ಆರ್ಟಿಕಲ್‌ 370 ರದ್ದಾದ ಬಳಿಕ ಜಮ್ಮು& ಕಾಶ್ಮೀರದಲ್ಲಿ ಆಸ್ತಿ ಖರೀದಿಸಿದವರು ಕೇವಲ ಇಬ್ಬರು!

ಹೊಸದಿಲ್ಲಿ: ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನ ನೀಡಿದ್ದ ಸಂವಿಧಾನದ 370ನೇ ವಿಧಿಯನ್ನು ಕೇಂದ್ರ ಸರಕಾರ ರದ್ದುಪಡಿಸಿದ ಬಳಿಕ ಒಟ್ಟು ಕಳೆದ ಎರಡು ವರ್ಷಗಳಲ್ಲಿ ಹೊರ ರಾಜ್ಯಗಳ ಕೇವಲ ಇಬ್ಬರು ಮಾತ್ರವೇ ಅಲ್ಲಿ ಖರೀದಿಸಿದ್ದಾರೆ! ಮಂಗಳವಾರ ಲೋಕಸಭೆಗೆ ನೀಡಿರುವ ಲಿಖಿತ ಉತ್ತರದಲ್ಲಿ ಗೃಹ ಖಾತೆ ಸಹಾಯಕ ಸಚಿವ ನಿತ್ಯಾನಂದ ರಾಯ್‌ ಅವರು, "ಖರೀದಿ ಪ್ರಕ್ರಿಯೆಯಲ್ಲಿ ಹೊರ ರಾಜ್ಯದವರಿಗೆ ಯಾವುದೇ ರೀತಿ ಅಡೆತೆಗಳು ಎದುರಾಗಿಲ್ಲ. ಸರಾಗವಾಗಿ ಸ್ವತ್ತುಗಳನ್ನು ಹೊಸ ಮಾಲೀಕರ ಹೆಸರಿಗೆ ವರ್ಗಾಯಿಸಲಾಗಿದೆ," ಎಂದು ತಿಳಿಸಿದರು. "ಹೊರ ರಾಜ್ಯಗಳ ಬಹಳ ಮಂದಿ ಜಮ್ಮು-ಕಾಶ್ಮೀರದಲ್ಲಿ ಸ್ವತ್ತುಗಳ ಖರೀದಿಗೆ ಆಸಕ್ತಿ ತೋರುತ್ತಿದ್ದಾರೆ. ಆದರೆ ಅಧಿಕೃತವಾಗಿ ಸದ್ಯ ಕೇವಲ ಎರಡು ಸ್ವತ್ತುಗಳ ವ್ಯವಹಾರ ನಡೆಸಲಾಗಿದೆ," ಎಂದು ರಾಯ್‌ ಮಾಹಿತಿ ನೀಡಿದ್ದಾರೆ. ಸ್ವತ್ತು ಖರೀದಿ ಮಾಡಿದವರ ಹೆಸರನ್ನು ಅವರು ಬಹಿರಂಗಪಡಿಸಿಲ್ಲ. ಕರ್ನಾಟಕದ ಕೆಎಲ್‌ಇ ಸಂಸ್ಥೆ ಸಹ ಜಮ್ಮು-ಕಾಶ್ಮೀರದಲ್ಲಿ ಜಾಗ ಖರೀದಿಸಿ ಶಿಕ್ಷಣ ಸಂಸ್ಥೆಗಳನ್ನು ಆರಂಭಿಸುವುದಾಗಿ ಘೋಷಿಸಿತ್ತು. 2019ರ ಆ.5ರಂದು ಜಮ್ಮು -ಕಾಶ್ಮೀರಕ್ಕೆ ಹಲವು ದಶಕಗಳಿಂದ ನೀಡಲಾಗಿದ್ದ ವಿಶೇಷ ಸ್ಥಾನಮಾನವನ್ನು ಕೇಂದ್ರ ಸರಕಾರ ರದ್ದುಗೊಳಿಸಿತ್ತು. ಬಳಿಕ ಜಮ್ಮು-ಕಾಶ್ಮೀರ ಮತ್ತು ಲಡಾಕ್‌ ಕೇಂದ್ರಾಡಳಿತ ಪ್ರದೇಶಗಳನ್ನು ರಚಿಸಿದೆ. ಜಮ್ಮು-ಕಾಶ್ಮೀರವು ಭಾರತದ ಒಕ್ಕೂಟ ವ್ಯವಸ್ಥೆಯಲ್ಲಿ ವಿಲೀನವಾದ ಬಳಿಕ ದೇಶದ ಯಾವುದೇ ರಾಜ್ಯದ ಪ್ರಜೆ ಅಲ್ಲಿ ಆಸ್ತಿ ಖರೀದಿಸಬಹುದಾಗಿ. ಇದಕ್ಕೂ ಮೊದಲು ಬೇರೆ ರಾಜ್ಯಗಳ ಜನರು ಆಸ್ತಿ ಖರೀದಿಸುವುದಕ್ಕೆ ನಿರ್ಬಂಧವಿತ್ತು.