ಹೈದರಾಬಾದ್‌: ಎಂಟು ವರ್ಷಗಳ ಸುದೀರ್ಘ ಸಂಬಂಧದ ಬಳಿಕ ಸಲಿಂಗ ಜೋಡಿಯೊಂದು ವಿವಾಹವಾಗಿದ್ದು, ಅಧಿಕೃತವಾಗಿ 'ಗಂಡ-ಗಂಡ' ಆಗಿದ್ದಾರೆ. ಹೈದರಾಬಾದ್‌ನ ಹೊರ ವಲಯದಲ್ಲಿರುವ ರೆಸಾರ್ಟ್‌ ಒಂದರಲ್ಲಿ, ಸ್ನೇಹಿತರ ಹಾಗೂ ಕುಟುಂಬದವರ ಸಮ್ಮುಖದಲ್ಲಿ ಜೋಡಿಗಳು 'ಪತಿ-ಪತಿ'ಗಳಾಗಿದ್ದು, ಉಂಗುರ ಬದಲಾಯಿಸಿ ತಮ್ಮ ಸಂಬಂಧವನ್ನು ಅಧೀಕೃತಗೊಳಿಸಿದ್ದಾರೆ. 31 ವರ್ಷದ ಸುಪ್ರಿಯೋ ಚಕ್ರವರ್ತಿ ಹಾಗೂ 34 ವರ್ಷದ ಅಭಯ್‌ ದಂಗ್‌ ಅವರು ಉಂಗುರ ಬದಲಿಸಿಕೊಂಡು ಇದೀಗ ವಿವಾಹವಾಗಿದ್ದಾರೆ. ಕೋಲ್ಕತಾ ಮೂಲದ ಸುಪ್ರಿಯೋ ಚಕ್ರವರ್ತಿ, ಪ್ರತಿಷ್ಠಿತ ಹೋಟೆಲ್‌ ಮ್ಯಾನೇಜ್ಮೆಂಟ್‌ ಸಂಸ್ಥೆಯೊಂದರಲ್ಲಿ ಹಿರಿಯ ಪ್ರಾಧ್ಯಾಪಕರಾಗಿದ್ದಾರೆ. ದೆಹಲಿಯವರಾಗಿರುವ ಅಭಯ್‌ ದಂಗ್‌ ಬಹುರಾಷ್ಟ್ರೀಯ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದಾರೆ. ಹೀಗಾಗಿ ಮದುವೆ ಪಂಜಾಬಿ ಹಾಗೂ ಬೆಂಗಾಲಿ ಸಂಸ್ಕೃತಿಗಳ ಸಮ್ಮಿಳಿತವಾಗಿತ್ತು. ಎಂಟು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದ ಈ ಜೋಡಿಗಳ ವಿವಾಹವನ್ನು ಟ್ರಾನ್ಸ್‌ಸ್ಟ್ರೈಟ್‌ ( ತನ್ನ ವಿರುದ್ಧ ಲಿಂಗದವರ ಬಟ್ಟೆ ಧರಿಸುವ ವ್ಯಕ್ತಿ ) ಒಬ್ಬರು ನಡೆಸಿ ಕೊಟ್ಟಿದ್ದಾರೆ. ನಗರದಲ್ಲಿರುವ ರೆಸಾರ್ಟ್‌ ಒಂದರಲ್ಲಿ ಈ ಜೋಡಿಗಳ ಅದ್ಧೂರಿ ವಿವಾಹ ಮಹೋತ್ಸವ ನಡೆದಿದ್ದು, ಕುಟುಂಬಸ್ಥರು, ಸ್ನೇಹಿತರು, ಸಹೋದ್ಯೋಗಿಗಳು ಈ ಅಪರೂಪದ ಮದುವೆಗೆ ಸಾಕ್ಷಿಯಾದರು. ವಿಶೇಷ ಜೋಡಿಗಳಿಗೆ ಶುಭ ಹಾರೈಸಿದ್ದಾರೆ. 'ಈ ದಿನದ ಸಂಜೆಯನ್ನು ವಿಶೇಷವಾಗಿ ಕಳೆದೆ. ಹೈದರಾಬಾದ್‌ ಸಮೀಪ ಇರುವ ರೆಸಾರ್ಟ್‌ನಲ್ಲಿ ಹೋಟೆಲ್‌ ಮ್ಯಾನೇಜ್ಮೆಂಟ್‌ನ ಹಿರಿಯ ಪ್ರಾಧ್ಯಾಪಕ ಹಾಗೂ ಅಮೆಜಾನ್‌ನಲ್ಲಿ ಉದ್ಯೋಗಿಯಾಗಿರುವ ಇಬ್ಬರ ಅಪರೂಪದ ಮದುವೆಗೆ ನಾನು ಸಾಕ್ಷಿಯಾದೆ. ಈ ಹಿಂದೆ ಖಾಸಗಿ ಕಂನಪನಿಯಲ್ಲಿ ಮ್ಯಾನೇಜರ್‌ ಆಗಿದ್ದ ಟ್ರಾನ್ಸ್‌ಸ್ಟ್ರೈಟ್‌ ವ್ಯಕ್ತಿಯೊಬ್ಬರು ಮದುವೆಯ ವಿಧಿ ವಿಧಾನಗಳನ್ನು ನೆರವೇರಿಸಿದರು. ಈ ಅಪೂರ್ವ ಮದುವೆಗೆ ಎರಡೂ ಕುಟುಂಬದ ಸ್ನೇಹಿತರು, ಬಂಧು -ಬಾಂಧವರು ಭಾಗವಹಿಸಿ ಶುಭ ಹಾರೈಸಿದರು. ಇದು ಭಾರತ ನಿಧಾನವಾಗಿ ಬದಲಾವಣೆ ಆಗುತ್ತಿರುವುದಕ್ಕೆ ಸಾಕ್ಷಿ' ಎಂದು ಮದುವೆಯಲ್ಲಿ ಅತಿಥಿಯಾಗಿ ಭಾಗವಹಿಸಿದ್ದ ಪತ್ರಕರ್ತರೊಬ್ಬರು ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ. ಭಾರತದಲ್ಲಿ ಸಲಿಂಗ ಕಾಮಕ್ಕೆ ಮಾತ್ರ ಅನುಮತಿ ಇದ್ದು, ಸಲಿಂಗ ಮದುವೆಯನ್ನು ಮಾನ್ಯ ಮಾಡುವ ಯಾವುದೇ ಕಾನೂನು ಭಾರತದಲ್ಲಿ ಜಾರಿಯಲ್ಲಿಲ್ಲ. ಹೀಗಾಗಿ ಈ ಜೋಡಿಗಳ ಮದುವೆ ಕಾನೂನು ಬದ್ಧವೇ ಎನ್ನುವ ತರ್ಕ ಎದ್ದಿದೆ.

ಸಲಿಂಗ ಕಾಮಕ್ಕಷ್ಟೆ ಅನುಮತಿ, ವಿವಾಹಕ್ಕಿಲ್ಲ ಸಮ್ಮತಿ

ಭಾರತೀಯ ಕಾನೂನುಗಳ ಪ್ರಕಾರ ‘ಜೈವಿಕ ಪುರುಷ’ ಮತ್ತು ‘ಜೈವಿಕ ಮಹಿಳೆ’ ನಡುವಿನ ವಿವಾಹ ಸಂಬಂಧಕ್ಕೆ ಮಾತ್ರ ಅನುಮತಿ ಇದ್ದು, ಉಳಿದ ನಂಟುಗಳೆಲ್ಲ ಅಕ್ರಮ ಎಂದು ಈ ಹಿಂದೆ ಕೇಂದ್ರ ಸರ್ಕಾರ ದಿಲ್ಲಿ ಹೈಕೋರ್ಟ್‌ಗೆ ಹೇಳಿತ್ತು. ಜೈವಿಕ ಬದಲಾವಣೆಗಳಿಂದ ಸಲಿಂಗ ರತಿಯೂ ಎಲ್ಲೆಡೆ ಕಂಡು ಬರುತ್ತದೆಯಾದ್ದರಿಂದ ಸಲಿಂಗಿಗಳ ವಿವಾಹಕ್ಕೂ ಅನುಮತಿ ನೀಡಬೇಕು ಎಂದು ಕೋರಿ ಸಲ್ಲಿಸಿದ್ದ ಅರ್ಜಿ ವಿಚಾರಣೆಯನ್ನು ನ್ಯಾ.ಡಿ.ಎನ್‌.ಜ್ಯೋತಿ ಸಿಂಗ್‌ ನೇತೃತ್ವದ ಪೀಠ ನಡೆಸಿತು. ‘ಸಲಿಂಗ ಕಾಮವನ್ನು ಪರಿಚ್ಛೇದ 377ರ ಅಡಿಯಲ್ಲಿ ಅಪರಾಧ ಮುಕ್ತಗೊಳಿಸಲಾಗಿದೆ ನಿಜ. ಆದರೆ ಸಲಿಂಗ ಮದುವೆಗೆ ಇದೇ ಪರಿಚ್ಛೇದ ಅನ್ವಯ ಆಗುವುದಿಲ್ಲ. ನವ್‌ತೇಜ್‌ ಸಿಂಗ್‌ ಜೋಹರ್‌ ಪ್ರಕರಣದಲ್ಲಿ ನೀಡಿದ ತೀರ್ಪನ್ನು ತಪ್ಪಾಗಿ ಅರ್ಥೈಸಲಾಗುತ್ತಿದೆ. ಈ ಪ್ರಕರಣದಲ್ಲಿ ಕೇವಲ ಸಲಿಂಗ ಕಾಮಕ್ಕೆ ಮಾತ್ರವೇ ಅನುಮತಿ ನೀಡಲಾಗಿದೆ. ಸದ್ಯದ ಕಾನೂನುಗಳ ಪ್ರಕಾರ, ಸಲಿಂಗಿಗಳ ಮದುವೆಗೆ ಸಮ್ಮತಿ ಇಲ್ಲ’ ಎಂದು ಕೇಂದ್ರ ಸರ್ಕಾರ ಹೇಳಿತ್ತು.