Puneeth Rajkumar: ಪುನೀತ್ ಆಡಿದ್ದ ‘ಆ’ ಮಾತನ್ನ ಇದೀಗ ಈಡೇರಿಸುತ್ತಿದೆ ‘ಜೇಮ್ಸ್’ ತಂಡ..!

ಪವರ್ ಸ್ಟಾರ್ ಅವರ ಜನ್ಮದಿನಕ್ಕೆ ದಿನಗಣನೆ ಶುರುವಾಗಿದೆ. ಪುನೀತ್ ರಾಜ್‌ಕುಮಾರ್ ಅವರ ಹುಟ್ಟುಹಬ್ಬದಂದೇ.. ಅಂದ್ರೆ, ಮಾರ್ಚ್ 17ರಂದೇ ಅಪ್ಪು ನಾಯಕನಾಗಿ ಅಭಿನಯಿಸಿದ ಕೊನೆಯ ಸಿನಿಮಾ ‘’ ಸಿನಿಮಾ ಬಿಡುಗಡೆಯಾಗಲಿದೆ. ಇದೇ ಮೊದಲು..! 1976ರಲ್ಲಿ ತೆರೆಕಂಡ ಡಾ.ರಾಜ್‌ಕುಮಾರ್ ಅಭಿನಯದ ಚಿತ್ರ ‘ಪ್ರೇಮದ ಕಾಣಿಕೆ’. ಈ ಚಿತ್ರದಲ್ಲಿ ಆರು ತಿಂಗಳ ಪುಟಾಣಿ ಮಗು ಪುನೀತ್ ರಾಜ್‌ಕುಮಾರ್ ಕಾಣಿಸಿಕೊಂಡಿದ್ದರು. ಅಂದಿನಿಂದ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದ ಪುನೀತ್ ರಾಜ್‌ಕುಮಾರ್ ಅನೇಕ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಆದರೆ, ತಮ್ಮ 46 ವರ್ಷದ ಸಿನಿ ಜೀವನದಲ್ಲಿ ಇದುವರೆಗೂ ಪುನೀತ್ ರಾಜ್‌ಕುಮಾರ್ ನಟಿಸಿದ ಯಾವ ಚಿತ್ರವೂ ಅವರ ಹುಟ್ಟುಹಬ್ಬದಂದು ತೆರೆಗೆ ಬಂದಿರಲಿಲ್ಲ. ಹೀಗಾಗಿ, 2022ರ ಮಾರ್ಚ್ 17ರಂದೇ ‘ಜೇಮ್ಸ್’ ಚಿತ್ರವನ್ನು ತೆರೆಗೆ ತರಬೇಕು ಎಂಬುದರ ಕುರಿತಾದ ಚರ್ಚೆ ಪುನೀತ್ ರಾಜ್‌ಕುಮಾರ್ ಅವರ ಜೊತೆ ಕಳೆದ ವರ್ಷವೇ ನಡೆದಿತ್ತು. ಅಂದು ಪುನೀತ್ ರಾಜ್‌ಕುಮಾರ್ ಹೇಳಿದ್ದೇನು? ‘ಜೇಮ್ಸ್’ ಚಿತ್ರದ ರಿಲೀಸ್ ಡೇಟ್ ಕುರಿತಾಗಿ ನಿರ್ದೇಶಕ ಚೇತನ್, ನಿರ್ಮಾಪಕ ಕಿಶೋರ್ ಪತ್ತಿಕೊಂಡ ಹಾಗೂ ಪುನೀತ್ ರಾಜ್‌ಕುಮಾರ್ ಮಧ್ಯೆ ಅನೇಕ ಬಾರಿ ಚರ್ಚೆ ನಡೆದಿದ್ದವು. ಆ ವೇಳೆ ಪುನೀತ್ ರಾಜ್‌ಕುಮಾರ್ ಏನಂತ ಹೇಳಿದ್ದರು ಗೊತ್ತಾ? ಅಂದು ಪುನೀತ್ ರಾಜ್‌ಕುಮಾರ್ ಹೇಳಿದ್ದೇನು ಎಂಬುದನ್ನ ನಿರ್ದೇಶಕ ‘ವಿಜಯ ಕರ್ನಾಟಕ ವೆಬ್‌’ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಬಿಚ್ಚಿಟ್ಟಿದ್ದಾರೆ. ‘’ಅಪ್ಪು ಸರ್‌ ಜೊತೆಗೆ ‘ಜೇಮ್ಸ್’ ರಿಲೀಸ್ ಡೇಟ್ ಡಿಸ್ಕಷನ್ ತುಂಬಾ ಆಗಿತ್ತು. ಅವರು ಹೇಳ್ತಾಯಿದ್ದದ್ದು ಇಷ್ಟೇ.. ‘’ಯಾವ ಚಿತ್ರವೂ ಬರ್ತ್‌ಡೇಗೆ ರಿಲೀಸ್ ಆಗಿಲ್ಲ. ಇದನ್ನ ರಿಲೀಸ್ ಮಾಡೋಣ.. ಆದರೆ, ಬರ್ತ್‌ಡೇ ಅಂತ ಬೇಡ. ರಾಯರ ದಿನ ಅಂತ ಮಾಡೋಣ’’ ಅಂತ ಹೇಳ್ತಿದ್ರು. ಈ ಸಲ ಮಾರ್ಚ್ 17 ಗುರುವಾರ ಬಿದ್ದಿದೆ. ಹೀಗಾಗಿ, ಅದೇ ಡೇಟ್‌ಗೆ ರಿಲೀಸ್ ಮಾಡೋಣ ಅಂತ ನಾವು ಟಾರ್ಗೆಟ್ ಇಟ್ಟುಕೊಂಡಿದ್ವಿ. ಈಗ ಅದೇ ರೀತಿಯಲ್ಲಿ ಅಪ್ಪು ಸರ್ ಅವರ ಹುಟ್ಟುಹಬ್ಬದಂದೇ ‘ಜೇಮ್ಸ್’ ಬಿಡುಗಡೆಯಾಗಲಿದೆ. ಈಗಾಗಲೇ ‘ಜೇಮ್ಸ್’ ಕನ್ನಡ ವರ್ಷನ್ ಸೆನ್ಸಾರ್ ಆಗಿದೆ. ಈ ವಾರದಲ್ಲಿ ಇತರೆ ಭಾಷೆಗಳ ಸೆನ್ಸಾರ್ ನಡೆಯಲಿದೆ’’ ಎಂದು ‘ವಿಜಯ ಕರ್ನಾಟಕ ವೆಬ್‌’ಗೆ ನೀಡಿರುವ ಸಂದರ್ಶನದಲ್ಲಿ ‘ಜೇಮ್ಸ್’ ನಿರ್ದೇಶಕ ಚೇತನ್ ಕುಮಾರ್ ತಿಳಿಸಿದ್ದಾರೆ. ವರ್ಲ್ಡ್‌ ವೈಡ್ ರಿಲೀಸ್ ಮಾರ್ಚ್ 17 ರಂದು ಪುನೀತ್ ರಾಜ್‌ಕುಮಾರ್ ಅವರ ಜನ್ಮದಿನದಂದು ‘ಜೇಮ್ಸ್’ ಸಿನಿಮಾ ವರ್ಲ್ಡ್‌ ವೈಡ್ ರಿಲೀಸ್ ಆಗಲಿದೆ. ‘ಜೇಮ್ಸ್’ ಚಿತ್ರ ಕನ್ನಡ, ತೆಲುಗು, ತಮಿಳು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳಲ್ಲಿ ‘ಜೇಮ್ಸ್’ ಸಿನಿಮಾ ರಿಲೀಸ್ ಆಗಲಿದೆ. ಅಂದ್ಹಾಗೆ, ‘ಜೇಮ್ಸ್’ ಚಿತ್ರದಲ್ಲಿ ಶಿವರಾಜ್ ಕುಮಾರ್ ಹಾಗೂ ರಾಘವೇಂದ್ರ ರಾಜ್‌ಕುಮಾರ್ ಕೂಡ ನಟಿಸಿದ್ದಾರೆ. ತಾರಾಗಣದಲ್ಲಿ ಪ್ರಿಯಾ ಆನಂದ್, ಶರತ್ ಕುಮಾರ್, ಶ್ರೀಕಾಂತ್, ಆದಿತ್ಯ ಮೆನನ್, ಅನು ಪ್ರಭಾಕರ್, ಚಿಕ್ಕಣ್ಣ, ಅವಿನಾಶ್, ಸಾಧು ಕೋಕಿಲ ಮುಂತಾದವರು ಇದ್ದಾರೆ.