ಕಡಲೆಕಾಯಿ ಪರಿಷೆಗೆ ಬಸವನಗುಡಿ ಸಜ್ಜು: ​ಮಳಿಗೆ ಹಾಕಲು ಸಿದ್ಧತೆ

ಬೆಂಗಳೂರು: ಬಸವನಗುಡಿಯಲ್ಲಿ ಕಡೆ ಕಾರ್ತಿಕ ಸೋಮವಾರ ನಡೆಯಲಿರುವ ಕಡಲೆಕಾಯಿ ಪರಿಷೆಗೆ ದಿನಗಣನೆ ಆರಂಭವಾಗಿದ್ದು, ದೊಡ್ಡ ಗಣಪತಿ ದೇವಸ್ಥಾನದ ರಸ್ತೆ ಈಗಾಗಲೇ ಕಡಲೆಕಾಯಿಮಯವಾಗಿದೆ. ದೇವಾಲಯದ ಆವರಣವನ್ನು ಶುಚಿಗೊಳಿಸುವುದರ ಜತೆಗೆ, ಸುಣ್ಣ, ಬಣ್ಣ ಬಳಿಯುವ ಕಾರ್ಯ ನಡೆಯುತ್ತಿದೆ. ಸೋಮವಾರದಿಂದಲೇ ಬಸವನಗುಡಿಯ ನಾನಾ ರಸ್ತೆಗಳಲ್ಲಿ ಕಡಲೆಕಾಯಿ ಮಾರಾಟ ಆರಂಭವಾಗಿದೆ. ಕೆ.ಜಿ.ಗೆ 60 ರೂ.ನಂತೆ ಮತ್ತು ಸೇರಿಗೆ 30 ರೂ.ನಂತೆ ಮಾರಾಟವಾಗುತ್ತಿವೆ. ಚಿಂತಾಮಣಿ, ಶ್ರೀನಿವಾಸಪುರ, ಕೋಲಾರ, ಚಿಕ್ಕಬಳ್ಳಾಪುರ, ಮಾಗಡಿ, ಮಂಡ್ಯ, ಮೈಸೂರು, ತುಮಕೂರು, ಕುಣಿಗಲ್‌ ಮತ್ತಿತರ ಭಾಗಗಳಿಂದ ಕಡಲೆಕಾಯಿಗಳನ್ನು ಹೊತ್ತು ತರಲಾಗಿದೆ. ಪರಿಷೆಯಲ್ಲಿ ಡ್ರ್ಯಾಗನ್‌ ವೀಲ್‌ ಸೇರಿದಂತೆ ನಾನಾ ಮನರಂಜನಾ ಆಟದ ಪರಿಕರಗಳನ್ನು ಅಳವಡಿಸುವವರು ಈಗಾಗಲೇ ಕೆಲಸ ಆರಂಭಿಸಿದ್ದಾರೆ. ಮಾರಾಟಕ್ಕೆ ಅಧಿಕೃತವಾಗಿ ಒಂದು ಸಾವಿರಕ್ಕೂ ಹೆಚ್ಚು ಮಳಿಗೆಗಳಿಗೆ ಅನುಮತಿ ನೀಡಲಾಗುತ್ತಿದೆ. ದೊಡ್ಡ ಗಣಪತಿ ದೇವಸ್ಥಾನದ ಸುತ್ತಮುತ್ತಲಿನ ರಸ್ತೆಗಳಲ್ಲಿ ಹಲವು ಮಾರಾಟಗಾರರು ಮಳಿಗೆಗಳನ್ನು ತೆರೆಯಲಿದ್ದಾರೆ. ತರಹೇವಾರಿ ಕಡಲೆ ಕಾಯಿ ಜತೆಗೆ ಗೃಹೋಪಯೋಗಿ ವಸ್ತುಗಳು, ಆಟಿಕೆ ಸಾಮಗ್ರಿಗಳು, ಅಲಂಕಾರಿಕ ವಸ್ತುಗಳು ಪರಿಷೆಯಲ್ಲಿ ಮಾರಾಟವಾಗುತ್ತವೆ. ನ.29ರಂದು ಸೋಮವಾರ ಪರಿಷೆಯಾದರೂ ಅದರ ಹಿಂದಿನ, ಮುಂದಿನ ದಿನ ಅಂದರೆ ಭಾನುವಾರ ಮತ್ತು ಮಂಗಳವಾರ ಕೂಡ ಪರಿಷೆಗೆ ಜನಸಾಗರವೇ ಹರಿದು ಬರುತ್ತದೆ. ಕೋವಿಡ್‌ ಹಿನ್ನೆಲೆಯಲ್ಲಿ ಕಳೆದ ವರ್ಷ ಕಡಲೆಕಾಯಿ ಪರಿಷೆಯನ್ನು ಒಂದು ದಿನಕ್ಕೆ ಸೀಮಿತವಾಗಿ ಆಚರಿಸಲು ಆವಕಾಶ ಕೊಡಲಾಗಿತ್ತು. ಸಾರ್ವಜನಿಕರಿಗೆ ಪ್ರವೇಶ ಇರಲಿಲ್ಲ. ಈ ಬಾರಿ ಕೋವಿಡ್‌ ಆತಂಕ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ವಿಜೃಂಭಣೆಯಿಂದ ನಡೆಸಲು ಆಯೋಜಕರು ಕೂಡ ಸಿದ್ಧವಾಗಿದ್ದಾರೆ. ಜನರ ನಿಯಂತ್ರಣ, ಪೊಲೀಸರ ನಿಯೋಜನೆ, ವಾಹನಗಳ ಸಂಚಾರಕ್ಕೆ ವ್ಯವಸ್ಥೆ ಬಗ್ಗೆ ಚರ್ಚೆ ನಡೆಯುತ್ತಿದೆ.