ಇದು ಅವಳೇ ತಂದಿಟ್ಟ ಫಜೀತಿ: ಜೈಲಿಗೆ ಹೋಗುವ ಮುನ್ನ 'ರಗಳೆ ಹೆಂಡ್ತಿ'ಗೆ ಬೈದ ಪತಿ!

ಹೊಸದಿಲ್ಲಿ: ಮಾಸ್ಕ್ ಹಾಕದ್ದನ್ನು ಪ್ರಶ್ನಿಸಿದ ದೆಹಲಿ ಪೊಲೀಸರ ಜೊತೆ ಅಸಭ್ಯವಾಗಿ ವರ್ತಿಸಿ ಜೈಲು ಪಾಲಾಗಿರುವ ದಂಪತಿ ಈಗ ಪಶ್ಚಾತಾಪದ ಮಾತುಗಳನ್ನಾಡುತ್ತಿದ್ದಾರೆ. ಆದರೆ ಘಟನೆಗೆ ನನ್ನ ಪತ್ನಿಯ ಅಹಂಕಾರವೇ ಕಾರಣ ಎಂದು ಪತಿ ಹೇಳಿರುವುದು ಕುತೂಹಲ ಕೆರಳಿಸಿದೆ. ಹೌದು, ಪೊಲೀಸರೊಂದಿಗೆ ಅಸಭ್ಯವಾಗಿ ವರ್ತಿಸಿ ಜೈಕು ಪಾಲಾಗಿರುವ ದೆಹಲಿ ನಿವಾಸಿ ಪಂಕಜ್ ದತ್ತಾ, ಘಟನೆಗೆ ನನ್ನ ಪತ್ನಿ ಅಭಾ ದತ್ತಾಳ ದುರ್ವರ್ತನೆಯೇ ಕಾರಣ ಎಂದು ಆಪಾದಿಸಿದ್ದಾರೆ. ನಾನು ಮಾಸ್ಕ್ ಧರಿಸುವುದು ಉತ್ತಮ ಎಂದು ನಿರಂತರವಾಗಿ ಆಕೆಗೆ ಹೇಳುತ್ತಲೇ ಇದ್ದೆ. ಆದರೆ ಮಾಸ್ಕ್ ಧರಿಸುವಂತೆ ನಾನು ಮಾಡಿದ ಮನವಿಯನ್ನು ತಿರಸ್ಕರಿಸಿದ ಅಭಾ, ನನಗೂ ಮಾಸ್ಕ್ ಹಾಕಿಕೊಳ್ಳಲು ಬಿಡಲಿಲ್ಲ. ಅಲ್ಲದೇ ಪೊಲೀಸರು ತಡೆದು ಪ್ರಶ್ನಿಸಿದಾಗ ಆಕೆ ದರ್ಪದ ಮಾತುಗಳನ್ನಾಡಿದಳು ಎಂದು ಪಂಕಜ್ ದತ್ತಾ ಘಟನೆಯನ್ನು ಮೆಲುಕು ಹಾಕಿದ್ದಾರೆ. ಮಾಸ್ಕ್ ಹಾಕದೇ ಕಾರು ಚಲಾಯಿಸುವಂತೆ ನನ್ನ ಪತ್ನಿ ನನ್ನನ್ನು ಪ್ರಚೋದಿಸುತ್ತಲೇ ಇದ್ದಳು. ನಾನು ಮಾಸ್ಕ್ ಹಾಕುವುದು ಉತ್ತಮ ಎಂದು ಹೇಳಿದಾಗ ಒಂದು ಹಂತದಲ್ಲಿ ಆಕೆ ನನ್ನೊಂದಿಗೂ ಜಗಳವಾಡಿದಳು ಎಂದು ಪಂಕಜ್ ದತ್ತಾ ಹೇಳಿದ್ದಾರೆ. ನಾನು ಒಬ್ಬನೇ ಓಡಾಡುವಾಗ ಮಾಸ್ಕ್ ಹಾಕಿಕೊಂಡಿರುತ್ತೇನೆ. ಆದರೆ ಈ ಬಾರಿ ಅವಳ ಒತ್ತಾಯಕ್ಕೆ ಮಣಿದು ಪ್ರಮಾದ ಎಸಗಿದ್ದಾಗಿ ಪಂಕಜ್ ದತ್ತಾ ಪಶ್ಚಾತಾಪದ ಮಾತುಗಳನ್ನಾಡಿದ್ದಾರೆ. ಆಕೆ ಮಾಡಿದ್ದು ತಪ್ಪು. ಪೊಲೀಸರೊಂದಿಗೆ ಆಕೆ ತೋರಿದ ವರ್ತನೆಗೆ ನನ್ನ ಸಹಮತಿ ಇಲ್ಲ. ನಾನು ಆರಂಭದಿಂದಲೂ ಆಕೆಯನ್ನು ಸಮಾಧಾನಪಡಿಸಲು ಪ್ರಯತ್ನಿಸುತ್ತಿದ್ದೆ ಎಂದು ಪಂಕಜ್ ದತ್ತಾ ಅಳಲು ತೋಡಿಕೊಂಡಿದ್ದಾರೆ. ಕಾರಿನಲ್ಲಿ ಮಾಸ್ಕ್‌ ಧರಿಸದೇ ಬಂದ ಜೋಡಿಯೊಂದನ್ನು ದೆಹಲಿ ಪೊಲೀಸರು ತಡೆದಾಗ, ಗಂಡನಿಗೆ ಮುತ್ತು ಕೊಡಲು ಮಾಸ್ಕ್ ಹಾಕಿಲ್ಲ ಏನು ಮಾಡುತ್ತೀರಿ ಎಂದು ಕೇಳಿ ಅಸಭ್ಯವಾಗಿ ವರ್ತಿಸಿದ್ದ ಮಹಿಳೆಯನ್ನು ಮತ್ತು ಆಕೆಯ ಪತಿಯನ್ನು ಬಂಧಿಸಿರುವುದನ್ನು ಇಲ್ಲಿ ಸ್ಮರಿಸಬಹುದು.