ಕೊರೊನಾ ರೋಗಿಗಳಿಗೆ 'ಶ್ವಾಸ' ಮೂಲಕ ಆಕ್ಸಿಜನ್ ಪೂರೈಕೆಗೆ ಮುಂದಾದ ಭುವನ್ & ಹರ್ಷಿಕಾ ಪೂಣಚ್ಚ
ಸ್ಯಾಂಡಲ್‌ವುಡ್‌ ನಟಿ ಹರ್ಷಿಕಾ ಪೂಣಚ್ಚ ಮತ್ತು 'ಬಿಗ್ ಬಾಸ್' ಖ್ಯಾತಿಯ ಭುವನ್ ಪೊನ್ನಣ್ಣ ಅವರೀಗ ಕೊರೊನಾ ಮತ್ತು ಕಠಿಣ ಕರ್ಫ್ಯೂದಿಂದ ಸಂಕಷ್ಟದಲ್ಲಿರುವ ಜನರಿಗೆ ಆಹಾರ, ಔಷಧ ಮತ್ತು ಆಮ್ಲಜನಕ ನೀಡುವ ನೈಜ ಬಾಂಧವರಾಗಿ ಕೆಲಸ ಮಾಡುತ್ತಿದ್ದಾರೆ.
Admin
0
13
ಬಬಿತಾ ಎಸ್‌.
ಒಂದೇ ಒಂದು ಉಸಿರು ಇರುತ್ತಿದ್ದರೂ ಆ ಜೀವಗಳು ಬದುಕುಳಿಯುತ್ತಿತ್ತೇನೋ ಎಂದು ಎಲ್ಲರೂ ಮರುಗುತ್ತಿರುವ ಈ ಹೊತ್ತಿನಲ್ಲಿ ನಟಿ ಮತ್ತು ನಟ ಭುವನ್ ಪೊನ್ನಣ್ಣ ಅಗತ್ಯವಿದ್ದವರಿಗೆ ಪ್ರಾಣವಾಯು ನೀಡಲು ರೋಡಿಗೆ ಇಳಿದಿದ್ದಾರೆ. 'ಶ್ವಾಸ' ಎಂಬ ಪರಿಕಲ್ಪನೆಯಡಿ ಅವರು ಆರಂಭಿಸಿರುವ ಎರಡು ಆಕ್ಸಿಜನ್ ಎಕ್ಸ್‌ಪ್ರೆಸ್‌ ಬಸ್‌ಗಳಲ್ಲಿ ಐದು ಆಕ್ಸಿಜನ್ ಕಾನ್ಸನ್‌ಟ್ರೇಷನ್‌ಗಳನ್ನು ಅಳವಡಿಸಿದ್ದಾರೆ. ಸರ್ಕಾರಿ ಆಸ್ಪತ್ರೆಯ ಐಸಿಯು ಬೆಡ್‌ಗಾಗಿ ಕಾಯುತ್ತಿರುವ ರೋಗಿಗಳಿಗೆ ಅದು ಸಿಗುವವರೆಗೆ ಆಮ್ಲಜನಕವನ್ನು ಪೂರೈಸುವ ಸೇವೆಯನ್ನು ಈ ಆಕ್ಸಿಜನ್ ಎಕ್ಸ್‌ಪ್ರೆಸ್‌ ಬಸ್‌ಗಳಲ್ಲಿಉಚಿತವಾಗಿ ಮಾಡಲಾಗುತ್ತದೆ.
ಸದ್ಯಕ್ಕೆ ಬೆಂಗಳೂರಿನ ವಿಕ್ಟೋರಿಯಾ ಮತ್ತು ಬೌರಿಂಗ್‌ ಆಸ್ಪತ್ರೆಗಳ ಮುಂದೆ ಇರಲಿರುವ ಈ ಆಕ್ಸಿಜನ್ ಎಕ್ಸ್‌ಪ್ರೆಸ್‌ ಬಸ್‌ಗಳು ಆ ನಂತರ ಪ್ರಮುಖ ಸರ್ಕಾರಿ ಆಸ್ಪತ್ರೆಗಳಿಗೆ ಬರುವ ರೋಗಿಗಳಿಗೂ ಸೇವೆಯನ್ನು ವಿಸ್ತರಿಸಲಿವೆ. 'ಕೋವಿಡ್‌ ಸೋಂಕಿತರು ಪ್ರಾಣವಾಯು ಇಲ್ಲದೆ ಒದ್ದಾಡಿ ಸಾಯುವುದನ್ನು ನೋಡಲಾಗದೆ ಇಂಥದ್ದೊಂದು ಆಕ್ಸಿಜನ್ ಎಕ್ಸ್‌ಪ್ರೆಸ್‌ ಮಾಡುವ ಯೋಚನೆ ಹೊಳೆಯಿತು. ಈ ಬಸ್‌ನಲ್ಲಿ ಐದು ರೋಗಿಗಳಿಗೆ ಆಕ್ಸಿಜನ್ ಕಾನ್ಸನ್‌ಟ್ರೇಷನ್‌ ಜೊತೆಗೆ ಸರಳ ಊಟ, ನೀರು, ಬೇಸಿಕ್‌ ಮೆಡಿಸಿನ್‌ ಕೊಡಲಾಗುತ್ತದೆ. ಸಣ್ಣ ಟಿವಿ ಅಳವಡಿಸಿ ಅದರಲ್ಲಿ ರೋಗಿಗಳಿಗೆ ಪಾಸಿಟಿವಿಟಿ, ಧೈರ್ಯ ತುಂಬುವ ಮತ್ತು ಆರೋಗ್ಯ ಜಾಗೃತಿ ಮೂಡಿಸುವ ವಿಡಿಯೋಗಳನ್ನು ಹಾಕುತ್ತೇವೆ. ರೋಗಿಗಳ ಆರೈಕೆಗೆ ನರ್ಸ್‌ ಕೂಡ ಇದ್ದಾರೆ. ಇವೆಲ್ಲ ಸೇವೆಗಳನ್ನು ನಾವು ಎಲ್ಲಾ ಆರೋಗ್ಯ ಮಾರ್ಗಸೂಚಿಗಳನ್ನು ಪಾಲಿಸಿ ಮಾಡುತ್ತಿದ್ದೇವೆ' ಎಂದು ನಟ ಭುವನ್ ಪೊನ್ನಣ್ಣ ವಿವರಿಸಿದ್ದಾರೆ.
ಭುವನಂ ಫೌಂಡೇಶನ್‌ ವತಿಯಿಂದ ನಡೆಯುತ್ತಿರುವ ಈ ಜನಸೇವೆಯ ಬಗ್ಗೆ ಮಾತನಾಡಿರುವ ನಟಿ ಹರ್ಷಿಕಾ ಪೂಣಚ್ಚ, 'ಭುವನ್ ಒಂದು ಫೇಸ್‌ಬುಕ್‌ ಲೈವ್‌ನಲ್ಲಿ ಜನರಿಗೆ ತಮ್ಮ ಮೊಬೈಲ್‌ ನಂಬರ್‌ ಕೊಟ್ಟು ಏನಾದರೂ ಕಷ್ಟವಿದ್ರೆ ತಮಗೆ ಫೋನ್‌ ಮಾಡಿ ತಿಳಿಸುವಂತೆ ಹೇಳಿದರು. ಆ ನಂಬರ್‌ ಎಷ್ಟೊಂದು ವೈರಲ್‌ ಆಯ್ತು ಎಂದರೆ ಜನರು ಸಿಕ್ಕಾಪಟ್ಟೆ ಕರೆ ಮಾಡಲು ಶುರು ಮಾಡಿದರು. ದಿನಕ್ಕೆ ಸುಮಾರು 3000 ಕರೆಗಳು ಬರುತ್ತಿದ್ದವು. ಅದನ್ನೆಲ್ಲಾ ನೋಡಿ ಜನರಿಗೆ ಮುಖ್ಯವಾಗಿ ಬೇಕಾಗಿರುವ ಮೂರು ಅಗತ್ಯಗಳ ಬಗ್ಗೆ ನಮಗೆ ತಿಳಿಯಿತು. ಅದುವೇ ಆಹಾರ, ಆಮ್ಲಜನಕ ಮತ್ತು ದಿನಸಿ ವಸ್ತು. ಅದಕ್ಕಾಗಿ ಬಾಂಧವ, ಶ್ವಾಸ ಮತ್ತು ಫೀಡ್‌ ಕರ್ನಾಟಕ ಎಂಬ ಪರಿಕಲ್ಪನೆಗಳಡಿಯಲ್ಲಿ ನಾವು ಜನಸೇವೆಗೆ ಮುಂದಾದೆವು' ಎಂದಿದ್ದಾರೆ.
'ಮನೆಯಲ್ಲಿರುವ ಕೋವಿಡ್‌ ಸೋಂಕಿತರಿಗೆ ಆಚೆ ಹೋಗಲು ಆಗಲ್ಲ, ಅವರ ಮನೆಗೆ ಬೇರೆಯವರಿಗೆ ಹೋಗಲು ಆಗಲ್ಲ, ಅವರಿಗೆ ಎಲ್ಲೂಸಹಾಯ ಸಿಗಲ್ಲ, ಅವರು ಸರಿಯಾಗಿ ಊಟ ಮಾಡಿ ಕೆಲವು ದಿನಗಳೇ ಆಯ್ತು, ದುಡಿಮೆಯೂ ಇಲ್ಲ, ಅಗತ್ಯ ಔಷಧಗಳು ಸಿಗುತ್ತಿಲ್ಲಎಂಬಿತ್ಯಾದಿ ಕರೆಗಳಿಂದ ನಮಗೆ ಕಷ್ಟಗಳ ಪ್ರತ್ಯಕ್ಷ ಅನುಭವ ಆಯಿತು. ಅದಕ್ಕಾಗಿ ನಾವು 'ಬಾಂಧವ' ಎಂಬ ಪರಿಕಲ್ಪನೆಯಡಿ ಐದು ಆಟೋಗಳನ್ನು ನಿಗದಿಗೊಳಿಸಿ ಅವುಗಳ ಮೂಲಕ ಅಗತ್ಯವಿದ್ದವರಿಗೆ ಔಷಧ, ಊಟ, ದಿನಸಿ ವಸ್ತುಗಳನ್ನು ತಗೊಂಡು ಹೋಗಿ ಕೊಡುತ್ತಿದ್ದೇವೆ. ನಗರದಿಂದ ತುಂಬಾ ದೂರದಲ್ಲಿರುವ ಗ್ರಾಮಾಂತರ ಪ್ರದೇಶದ ಜನರಿಗೆ ಯಾವುದೇ ಅಗತ್ಯ ವಸ್ತುಗಳು ಸಿಗುತ್ತಿಲ್ಲ. ಅಂಥವರಿಗೂ ನಾವು ಬಾಂಧವ ಆಟೋಗಳಲ್ಲಿ ಆಹಾರ ವಸ್ತುಗಳನ್ನು ಪೂರೈಕೆ ಮಾಡಿದ್ದೇವೆ. ನಮಗೆ ಕರೆ ಮಾಡಿದವರ ಹಿನ್ನೆಲೆ, ಅವರಿಗೆ ನಿಜವಾಗಲೂ ಸಹಾಯದ ಅಗತ್ಯವಿದೆಯೇ ಅಥವಾ ನಕಲಿ ಕರೆಯೇ ಇತ್ಯಾದಿಗಳನ್ನು ಪರಿಶೀಲನೆ ಮಾಡಿ ನಾವು ಸೇವೆಗೆ ಮುಂದಾಗುತ್ತೇವೆ' ಎಂದು ಹರ್ಷಿಕಾ ಪೂಣಚ್ಚ ಹೇಳಿದ್ದಾರೆ.
ಫೀಡ್‌ ಕರ್ನಾಟಕ ಪರಿಕಲ್ಪನೆಯಡಿಯಲ್ಲಿನಾವು 650 ರೇಷನ್‌ ಕಿಟ್‌ಗಳನ್ನು ಕೊಟ್ಟಿದ್ದೇವೆ. ಜನರಿಗೆ ಇನ್ನೂ ಹೆಚ್ಚಿನ ಸಹಾಯದ ಅಗತ್ಯವಿದೆ. ಈ ನಿಟ್ಟಿನಲ್ಲಿ ಇನ್ನಷ್ಟು ಜನರು ಅಗತ್ಯವಿದ್ದವರಿಗೆ ಸಹಾಯ ಮಾಡಲು ಮುಂದಾಗಬೇಕು ಎಂದು ಬಯಸುತ್ತೇನೆ. ಬೆಂಗಳೂರು ನಗರದ ನಂತರ ಕರ್ನಾಟಕದ ಇತರ ಜಿಲ್ಲೆಗಳಿಗೂ ಈ ಸೇವೆಗಳನ್ನು ವಿಸ್ತರಿಸುತ್ತೇವೆ.
- ಹರ್ಷಿಕಾ ಪೂಣಚ್ಚ, ನಟಿ
ಮನೆಯಲ್ಲಿ ಸೀಲ್‌ಡೌನ್‌ ಆಗಿರುವ ಲಕ್ಷಾಂತರ ಜನರಿಗೆ ನಗರದೆಲ್ಲೆಡೆ ಸುತ್ತಾಡುತ್ತಿರುವ ನಮ್ಮ ಬಾಂಧವ ಆಟೋಗಳ ಮೂಲಕ ದಿನಸಿ ವಸ್ತುಗಳು, ಊಟ, ತಿಂಡಿ, ಔಷಧ ಮತ್ತು ಅಗತ್ಯ ವಸ್ತುಗಳನ್ನು ಪೂರೈಸುತ್ತೇವೆ. ಇದರಿಂದ ಮುಂದೆ ಅಸಂಖ್ಯಾತ ಜನರಿಗೆ ಸಹಾಯವಾಗಲಿದೆ.
- ಭುವನ್ ಪೊನ್ನಣ್ಣ, ನಟ
