ಕೊರೊನಾದಿಂದ ಸಾವನಪ್ಪಿದ ಸ್ಯಾಂಡಲ್‌ವುಡ್‌ನ ಹಿರಿಯ ಪೋಸ್ಟರ್ ಡಿಸೈನರ್ ಮಸ್ತಾನ್‌!

ಕೊರೊನಾ ಎರಡನೇ ಅಲೆಯಿಂದಾಗಿ ಅನೇಕರು ಸೋಂಕಿತರಾಗುತ್ತಿದ್ದಾರೆ. ಅದರಲ್ಲೂ ಬೆಂಗಳೂರಿನಲ್ಲಿ ಅತ್ಯಂತ ವೇಗವಾಗಿ ಕೊರೊನಾ ಹರುಡುತ್ತಿದೆ. ಸಾವಿನ ಸಂಖ್ಯೆಯೂ ಕೂಡ ಜಾಸ್ತಿ ಆಗುತ್ತಿದೆ. ಇದೀಗ ಕನ್ನಡ ಚಿತ್ರರಂಗದ ಹಿರಿಯ ಪೋಸ್ಟರ್ ವಿನ್ಯಾಸಕರಾದ ಮಸ್ತಾನ್ ಅವರು ಕೂಡ ಕೋವಿಡ್‌-19ಗೆ ಬಲಿಯಾಗಿದ್ದಾರೆ. ಅವರಿಗೆ 63 ವರ್ಷ ವಯಸ್ಸಾಗಿತ್ತು. ಸ್ಯಾಂಡಲ್‌ವುಡ್‌ನ ಹಿರಿಯ ಡಿಸೈನರ್‌!ಕನ್ನಡ ಚಿತ್ರರಂಗದ ಹಿರಿಯ ಪೋಸ್ಟರ್‌ ಡೈಸೈನರ್‌ ಆಗಿದ್ದ , ಸುಮಾರು 42 ವರ್ಷಗಳಿಂದ ಕೆಲಸ ಮಾಡುತ್ತಿದ್ದರು. ಆಗಿನ ಕಾಲದ ಹಿರಿಯ ನಟರ ಸಿನಿಮಾಗಳಿಂದಿಡಿದು, ಇತ್ತೀಚಿನ ಸಿನಿಮಾಗಳವರೆಗೂ ಅವರು ಪೋಸ್ಟರ್‌ ಡಿಸೈನ್ ಮಾಡಿದ್ದರು. 42 ವರ್ಷಗಳ ವೃತ್ತಿ ಜೀವನದಲ್ಲಿ ಸುಮಾರು 2 ಸಾವಿರಕ್ಕೂ ಅಧಿಕ ಸಿನಿಮಾಗಳಿಗೆ ಪೋಸ್ಟರ್ ಡಿಸೈನ್ ಮಾಡಿದ ಹೆಮ್ಮೆ ಅವರದ್ದು. ಬರೀ ವಿನ್ಯಾಸಕರಾಗಿ ಮಾತ್ರವಲ್ಲದೆ, ಸಿನಿಮಾಗಳನ್ನು ಅವರು ನಿರ್ದೇಶಿಸಿದ್ದರು. ನಟ ಮೋಹನ್ ಅಭಿನಯದ 'ಶುಕ್ಲಾಂಬರದರಂ', 'ಕಲ್ಲೇಶಿ ಮಲ್ಲೇಶಿ', 'ಸಿತಾರಾ' ಸಿನಿಮಾಗಳನ್ನು ಮಸ್ತಾನ್ ನಿರ್ದೇಶನ ಮಾಡಿದ್ದರು. ಈಚೆಗೆ ಕೊರೊನಾ ಸೋಂಕಿತರಾಗಿದ್ದ ಅವರನ್ನು ಬೆಂಗಳೂರಿನ ಹೆಸರಘಟ್ಟ ಬಳಿಯಿರುವ ಆಸ್ಪತ್ರೆಯೊಂದಕ್ಕೆ ದಾಖಲಿಸಿ, ಚಿಕಿತ್ಸೆ ಕೊಡಿಸಲಾಗುತ್ತಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೇ ಮಂಗಳವಾರ (ಏ.20) ರಾತ್ರಿ ಮಸ್ತಾನ್ ನಿಧನರಾಗಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ 'ಕೆಮಿಸ್ಟ್ರಿ ಆಫ್‌ ಕರಿಯಪ್ಪ', 'ಸಂಯುಕ್ತ 2' ಸಿನಿಮಾಗಳ ನಿರ್ಮಾಪಕ ಮಂಜುನಾಥ್‌ ಅವರು ಕೂಡ ಕೊರೊನಾಗೆ ಬಲಿಯಾಗಿದ್ದರು. 41 ವರ್ಷ ವಯಸ್ಸಿನ ಅವರು ಈಚೆಗೆ ನಟರಾಗಿಯೂ ಗಮನಸೆಳೆಯುವುದಕ್ಕೆ ಸಜ್ಜಾಗಿದ್ದರು. ಅವರ ನಾಯಕತ್ವದ ಮೊದಲ ಸಿನಿಮಾ ತೆರೆಗೆ ಬರುವುದಕ್ಕೂ ಮುನ್ನವೇ ಕೊರೊನಾದಿಂದ ಮಂಜುನಾಥ್ ನಿಧನರಾಗಿದ್ದು ಬೇಸರದ ಸಂಗತಿ.