ಏಪ್ರಿಲ್‌ನಲ್ಲಿ ಸಗಟು ಹಣದುಬ್ಬರ ದಾಖಲೆಯ ಶೇ.10.49ಕ್ಕೆ ಜಿಗಿತ; 11 ವರ್ಷಗಳಲ್ಲೇ ಗರಿಷ್ಠ
2020ರ ಏಪ್ರಿಲ್‌ನಲ್ಲಿ ಮೈನಸ್‌ 1.57% ರಷ್ಟಿದ್ದ ಸಗಟು ಹಣದುಬ್ಬರ, ಕಳೆದ ಡಿಸೆಂಬರ್‌ನಿಂದ ನಿರಂತರ ಏರಿಕೆಯಾಗಲು ಆರಂಭವಾಗಿತ್ತು. ಇದೀಗ ಏಪ್ರಿಲ್‌ 2010ರ ನಂತರದ ಗರಿಷ್ಠ ಮಟ್ಟಕ್ಕೆ ಮುಟ್ಟಿದೆ.
Admin
0
4
ಹೊಸದಿಲ್ಲಿ: ಕಳೆದ ಏಪ್ರಿಲ್‌ನಲ್ಲಿ ದೇಶದಲ್ಲಿ ಸಗಟು ಶೇ. 10.49ಕ್ಕೆ ಹೆಚ್ಚಳವಾಗಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕೆ ಇಲಾಖೆಯ ಅಂಕಿ ಅಂಶಗಳು ತಿಳಿಸಿವೆ. ಇದು ಕಳೆದ 11 ವರ್ಷಗಳಲ್ಲೇ ಗರಿಷ್ಠ ಮಟ್ಟವಾಗಿದೆ. ಇಂಧನ ಮತ್ತು ಸರಕುಗಳ ಬೆಲೆಯಲ್ಲಿ ನಿರಂತರ ಏರಿಕೆ ಇದಕ್ಕೆ ಕಾರಣವಾಗಿದ್ದು, ಹಣದುಬ್ಬರ ಒತ್ತಡ ಹೆಚ್ಚುತ್ತಿರುವುದನ್ನು ಸೂಚಿಸುತ್ತಿದೆ.
2020ರ ಏಪ್ರಿಲ್‌ನಲ್ಲಿ ಮೈನಸ್‌ 1.57% ರಷ್ಟಿತ್ತು. ನಂತರ ಇದೇ ಡಿಸೆಂಬರ್‌ನಿಂದ ಸಗಟು ಹಣದುಬ್ಬರ ಸೂಚ್ಯಂಕ ನಿರಂತರ ಏರಿಕೆಯಾಗಲು ಆರಂಭವಾಗಿತ್ತು. ಜನವರಿಯಲ್ಲಿ ಶೇ. 4.17 ಮತ್ತು ಫೆಬ್ರವರಿಯಲ್ಲಿ ಶೇ. 4.83ರಷ್ಟಿತ್ತು. ಮಾರ್ಚ್‌ನಲ್ಲಿ 8 ವರ್ಷಗಳ ಗರಿಷ್ಠ ಮಟ್ಟ ಶೇ. 7.39ಕ್ಕೆ ವೃದ್ಧಿಸಿತ್ತು.
ಇದೀಗ ಸಗಟು ಹಣದುಬ್ಬರ ಏಪ್ರಿಲ್‌ 2010ರ ನಂತರದ ಗರಿಷ್ಠ ಮಟ್ಟಕ್ಕೆ ಏರಿಕೆಯಾಗಿದೆ. ಆಹಾರ ಹಣದುಬ್ಬರ ಶೇ. 4.92ಕ್ಕೆ ಏರಿಕೆಯಾಗಿದ್ದರೆ, ಉತ್ಪಾದಿತ ವಸ್ತುಗಳ ಹಣದುಬ್ಬರ ಶೇ.9.01ಕ್ಕೆ ತಲುಪಿದೆ. ಇನ್ನು ಇಂಧನ ಮತ್ತು ವಿದ್ಯುತ್‌ ಹಣದುಬ್ಬರ ಕಂಡು ಕೇಳರಿಯದ ಶೇ. 20.94ಕ್ಕೆ ತಲುಪಿದೆ.
ಕಚ್ಚಾ ತೈಲ ದರ ಭಾರಿ ಏರಿಕೆ ಕಂಡಿರುವುದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಈಗ ಉತ್ಪಾದಿತ ವಸ್ತುಗಳ ದರ ಹೆಚ್ಚಳವಾಗಿರುವುದು ಸಗಟು ಹಣದುಬ್ಬರ ವೃದ್ಧಿಗೆ ಕಾರಣ ಎಂದು ಸಚಿವಾಲಯ ತಿಳಿಸಿದೆ.
