚಿಂತನೆ ನಡೆಸಿರುವ ಸರಕಾರ ಕ್ರಿಪ್ಟೋಕರೆನ್ಸಿ ಮೇಲೆ ನಿಷೇಧ ಹೇರುವ ಯೋಚನೆಯಲ್ಲಿದೆ.