ಕೊರೊನಾ ಕರ್ಫ್ಯೂ ಎಫೆಕ್ಟ್: ಡೆಲಿವರಿ ದರ ಹೆಚ್ಚಿಸಿದ ಸ್ವಿಗ್ಗಿ, ಜೊಮ್ಯಾಟೋ..!

: ನಗರದಲ್ಲಿ ಪ್ರಾರಂಭವಾಗುತ್ತಿದ್ದಂತೆಯೇ ಆ್ಯಪ್‌ ಆಧಾರಿತ ಆಹಾರ ಪದಾರ್ಥಗಳನ್ನು ಮನೆ ಬಾಗಿಲಿಗೆ ತಲುಪಿಸುವ ಮತ್ತು ಜೊಮ್ಯಾಟೋ ಸೇವಾ ದರದಲ್ಲಿ ದಿಢೀರ್‌ ಹೆಚ್ಚಳ ಮಾಡಲಾಗಿದೆ. ಕರ್ಫ್ಯೂ ಅವಧಿಯಲ್ಲಿ ಹೋಟೆಲ್‌ಗಳಲ್ಲಿ ಪಾರ್ಸೆಲ್‌ಗೆ ಮಾತ್ರ ಅವಕಾಶವಿದೆ. ಈ ಹಿನ್ನೆಲೆಯಲ್ಲಿ ಬಹುತೇಕ ಮಂದಿ ಸ್ವಿಗ್ಗಿ ಮತ್ತು ಜೊಮ್ಯಾಟೋವನ್ನು ಅವಲಂಬಿಸಿದ್ದಾರೆ. ಇದೇ ಸಂದರ್ಭವನ್ನು ಬಳಸಿಕೊಳ್ಳುತ್ತಿರುವ ಸಂಸ್ಥೆಗಳು ಬೆಲೆ ಹೆಚ್ಚಳ ಮಾಡಿವೆ. ಶೇ.5-10ರಷ್ಟು ದರ ಏರಿಕೆಯಾಗಿರುವುದು ಕಂಡು ಬರುತ್ತಿದೆ. ಹೋಟೆಲ್‌ನಲ್ಲಿ ಸರ್ವ್‌ ಮಾಡುವ ದರಕ್ಕೆ ಹೋಲಿಸಿದಲ್ಲಿ ಡೆಲಿವರಿ ಸಂಸ್ಥೆಗಳ ಮೂಲಕ ತರಿಸಿಕೊಳ್ಳುವುದಾದಲ್ಲಿ ಈ ಮೊದಲು ಶೇ.20ರಷ್ಟು ಹೆಚ್ಚು ದರ ಇರುತ್ತಿತ್ತು. ಇದೀಗ ಶೇ.25ರಿಂದ 30 ರಷ್ಟು ದರ ವಿಧಿಸಲಾಗುತ್ತಿದೆ. ಹೋಟೆಲೊಂದರ ದರ ಉದಾಹರಣೆಗೆ ತೆಗೆದುಕೊಳ್ಳುವುದಾದರೆ, ಊಟ 165 ರೂ. ಇದ್ದದು ಇದೀಗ 200 ರೂ. ತಲುಪಿದೆ. ಮಸಾಲೆ ದೋಸೆ 75 ರೂ. ಇದ್ದುದು 90 ರೂ., ರವೆ ಇಡ್ಲಿ 50 ರೂ.ರಿಂದ 65 ರೂ., ಮೊಸರನ್ನ 45 ರೂ.ನಿಂದ 70 ರೂ. ತಲುಪಿದೆ. ಚಪಾತಿ ಒಂದಕ್ಕೆ 13 ರೂ. ಇದ್ದುದು ಇದೀಗ 20 ರೂ. ಗೆ ಏರಿಕೆಯಾಗಿದೆ. ಹೋಟೆಲ್‌ಗಳ ಮೇಲೆ ಈ ದರ ಬದಲಾವಣೆಯಾಗಬಹುದು. ಸ್ವಿಗ್ಗಿ ಮತ್ತು ಜೊಮ್ಯಾಟೋ ಸಂಸ್ಥೆಗಳು ಏಕಾಏಕಿ ಬೆಲೆ ಹೆಚ್ಚಳ ಮಾಡಿದ್ದು, ತೊಂದರೆ ಅನುಭವಿಸುವಂತಾಗಿದೆ. ಈ ಮೊದಲು ನೀಡುತ್ತಿದ್ದ ಆಫರ್‌ಗಳು ಈಗಿಲ್ಲ ಎಂದು ಖಾಸಗಿ ಕಾಲೇಜಿನ ಎಂಬಿಎ ವಿದ್ಯಾರ್ಥಿ ಮಹಾಂತೇಶ್‌ ಅಳಲು ತೋಡಿಕೊಂಡಿದ್ದಾರೆ. ಮನೆಯಲ್ಲೇ ಇರಲು ಒಲವು: ಕೊರೊನಾ ಸೋಂಕು ಬರುವುದಕ್ಕೂ ಮುನ್ನ ಆನ್‌ಲೈನ್‌ನಲ್ಲಿ ಆಹಾರ ಖರೀದಿ ಮಾಡುವವರ ಸಂಖ್ಯೆ ಹೆಚ್ಚಿರಲಿಲ್ಲ. ಆದರೆ, ಸೋಂಕು ಹರಡುತ್ತಿದ್ದಂತೆಯೇ ಹೋಟೆಲ್‌ಗಳಿಗೆ ಹೋಗುವವರ ಸಂಖ್ಯೆ ಕಡಿಮೆಯಾಗುತ್ತಿದೆ. ಹೋಟೆಲ್‌ಗಳಿಗೆ ಹೋಗುವಾಗ, ಕಾಯುವಾಗ ಸೋಂಕು ತಗಲುವ ಆತಂಕವಿರುವುದರಿಂದ ಹೆಚ್ಚಿನವರು ಡೆಲಿವರಿ ಸಂಸ್ಥೆಗಳನ್ನೇ ಅವಲಂಬಿಸುತ್ತಿದ್ದಾರೆ.