Bitcoin Scam: ಅಸಾಮಾನ್ಯ ಹ್ಯಾಕರ್ ಶ್ರೀಕಿಯ 'ಸಾಧನೆ' ಒಂದೆರಡಲ್ಲ! ಮಹಾ ಚಾಣಾಕ್ಷನ ಇತಿಹಾಸ

ಬೆಂಗಳೂರು: ಹ್ಯಾಕರ್ ಶ್ರೀ ಕೃಷ್ಣ ಅಲಿಯಾಸ್ ಶ್ರೀಕಿಯನ್ನು ಮಂಗಳವಾರ ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿದೆ. ಜೆಪಿ ನಗರ ಪೊಲೀಸರು ಆತನನ್ನು ಬಂಧಿಸಿದ ಬಳಿಕ ಸೋಮವಾರ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿತ್ತು. 4,500 ರೂ ದಂಡ ವಿಧಿಸಿ ಆತನನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿದೆ. ಅದರ ಬೆನ್ನಲ್ಲೇ ಶ್ರೀಕಿ ಬಳಸುತ್ತಿದ್ದ ಫೋನ್ ಹಾಗೂ ಇತರೆ ಗ್ಯಾಡ್ಜೆಟ್‌ಗಳನ್ನು ಪೊಲೀಸರು ಪರಿಶೀಲನೆ ನಡೆಸುತ್ತಿದ್ದಾರೆ. ಸ್ಟಾರ್ ಹೋಟೆಲ್ ಒಂದರಲ್ಲಿ ಜಗಳ ಮಾಡಿ ಬಂಧನಕ್ಕೆ ಒಳಗಾಗಿದ್ದ ಶ್ರೀಕಿ, ರಾಜ್ಯದ ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಒಳಗಾಗುತ್ತಿರುವ ಹಗರಣದಲ್ಲಿ ಮುಖ್ಯ ಪಾತ್ರ ವಹಿಸಿರುವ ಅನುಮಾನವಿದೆ. ಕೆಲವರೊಂದಿಗೆ ಸೇರಿಕೊಂಡು ಹಣ ಕದಿಯುವ ಸಲುವಾಗಿ ವೆಬ್‌ಸೈಟ್‌ಗಳನ್ನು ಮಾಡುತ್ತಿದ್ದ. ಇದೇ ಕೆಲಸಕ್ಕಾಗಿ ಆತ ಸ್ಟಾರ್ ಹೋಟೆಲ್ ಒಂದರಲ್ಲಿ ರೂಮ್ ಬುಕ್ ಮಾಡಲು ಬಂದಿದ್ದ ಎಂದು ಪೊಲೀಸರು ಅನುಮಾನಿಸಿದ್ದಾರೆ. ಶ್ರೀಕಿಯ ಸ್ನೇಹಿತ ವಿಷ್ಣು ಭಟ್ ಪೊಲೀಸ್ ವಶದಲ್ಲಿದ್ದು, ಆತನ ವಿಚಾರಣೆ ಮಾಡಲಾಗುತ್ತಿದೆ. ಕಳೆದ ಎರಡು ವರ್ಷಗಳಲ್ಲಿನ ಆತನ ಫೋನ್ ಕರೆಗಳ ದಾಖಲೆಗಳು ಹಾಗೂ ಪ್ರಯಾಣ ಚಟುವಟಿಕೆಗಳ ಬಗ್ಗೆ ಪೊಲೀಸರು ಮಾಹಿತಿ ಕಲೆ ಹಾಕುತ್ತಿದ್ದಾರೆ. ಬಿಟ್‌ಕಾಯಿನ್‌ಗೆ ಕನ್ನಶ್ರೀಕಿ ಕಳೆದ ಐದಾರು ವರ್ಷಗಳಿಂದ ವಿವಿಧ ಕ್ರಿಪ್ಟೋ ಕರೆನ್ಸಿ ಮಾರಾಟ ಪ್ಲಾಟ್‌ಫಾರ್ಮ್‌ಗಳನ್ನು ಹ್ಯಾಕ್ ಮಾಡಿ ಅವುಗಳಿಂದ ಸಾವಿರಾರು ಬಿಟ್‌ಕಾಯಿನ್‌ಗಳನ್ನು ಎಗರಿಸಿದ್ದ ಎಂದು ಪೊಲೀಸರು ಚಾರ್ಜ್‌ಶೀಟ್‌ನಲ್ಲಿ ಹೇಳಿದ್ದಾರೆ. ಅಷ್ಟೇ ಅಲ್ಲದೆ ಆತ, ಅನೇಕ ಪೋಕರ್ ಗೇಮಿಂಗ್ ಪೋರ್ಟಲ್‌ಗಳನ್ನು ಕೂಡ ಹ್ಯಾಕ್ ಮಾಡಿ ಅಕ್ರಮವಾಗಿ ನಗದು ಬಹುಮಾನ ಗೆಲ್ಲುತ್ತಿದ್ದ. ಕೆಲವು ಪೋಕರ್ ಗೇಮಿಂಗ್ ಪೋರ್ಟಲ್‌ಗಳಲ್ಲಿ ರಾನ್ಸಮ್‌ವೇರ್‌ಗಳನ್ನು ಬಿಟ್ಟು, ಹಲವು ಕೋಟಿಗಳನ್ನು ಸುಲಿಗೆ ಮಾಡಿದ್ದ ಆರೋಪವೂ ಇದೆ. ಶ್ರೀಕಿಯ ಪ್ರಕರಣ ರಾಜಕಾರಣಿಗಳು ಹಾಗೂ ಪೊಲೀಸರು ಇಬ್ಬರಿಗೂ ತಲೆನೋವಾಗಿದೆ. ಶ್ರೀಕಿಯನ್ನು ಬಳಸಿಕೊಂಡು ರಾಜಕಾರಣಿಗಳು ಬಿಟ್‌ಕಾಯಿನ್ ಹಗರಣಗಳನ್ನು ಎಸಗಿದ ಆರೋಪವಿದೆ. ವಿವಿಧ ಸೈಬರ್ ಕ್ರೈಂಗಳಲ್ಲಿ ಭಾಗಿಯಾದ ಆರೋಪದಡಿ ಶ್ರೀಕಿ ಹಾಗೂ ನಾಲ್ವರು ಇತರರ ವಿರುದ್ಧ 2021ರ ಫೆಬ್ರವರಿ 22ರಂದು ಮೊದಲ ಆರೋಪಪಟ್ಟಿ ಸಲ್ಲಿಕೆಯಾಗಿತ್ತು. ಬಾಲ್ಯದಲ್ಲಿಯೇ ಹ್ಯಾಕಿಂಗ್ 'ಕಲೆ'!ಹೈಸ್ಕೂಲಿನಲ್ಲಿ ಓದುವಾಗಲೇ ಕಂಪ್ಯೂಟರ್ ಹ್ಯಾಕ್ ಮಾಡುವುದನ್ನು ಆರಂಭಿಸಿದ್ದ ಶ್ರೀಕಿ, ಕ್ರಮೇಣ ಹ್ಯಾಕಿಂಗ್ ವಲಯದಲ್ಲಿ ಇನ್ನಷ್ಟು ಪರಿಣತಿ ಪಡೆದಿದ್ದ. ಅಮೆರಿಕ, ಫ್ರಾನ್ಸ್ ಮತ್ತು ಬಾಂಗ್ಲಾದೇಶ ಸೇರಿದಂತೆ ವಿವಿಧ ದೇಶಗಳಲ್ಲಿ ಬಿಟ್‌ಕಾಯಿನ್ ವಹಿವಾಟು ನಡೆಸುವ ಹಲವು ವೆಬ್‌ಸೈಟ್‌ಗಳನ್ನು ಹ್ಯಾಕ್ ಮಾಡುವುದರಲ್ಲಿ ನಿಪುಣನಾದ. ಶ್ರೀಕಿ ಯಾವುದೇ ಬ್ಯಾಂಕ್ ಖಾತೆಗಳನ್ನು ಹೊಂದಿರಲಿಲ್ಲ. ಆತನ ಎಲ್ಲ ಬಿಟ್‌ಕಾಯಿನ್ ವ್ಯವಹಾರ ಮತ್ತು ಹ್ಯಾಕಿಂಗ್‌ನಿಂದ ಹಣ ಸಂಪಾದನೆಯನ್ನು ಮತ್ತೊಬ್ಬ ಆರೋಪಿ ರಾಬಿನ್ ಖಂಡೇವಾಲನ ಮೂಲಕ ಮಾಡುತ್ತಿದ್ದ. ತಾನು ಎಂಟು ಕೋಟಿ ರೂಪಾಯಿಗೂ ಅಧಿಕ ಹಣವನ್ನು ರಾಬಿನ್‌ಗೆ ನೀಡಿದ್ದಾಗಿ, ಅವನು ಕದ್ದ ಬಿಟ್‌ಕಾಯಿನ್‌ಗಳನ್ನು ತನ್ನ ಕ್ಲೌಡ್ ಖಾತೆಯಲ್ಲಿ ಪ್ರೈವೇಟ್ ಕೀಗಳನ್ನು ಬಳಸಿ ಇರಿಸಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ. ಬಿಟ್‌ಕಾಯಿನ್ ಮೇಲೆ ಕಣ್ಣುಜನರು ಹಣಕ್ಕಾಗಿ ಬಿಟ್‌ಕಾಯಿನ್ ವಿನಿಮಯ ಮಾಡಿಕೊಳ್ಳುವ BTC2pm.me, ಬಿಟ್‌ಕಾಯಿನ್ ಬಳಕೆದಾರರ ಷೇರು ಮಾರಾಟ ವೇದಿಕೆ ಹ್ಯಾವ್‌ಲಾಕ್ ಇನ್‌ವೆಸ್ಟ್‌ಮೆಂಟ್, ಬಾಂಗ್ಲಾದೇಶ ವಿನಿಮಯ ಪೋರ್ಟಲ್ ಪೇಟಿಜ್, ಅಕ್ರಮ ಕ್ರಿಪ್ಟೋ ಕರೆನ್ಸಿ ಮಾರಾಟ ವೇದಿಕೆ MPEX, ಉಕ್ರೇನಿನ ಪ್ಲಾಟ್‌ಫಾರ್ಮ್ ಮಿಕ್ಸ್‌ಚೇಜ್ ಸೇರಿದಂತೆ ಶ್ರೀಕಿ ಹಲವು ವೆಬ್‌ಸೈಟ್‌ಗಳನ್ನು ಹ್ಯಾಕ್ ಮಾಡಿದ್ದಾನೆ ಎಂದು ತಿಳಿಸಿದ್ದಾರೆ. ಆತ ಇತರೆ ವೆಬ್‌ಸೈಟ್‌ಗಳನ್ನು ಹ್ಯಾಕ್ ಮಾಡಿ ಸಂಪಾದಿಸಿದ ಹಣ ಎಷ್ಟೆಂದು ಇದುವರೆಗೂ ಗೊತ್ತಾಗಿಲ್ಲ. ಹುಡುಗಾಟಿಕೆಯಲ್ಲಿದ್ದಾಗಲೇ ರೂನ್‌ಸ್ಕೇಪ್ ಎಂಬ ಗೇಮರ್ ಹ್ಯಾಕ್ ಮಾಡಿ ಸುಮಾರು 10 ಲಕ್ಷ ಡಾಲರ್ ಹಣ ಸಂಪಾದಿಸಿದ್ದಾಗಿ ಆತ ತಿಳಿಸಿದ್ದಾನೆ. ಅದೇ ರೀತಿ ಗೇಮ್‌ಗಳಿಗೆ ಸಂಬಂಧಿಸಿದ ಟಿಪ್.ಇಟ್ ಮತ್ತು ಸೈದ್ ಎಂಬ ಪೋರ್ಟಲ್‌ಗಳನ್ನೂ ಹ್ಯಾಕ್ ಮಾಡಿ ಅಕ್ರಮವಾಗಿ 1.6 ಮಿಲಿಯನ್ ಡಾಲರ್ ಗಳಿಸಿದ್ದ. ಆತ ಮೊದಲು ಬಿಟ್‌ಕಾಯಿನ್ ವಿನಿಮಯ ಹ್ಯಾಕ್ ಮಾಡಿದ್ದು ಬಿಟ್‌ಫೈನೆಕ್ಸ್ ವೆಬ್‌ಸೈಟ್‌ನಿಂದ. ಅದರಿಂದ ಆತ ಸುಮಾರು 2,000 ಬಿಟ್‌ಕಾಯಿನ್‌ಗಳನ್ನು ಕಳವು ಮಾಡಿದ್ದ. ಆ ಸಮಯದಲ್ಲಿ ಪ್ರತಿ ಬಿಟ್‌ಕಾಯಿನ್ ಸುಮಾರು 7,000 ರೂದಿಂದ 14,000 ರೂ.ವರೆಗೆ ಮೌಲ್ಯ ಹೊಂದಿತ್ತು. ಪ್ರಸ್ತುತ ಒಂದು ಬಿಟ್‌ಕಾಯಿನ್ ಬೆಲೆ 45 ಲಕ್ಷ ರೂಪಾಯಿಗೂ ಅಧಿಕವಿದೆ. ಬಿಟ್‌ಕಾಯಿನ್‌ಟಾಕ್.ಒಆರ್‌ಜಿ, ಬಿಟಿಸಿ-ಇ.ಕಾಂ ಮತ್ತು ಬಿಟ್‌ಸೆಂಟ್ರಲ್ ಎಕ್ಸ್‌ಚೇಂಜಸ್‌ಗಳನ್ನು ಹ್ಯಾಕ್ ಮಾಡಿ ಸುಮಾರು 3 ರಿಂದ 3.5 ಮಿಲಿಯನ್ ಡಾಲರ್‌ವರೆಗೆ ಕಳ್ಳತನ ಮಾಡಿದ್ದ. ಹೀಗೆ ಹ್ಯಾಕ್ ಮಾಡಿ ಸಂಪಾದಿಸಿದ ಹಣವನ್ನು ಆತ ಮಾದಕವಸ್ತು ಬಳಕೆ ಹಾಗೂ ಐಷಾರಾಮಿ ಜೀವನಕ್ಕಾಗಿ ವಿನಿಯೋಗಿಸುತ್ತಿದ್ದ. ಬೆಂಗಳೂರಿನ ಜಯನಗರ ನಿವಾಸಿಯಾದ ಗೋಪಾಲ್ ರಮೇಶ್ ಮತ್ತು ಕೌಸಲ್ಯಾ ಅವರ ಮಗನಾದ ಶ್ರೀಕಿ, ಚಿಕ್ಕ ವಯಸ್ಸಿನಲ್ಲಿದ್ದಾಗಲೇ ತಂತ್ರಜ್ಞಾನದ ಬಗ್ಗೆ ಅತೀವ ಒಲವು ಹೊಂದಿದ್ದ. 4 ನೇ ತರಗತಿ ಓದುವಾಗಲೇ ಇಂಟರ್‌ನೆಟ್ ರೆಲೇ ಚಾಟ್ (ಐಆರ್‌ಎಸ್) ಮೂಲಕ ಹ್ಯಾಕರ್‌ಗಳನ್ನು ಸಂಪರ್ಕಿಸಿದ್ದ. 'ಬ್ಲ್ಯಾಕ್ ಹ್ಯಾಟ್' ಎಂಬ ಹ್ಯಾಕರ್‌ಗಳ ತಂಡದ ಸದಸ್ಯನೂ ಆಗಿದ್ದ. 8ನೇ ತರಗತಿ ಓದುವ ವೇಳೆಗೆ ಆ ಗುಂಪಿನ ಅಡ್ಮಿನಿಸ್ಟ್ರೇಟರ್ ಆಗಿ ಬಡ್ತಿ ಕೂಡ ಪಡೆದಿದ್ದ. ಬಳಿಕ ಬ್ಲ್ಯಾಕ್ ಹ್ಯಾಟ್ ವಿಭಜನೆಯಾದಾಗ ಮತ್ತೊಂದು ತಂಡವನ್ನು ಶ್ರೀಕಿ ಮುನ್ನಡೆಸಿದ್ದ ಎಂದು ಹೇಳಿದ್ದಾರೆ. ಪಿಯುಸಿಯಲ್ಲಿ ಹೊಸ ಅಭ್ಯಾಸಶಾಲಾ ದಿನಗಳಲ್ಲಿಯೇ ಆತ ವೆಬ್‌ಸೈಟ್ ಹ್ಯಾಕ್ ಮಾಡಿ ತನ್ನ ಸ್ನೇಹಿತರಿಗೆ ಹಾಜರಾತಿ, ಅಂಕಗಳನ್ನು ಕೊಡಿಸಿದ್ದ. ವಿವಿ ಪುರಂನ ಖಾಸಗಿ ಕಾಲೇಜಿನಲ್ಲಿ ಪಿಯುಸಿ ಓದುವಾಗ ಮಾದಕ ವಸ್ತು ಸೇವನೆ, ಕುಡಿತದಂತಹ ಚಟಗಳನ್ನು ಬೆಳೆಸಿಕೊಂಡಿದ್ದ. ಇದಕ್ಕೆ ಹಣ ಒದಗಿಸುವುದಕ್ಕಾಗಿ ಹ್ಯಾಕಿಂಗ್ ಮಾಡುತ್ತಿದ್ದ. ಪಿಯುಸಿ ಓದುವಾಗ ಪೇಪಲ್ ಹಣ ವರ್ಗಾವಣೆ ಆಪ್‌ ಅನ್ನು ಹ್ಯಾಕ್ ಮಾಡಿದ್ದ. ಇದಕ್ಕೆ ಆಸ್ಟ್ರೇಲಿಯಾದಲ್ಲಿನ ಸ್ನೇಹಿತನ ನೆರವು ಪಡೆದಿದ್ದ. ಬಳಿಕ ಗೇಮಿಂಗ್ ವೆಬ್‌ಸೈಟ್‌ಗಳ ಮೇಲೆ ಕಣ್ಣು ಹಾಕಿದ್ದ ಎನ್ನಲಾಗಿದೆ. ಆನ್‌ಲೈನ್ ಹಣ ವರ್ಗಾವಣೆ ಸಂಸ್ಥೆಗಳು ಈತನ ಮುಖ್ಯ ಗುರಿಗಳಾಗಿದ್ದವು. ಡಾರ್ಕ್ ನೆಟ್ ಮೂಲಕ ಬಿಟ್ ಕಾಯಿನ್ ವ್ಯವಹಾರದ ಬಗ್ಗೆ ಚೆನ್ನಾಗಿ ತಿಳಿದುಕೊಂಡಿದ್ದ. ಈ ಎಲ್ಲ ಹಣವನ್ನೂ ತನ್ನ ಐಷಾರಾಮಿ ಜೀವನ, ವ್ಯಸನಗಳಿಗೆ ಬಳಸುತ್ತಿದ್ದ. ಒಮ್ಮೆ ಮನೆ ಬಿಟ್ಟು ಹಿಮಾಲಯ, ಬದರಿನಾಥಕ್ಕೆ ಹೋಗಿದ್ದ. ಈ ಸಂಬಂಧ ದೂರು ದಾಖಲಾಗಿತ್ತು. ಪೊಲೀಸರು ಆತನನ್ನು ಪತ್ತೆ ಮಾಡಿ ಬೆಂಗಳೂರಿಗೆ ಕರೆ ತಂದಿದ್ದರು. ಮಗನನ್ನು ಸರಿದಾರಿಗೆ ತರುವ ಉದ್ದೇಶದಿಂದ ಉನ್ನತ ವ್ಯಾಸಂಗಕ್ಕಾಗಿ ನೆದರ್‌ಲ್ಯಾಂಡ್ಸ್‌ಗೆ ಕಳುಹಿಸಿದ್ದರು. ಆದರೆ ಅಲ್ಲಿಯೂ ಆತ ಇದೇ ವ್ಯವಹಾರ ಮುಂದುವರಿಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ರಾಜಕಾರಣಿ ಮಗನ ಹಲ್ಲೆ ಪ್ರಕರಣ2018ರಲ್ಲಿ ಯುಬಿ ಸಿಟಿಯಲ್ಲಿ ವಿದ್ವತ್ ಎಂಬಾತನ ಮೇಲೆ ಶಾಸಕರೊಬ್ಬರ ಮಗ ಹಲ್ಲೆ ನಡೆಸಿದ ಪ್ರಕರಣದಲ್ಲಿ ಶ್ರೀಕಿ ಸಹ ಆರೋಪಿಯಾಗಿದ್ದ. ಆ ಗುಂಪಿನಲ್ಲಿ ಇದ್ದ ಆರೋಪಿಗಳ ಪಟ್ಟಿಯಲ್ಲಿ ಶ್ರೀಕಿ ಹೆಸರಿದ್ದರೂ ಅವನನ್ನು ಬಂಧಿಸಿರಲಿಲ್ಲ. ಬಂಧನಕ್ಕೂ ಮುನ್ನ ಆತ ಬಸ್‌ನಲ್ಲಿ ಹೈದರಾಬಾದ್‌ಗೆ ತೆರಳಿ ಅಲ್ಲಿಂದ ಹಿಮಾಲಯಕ್ಕೆ ತೆರಳಿದ್ದ. ಮುಖ್ಯ ಆರೋಪಿ ಜಾಮೀನಿನ ಮೇಲೆ ಹೊರಬಂದಾಗ ಶ್ರೀಕಿಗೂ ಜಾಮೀನು ಸಿಕ್ಕಿತ್ತು. ಅದರ ನಂತರ ಆತ ಬೆಂಗಳೂರಿಗೆ ಬಂದು ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದ. ರಾಯಲ್ ಆರ್ಕಿಡ್ ಹೋಟೆಲ್‌ನಲ್ಲಿ ಭದ್ರತಾ ಸಿಬ್ಬಂದಿ ಜತೆ ಜಗಳವಾಡಿ ಹಲ್ಲೆ ನಡೆಸಿದ ಪ್ರಕರಣದಲ್ಲಿ ಹ್ಯಾಕರ್ ಶ್ರೀಕಿ ಮತ್ತು ಆತನ ಗೆಳೆಯ ವಿಷ್ಣು ಭಟ್‌ನನ್ನು ಪೊಲೀಸರು ಬಂಧಿಸಿದ್ದರು. ಇಬ್ಬರೂ ಮಾದಕ ಪದಾರ್ಥಗಳನ್ನು ಸೇವಿಸಿದ್ದು ದೃಢಪಟ್ಟಿತ್ತು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.