HBD Hamsalekha: ದೇಸಿ ದೊರೆ 'ನಾದಬ್ರಹ್ಮ' ಹಂಸಲೇಖಗೆ 70ನೇ ಹುಟ್ಟುಹಬ್ಬದ ಸಂಭ್ರಮ
ಕನ್ನಡ ಚಿತ್ರರಂಗದ ದೇಸಿ ದೊರೆ, ನಾದಬ್ರಹ್ಮ ಎನಿಸಿಕೊಂಡಿರುವ ಡಾ. ಹಂಸಲೇಖ ಅವರಿಗೆ ಇಂದು (ಜೂನ್ 23) ಹುಟ್ಟುಹಬ್ಬದ ಸಂಭ್ರಮ. ಅವರ ಲಕ್ಷಾಂತರ ಅಭಿಮಾನಿಗಳು, ಸಂಗೀತ ಪ್ರೇಮಿಗಳು ಹಂಸಲೇಖಗೆ ಜನ್ಮದಿನದ ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ.
Admin
0
6
ಕನ್ನಡ ಚಿತ್ರರಂಗದಲ್ಲಿ ನಾದಬ್ರಹ್ಮ ಎಂದೇ ಖ್ಯಾತರಾಗಿರುವ ಸಂಗೀತ ನಿರ್ದೇಶಕ, ಗೀತ ಸಾಹಿತಿ ಅವರಿಗೆ ಇಂದು (ಜೂನ್ 23) 70ನೇ ವರ್ಷದ ಜನ್ಮದಿನದ ಸಂಭ್ರಮ. 4 ದಶಕಗಳಿಂದ ಕನ್ನಡ ಚಿತ್ರರಂಗಕ್ಕೆ, ಸಂಗೀತ ಕ್ಷೇತ್ರಕ್ಕೆ ತಮ್ಮದೇ ಆದ ಕೊಡುಗೆ ನೀಡುತ್ತ ಬಂದಿರುವ ಹಂಸಲೇಖ ಅವರಿಗೆ ಅಸಂಖ್ಯಾ ಅಭಿಮಾನಿಗಳಿದ್ದಾರೆ. ಹಂಸಲೇಖ ಅವರ ಹುಟ್ಟುಹಬ್ಬದ ಹಿನ್ನೆಲೆಯಲ್ಲಿ ಅವರ ಅಭಿಮಾನಿಗಳು, ಚಿತ್ರರಂಗದ ಆಪ್ತರು, ಸ್ನೇಹಿತರು ದೇಸಿ ದೊರೆಗೆ ಹುಟ್ಟುಹಬ್ದದ ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ.
ಗಂಗರಾಜು ಹಂಸಲೇಖರಾಗಿ ಬದಲಾಗಿದ್ದು..
ಹಂಸಲೇಖ ಅವರ ಮೂಲ ಹೆಸರು ಗಂಗರಾಜು. ಚಿತ್ರರಂಗಕ್ಕೆ ಮೊದಲು ಬರಹಗಾರರಾಗಿ ಅವರು ಎಂಟ್ರಿ ನೀಡಿದರು. ಗೀತ ಸಾಹಿತಿಯಾಗಿ ಸ್ಯಾಂಡಲ್‌ವುಡ್‌ಗೆ ಪಾದಾರ್ಪಣೆ ಮಾಡಿದ ಹಂಸಲೇಖ, 1986ರಲ್ಲಿ 'ಹೆಣ್ಣೇ ನಿನಗೇನು ಬಂಧನ' ಸಿನಿಮಾ ಮೂಲಕ ಸಂಗೀತ ನಿರ್ದೇಶಕರಾದರು. 1987ರಲ್ಲಿ ತೆರೆಕಂಡ 'ಪ್ರೇಮಲೋಕ' ಸಿನಿಮಾ ಹಂಸಲೇಖರ ಕೀರ್ತಿಯನ್ನು ಉನ್ನತಕ್ಕೇರಿಸಿತು. ಅಲ್ಲಿಂದ ವೃತ್ತಿ ಜೀವನದಲ್ಲಿ ಹಿಂತಿರುಗಿ ನೋಡುವ ಪ್ರಮೇಯವೇ ಬಾರಲಿಲ್ಲ. ಒಂದರ ಹಿಂದೊಂದು ಹಿಟ್ ಆಲ್ಬಂಗಳನ್ನು ನೀಡುತ್ತ, ಅದ್ಭುತ ಗೀತೆಗಳನ್ನು ಬರೆಯುತ್ತ ಸಾಗಿದರು ಹಂಸ್‌.
ರವಿಚಂದ್ರನ್-ಹಂಸಲೇಖ ಕಾಂಬಿನೇಷನ್‌
ಹಂಸಲೇಖ-ರವಿಚಂದ್ರನ್ ಅವರ ಕಾಂಬಿನೇಷನ್‌ ಬಗ್ಗೆ ಹೇಳದಿದ್ದರೆ, ಅದೊಂಥರ ಅಪೂರ್ಣ ಭಾವವೇ ಸರಿ. ಕನ್ನಡ ಚಿತ್ರರಂಗದಲ್ಲಿ ಇವರಿಬ್ಬರು ನೀಡಿದಷ್ಟು ಸೂಪರ್ ಹಿಟ್ ಆಲ್ಬಂಗಳನ್ನು ಈವರೆಗೂ ಯಾರೂ ನೀಡಿಲ್ಲ. ಅವರ ಯಶಸ್ಸಿನ ಹಿಂದೆ ಹಂಸಲೇಖರ ಪಾಲೂ ಇದೆ. ಅದನ್ನು ಸ್ವತಃ ರವಿಚಂದ್ರನ್ ಅವರೇ ಹೇಳಿಕೊಂಡಿದ್ದಾರೆ. 'ಪ್ರೇಮಲೋಕ'ದಿಂದ ಶುರುವಾದ ಈ ಕಾಂಬಿನೇಷನ್‌ ನೀಡಿರುವ ಹಿಟ್ ಹಾಡುಗಳ ಸಂಖ್ಯೆ ನೂರಾರು. 20-30 ವರ್ಷಗಳಾದರೂ ಆ ಸಾಂಗ್‌ಗಳನ್ನು ಮತ್ತೆ ಮತ್ತೆ ಕೇಳಬೇಕು ಎನಿಸುವಂತಿವೆ. ಎಲ್ಲವೂ ಸರಿಯಾಗಿ ಸಾಗುವಾಗಲೇ ಒಂದು ಹಂತದಲ್ಲಿ ಈ ಜೋಡಿ ದೂರವಾಗಿದ್ದು ಮಾತ್ರ ಕನ್ನಡಿಗರಿಗೆ ಇನ್ನಿಲ್ಲದ ಲಾಸು ಎಂಬುದು ಮಾತ್ರ ಸುಳ್ಳಲ್ಲ!
ಹಂಸಲೇಖಗೆ ಸಿಕ್ಕಿವೆ ಅನೇಕರ ಪುರಸ್ಕಾರಗಳು
ಸಂಗೀತ ನಿರ್ದೇಶನಕ್ಕಾಗಿ ಹಂಸಲೇಖ ನ್ಯಾಷನಲ್ ಅವಾರ್ಡ್ ಪಡೆದುಕೊಂಡಿದ್ದಾರೆ. ಆರು ಬಾರಿ ಫಿಲ್ಮ್‌ಫೇರ್, ಮೂರು ಬಾರಿ ರಾಜ್ಯ ಸರ್ಕಾರದ ಪ್ರಶಸ್ತಿಗಳು ಕೂಡ ಹಂಸಲೇಖಗೆ ಸಿಕ್ಕಿವೆ. ಸಂಗೀತಕ್ಕೆ ಮಾತ್ರವಲ್ಲದೆ, ಗೀತ ಸಾಹಿತ್ಯಕ್ಕಾಗಿಯೂ ಹಂಸಲೇಖ 2 ಬಾರಿ ಸ್ಟೇಟ್ ಅವಾರ್ಡ್ ಪಡೆದುಕೊಂಡಿದ್ದಾರೆ. 350ಕ್ಕೂ ಹೆಚ್ಚು ಸಿನಿಮಾಗಳಿಗೆ ಸಂಗೀತ ನಿರ್ದೇಶನ ಮಾಡಿರುವ ಅವರು, ಕೆಲ ಸಿನಿಮಾಗಳಿಗೆ ಕಥೆ, ಚಿತ್ರಕಥೆ, ಸಂಭಾಷಣೆಯನ್ನೂ ಬರೆದಿದ್ದಾರೆ. ನಿರ್ದೇಶನ ಮಾಡುವ ಅದಮ್ಯ ಬಯಕೆ ಅವರಲ್ಲಿದೆ. ಅದಕ್ಕಾಗಿಯ ಭಾರಿ ತಯಾರಿಯನ್ನೂ ನಡೆಸಿದ್ದಾರೆ. ಶೀಘ್ರದಲ್ಲೇ ಅವರ ನಿರ್ದೇಶನದ ಸಿನಿಮಾವನ್ನು ಕನ್ನಡಿಗರು ನೋಡುವಂತಾಗಲಿ. ಮತ್ತೊಮ್ಮೆ 'ದೇಸಿ ದೊರೆ' ಹಂಸಲೇಖರಿಗೆ ಹುಟ್ಟುಹಬ್ಬದ ಶುಭಾಶಯಗಳು.
