Rajinikanth: ಸದ್ದಿಲ್ಲದೇ ವಿದೇಶಕ್ಕೆ ಹಾರಿದ 'ಸೂಪರ್ ಸ್ಟಾರ್' ರಜನಿಕಾಂತ್! ಕಾರಣವೇನು?
'ಸೂಪರ್ ಸ್ಟಾರ್' ರಜನಿಕಾಂತ್ ಇತ್ತೀಚೆಗೆ ತಮ್ಮ ನಟನೆಯ 'ಅಣ್ಣಾಥೆ' ಸಿನಿಮಾದ ಚಿತ್ರೀಕರಣವನ್ನು ಸಂಪೂರ್ಣವಾಗಿ ಮುಗಿಸಿಕೊಟ್ಟಿದ್ದರು. ಇದೀಗ ಅವರು ತಮ್ಮ ಕುಟುಂಬಸಮೇತ ವಿದೇಶಕ್ಕೆ ಹಾರಿದ್ದಾರೆ. ಅದಕ್ಕೆ ಕಾರಣವೇನು?
Admin
0
6
'ತಲೈವಾ' ಅವರು ಈಚೆಗಷ್ಟೇ ತಮ್ಮ ನಟನೆಯ 'ಅಣ್ಣಾಥೆ' ಸಿನಿಮಾದ ಶೂಟಿಂಗ್ ಅನ್ನು ಮುಗಿಸಿಕೊಟ್ಟಿದ್ದರು. ಹೈದರಾಬಾದ್‌ನಲ್ಲಿ ಸುಮಾರು 1 ತಿಂಗಳು ನಿರಂತರ ಶೂಟಿಂಗ್‌ನಲ್ಲಿ ಪಾಲ್ಗೊಂಡು ಸಿನಿಮಾದ ಸಂಪೂರ್ಣ ಕೆಲಸಗಳನ್ನು ಮುಗಿಸಿದ್ದರು ಅವರು. ಕೋವಿಡ್ 2ನೇ ಅಲೆ ಆರಂಭಗೊಂಡ ಹಿನ್ನೆಲೆಯಲ್ಲಿ ವ್ಯಾಕ್ಸಿನ್ ಪಡೆದು, ಮನೆಯಲ್ಲೇ ಇದ್ದರು. ಆದರೆ, ಇದೀಗ ಇದ್ದಕ್ಕಿದ್ದಂತೆಯೇ ತಲೈವಾ ಅಮೆರಿಕಕ್ಕೆ ಹಾರಿದ್ದಾರೆ. ಎಲ್ಲೆಡೆ ಇನ್ನೂ ಕೊರೊನಾ ಮಹಮಾರಿ ರುದ್ರ ನರ್ತನ ಮಾಡುತ್ತಿರುವ ಇಂಥ ಹೊತ್ತಿನಲ್ಲಿ ರಜನಿ ವಿದೇಶಕ್ಕೆ ಹಾರಿದ್ದೇಕೆ?
ಚಿಕಿತ್ಸೆಗಾಗಿ ವಿದೇಶಕ್ಕೆ ಹೋದ ರಜನಿ
ರಜನಿಕಾಂತ್ ಅಮೆರಿಕಕ್ಕೆ ಹೋಗಿರುವುದು ತಪಾಸಣೆಗೆ ಎನ್ನಲಾಗಿದೆ. ಜೂನ್ 18ರ ಮಧ್ಯರಾತ್ರಿ ಪತ್ನಿ ಲತಾ ರಜನಿಕಾಂತ್ ಅವರೊಂದಿಂಗೆ ಚೆನ್ನೈ ವಿಮಾನ ನಿಲ್ದಾಣದಿಂದ ಅಮೆರಿಕಕ್ಕೆ ರಜನಿಕಾಂತ್ ಪಯಣ ಆರಂಭಿಸಿದರು. ಅಮೆರಿಕದಲ್ಲಿ ಅರೋಗ್ಯ ತಪಾಸಣೆ ಮಾಡಿಸಿಕೊಳ್ಳಲಿರುವ ರಜನಿಕಾಂತ್, ಆನಂತರ ಕೆಲ ಸಮಯ ಅಲ್ಲಿಯೇ ತಂಗಲಿದ್ದಾರೆ. ಚೆನ್ನೈ ಏರ್‌ಪೋರ್ಟ್‌ನಲ್ಲಿ ರಜನಿಕಾಂತ್ ಮತ್ತು ಲತಾ ಅವರು ಕಾಣಿಸಿಕೊಂಡಿರುವ ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿವೆ.
ಅಂದಹಾಗೆ, ಹೀಗೆ ವಿದೇಶಕ್ಕೆ ಹೋಗುವುದಕ್ಕೆ ಅನುಮತಿ ನೀಡುವಂತೆ ರಜನಿಕಾಂತ್ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದರು ಎನ್ನಲಾಗಿದೆ. ಅನುಮತಿ ಸಿಕ್ಕ ಕೂಡಲೇ ವ್ಯಾಕ್ಸಿನ್ ಪಡೆದುಕೊಂಡಿರುವ ಕುಟುಂಬದ ಇತರೆ ಸದಸ್ಯರೊಂದಿಗೆ ರಜನಿಕಾಂತ್ ವಿಶೇಷ ವಿಮಾನದಲ್ಲಿ ಚೆನ್ನೈನಿಂದ ಅಮೆರಿಕಕ್ಕೆ ತೆರಳಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ.
ಇನ್ನು, ರಜನಿಕಾಂತ್ ಅವರ ಅಳಿಯ, ನಟ ಈಗಾಗಲೇ ಅಮೆರಿಕದಲ್ಲಿ ಬೀಡುಬಿಟ್ಟಿದ್ದಾರೆ. ಅವರು ಹಾಲಿವುಡ್ ಸಿನಿಮಾವೊಂದರಲ್ಲಿ ಪ್ರಮುಖ ಪಾತ್ರ ಮಾಡುತ್ತಿದ್ದು, ಅದರ ಶೂಟಿಂಗ್‌ಗಾಗಿ ಅವರು ತಮ್ಮ ಪತ್ನಿ ಮತ್ತು ಮಕ್ಕಳೊಂದಿಗೆ ಅಲ್ಲಿಯೇ ಇದ್ದಾರೆ. ರಜನಿಕಾಂತ್ ಅವರು ಕೂಡ ತಮ್ಮ ಅಳಿಯನೊಂದಿಗೆ ಅಲ್ಲಿಯೇ ಕೆಲ ಸಮಯ ಕಳೆಯಲಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ. ಕಳೆದ ಡಿಸೆಂಬರ್‌ನಲ್ಲಿ ರಜನಿಕಾಂತ್ ರಾಜಕೀಯಕ್ಕೆ ಎಂಟ್ರಿ ನೀಡಲಿದ್ದಾರೆ ಎಂಬ ಮಾಹಿತಿ ಇತ್ತು. ಅಭಿಮಾನಿಗಳು ಕೂಡ ದೊಡ್ಡ ನಿರೀಕ್ಷೆ ಇಟ್ಟುಕೊಂಡಿದ್ದರು. ಆದರೆ, ರಜನಿಕಾಂತ್ ಆರೋಗ್ಯದ ಕಾರಣದಿಂದ ರಾಜಕೀಯದಿಂದ ದೂರ ಉಳಿದಿದ್ದರು.
