ಕನ್ನಡ ನಟಿಯರ ವರಮಹಾಲಕ್ಷ್ಮೀ ಹಬ್ಬದ ತಯಾರಿ ಹೇಗಿದೆ?
ವರಮಹಾಲಕ್ಷ್ಮೀ ಹಬ್ಬ ತುಂಬ ಮುಖ್ಯವಾದುದು. ಸಾಧ್ಯವಾದಷ್ಟು ಗುಂಪಿನೊಂದಿಗೆ ಬೆರೆಯದೆ ಜನರಿಂದ ಅಂತರ ಕಾಯ್ದುಕೊಂಡು ಕನ್ನಡ ನಟಿಯರು ಹಬ್ಬದ ತಯಾರಿ ಮಾಡಿದ್ದಾರೆ. ಕೆಲವು ನಟಿಯರ ಮಹಾಲಕ್ಷ್ಮಿ ಹಬ್ಬದ ಝಲಕ್‌ ಇಲ್ಲಿದೆ.
Admin
0
8
(ಬಬಿತಾ ಎಸ್)
ಕೊರೊನಾ ಮತ್ತು ಲಾಕ್‌ಡೌನ್‌ ಪರಿಣಾಮ ಕಂಗೆಟ್ಟಿರುವ ಚಿತ್ರರಂಗಕ್ಕೆ ವರದಾಯಕವಾಗಿ ಪರಿಣಮಿಸಲಿ ಎಂಬ ಆಶಯದಿಂದ ಸ್ಯಾಂಡಲ್‌ವುಡ್‌ ತಾರೆಯರು ಇಂದು ವರಮಹಾಲಕ್ಷ್ಮಿ ಹಬ್ಬವನ್ನು ಸರಳವಾಗಿ ಆಚರಿಸಿಕೊಳ್ಳುತ್ತಿದ್ದಾರೆ.
ಖುಷಿಯ ಆಚರಣೆ
'ದಿಯಾ' ಸಿನಿಮಾ ಖ್ಯಾತಿಯ ನಟಿ ಖುಷಿಗೆ ವರಮಹಾಲಕ್ಷ್ಮಿ ದೊಡ್ಡ ಹಬ್ಬ. ಆದರೆ ಈಗ ಕೊರೊನಾ ಸಾಂಕ್ರಾಮಿಕದಿಂದಾಗಿ ಮೊದಲಿನಷ್ಟು ಅದ್ದೂರಿಯಾಗಿ ಈ ಹಬ್ಬ ಆಚರಿಸಲಾಗುತ್ತಿಲ್ಲಎಂದು ಹೇಳಿರುವ ಅವರು, 'ಇವತ್ತು ಮೊದಲಿಗೆ ಕಳಸ ಪೂಜೆ ಮಾಡುತ್ತೇವೆ. ಆಮೇಲೆ ಹಬ್ಬದೂಟದ ತಯಾರಿ ನಡೆಯುತ್ತದೆ' ಎಂದಿದ್ದಾರೆ. 'ಆರೋಗ್ಯ ಸುರಕ್ಷೆಯ ದೃಷ್ಟಿಯಿಂದ ಯಾರನ್ನೂ ಹಬ್ಬಕ್ಕೆ ಆಹ್ವಾನಿಸಿಲ್ಲ. ಪೂಜೆಯ ವಿಧಿ ವಿಧಾನಗಳನ್ನು ನನ್ನ ಅಕ್ಕ ಮಾಡುತ್ತಾರೆ. ನಾನು ಅವರಿಗೆ ಸಹಾಯ ಮಾಡುತ್ತೇನೆ. ಹಬ್ಬದಡುಗೆಯನ್ನು ನಾನೇ ಮಾಡುತ್ತೇನೆ. ಇವತ್ತು ಹೋಳಿಗೆ, ಪಾಯಸ, ಚಿತ್ರಾನ್ನ ಮತ್ತು ಬಗೆ ಬಗೆಯ ಪಲ್ಯಗಳನ್ನು ಮಾಡುವ ತಯಾರಿಯಲ್ಲಿದ್ದೇನೆ' ಎಂದು ಖುಷಿ ಹೇಳಿದ್ದಾರೆ.
ಪಾವನಾ ಸಂಭ್ರಮ
ನಟಿ ಪಾವನಾ ಆಗಲೇ ಒಂದು ವಾರದಿಂದ ವರಮಹಾಲಕ್ಷ್ಮಿ ಹಬ್ಬದ ತಯಾರಿಯಲ್ಲಿದ್ದಾರೆ. 'ಹಬ್ಬಕ್ಕಾಗಿ ಇಡೀ ಮನೆಯನ್ನು ಸ್ವಚ್ಛಗೊಳಿಸಿದ್ದೇವೆ. ಇವತ್ತು ನಾನು, ನನ್ನ ಅಮ್ಮ, ಅಕ್ಕ ಸೇರಿ ವರಮಹಾಲಕ್ಷ್ಮಿಯ ಕಳಸಕ್ಕೆ ಸೀರೆ ಉಡಿಸಿ, ಆಭರಣಗಳನ್ನು ತೊಡಿಸುತ್ತೇವೆ. ಹಬ್ಬದ ಬಹುತೇಕ ಅಲಂಕಾರವನ್ನು ನಾನೇ ಮಾಡುತ್ತೇನೆ. ಇವತ್ತು ನಾವು ಪುಳಿಯೋಗರೆಯನ್ನು ತುಂಬಾ ವಿಶೇಷವಾಗಿ ಮಾಡುತ್ತೇವೆ. ಹಬ್ಬಕ್ಕೆ ಬಂದವರಿಗೆ ಅದನ್ನು ಕೊಡುತ್ತೇವೆ. ಇದರೊಂದಿಗೆ ಹೋಳಿಗೆ ಮತ್ತು ವಿಶೇಷ ಖಾದ್ಯಗಳನ್ನು ಮಾಡುತ್ತೇವೆ. ಅರಿಶಿನ ಕುಂಕುಮ, ಉಡುಗೊರೆಗಳ ಕೊಡುಕೊಳ್ಳುವಿಕೆಯೂ ಹಬ್ಬಕ್ಕೆ ವಿಶೇಷ ಕಳೆ ಕೊಡುತ್ತವೆ' ಎಂದು ಪಾವನಾ ವಿವರಿಸಿದ್ದಾರೆ.
ಅಪೇಕ್ಷಾಗೆ ಇಮ್ಮಡಿ ಸಡಗರ
ನಟಿ ಮತ್ತು ನಿರ್ದೇಶಕ ಪವನ್‌ ಒಡೆಯರ್‌ ಪತ್ನಿ ಅಪೇಕ್ಷಾ ಪುರೋಹಿತ್‌ಗೆ ಇಂದು ದುಪ್ಪಟ್ಟು ಖುಷಿ. ಒಂದೆಡೆ ಅವರಿಗೆ ವರಮಹಾಲಕ್ಷ್ಮಿ ಅತ್ಯಂತ ಫೇವರಿಟ್‌ ಹಬ್ಬ. ಇನ್ನೊಂದೆಡೆ ಇಂದು ಅವರ ಮೂರನೇ ವೆಡ್ಡಿಂಗ್‌ ಆ್ಯನಿವರ್ಸರಿಯೂ ಹೌದು. 'ದೇವಿ ಪೂಜೆಗೆ ಆದ್ಯತೆ ಇರುವ ಎಲ್ಲಾಹಬ್ಬಗಳೂ ನನಗಿಷ್ಟ. ಶ್ರಾವಣ ಮಾಸವೂ ನನಗೆ ಫೇವರಿಟ್‌. ಪ್ರತಿವರ್ಷ ನಾನು ಶ್ರಾವಣ ಮಾಸ ಬರುವುದನ್ನೇ ಕಾಯುತ್ತೇನೆ. ಈ ಮಾಸದಲ್ಲಿ ಸಂತೋಷ, ಸಡಗರದಂಥ ಪಾಸಿಟಿವ್‌ ವೈಬ್ಸ್‌ ಮನೆ ಮಾಡಿರುತ್ತವೆ. ನಮ್ಮ ಮನೆ ದೇವರೇ ಲಕ್ಷ್ಮಿ ಆಗಿರುವುದರಿಂದ ಬಾಲ್ಯದಿಂದಲೂ ನಾನು ಲಕ್ಷ್ಮಿಯನ್ನು ತುಂಬಾ ಭಕ್ತಿಯಿಂದ ಪೂಜಿಸುತ್ತ ಬಂದಿದ್ದೇನೆ. ಇವತ್ತು ಲಕ್ಷ್ಮಿಯನ್ನು ಕೂಡಿಸಿ ಪೂಜೆ ಮಾಡುತ್ತೇನೆ. ನಾನೇ ಹಬ್ಬದಡುಗೆ ಮಾಡಿ ಎಷ್ಟು ಜನರಿಗೆ ಸಾಧ್ಯವಾಗುತ್ತದೋ ಅಷ್ಟು ಜನರಿಗೆ ಕೈಯಾರೆ ಬಡಿಸುತ್ತೇನೆ. ಹಬ್ಬದೂಟದಲ್ಲಿ ಐದು ರೀತಿಯ ಸಿಹಿ ತಿಂಡಿ ಇರುತ್ತವೆ. ಎಲ್ಲರೂ ಬಾಳೆಎಲೆಯಲ್ಲಿಊಟ ಮಾಡುತ್ತೇವೆ' ಎಂದು ಅಪೇಕ್ಷಾ ಹೇಳಿದ್ದಾರೆ.
ಹಬ್ಬದ ಶಾಪಿಂಗ್‌ ಮಾಡಲು ಸಮಯವೇ ಸಿಗಲಿಲ್ಲ. ನನಗೀಗ ಹಬ್ಬ, ಶಾಪಿಂಗ್‌ ಅಂದರೆ ಸಿನಿಮಾವೇ ಅಂತಾಗಿದೆ. ಕೊರೊನಾ 3ನೇ ಅಲೆ ಶುರುವಾಗುವ ಮೊದಲೇ ಸಿನಿಮಾ ಕಮಿಟ್ಮೆಂಟ್ಸ್‌ ಮುಗಿಸಬೇಕಾದ ಕಾರಣ ಈಗ ಬಿಝಿ ಇದ್ದೇನೆ. ನಿನ್ನೆಯಷ್ಟೇ 'ದಿಯಾ' ಸಿನಿಮಾದ ತೆಲುಗು ವರ್ಷನ್‌ ಒಟಿಟಿಯಲ್ಲಿ ಬಿಡುಗಡೆಯಾಗಿದೆ. ಇವತ್ತು ನನ್ನ ತಮಿಳು ಆಲ್ಬಂ ಒಂದು ಬಿಡುಗಡೆಯಾಗುತ್ತಿದೆ. ನನಗೆ ಇದುವೇ ಹಬ್ಬ ಎಂದಿದ್ದಾರೆ ಖುಷಿ
ಹಬ್ಬಗಳನ್ನು ಸೆಲೆಬ್ರೇಟ್‌ ಮಾಡಲೇಬೇಕು. ಅದೇ ರೀತಿ ಲಕ್ಷ್ಮಿ ಎಲ್ಲರಿಗೂ ಬೇಕು. ಆಕೆಯ ಆರಾಧನೆ ಮಾಡಿದರೆ ತುಂಬಾ ಒಳ್ಳೆಯದು. ಮಹಾಲಕ್ಷ್ಮಿಯ ಪೂಜೆಯನ್ನು ಚೆನ್ನಾಗಿ ಮಾಡಿ ಎಂದಿದ್ದಾರೆ ಪಾವನಾ
ಹಬ್ಬಕ್ಕೆ ಪಿಂಕ್‌ ಬಾರ್ಡರ್‌ನ ಹಸಿರು ರೇಷ್ಮೆ ಸೀರೆ ಖರೀದಿಸಿದ್ದೇನೆ. ಹಬ್ಬದೊಂದಿಗೆ ನಮ್ಮ 3ನೇ ವರ್ಷದ ವೆಡ್ಡಿಂಗ್‌ ಆ್ಯನಿವರ್ಸರಿಯನ್ನು ನಾನು, ಪವನ್‌ ಮತ್ತು ನಮ್ಮ ಮಗು ಸೇರಿ ಮೂವರೂ ಒಟ್ಟಿಗೆ ಸೆಲೆಬ್ರೇಟ್‌ ಮಾಡುತ್ತಿದ್ದೇವೆ. ಕೋವಿಡ್‌ನಿಂದಾಗಿ ಹಬ್ಬಕ್ಕೆ ಜನರನ್ನು ಆಮಂತ್ರಿಸಿಲ್ಲ ಎಂದಿದ್ದಾರೆ ಅಪೇಕ್ಷಾ ಪುರೋಹಿತ್‌
