3ನೇ ಅಲೆ ವೈರಸ್‌ ಮತ್ತಷ್ಟು ಅಪಾಯಕಾರಿ! ಪರಿಸ್ಥಿತಿ ಎದುರಿಸಲು ಸಜ್ಜಾಗುವುದು ಅನಿವಾರ್ಯ

ಹೊಸದಿಲ್ಲಿ: ದೇಶವು ಕೊರೊನಾ ಸೋಂಕಿನ ಮೂರನೇ ಅಲೆಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲಎಂದು ಕೇಂದ್ರ ಸರಕಾರವೇ ಬುಧವಾರ ಘೋಷಿಸಿದೆ. ಎರಡನೇ ಅಲೆಯ ಹೊಡೆತಕ್ಕೇ ಇಡೀ ದೇಶ ತತ್ತರಿಸಿರುವಾಗಲೇ ಖುದ್ದು ಕೇಂದ್ರ ಸರಕಾರವೇ ಈ ಹೇಳಿಕೆ ನೀಡಿರುವುದು ಜನರಲ್ಲಿಆತಂಕ ಹೆಚ್ಚಿಸಿದೆ. ''ಮೂರನೇ ಅಲೆ ಯಾವಾಗ ಅಪ್ಪಳಿಸಲಿದೆ ಎನ್ನುವುದನ್ನು ಈ ಹಂತದಲ್ಲಿಖಚಿತವಾಗಿ ಹೇಳಲಾಗದು. ವಿಜ್ಞಾನಿಗಳು ಅದನ್ನು ಅಂದಾಜಿಸುವ ಪ್ರಯತ್ನ ಮಾಡುತ್ತಿದ್ದಾರೆ. ಆದರೆ ದೇಶವು ಮೂರನೇ ಅಲೆಯಿಂದ ಬಚಾವಾಗುವುದಂತೂ ಸಾಧ್ಯವೇ ಇಲ್ಲ,'' ಎಂದು ಕೇಂದ್ರ ಸರಕಾರದ ಪ್ರಧಾನ ವೈಜ್ಞಾನಿಕ ಸಲಹೆಗಾರ ಕೆ.ವಿಜಯ ರಾಘವನ್‌ ತಿಳಿಸಿದ್ದಾರೆ. ''ನಾವು ಮೂರನೇ ಅಲೆ ಎದುರಿಸಲು ಸಜ್ಜಾಗುವುದು ಅನಿವಾರ್ಯ. ಮೂರನೇ ಅಲೆಯು ಮತ್ತಷ್ಟು ವೇಗವಾಗಿ ಪ್ರಸರಣ ಹೊಂದಲಿದೆ. ಇಡೀ ಜಗತ್ತಿನಲ್ಲಿ ವಿಜ್ಞಾನಿಗಳು ಮೂರನೇ ಅಲೆಯ ತೀವ್ರತೆ ಮತ್ತು ಹೊಸ ರೂಪಾಂತರಿ ವೈರಾಣುವಿನ ಸ್ವರೂಪ ಹೇಗಿರಲಿದೆ ಎಂಬುದನ್ನು ಅಂದಾಜಿಸುವ ಪ್ರಯತ್ನದಲ್ಲಿ ತೊಡಗಿದ್ದಾರೆ,'' ಎಂದು ಅವರು ಹೇಳಿದ್ದಾರೆ. ಬೆಂಗಳೂರಿನ ಆತಂಕ: ಬುಧವ ಬೆಳಗ್ಗೆ 8 ಗಂಟೆಗೆ ಕೊನೆಯಾದ 24 ಗಂಟೆಗಳ ಅವಧಿಯಲ್ಲಿ ದೇಶವು ಏಕದಿನ ಪ್ರಕರಣದಲ್ಲಿಇದುವರೆಗಿನ ಗರಿಷ್ಠ ದಾಖಲೆ ಬರೆದಿದೆ. ಒಂದು ದಿನದಲ್ಲಿ3,82,315 ಹೊಸ ಪ್ರಕರಣಗಳು ಹಾಗೂ 3,780 ಸಾವು ದಾಖಲಾಗಿದೆ. ಕರ್ನಾಟಕ, ಕೇರಳ, ತಮಿಳುನಾಡು, ಪಶ್ಚಿಮ ಬಂಗಾಳ, ರಾಜಸ್ಥಾನ ಮತ್ತು ಬಿಹಾರಗಳಲ್ಲಿ ಸೋಂಕು ಸತತ ಏರುಗತಿಯಲ್ಲಿದೆ. ಅದರಲ್ಲಿಯೂ ಬೆಂಗಳೂರಿನಲ್ಲಿ ಒಂದು ವಾರದಲ್ಲಿ 1.49 ಲಕ್ಷ ಹೊಸ ಪ್ರಕರಣ ದಾಖಲಾಗಿರುವುದು ಕಳವಳಕಾರಿ ಸಂಗತಿ. ಕೊಯಿಕ್ಕೋಡ್‌, ಎರ್ನಾಕುಲಂ, ಗುರುಗ್ರಾಮಗಳಲ್ಲಿಯೂ ಸೋಂಕು ಸತತ ಏರುಗತಿಯಲ್ಲಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ. ಮಹಾರಾಷ್ಟ್ರದ 11 ಜಿಲ್ಲೆಗಳಲ್ಲಿ ಸೋಂಕು ಇಳಿಮುಖವಾಗಿರುವುದು ಕೊಂಚ ಸಮಾಧಾನ ಮೂಡಿಸಿದೆ. ಮತ್ತೆ 18 ಮಂದಿ ಸಾವು: ಚೆನ್ನೈನ ಚೆಂಗಪಟ್ಟು ಸರಕಾರಿ ಆಸ್ಪತ್ರೆಗೆ ದಾಖಲಾಗಿದ್ದ 13 ರೋಗಿಗಳು ಆಮ್ಲಜನಕದ ಕೊರತೆಯಿಂದ 24 ಗಂಟೆ ಅವಧಿಯಲ್ಲಿ ಮೃತಪಟ್ಟಿದ್ದಾರೆ. ಇವರೆಲ್ಲ40 ರಿಂದ 85 ವರ್ಷ ವಯೋಮಾನದವರು. ಈ ಬಗ್ಗೆ ಆಸ್ಪತ್ರೆಯ ಡೀನ್‌ ಡಾ. ಜೆ. ಮುತ್ತುಕುಮರನ್‌ ಅವರು ಸ್ಪಷ್ಟನೆ ನೀಡಿದ್ದು, ''ಸತ್ತವರಲ್ಲಿ ಕೇವಲ ಒಬ್ಬ ವ್ಯಕ್ತಿಗೆ ಮಾತ್ರ ಕೊರೊನಾ ಪಾಸಿಟಿವ್‌ ಇತ್ತು. ಉಳಿದ ಆರು ಮಂದಿಗೆ ಇತರ ಗಂಭೀರ ಆರೋಗ್ಯ ಸಮಸ್ಯೆಗಳಿದ್ದವು. ಅದಕ್ಕಾಗಿ ಅವರು ಚಿಕಿತ್ಸೆ ಪಡೆಯುತ್ತಿದ್ದರು. ಇದಲ್ಲದೇ ಬಾಕಿ ಏಳು ಮಂದಿ ಆಸ್ಪತ್ರೆಗೆ ಬರುವಾಗಲೇ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದರು. ಹಾಗಾಗಿ ಅವರನ್ನು ಉಳಿಸಲು ಆಗಿಲ್ಲ,'' ಎಂದಿದ್ದಾರೆ. ಮೃತಪಟ್ಟ ಹಲವರಲ್ಲಿ ಆಮ್ಲಜನಕದ ಪ್ರಮಾಣ ತೀವ್ರವಾಗಿ ಕುಸಿಯುತ್ತಿರುವುದನ್ನು ಗಮನಿಸಿದ ನರ್ಸ್‌ಗಳು , ಪ್ರಾಥಮಿಕ ಚಿಕಿತ್ಸೆ ಕೂಡ ನೀಡಿದ್ದಾರೆ. ಇದರಲ್ಲಿ ನಿರ್ಲಕ್ಷ್ಯ ಮಾಡಲಾಗಿಲ್ಲ ಎಂದು ಸಮರ್ಥನೆ ನೀಡಿದ್ದಾರೆ. ಮತ್ತೊಂದೆಡೆ, ಜಿಲ್ಲಾಧಿಕಾರಿ ಎ.ಜಾನ್‌ ಲೂಯಿಸ್‌ ಕೂಡ ಪ್ರತಿಕ್ರಿಯಿಸಿ, ''ಮಂಗಳವಾರ ಇಡೀ ರಾತ್ರಿ ಗಸ್ತು ತಿರುಗುತ್ತಾ ಆಸ್ಪತ್ರೆಗಳಲ್ಲಿಮತ್ತು ಕೆಲವು ಐಸೊಲೇಷನ್‌ ಕೇಂದ್ರಗಳಲ್ಲಿ ಆಮ್ಲಜನಕದ ಕೊರತೆ ಬಗ್ಗೆ ಗಮನಿಸುತ್ತಿದ್ದೆವು. ಮೃತರಿಗೆ ಆಕ್ಸಿಜನ್‌ ಕೊರತೆಯಾಗುವಂಥ ಪರಿಸ್ಥಿತಿ ಇರಲಿಲ್ಲ. ಇತರ ತಾಂತ್ರಿಕ ಸಮಸ್ಯೆಗಳ ಬಗ್ಗೆ ತನಿಖೆಗೆ ಆದೇಶಿಸಿದ್ದೇನೆ. ಮೃತರಲ್ಲಿ ಹಲವರಿಗೆ ವೈರಲ್‌ ನ್ಯುಮೊನಿಯಾ ಇದ್ದ ಬಗ್ಗೆ ವೈದ್ಯರು ತಿಳಿಸಿದ್ದಾರೆ,'' ಎಂದು ಹೇಳಿದ್ದಾರೆ. ಐವರು ಸೋಂಕಿತರ ಸಾವು: ಉತ್ತರಾಖಂಡದ ಹರಿದ್ವಾರ ಜಿಲ್ಲೆಯ ರೂರ್ಕಿ ನಗರದ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಓರ್ವ ಮಹಿಳೆ ಸೇರಿದಂತೆ ಒಟ್ಟು ಐವರು ಕೊರೊನಾ ಸೋಂಕಿತರು ಕೇವಲ 30 ನಿಮಿಷಗಳ ಕಾಲದವರೆಗೆ ಆಕ್ಸಿಜನ್‌ ಪೂರೈಕೆಯ ವ್ಯತ್ಯಯದಿಂದಾಗಿ ಮೃತಪಟ್ಟಿದ್ದಾರೆ. ಮಂಗಳವಾರ ನಸುಕಿನ 2 ಗಂಟೆಗೆ ದುರಂತ ಸಂಭವಿಸಿದೆ. ಮೃತರ ಪೈಕಿ ಒಬ್ಬರು ಮಾತ್ರ ವೆಂಟಿಲೇಟರ್‌ ನೆರವಿನಲ್ಲಿದ್ದರು. ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿಸಿರುವ ಜಿಲ್ಲಾಧಿಕಾರಿ ಸಿ.ರವಿಶಂಕರ್‌ ಅವರು ತನಿಖೆಗೆ ಆದೇಶಿಸಿದ್ದಾರೆ. ರೂರ್ಕಿಯ ಪ್ರಧಾನ ವೈದ್ಯಾಧಿಕಾರಿಗಳ ನೇತೃತ್ವದಲ್ಲಿ ಖಾಸಗಿ ಆಸ್ಪತ್ರೆಯ ಮೆಡಿಕಲ್‌ ಆಡಿಟ್‌ಗೂ ಸೂಚನೆ ನೀಡಲಾಗಿದೆ. ಒಟ್ಟು ಮೂವರು ಹಿರಿಯ ವೈದ್ಯರ ತಂಡವನ್ನು ಇದಕ್ಕಾಗಿಯೇ ರಚಿಸಲಾಗಿದೆ. ಒಂದು ವಾರದೊಳಗೆ ಈ ತಂಡವು ಆಸ್ಪತ್ರೆಯಲ್ಲಿನ ರೋಗಿಗಳ ಸಂಖ್ಯೆ, ಆಕ್ಸಿಜನ್‌ ಸಂಗ್ರಹ ಪ್ರಮಾಣ, ಇತರ ಔಷಧಗಳ ಪೂರೈಕೆ ಕುರಿತು ವಿಸ್ತೃತ ವರದಿಯನ್ನು ಜಿಲ್ಲಾಧಿಕಾರಿಗೆ ನೀಡಲಿದೆ. ಯುವಕರಿಗೆ ಸಿಗದ ಲಸಿಕೆ ದೇಶಾದ್ಯಂತ ಏಪ್ರಿಲ್‌ 28ರಿಂದ ಮೇ 5ರವರೆಗೆ 18ರಿಂದ 44 ವರ್ಷದ 3.5 ಕೋಟಿ ಜನರು ಕೊರೊನಾ ನಿರೋಧಕ ಲಸಿಕೆ ಪಡೆಯಲು ನೋಂದಣಿ ಮಾಡಿಸಿಕೊಂಡಿದ್ದಾರೆ. ಈ ಪೈಕಿ ಶೇ.2ರಷ್ಟು ಜನರಿಗೆ ಮಾತ್ರ ಲಸಿಕೆ ಲಭ್ಯವಾಗಿದೆ ಎಂದು ಮೂಲಗಳು ತಿಳಿಸಿವೆ. ಆಸ್ಪತ್ರೆ, ನರ್ಸಿಂಗ್‌ ಹೋಮ್‌ಗಳಲ್ಲಿಅಗ್ನಿ ಸುರಕ್ಷತೆ ಪರಿಶೀಲನೆಗೆ ಆದೇಶ ಕೊರೊನಾ ಎರಡನೇ ಅಲೆ ಹೊಡೆತಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಸೋಂಕಿತರು ಆಸ್ಪತ್ರೆಗಳಿಗೆ ದಾಖಲಾಗುತ್ತಿರುವ ಹಿನ್ನೆಲೆಯಲ್ಲಿ ದೇಶದ ಎಲ್ಲ ಆಸ್ಪತ್ರೆಗಳು, ನರ್ಸಿಂಗ್‌ ಹೋಮ್‌ಗಳು ತಮ್ಮಲ್ಲಿನ ಅಗ್ನಿ ಅವಘಡ ತಡೆ ವ್ಯವಸ್ಥೆಯ ಪರಿಶೀಲನೆ ನಡೆಸಬೇಕು ಎಂದು ಕೇಂದ್ರ ಗೃಹ ಸಚಿವಾಲಯ ಆದೇಶಿಸಿದೆ. ಈ ಬಗ್ಗೆ ಗೃಹ ಕಾರ್ಯದರ್ಶಿ ಅಜಯ್‌ ಭಲ್ಲಾಅವರು ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಪತ್ರ ಬರೆದು ಸೂಚನೆ ನೀಡಿದ್ದಾರೆ. ಕಳೆದ ಎರಡು ತಿಂಗಳಲ್ಲಿ ದೇಶಾದ್ಯಂತ ಆಸ್ಪತ್ರೆಗಳಲ್ಲಿ 12ಕ್ಕೂ ಹೆಚ್ಚು ಅಗ್ನಿ ದುರಂತಗಳು ಸಂಭವಿಸಿವೆ. ಕೊರೊನಾ ಸೋಂಕಿತರು ಸೇರಿದಂತೆ ಅನೇಕ ರೋಗಿಗಳು, ಸಿಬ್ಬಂದಿ ಮೃತಪಟ್ಟಿದ್ದಾರೆ. ಇದನ್ನು ತಡೆಯಲು ರಾಜ್ಯ ಸರಕಾರದ ಆರೋಗ್ಯ ಇಲಾಖೆ ಹಾಗೂ ಅಗ್ನಿಶಾಮಕ ದಳವು ಎಲ್ಲ ಆಸ್ಪತ್ರೆಗಳಲ್ಲಿ ಪರಿಶೀಲನೆ ಕಾರ್ಯ ನಡೆಸಬೇಕು. ಸುರಕ್ಷತಾ ಸಾಧನಗಳನ್ನು ಕೂಡ ಹೆಚ್ಚಿಸಿ ಎಂದು ಸಚಿವಾಲಯ ಹೇಳಿದೆ. ಪ್ರಮುಖವಾಗಿ ದಿನದ 24 ವೈದ್ಯಕೀಯ ಸೇವೆ ಒದಗಿಸುವ ಬೃಹತ್‌ ಆಸ್ಪತ್ರೆಗಳು ಅಗ್ನಿ ಅವಘಡ ತಡೆಯಲು ಎಲ್ಲ ರೀತಿಯಲ್ಲಿ ಸಜ್ಜಾಗಿರಬೇಕು. ರೋಗಿಗಳ ಜೀವ ಬಹಳ ಮುಖ್ಯ ಎಂದು ಸೂಚನೆ ನೀಡಲಾಗಿದೆ.