ಅಮೆರಿಕದ ಬ್ಯಾಟರಿ ತಂತ್ರಜ್ಞಾನ ಕಂಪನಿಯಲ್ಲಿ ಭಾರೀ ಹೂಡಿಕೆ ಘೋಷಿಸಿದ ರಿಲಯನ್ಸ್‌!

ಹೊಸದಿಲ್ಲಿ: ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ (ಆರ್‌ಐಎಲ್) ಒಡೆತನದ ಅಂಗಸಂಸ್ಥೆ'ರಿಲಯನ್ಸ್ ನ್ಯೂ ಎನರ್ಜಿ ಸೋಲಾರ್ ಲಿಮಿಟೆಡ್' (ಆರ್‌ಎನ್ಇಎಸ್ಎಲ್) ಸೇರಿದಂತೆ ವಿಶ್ವದ ಹಲವು ದೊಡ್ಡ ದೊಡ್ಡ ಕಂಪನಿಗಳು ಅಮೆರಿಕ ಮೂಲದ ಇಂಧನ ಸಂಗ್ರಹಣಾ ಕಂಪನಿಯಲ್ಲಿ ಬೃಹತ್‌ ಮೊತ್ತದ ಹೂಡಿಕೆ ಮಾಡುವುದಾಗಿ ಘೋಷಿಸಿವೆ. ಅಮೆರಿಕದ ಮೆಸ್ಸಾಚುಸೆಟ್ಸ್‌ನಲ್ಲಿರುವ ಇಂಧನ ಸಂಗ್ರಹಣ ಕಂಪನಿ 'ಅಂಬ್ರಿ ಇಂಕ್' (Ambri Inc) ನಲ್ಲಿ ರಿಲಯನ್ಸ್‌, ಪಾಲ್ಸನ್ ಮತ್ತು ಕಂಪನಿ ಮತ್ತು ಬಿಲ್ ಗೇಟ್ಸ್ ಸೇರಿದಂತೆ ಇತರೆ ಹಲವು ಹೂಡಿಕೆದಾರರು ಬರೋಬ್ಬರಿ $144 ಮಿಲಿಯನ್ ಹೂಡಿಕೆ ಮಾಡುವುದಾಗಿ ಘೋಷಿಸಿದ್ದಾರೆ. ಇಷ್ಟು ಬೃಹತ್‌ ಮೊತ್ತದ ಹೂಡಿಕೆಯಿಂದ ಕಂಪನಿಯು ತನ್ನ ದೀರ್ಘಾವಧಿಯ ಇಂಧನ ಶೇಖರಣಾ ವ್ಯವಸ್ಥೆಯನ್ನು ಜಾಗತಿಕವಾಗಿ ಅಭಿವೃದ್ಧಿ ಮಾಡಲು ಸಹಾಯವಾಗಲಿದೆ. ಆಂಬ್ರಿಯಲ್ಲಿ 42.3 ಮಿಲಿಯನ್ ಷೇರುಗಳನ್ನು ಸ್ವಾಧೀನಪಡಿಸಿಕೊಳ್ಳುವ ಸಲುವಾಗಿ ರಿಲಯನ್ಸ್‌ 50 ಮಿಲಿಯನ್ ಡಾಲರ್ ಹೂಡಿಕೆ ಮಾಡಲಿದೆ, '' ಎಂದು ಆರ್‌ಐಎಲ್ ತಿಳಿಸಿದೆ. ಗ್ರಿಡ್-ಸ್ಕೇಲ್ ಸ್ಟೇಷನರಿ ಸ್ಟೋರೇಜ್ ಅಪ್ಲಿಕೇಶನ್‌ಗಳಲ್ಲಿ ಬಳಸುವ ಲಿಥಿಯಂ-ಐಯಾನ್ ಬ್ಯಾಟರಿಗಳಿಗೆ ಸಂಬಂಧಿಸಿದ ವೆಚ್ಚ, ದೀರ್ಘ ಬಾಳಿಕೆ, ಸುರಕ್ಷತೆಯ ನಿಟ್ಟಿನಲ್ಲಿ ಇದ್ದ ಅಡೆತಡೆಗಳಿಗೆಅಂಬ್ರಿಯ ದೀರ್ಘಾವಧಿಯ ಶಕ್ತಿ ಶೇಖರಣಾ ವ್ಯವಸ್ಥೆ ಪರಿಹಾರ ಒದಗಿಸಲಿದೆ. ರಿಲಯನ್ಸ್‌ನ ಆರ್‌ಎನ್‌ಇಎಸ್‌ಎಲ್ ಮತ್ತು ಅಂಬ್ರಿ ಸಹಯೋಗದಲ್ಲಿ ಭಾರತದಲ್ಲಿ ದೊಡ್ಡ ಪ್ರಮಾಣದ ಉತ್ಪಾದನಾ ಘಟಕ ಸ್ಥಾಪಿಸಲು ಚರ್ಚೆ ನಡೆಯುತ್ತಿದೆ. ಇದು ರಿಲಯನ್ಸ್‌ನ ಹಸಿರು ಇಂಧನ ಪ್ರಮಾಣ ಹೆಚ್ಚಿಸುವ ಜತೆಗೆ ವೆಚ್ಚವನ್ನು ಇನ್ನಷ್ಟು ತಗ್ಗಿಸಬಹುದು. ಕಳೆದ ಜೂನ್‌ನಲ್ಲಿ ಷೇರುದಾರರನ್ನು ಉದ್ದೇಶಿಸಿ, ರಿಲಯನ್ಸ್ ಇಂಡಸ್ಟ್ರೀಸ್ ಅಧ್ಯಕ್ಷ ಮುಖೇಶ್ ಅಂಬಾನಿ ಮಾತನಾಡಿ, 'ಧೀರೂಭಾಯಿ ಅಂಬಾನಿ ಗ್ರೀನ್ ಎನರ್ಜಿ ಗಿಗಾ ಕಾಂಪ್ಲೆಕ್ಸ್' ಯೋಜನೆಯ ಭಾಗವಾಗಿದೆ. ಜಾಮ್‌ನಗರದಲ್ಲಿ ಗಿಗಾ ಫ್ಯಾಕ್ಟರಿ ನಿರ್ಮಿಸುವುದಾಗಿ ಘೋಷಿಸಿದರು. "ನಾವು ಉತ್ಪಾದಿಸುವ ಶಕ್ತಿಯನ್ನು ಸಂಗ್ರಹಿಸಲು ಅಂತಹ ದೊಡ್ಡ-ಪ್ರಮಾಣದ ಗ್ರಿಡ್ ಬ್ಯಾಟರಿಗಳಿಗೆ ಬಳಸಬಹುದಾದ ಹೊಸ ಮತ್ತು ಸುಧಾರಿತ ಎಲೆಕ್ಟ್ರೋ-ರಾಸಾಯನಿಕ ತಂತ್ರಜ್ಞಾನಗಳನ್ನು ಅನ್ವೇಷಿಸುತ್ತಿದ್ದೇವೆ. ಉತ್ಪಾದನೆ, ಸಂಗ್ರಹಣೆ ಮತ್ತು ಗ್ರಿಡ್ ಸಂಪರ್ಕದ ಸಂಯೋಜನೆಯ ಮೂಲಕ ಸುತ್ತಲಿನ ವಿದ್ಯುತ್ ಲಭ್ಯತೆಗಾಗಿ ಹೆಚ್ಚಿನ ವಿಶ್ವಾಸಾರ್ಹತೆ ಸಾಧಿಸಲು ಬ್ಯಾಟರಿ ತಂತ್ರಜ್ಞಾನದಲ್ಲಿ ಜಾಗತಿಕ ನಾಯಕರೊಂದಿಗೆ ಸಹಕರಿಸುತ್ತೇವೆ "ಎಂದು ಅಂಬಾನಿ ಘೋಷಿಸಿದರು.