ಅಯೋಧ್ಯೆಯಲ್ಲಿ 'ತಿರಂಗಾ ಯಾತ್ರೆ': ಬಿಜೆಪಿ ವಿರುದ್ಧ 'ಹಿಂದುತ್ವ'ದ ಮಂತ್ರ ಜಪಿಸಿದ ಎಎಪಿ

ಹೊಸದಿಲ್ಲಿ: ದಿಲ್ಲಿ ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಮತ್ತು ರಾಜ್ಯಸಭೆ ಸಂಸದ ಸಂಜಯ್ ಸಿಂಗ್ ನೇತೃತ್ವದಲ್ಲಿ ಸೆಪ್ಟೆಂಬರ್ 14ರಂದು ಅಯೋಧ್ಯಾದಲ್ಲಿ 'ತಿರಂಗ ಯಾತ್ರೆ' ನಡೆಸಲು ಆಮ್ ಆದ್ಮಿ ಪಕ್ಷ ಉದ್ದೇಶಿಸಿದ್ದು, ಈ ಯಾತ್ರೆಯು ರಾಮ ಲಲ್ಲಾ ದೇವಸ್ಥಾನದಲ್ಲಿ ವಿರಾಮ ಪಡೆದು ಬಳಿಕ ಹನುಮಾನ್‌ಗರ್ಹಿ ಮಾರ್ಗದಲ್ಲಿ ಸಾಗಲಿದೆ. ಶಾಲೆಗಳಲ್ಲಿ 'ದೇಶಭಕ್ತಿ' ಕೋರ್ಸ್‌ಗಳನ್ನು ಪರಿಚಯಿಸಿದ ಬಳಿಕ , ಬಿಜೆಪಿಯ ವಿಭಜನೀಯ ರಾಜಕೀಯ ಸಿದ್ಧಾಂತಕ್ಕಿಂತ ವಿಭಿನ್ನವಾದ ರೀತಿಯಲ್ಲಿ ಹಿಂದೂ ಅಸ್ಮಿತೆ, ಧರ್ಮ ಹಾಗೂ ರಾಷ್ಟ್ರೀಯತೆಯನ್ನು ರೂಪಿಸುವ ಸಂದೇಶ ಸಾರಲು ಈ ಯಾತ್ರೆ ನಡೆಸುತ್ತಿರುವುದಾಗಿ ತಿಳಿಸಿದೆ. ದಿಲ್ಲಿಯಲ್ಲಿ ಪ್ರಾಬಲ್ಯ ಸಾಧಿಸಿರುವ ಎಎಪಿ, ಉತ್ತರ ಪ್ರದೇಶ, ಗುಜರಾತ್ ಮತ್ತು ಉತ್ತರಾಖಂಡ ರಾಜ್ಯಗಳಲ್ಲಿ ತನ್ನ ಬೇರು ಮೂಡಿಸುವ ಪ್ರಯತ್ನವಾಗಿ ಹಿಂದೂ ಧರ್ಮದ ವಿಚಾರಗಳನ್ನು ಮುಂದಿಟ್ಟು ವಿಭಿನ್ನ ಕಾರ್ಯತಂತ್ರ ರೂಪಿಸುತ್ತಿದೆ. ಉತ್ತರಾಖಂಡದಲ್ಲಿ ಅದು ಭಾರತೀಯ ಸೇನೆಯ ಮಾಜಿ ಕರ್ನಲ್ ಅಜಯ್ ಕೋಥಿಯಾಲ್ ಅವರನ್ನು ಮುಖ್ಯಮಂತ್ರಿ ಅಭ್ಯರ್ಥಿಯನ್ನಾಗಿ ಕಣಕ್ಕಿಳಿಸಲು ಮುಂದಾಗಿದೆ. ಉತ್ತರಾಖಂಡವನ್ನು ಹಿಂದೂಗಳ ಆಧ್ಯಾತ್ಮಿಕ ರಾಜಧಾನಿಯನ್ನಾಗಿ ಪರಿವರ್ತಿಸುವ ಭರವಸೆ ನೀಡಿದೆ. ಅಯೋಧ್ಯಾ ಕಾರ್ಯಕ್ರಮಕ್ಕೂ ಮುನ್ನ ಆಗ್ರಾ ಹಾಗೂ ನೋಯ್ಡಾಗಳಲ್ಲಿ ಎಎಪಿಯ ನಡೆಯಲಿದೆ. ಈ ಎರಡೂ ಸಮಾವೇಶಗಳಲ್ಲಿ ಮನೀಶ್ ಸಿಸೋಡಿಯಾ ಹಾಗೂ ಸಂಜಯ್ ಸಿಂಗ್ ಭಾಗವಹಿಸಲಿದ್ದಾರೆ. ದಿಲ್ಲಿಯಲ್ಲಿ ಎಎಪಿ ನೇತೃತ್ವದ ಸರ್ಕಾರವು ನಗರದಾದ್ಯಂತ ಸುಮಾರು 85 ಕೋಟಿ ರೂ ವೆಚ್ಚದಲ್ಲಿ, ಎತ್ತರದಲ್ಲಿ 500 ತ್ರಿವರ್ಣ ಧ್ವಜಗಳನ್ನು ಅಳವಡಿಸುತ್ತಿದೆ. 'ದೇಶದ 75ನೇ ಸ್ವಾತಂತ್ರ್ಯೋತ್ಸವದ ಸಂದರ್ಭದಲ್ಲಿ ಮುಂದಿನ ವರ್ಷದವರೆಗೂ ಪಕ್ಷವು ಸರಣಿ ಕಾರ್ಯಕ್ರಮಗಳನ್ನು ನಡೆಸಲಿದೆ. ಇದರ ಸಂದೇಶ ಬಹಳ ಸರಳ: ಬಿಂಬಿಸಿಕೊಳ್ಳುವ ರಾಷ್ಟ್ರೀಯವಾದ ಭಾರತಕ್ಕೆ ಹಾನಿ ಮಾಡುತ್ತಿದೆ. ಜನರಿಗೆ ಅವರ ಹಕ್ಕುಗಳನ್ನು ನೀಡುವುದರಲ್ಲಿನ ರಾಷ್ಟ್ರೀಯವಾದವನ್ನು ಎಎಪಿ ನಂಬುತ್ತದೆ. ಅದು ಉತ್ತಮ ಶಿಕ್ಷಣ ಅಥವಾ ಆರೋಗ್ಯಕ್ಷೇತ್ರ ಸುಧಾರಣೆ ಇರಬಹುದು. ನಮ್ಮ ಪಾಲಿಗೆ ತ್ರಿವರ್ಣ ಧ್ವಜದೆಡೆಗಿನ ಪ್ರೀತಿಯೇ ದೇಶದ ದೃಷ್ಟಿಕೋನ, ಅದರ ಅಭಿವೃದ್ಧಿ ಮತ್ತು ಜನರ ಕ್ಷೇಮವನ್ನು ಪ್ರತಿನಿಧಿಸುತ್ತದೆ' ಎಂದು ಸಂಜಯ್ ಸಿಂಗ್ ಹೇಳಿದ್ದಾರೆ.