'ಅನಂತ್‌ ನಾಗ್‌ ಸರ್‌ 'ದೃಶ್ಯ 2' ಚಿತ್ರದಲ್ಲಿ ನಟಿಸುತ್ತಿರುವುದು ಹೆಚ್ಚು ಖುಷಿ ನೀಡಿದೆ'- ಆರೋಹಿ ನಾರಾಯಣ್
ಮಲಯಾಳಂನಲ್ಲಿ ಮೋಹನ್‌ಲಾಲ್, ಮೀನಾ ನಟಿಸಿದ್ದ 'ದೃಶ್ಯಂ 2' ಚಿತ್ರವು ಕನ್ನಡಕ್ಕೂ ರಿಮೇಕ್ ಆಗುತ್ತಿದ್ದು, 'ದೃಶ್ಯ' ಮೊದಲ ಭಾಗದಲ್ಲಿ ರವಿಚಂದ್ರನ್‌ ಮಗಳಾಗಿ ನಟಿಸಿದ್ದ ನಟಿ ಆರೋಹಿ ನಾರಾಯಣ್ ಇದರಲ್ಲೂ ಮುಖ್ಯ ಪಾತ್ರದಲ್ಲಿಇರಲಿದ್ದಾರೆ.
Admin
0
6
ಪದ್ಮಾ ಶಿವಮೊಗ್ಗ
ಮಲಯಾಳಂನ 'ದೃಶ್ಯಂ' ಚಿತ್ರದ ರೀಮೇಕ್‌ 'ದೃಶ್ಯ'. ಕನ್ನಡದಲ್ಲಿ ರವಿಚಂದ್ರನ್‌ ನಟನೆಯ ಈ ಚಿತ್ರ ತೆರೆಕಂಡ 7 ವರ್ಷಗಳ ನಂತರ ಇದರ ಎರಡನೇ ಭಾಗ ಸೆಟ್ಟೇರಿದೆ. ಈಗಾಗಲೇ ಮಲಯಾಳಂನಲ್ಲಿ 'ದೃಶ್ಯಂ 2' ರಿಲೀಸ್‌ ಆಗಿದ್ದು, ಕನ್ನಡದಲ್ಲಿ ರೀಮೇಕ್‌ ಮಾಡಲಾಗುತ್ತಿದೆ. 'ದೃಶ್ಯ' ಚಿತ್ರದಲ್ಲಿ ರವಿಚಂದ್ರನ್‌ ಮೊದಲ ಪುತ್ರಿಯಾಗಿ ನಟಿಸಿದ್ದ ಆರೋಹಿ ನಾರಾಯಣ್ ಈಗ '' ಚಿತ್ರದಲ್ಲೂಅದೇ ಪಾತ್ರದಲ್ಲಿ ನಟಿಸಲಿದ್ದಾರೆ.
'ದೃಶ್ಯಂ 2 ಚಿತ್ರದಲ್ಲಿ ನಟಿಸುವ ಅವಕಾಶ ಮತ್ತೆ ಬಂದಿದ್ದು ಖುಷಿ ಸಿಕ್ಕಿದೆ. ಈಗಾಗಲೇ ನಾನು 'ಭೀಮಸೇನ ನಳಮಹಾರಾಜ' ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದೆ. ಮತ್ತೆ ಈ ಜಾನರ್‌ನಲ್ಲಿ ನಟಿಸಬೇಕಾ ಎಂಬ ಆಲೋಚನೆ ಇದ್ದರೂ, 'ದೃಶ್ಯ' ಚಿತ್ರವಾಗಿದ್ದರಿಂದ ಬಿಡಲು ಇಷ್ಟವಾಗಲಿಲ್ಲ. ನಿರ್ದೇಶಕ ಪಿ. ವಾಸು ಅವರು ಇಲ್ಲಿನ ನೇಟಿವಿಟಿಗೆ ತಕ್ಕಂತೆ ರೀಮೇಕ್‌ ಮಾಡಲು ನಿರ್ಧರಿಸಿದ್ದಾರೆ. ಹಾಗಾಗಿ ಆ ಪಾತ್ರವನ್ನು ಪಾತ್ರವನ್ನು ಅರ್ಥ ಮಾಡಿಕೊಂಡು ನಿನಗೆ ಸರಿ ಎನ್ನಿಸಿದ ಹಾಗೆ ನಟಿಸು ಅಂತ ನನಗೆ ಸ್ವಾತಂತ್ರ್ಯವನ್ನೂ ನೀಡಿದ್ದಾರೆ. ನನ್ನ ಪಾಲಿನ ದೃಶ್ಯಗಳ ಚಿತ್ರೀಕರಣ ಇನ್ನೂ ಪ್ರಾರಂಭವಾಗಿಲ್ಲ. ಬೆಂಗಳೂರಿನ ಚಿತ್ರೀಕರಣದ ನಂತರ ಕೂರ್ಗ್‌ಗೆ ಶಿಫ್ಟ್‌ ಆಗಲಿದ್ದಾರೆ. ಈಗ ಅಲ್ಲಿ ಮಳೆ ಇದೆ. ಪರಿಸ್ಥಿತಿ ನೋಡಿಕೊಂಡು ಶೂಟಿಂಗ್‌ ಶೆಡ್ಯೂಲ್‌ ಹಾಕಲಿದ್ದಾರೆ' ಎಂದಿದ್ದಾರೆ ಆರೋಹಿ. ಚಿತ್ರದಲ್ಲಿ ಆಘಾತದಿಂದ ಡಿಪ್ರೆಷನ್‌ಗೆ ಒಳಗಾದ ಮಗಳ ಪಾತ್ರದಲ್ಲಿ ಅವರು ನಟಿಸುತ್ತಿದ್ದಾರೆ. ಪತ್ನಿಯ ಪಾತ್ರದಲ್ಲಿ ನವ್ಯಾ ನಾಯರ್‌ ನಟಿಸುತ್ತಿದ್ದಾರೆ.
'ದೃಶ್ಯಂ 2' ಚಿತ್ರದ ಶೂಟಿಂಗ್‌ ಈಗಾಗಲೇ ಬೆಂಗಳೂರಿನಲ್ಲಿ ಶುರುವಾಗಿದೆ. ಇದರಲ್ಲಿ ಅನಂತ್‌ ನಾಗ್‌ ಮುಖ್ಯ ಪಾತ್ರವೊಂದರಲ್ಲಿ ನಟಿಸುತ್ತಿದ್ದಾರೆ. ಮೊದಲ ಭಾಗದಲ್ಲಿ ಅವರು ನಟಿಸಿರಲಿಲ್ಲ. 'ಅನಂತ್‌ ನಾಗ್‌ ಸರ್‌ ಈ ಚಿತ್ರದಲ್ಲಿನಟಿಸುತ್ತಿದ್ದಾರೆ ಎನ್ನುವುದು ನನಗೆ ಹೆಚ್ಚು ಖುಷಿ ಕೊಟ್ಟಿದೆ. ಆದರೆ, ಅವರ ಜತೆ ನನ್ನ ದೃಶ್ಯಗಳಿಲ್ಲ ಎನ್ನುವ ನಿರಾಶೆಯೂ ಇದೆ' ಎಂದಿದ್ದಾರೆ ಆರೋಹಿ.
ಉಳಿದಂತೆ ಈ ಸಿನಿಮಾದಲ್ಲಿ ಪ್ರಭು ಶಿವಾಜಿ, ಸಾಧುಕೋಕಿಲ, ನೀತು ರೈ, ಪ್ರಮೋದ್ ಶೆಟ್ಟಿ, ಅಶೋಕ್, ಶಿವರಾಮ್, ಉನ್ನತಿ, ನಾರಾಯಣ್ ಸ್ವಾಮಿ, ಲಾಸ್ಯಾ ನಾಗರಾಜ್ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ. ಜಿ.ಎಸ್.ವಿ. ಸೀತಾರಾಮ್‌ ಛಾಯಾಗ್ರಹಣ, ಸುರೇಶ್ ಅರಸ್ ಸಂಕಲನ, ರವಿ ಸಂತೆಹುಕ್ಲು ಅವರ ಕಲಾ ನಿರ್ದೇಶನ ಹಾಗೂ ಲೋಕೇಶ್ ಬಿ.ಕೆ. ಗೌಡ, ಭರತ್ ಅವರ ನಿರ್ಮಾಣ ನಿರ್ವಹಣೆ 'ದೃಶ್ಯ 2' ಚಿತ್ರಕ್ಕಿದೆ. ಇ4 ಎಂಟರ್‌ಟೇನ್‌ಮೆಂಟ್ ಲಾಂಛನದಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರಕ್ಕೆ ಸಿ.ವಿ.ಸಾರಥಿ ಕಾರ್ಯಕಾರಿ ನಿರ್ಮಾಪಕರಾಗಿದ್ದಾರೆ.
