ಕೋಚಿಮುಲ್ ಹಾಲು ಒಕ್ಕೂಟ ಹೋಳು! ರೈತರಿಗೆ ತಪ್ಪದ ಗೋಳು!
ಕೋಚಿಮುಲ್ ಒಕ್ಕೂಟ ವಿಭಜಿಸಲು ಸರಕಾರ ತೀರ್ಮಾನ ಕೈಗೊಂಡಿರುವುದರಿಂದ ಎರಡೂ ಜಿಲ್ಲೆಗಳ ಒಕ್ಕೂಟಗಳಿಗೆ ಆಗುವ ಲಾಭಕ್ಕಿಂತಲೂ ನಷ್ಟವೇ ಹೆಚ್ಚು ಎಂದು ವಿಶ್ಲೇಷಿಸಲಾಗುತ್ತಿದೆ. ಕೋಚಿಮುಲ್ ಹಾಲು ಉತ್ಪಾದನೆಯಲ್ಲಿ ರಾಜ್ಯದಲ್ಲಿಯೇ 2ನೇ ಸ್ಥಾನದಲ್ಲಿತ್ತು.
Admin
0
5
ಕೋಲಾರ: ವಿಭಜಿಸಲು ಸರಕಾರ ತೀರ್ಮಾನ ಕೈಗೊಂಡಿರುವುದರಿಂದ ಎರಡೂ ಜಿಲ್ಲೆಗಳ ಒಕ್ಕೂಟಗಳಿಗೆ ಆಗುವ ಲಾಭಕ್ಕಿಂತಲೂ ನಷ್ಟವೇ ಹೆಚ್ಚು ಎಂದು ವಿಶ್ಲೇಷಿಸಲಾಗುತ್ತಿದೆ.
ಅವಳಿ ಜಿಲ್ಲೆಗಳಾದ ಕೋಲಾರ-ಚಿಕ್ಕಬಳ್ಳಾಪುರ ರೈತರು ಕೃಷಿಯೊಂದಿಗೆ ಹೈನುಗಾರಿಕೆಯಲ್ಲಿ ಹೆಚ್ಚು ತೊಡಗಿಕೊಂಡಿದ್ದು, ಹಾಲು ಉತ್ಪಾದನೆಯಲ್ಲಿ ರಾಜ್ಯದಲ್ಲಿಯೇ 2ನೇ ಸ್ಥಾನ ಹೊಂದಿದೆ. ಇದೀಗ ಒಕ್ಕೂಟ ವಿಭಜನೆಯಿಂದ 2ನೇ ಸ್ಥಾನಮಾನ ಕಳೆದುಕೊಳ್ಳಲಿದೆ.
ಅದರಲ್ಲಿಯೂ ಪ್ರಮುಖವಾಗಿ ಒಕ್ಕೂಟ ವಿಭಜನೆಯಿಂದ ರೈತರಿಗೆ ಆಗುವಂತಹ ಲಾಭಕ್ಕಿಂತಲೂ ನಷ್ಟವೇ ಹೆಚ್ಚಾಗಿರುತ್ತದೆ. ಒಕ್ಕೂಟ ವಿಭಜನೆಯಿಂದ ಮುಂದಿನ ದಿನಗಳಲ್ಲಿ ರೈತರಿಗೆ ಸಿಗುವಂತಹ ಲಾಭ ಕಡಿಮೆಯಾಗುವ ಸಾಧ್ಯತೆಯಿರುತ್ತದೆ ಎಂಬುದು ಹಿರಿಯ ನಿರ್ದೇಶಕರ ಅಭಿಪ್ರಾಯವಾಗಿದೆ.
ಕೋಲಾರ-ಚಿಕ್ಕಬಳ್ಳಾಪುರ ಜಿಲ್ಲೆಗಳಲ್ಲಿ 1900ಕ್ಕೂ ಹೆಚ್ಚಿನ ಹಾಲು ಉತ್ಪಾದಕ ಒಕ್ಕೂಟಗಳಲ್ಲಿ 83 ಸಾವಿರಕ್ಕೂ ಹೆಚ್ಚಿನ ಸದಸ್ಯರಿದ್ದು, ಒಕ್ಕೂಟಕ್ಕೆ ಎರಡು ಜಿಲ್ಲೆಗಳಿಂದ ಒಂದು ಹಂತದಲ್ಲಿ 11 ಲಕ್ಷ ಲೀಟರ್‌ಗೂ ಹೆಚ್ಚಿನ ಹಾಲು ಬಂದ ಉದಾಹರಣೆಗಳು ನಮ್ಮ ಮುಂದಿವೆ.
ಒಕ್ಕೂಟಕ್ಕೆ ಹೆಚ್ಚಿನ ಪ್ರಮಾಣದಲ್ಲಿ ಹಾಲು ಬರುವುದರಿಂದ ಲಾಭವೂ ಹೆಚ್ಚಾಗಿರುತ್ತದೆ. ಆದರೆ, ಒಕ್ಕೂಟ ವಿಭಜನೆಯಿಂದ ಒಕ್ಕೂಟಗಳಿಗೆ ಬರುವ ಹಾಲಿನ ಪ್ರಮಾಣ ಕಡಿಮೆಯಾಗಿ ಬರುವ ಆದಾಯವೂ ಕಡಿಮೆಯಾಗುತ್ತದೆ. ಹೀಗಾಗಿ ರೈತರಿಗೆ ನೀಡುವ ಹಾಲಿನ ದರವನ್ನೂ ಕಡಿಮೆ ಮಾಡಬೇಕಾದ ಸಾಧ್ಯತೆಗಳು ಹೆಚ್ಚಾಗಿರುತ್ತವೆ ಎಂದು ಎಂಬುದು ಹಿರಿಯ ನಿರ್ದೇಶಕರ ವಾದವಾಗಿದೆ.
ಮಾರುಕಟ್ಟೆ ಸೌಲಭ್ಯವಿಲ್ಲ: ಒಕ್ಕೂಟವು ಇನ್ನೂ ಪೂರ್ಣ ಪ್ರಮಾಣದಲ್ಲಿ ರಚನೆಯಾಗಿಲ್ಲ. ಜತೆಗೆ ಸುಧಾರಿತ ಪ್ಯಾಕಿಂಗ್‌ ವ್ಯವಸ್ಥೆಯಿಲ್ಲ. ಇದರೊಂದಿಗೆ ಮಾರುಕಟ್ಟೆ ವಿಸ್ತರಣೆಯೂ ಸಹ ಸವಾಲಿನ ವಿಚಾರವಾಗಿದೆ. ಹೀಗಾಗಿ ತಮ್ಮ ಉತ್ಪನ್ನಗಳಿಗೆ ಮಾರುಕಟ್ಟೆ ಸಿಗುವುದು ಕಷ್ಟವಾಗುತ್ತದೆ.
ಹೀಗಾಗಿ ಒಂದು ಒಕ್ಕೂಟಕ್ಕೆ ಅಗತ್ಯವಿರುವಂತಹ ಎಲ್ಲ ರೀತಿಯ ಸೌಲಭ್ಯಗಳನ್ನು ಪಡೆದ ಬಳಿಕ ಒಕ್ಕೂಟ ವಿಭಜನೆ ಮಾಡುವುದರಿಂದ ಎರಡೂ ಒಕ್ಕೂಟಗಳಿಗೆ ಅನುಕೂಲವಾಗಲಿದೆ ಎಂದು ಮಾಜಿ ಅಧ್ಯಕ್ಷ ಜಯಸಿಂಹ ಅವರು ಅಭಿಪ್ರಾಯಪಟ್ಟಿದ್ದಾರೆ.
ದರ ಪೈಪೋಟಿ ಸಾಧ್ಯತೆ: ಕೋಲಾರ-ಚಿಕ್ಕಬಳ್ಳಾಪುರ ಜಿಲ್ಲೆಗಳ ಗಡಿಗಳು ಹೊಂದಿಕೊಂಡಿರುವುದರಿಂದ ಗಡಿ ಭಾಗದ ರೈತರು ಹೆಚ್ಚಿನ ದರ ನೀಡುವಂತಹ ಒಕ್ಕೂಟಕ್ಕೆ ತಮ್ಮ ಹಾಲು ನೀಡಲು ಮುಂದಾಗುತ್ತಾರೆ. ಹೀಗಾಗಿ ರೈತರನ್ನು ಸೆಳೆಯಲು ಒಕ್ಕೂಟಗಳು ದರ ಪೈಪೋಟಿಗೆ ಬೀಳುವ ಸಾಧ್ಯತೆಗಳು ಹೆಚ್ಚಾಗಿರುತ್ತದೆ ಎಂದು ಅಂದಾಜಿಸಲಾಗಿದೆ.
ವಿಭಜನೆಯ ಲಾಭವಾದರೂ ಏನು?: ಕೋಚಿಮುಲ್ ಒಕ್ಕೂಟದ ವಿಭಜನೆಯಿಂದ ರೈತರಿಗೆ ಆಗುವ ಲಾಭಕ್ಕಿಂತಲೂ ರಾಜಕೀಯ ಮುಖಂಡರಿಗೆ ಹೆಚ್ಚಿನ ಲಾಭ ಎಂದು ಹೇಳಲಾಗುತ್ತಿದೆ. ಅದರಂತೆ ಚಿಕ್ಕಬಳ್ಳಾಪುರ ಜಿಲ್ಲೆಗೆ ಒಂದು ಅಧ್ಯಕ್ಷ ಸ್ಥಾನ ಸೃಜನೆಯಾಗುತ್ತದೆಯೇ ಹೊರತು ಉಳಿದಂತೆ ಯಾವುದೇ ಪ್ರಯೋಜನವಿಲ್ಲ ಎಂಬುದು ಹಿರಿಯ ಮುಖಂಡರ ವಾದವಾಗಿದೆ.
ಕೋಲಾರದಲ್ಲಿ ಎಂ.ವಿ.ಕೃಷ್ಣಪ್ಪ ಅವರ ಹೆಸರಿನಲ್ಲಿ ಡೇರಿ ನಿರ್ಮಾಣದ ಬಳಿಕ ವಿಭಜನೆ ಮಾಡುವಂತೆ ಜಿಲ್ಲೆಯ ಎಲ್ಲಾ ಶಾಸಕರ ನೇತೃತ್ವದಲ್ಲಿ ಮುಖ್ಯಮಂತ್ರಿಗಳನ್ನು ಕೋರಲಾಗಿತ್ತು. ಆದರೆ, ಡೇರಿ ನಿರ್ಮಿಸುವ ಮೊದಲೇ ವಿಭಜನೆ ಮಾಡಿರುವುದು ಕೃಷ್ಣಪ್ಪ ಅವರಿಗೆ ಮಾಡಿದ ಅಪಮಾನವಾಗಿದೆ.
- ಕೆ.ವೈ.ನಂಜೇಗೌಡ, ಅಧ್ಯಕ್ಷರು, ಕೋಚಿಮುಲ್
ಒಕ್ಕೂಟದ ವಿಭಜನೆಯಿಂದಾಗಿ ಹಾಗೂ ಚಿಕ್ಕಬಳ್ಳಾಪುರ ಎರಡೂ ಒಕ್ಕೂಟಗಳಿಗೆ ಆರ್ಥಿಕ ನಷ್ಟವಾಗಲಿದೆ. ಇನ್ನೂ ಪೂರ್ಣ ಪ್ರಮಾಣದಲ್ಲಿ ಡೇರಿ ಕಾರ್ಯಾಚರಣೆ ಮಾಡುವ ಮೊದಲೇ ವಿಭಜನೆ ಮಾಡಿರುವುದು ಸರಿಯಲ್ಲ. ಒಕ್ಕೂಟದ ವಿಭಜನೆಯಿಂದ ರೈತರಿಗೆ ಬರುವ ಆದಾಯವೂ ಕಡಿಮೆಯಾಗುವ ಸಾಧ್ಯತೆಗಳು ಹೆಚ್ಚಾಗಿವೆ.
- ಜಯಸಿಂಹ, ಮಾಜಿ ಅಧ್ಯಕ್ಷರು, ಕೋಚಿಮುಲ್
