'ಭದ್ರತೆ ಉಲ್ಲಂಘಿಸಿದ ರೈತರ ತಲೆ ಒಡೆಯಿರಿ': ಭಾರಿ ವಿವಾದಕ್ಕೆ ಎಡೆಮಾಡಿದ ಐಎಎಸ್ ಅಧಿಕಾರಿ ಆದೇಶ

ಚಂಡೀಗಡ: ಕೃಷಿ ಕಾಯ್ದೆಗಳ ವಿರುದ್ಧ ನಡೆಸುವ ವೇಳೆ ರಸ್ತೆ ತಡೆ ನಡೆಸುತ್ತಿದ್ದ ರೈತರ ತಲೆ ಒಡೆಯುವಂತೆ ಐಎಎಸ್ ಅಧಿಕಾರಿಯೊಬ್ಬರು ಪೊಲೀಸರಿಗೆ ಸೂಚನೆ ನೀಡುವ ಕ್ರೌರ್ಯದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ. ಕರ್ನಾಲ್ ಉಪ ವಿಭಾಗೀಯ ಮ್ಯಾಜಿಸ್ಟ್ರೇಟ್ ಮತ್ತು ಕೇಡರ್‌ನ 2018ನೇ ಬ್ಯಾಚಿನ ಆಯುಷ್ ಸಿನ್ಹಾ, ಪ್ರತಿಭಟನಾಕಾರರನ್ನು ಚೆನ್ನಾಗಿ ಥಳಿಸಿ ಮತ್ತು ಭದ್ರತಾ ವಲಯವನ್ನು ಉಲ್ಲಂಘಿಸುವ ಯಾರೇ ಆದರೂ ಅವರ 'ತಲೆ ಒಡೆಯದೆ' ಬಿಡಬೇಡಿ ಎಂದು ಹೇಳಿರುವುದು ವಿಡಿಯೋಗಳಲ್ಲಿ ಸೆರೆಯಾಗಿದೆ. ಐಎಎಸ್ ಅಧಿಕಾರಿಯ ಅಮಾನವೀಯ ಆದೇಶ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಈ ಪ್ರತಿಭಟನೆಯಲ್ಲಿ ರೈತರ ಮೇಲೆ ಪೊಲೀಸರು ಮನಬಂದಂತೆ ಲಾಠಿ ಪ್ರಹಾರ ನಡೆಸಿದ್ದು, ಅನೇಕ ರೈತರ ತಲೆ ಮತ್ತು ಮೈಯಿಂದ ರಕ್ತ ಸುರಿಯುತ್ತಿರುವ ಚಿತ್ರಗಳು ಎದೆ ನಡುಗಿಸುವಂತಿವೆ. ಟೋಲ್ ಪ್ಲಾಜಾಗಳು ಸೇರಿದಂತೆ ಹೆದ್ದಾರಿಗಳಲ್ಲಿ ತಡೆಯೊಡ್ಡಿದ್ದ ರೈತರನ್ನು ಚೆದುರಿಸಲು ಪೊಲೀಸರು ಬಲಪ್ರಯೋಗ ನಡೆಸಿದ್ದರು. 'ಅವರಿಗೆ ಸರಿಯಾಗಿ ಬಾರಿಸಿ. ಈ ವಲಯವನ್ನು ದಾಟಿ ಹೋಗಲು ಅವರಿಗೆ ಬಿಡಬಾರದು. ನಮ್ಮ ಬಳಿ ಸಾಕಷ್ಟು ಬಲವಿದೆ. ಕಳೆದ ಎರಡು ದಿನಗಳಿಂದ ನಾವು ನಿದ್ದೆ ಮಾಡಿಲ್ಲ. ಆದರೆ ನೀವಿಲ್ಲಿ ಸ್ವಲ್ಪ ನಿದ್ದೆ ಮಾಡಿದ ಬಳಿಕ ಬಂದಿದ್ದೀರಿ. ಈ ಬೇಲಿಯನ್ನು ಯಾರೂ ದಾಟಿ ನನ್ನ ಬಳಿ ಬರಬಾರದು. ಯಾರಾದರೂ ಹಾಗೆ ಮಾಡಿದರೆ, ಅವರ ತಲೆ ಒಡೆದಿರಬೇಕು, ಹಾಗೆ ನೋಡಿಕೊಳ್ಳಿ. ಇದು ಅರ್ಥವಾಯಿತು ಎಂದುಕೊಳ್ಳುತ್ತೇನೆ' ಎಂದು ಆಯುಷ್ ಸಿನ್ಹಾ ಹೇಳಿದ್ದಾರೆ. ಸಿನ್ಹಾ ಹೇಳಿಕೆ ಆಕ್ರೋಶಕ್ಕೆ ಕಾರಣವಾಗಿದೆ. ಅವರನ್ನು ಸೇವೆಯಿಂದ ಅಮಾನತು ಮಾಡುವಂತೆ ರೈತ ಮುಖಂಡರು ಮತ್ತು ರಾಜಕೀಯ ಪಕ್ಷಗಳು ಆಗ್ರಹಿಸಿವೆ. ಸಿನ್ಹಾ ಅವರ ವಿವಾದಾತ್ಮಕ ಹೇಳಿಕೆಗೆ ಸರ್ಕಾರದ ಯಾವುದೇ ಅಧಿಕಾರಿಗಳು ಪ್ರತಿಕ್ರಿಯೆ ನೀಡಿಲ್ಲ. ಈ ಹೇಳಿಕೆಯನ್ನು ಕೆಲವರು ಸಮರ್ಥಿಸಿಕೊಳ್ಳಲು ಪ್ರಯತ್ನಿಸಿದ್ದು, ಅವರು ತಪ್ಪೇನೂ ಹೇಳಿಲ್ಲ. ಅಂತಹ ಒತ್ತಡದ ಸಮಯದಲ್ಲಿ ತಮ್ಮ ಕೆಲಸ ಮಾಡಿದ್ದಾರೆ ಅಷ್ಟೇ ಎಂದಿದ್ದಾರೆ. ಸಿನ್ಹಾ ಸಮರ್ಥನೆ ತಮ್ಮ ಆದೇಶವನ್ನು ಸಮರ್ಥಿಸಿಕೊಂಡಿರುವ ಸಿನ್ಹಾ, 'ಪ್ರತಿಭಟನೆಯ ಸ್ಥಳದಿಂದ ಮುಖ್ಯಮಂತ್ರಿ ಮನೋಹರ ಲಾಲ್ ಖಟ್ಟರ್ ನೇತೃತ್ವದಲ್ಲಿ ಸಭೆ ನಡೆಯುತ್ತಿದ್ದ ಸ್ಥಳಕ್ಕೆ ಮೂರು ತಪಾಸಣಾ ನೆಲೆಗಳಿದ್ದವು. ನಾನು ಮೂರನೇ ಹಾಗೂ ಕೊನೆಯ ನೆಲೆಯಲ್ಲಿ ನಿಯೋಜನೆಗೊಂಡಿದ್ದೆ. ನನ್ನ ನಂತರ ಯಾವುದೇ ತಪಾಸಣಾ ನೆಲೆ ಇರಲಿಲ್ಲ. ಅದು ನೇರವಾಗಿ ಸಭೆಯ ಸ್ಥಳಕ್ಕೆ ಪ್ರವೇಶ ಕಲ್ಪಿಸುತ್ತಿತ್ತು. ಅಂದರೆ, ಯಾವುದೇ ವ್ಯಕ್ತಿ ಅಲ್ಲಿಗೆ ತಲುಪಿದರೆ ಆತ ಎರಡು ಬೇಲಿಗಳನ್ನು ದಾಟಿ ಬಂದಿದ್ದಾನೆ ಎಂದರ್ಥ. ಮೂರನೇ ತಡೆಯನ್ನೂ ದಾಟಿದರೆ ದೊಡ್ಡ ದಾಂದಲೆಗೆ ಅವಕಾಶ ನೀಡುವ ಸಾಧ್ಯತೆ ಇತ್ತು. ಪ್ರತಿಭಟನಾ ಗುಂಪುಗಳಲ್ಲಿ ಖಂಡಿತವಾಗಿಯೂ ದುಷ್ಕರ್ಮಿಗಳು ಸೇರಿಕೊಂಡಿರುತ್ತಾರೆ. ಇದರಿಂದ ಭದ್ರತಾ ಬೆದರಿಕೆ ಸಹಜವಾಗಿಯೇ ಇರುತ್ತದೆ' ಎಂದಿದ್ದಾರೆ. 'ಈ ಅಂಶಗಳನ್ನು ಗಮನದಲ್ಲಿಟ್ಟುಕೊಂಡು, ನಾನು ನನ್ನ ಸ್ಥಳದಲ್ಲಿರುವ ಭದ್ರತಾ ಪಡೆಗಳಿಗೆ ಸೂಚನೆ ನೀಡುತ್ತಿದ್ದೆ. ನಾನು ಸಿಆರ್‌ಪಿಸಿ ಅಡಿಯಲ್ಲಿನ ನಿಯಮಗಳು, ಪ್ರಕ್ರಿಯೆಗಳಿಗೆ ಅನುಗುಣವಾಗಿಯೇ ಅವರಿಗೆ ಸೂಚನೆ ನೀಡಿದ್ದೆ. ಪ್ರತಿಭಟನಾಕಾರರಿಗೆ ಎಚ್ಚರಿಕೆ ನೀಡಬೇಕು. ಬಳಿಕ ಜಲಫಿರಂಗಿ ಬಳಸಬಹುದು. ಅಶ್ರುವಾಯು ಸಿಡಿಸುವ ಬಗ್ಗೆ ಘೋಷಣೆ ನೀಡಬಹುದು ಮತ್ತು ಕೊನೆಗೆ ಅಗತ್ಯಬಿದ್ದರೆ ಲಾಠಿ ಚಾರ್ಜ್ ನಡೆಸಬೇಕಾಗಬಹುದು ಎಂದು ತಿಳಿಸಿದ್ದೆ' ಎಂದು ಹೇಳಿದ್ದಾರೆ. ಈಗ ಹರಿದಾಡುತ್ತಿರುವ ವಿಡಿಯೋ ದುರುದ್ದೇಶಪೂರ್ವಕವಾಗಿ ತಿದ್ದಲಾಗಿದೆ. ಲಾಠಿ ಚಾರ್ಜ್‌ಗೆ ಸಂಬಂಧಿಸಿದ ಕೆಲವು ಆಯ್ದ ಭಾಗಗಳನ್ನಷ್ಟೇ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಮಾಡಲಾಗಿದೆ ಎಂದು ಅವರು ಆರೋಪಿಸಿದ್ದಾರೆ.