ಅರುಣಾಚಲ ಪ್ರದೇಶದ ಅಪಹೃತ ತರುಣನನ್ನು ಬಿಡುಗಡೆ ಮಾಡಿದ ಚೀನಾ
ಅರುಣಾಚಲ ಪ್ರದೇಶದಿಂದ ಜ. 18ರಂದು ಅಪಹರಣ ಮಾಡಲಾಗಿದ್ದ 17 ವರ್ಷದ ತರುಣನನ್ನು ಚೀನಾ ಪಿಎಲ್‌ಎ ಸೇನೆ ಭಾರತೀಯ ಸೇನೆಗೆ ಗುರುವಾರ ಹಸ್ತಾಂತರ ಮಾಡಿದೆ. ಈ ಮಾಹಿತಿಯನ್ನು ಕೇಂದ್ರ ಸಚಿವ ಕಿರೆನ್ ರಿಜಿಜು ಅವರು ಟ್ವಿಟ್ಟರ್‌ನಲ್ಲಿ ಹಂಚಿಕೊಂಡಿದ್ದಾರೆ.
Admin
0
4
ಹೊಸದಿಲ್ಲಿ: ಅರುಣಾಚಲ ಪ್ರದೇಶದಿಂದ ಪಡೆಗಳು ಅಪಹರಿಸಿದ್ದ 17 ವರ್ಷದ ತರುಣ ಮಿರಾಮ್ ತರೊನ್‌ನನ್ನು ಗುರುವಾರ ಬಿಡುಗಡೆ ಮಾಡಲಾಗಿದೆ. ಚೀನಾದ ಸೇನೆ ಜನವರಿ 18ರಂದು ಬಿಶಿಂಗ್ ಪ್ರದೇಶದ ಶಿಯುಂಗ್ ಲಾ ಎಂಬಲ್ಲಿಂದ ತರೊನ್‌ನನ್ನು ಅಪಹರಿಸಿದ್ದವು.
ಚೀನಾ ಪಿಎಲ್‌ಎ ಅರುಣಾಚಲ ಪ್ರದೇಶದ ಬಾಲಕ ಮಿರಾಮ್ ತರೊನ್ ಅವರನ್ನು ಭಾರತೀಯ ಸೇನೆಗೆ ಹಸ್ತಾಂತರಿಸಿದೆ. ವೈದ್ಯಕೀಯ ತಪಾಸಣೆ ಸೇರಿದಂತೆ ಬಾಕಿ ಪ್ರಕ್ರಿಯೆಗಳು ನಡೆಯುತ್ತಿವೆ' ಎಂದು ಕೇಂದ್ರ ಸಚಿವ ಕಿರೆನ್ ರಿಜಿಜು ಅವರು ಗುರುವಾರ ಟ್ವಿಟ್ಟರ್‌ನಲ್ಲಿ ಮಾಹಿತಿ ನೀಡಿದ್ದಾರೆ.
ಇದಕ್ಕೂ ಮುನ್ನ ಬುಧವಾರ ಮಾಹಿತಿ ನೀಡಿದ್ದ ರಿಜಿಜು, 'ಅರುಣಾಚಲ ಪ್ರದೇಶದ ತರುಣ ಮಿರಾಮ್ ತರೊನ್ ಅವರನ್ನು ಭಾರತದ ವಶಕ್ಕೆ ಒಪ್ಪಿಸುವುದಾಗಿ ಚೀನಾ ಪಿಎಲ್‌ಎ ಖಚಿತಪಡಿಸಿದೆ. ಸುಗಮ ಹಸ್ತಾಂತರ ಪ್ರಕ್ರಿಯೆಗಾಗಿ ನಾವು ನಿರ್ದಿಷ್ಟ ಸ್ಥಳ ಮತ್ತು ಸಮಯವನ್ನು ಬಹಿರಂಗಪಡಿಸಲಿದ್ದೇವೆ. ಅದಕ್ಕೆ ಅನುಗುಣವಾಗಿ ಭಾರತೀಯ ಸೇನೆಯು ಚೀನಾ ಸೇನೆ ಜತೆ ಅಗತ್ಯ ವ್ಯವಸ್ಥೆಗಳನ್ನು ಮಾಡಲಿದೆ' ಎಂದು ತಿಳಿಸಿದ್ದರು.
ತರೊನ್ ಬಿಡುಗಡೆಗಾಗಿ ಗಣರಾಜ್ಯೋತ್ಸವ ದಿನದಂದು ಚೀನಾ ಪಿಎಲ್‌ಎ ಜತೆಗೆ ಹಾಟ್‌ಲೈನ್ ಸಂಪರ್ಕ ನಡೆಸಿತ್ತು. ಇದಕ್ಕೆ ಸಕಾರಾತ್ಮಕವಾಗಿ ಸ್ಪಂದಿಸಿದ್ದ ಚೀನಾ, ಬಾಲಕನ ಬಿಡುಗಡೆಗೆ ಒಪ್ಪಿಕೊಂಡಿತ್ತು.
ಅಪ್ಪರ್ ಸಿಯಾಂಗ್ ಜಿಲ್ಲೆಯ ಜಿಡೊ ಗ್ರಾಮದ ನಿವಾಸಿಯಾಗಿರುವ ಮಿರಾಮ್ ತರೊನ್‌ನನ್ನು ಜ. 18ರಂದು ಚೀನಾ ಸೈನಿಕರು ಮಾಡಿದ್ದರು. ತರೊನ್‌ನ ಸ್ನೇಹಿತ ಜಾನಿ ಯೈಯಿಂಗ್, ಪಿಎಲ್‌ಎ ಸೈನಿಕರಿಂದ ತಪ್ಪಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದು, ಈ ಅಪಹರಣ ಘಟನೆ ಬಗ್ಗೆ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದ. ಇಬ್ಬರೂ ಸ್ಥಳೀಯ ಬೇಟೆಗಾರರಾಗಿದ್ದು, ಬೇಟೆ ಹಾಗೂ ಗಿಡಮೂಲಿಕೆಗಳನ್ನು ತರುವ ಉದ್ದೇಶದಿಂದ ಕಾಡಿಗೆ ತೆರಳಿದ್ದರು. ಆಗ ಈ ಅಪಹರಣ ನಡೆದಿತ್ತು.
'ಚೀನಾದ ಪಿಎಲ್‌ಎ ಜಿಡೊ ಗ್ರಾಮದ ಮಿರಾಮ್ ತರೊನ್ ಎಂಬ 17 ವರ್ಷದ ಬಾಲಕನನ್ನು ಅಪಹರಣ ಮಾಡಿದೆ. ಜನವರಿ 18ರಂದು ಭಾರತದ ಭೂಪ್ರದೇಶದ ಒಳಗಿನ, ಅಪ್ಪರ್ ಸಿಯಾಂಗ್ ಜಿಲ್ಲೆಯ ಸಿಯುಂಗ್ಲಾ ಪ್ರದೇಶದ (ಬಿಶಿಂಗ್ ಗ್ರಾಮ) ಲುಂಗ್ತಾ ಜೊರ್ ಸ್ಥಳದಿಂದ (
2018ರಲ್ಲಿ ಭಾರತದ ಒಳಗೆ 3-4 ಕಿಮೀ ರಸ್ತೆ ನಿರ್ಮಿಸಿದೆ) ಅಪಹರಿಸಿದೆ' ಎಂದು ಸಂಸದ ತಾಪಿರ್ ಗಾವೊ ಟ್ವೀಟ್ ಮಾಡಿದ್ದರು.
ಅಪಹೃತ ಬಾಲಕನ ಚಿತ್ರವನ್ನು ಹಂಚಿಕೊಂಡು ಮತ್ತೊಂದು ಟ್ವೀಟ್ ಮಾಡಿದ್ದ ತಾಪಿರ್, 'ಬಾಲಕನ ಶೀಘ್ರ ಬಿಡುಗಡೆಗೆ ಭಾರತ ಸರ್ಕಾರದ ಎಲ್ಲ ಸಂಸ್ಥೆಗಳೂ ಕ್ರಮ ತೆಗೆದುಕೊಳ್ಳಬೇಕು ಎಂದು ಮನವಿ ಮಾಡುತ್ತೇನೆ' ಎಂದು ಹೇಳಿದ್ದರು.
'ಗಣರಾಜ್ಯ ದಿನದ ಕೆಲವೇ ದಿನ ಮೊದಲು, ಭಾರತದ ಭವಿಷ್ಯವಾದ, ಬಾಲಕನನ್ನು ಚೀನಾ ಅಪಹರಣ ಮಾಡಿದೆ. ಮಿರಾಮ್ ತರೊನ್ ಕುಟುಂಬದ ಜತೆ ನಾವಿದ್ದೇವೆ ಮತ್ತು ನಮ್ಮ ಭರವಸೆಯನ್ನು ಬಿಡುವುದಿಲ್ಲ. ಸೋಲು ಒಪ್ಪಿಕೊಳ್ಳುವುದಿಲ್ಲ' ಎಂದು ಟ್ವೀಟ್ ಮಾಡಿದ್ದ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, 'ಪ್ರಧಾನಿ ಅವರ ಮೌನವೇ ಅವರ ಹೇಳಿಕೆ... ಅವರು ಇದಕ್ಕೆಲ್ಲ ತಲೆಕೆಡಿಸಿಕೊಳ್ಳುವುದಿಲ್ಲ' ಎಂದು ವ್ಯಂಗ್ಯವಾಡಿದ್ದರು.
