38,000 ಕೋಟಿ ರೂ. ದಾಟಿದ ರಕ್ಷಣಾ ಸಾಮಗ್ರಿ ರಫ್ತು, ಅಮೇಥಿಯಲ್ಲಿ 5 ಲಕ್ಷ ಎ.ಕೆ-203 ರೈಫಲ್‌ ಉತ್ಪಾದನೆ

ಹೊಸದಿಲ್ಲಿ: ಭಾರತವು ಕಳೆದ ಏಳು ವರ್ಷಗಳಲ್ಲಿ 38 ಸಾವಿರ ಕೋಟಿ ರೂ.ಗಿಂತಲೂ ಹೆಚ್ಚು ಮೌಲ್ಯದ ರಕ್ಷಣಾ ಸಾಮಗ್ರಿಗಳನ್ನು ರಫ್ತು ಮಾಡಿದೆ ಎಂದು ರಕ್ಷಣಾ ಸಚಿವ ಶನಿವಾರ ಹೇಳಿದ್ದಾರೆ. ಶನಿವಾರ ಇಲ್ಲಿ ನಡೆದ ಭಾರತೀಯ ರಕ್ಷಣಾ ಉತ್ಪಾದಕರ ಸಂಘದ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ (ಎಂಎಸ್‌ಎಂಇ) ಸಮಾವೇಶದಲ್ಲಿ ರಾಜನಾಥ್‌ ಸಿಂಗ್‌ ಮಾತನಾಡಿದರು. "ಭಾರತದ ಏರೋಸ್ಪೇಸ್‌ ಮತ್ತು ರಕ್ಷಣಾ ಉದ್ಯಮವು ಅಂದಾಜು 85 ಸಾವಿರ ಕೋಟಿ ರೂ.ಹೂಡಿಕೆ ಹೊಂದಿದೆ. ಇದರಲ್ಲಿ ಖಾಸಗಿ ವಲಯದ ಕೊಡುಗೆ 18 ಸಾವಿರ ಕೋಟಿ ರೂ.ಗಿಂತಲೂ ಹೆಚ್ಚಾಗಿದೆ," ಎಂದರು. ರಾಷ್ಟ್ರದ ಭದ್ರತೆ ಬಲಪಡಿಸಲು ನೆರವಾಗುವ ಸಂಶೋಧನಾ ಚಟುವಟಿಕೆಗಳಿಗೆ ಹೆಚ್ಚಿನ ಹೂಡಿಕೆ ಮಾಡುವಂತೆ ಸಚಿವರು ಉದ್ಯಮಗಳ ಪ್ರತಿನಿಧಿಗಳಿಗೆ ಮನವಿ ಮಾಡಿದರು. "ಸರಕಾರ ಕೈಗೊಂಡಿರುವ ಕ್ರಮಗಳಿಂದ ಸುಮಾರು 12,000 ‘ಎಂಎಸ್‌ಎಂಇ’ಗಳು ರಕ್ಷಣಾ ಉದ್ಯಮಕ್ಕೆ ಸೇರ್ಪಡೆಗೊಂಡಿವೆ. ಸರಕಾರ 2024-25ರ ವೇಳೆಗೆ 35,000 ಕೋಟಿ ರೂ. ಮೌಲ್ಯದ ರಫ್ತು ಗುರಿ ಸಾಧಿಸುವ ಉದ್ದೇಶ ಹೊಂದಿದೆ. ಪ್ರಸ್ತುತ, ಭಾರತವು ಸುಮಾರು 70 ದೇಶಗಳಿಗೆ ರಕ್ಷಣಾ ಸಾಧನಗಳನ್ನು ರಫ್ತು ಮಾಡುತ್ತಿದೆ. ಸ್ಟಾಕ್ಹೋಮ್‌ ಇಂಟರ್‌ ನ್ಯಾಷನಲ್‌ ಪೀಸ್‌ ರಿಸರ್ಚ್ ಇನ್ಸ್‌ಟಿಟ್ಯೂಟ್‌ ವರದಿಯ ಪ್ರಕಾರ, ಭಾರತವು ಅತಿ ಹೆಚ್ಚು ರಕ್ಷಣಾ ಸಾಮಗ್ರಿಗಳನ್ನು ರಫ್ತು ಮಾಡುತ್ತಿರುವ ಅಗ್ರ 25 ದೇಶಗಳ ಪಟ್ಟಿಯಲ್ಲಿದೆ," ಎಂದರು. ಅಮೇಥಿಯಲ್ಲಿ 5 ಲಕ್ಷ ಎ.ಕೆ-203 ಉತ್ಪಾದನೆಗೆ ಸಮ್ಮತಿ ಉತ್ತರ ಪ್ರದೇಶದ ಅಮೇಥಿಯ ಕೊರ್ವಾದಲ್ಲಿ 5 ಲಕ್ಷಕ್ಕೂ ಅಧಿಕ ಎಕೆ-203 ಅಸಾಲ್ಟ್‌ ರೈಫಲ್‌ಗಳನ್ನು ತಯಾರಿಸುವ ಯೋಜನೆಗೆ ಕೇಂದ್ರ ಸರಕಾರ ಹಸಿರು ನಿಶಾನೆ ತೋರಿದೆ. ಸರಕಾರದ ಈ ನಿರ್ಧಾರವು ರಕ್ಷಣಾ ವಲಯದಲ್ಲಿ ಭಾರತದ ಸ್ವಾವಲಂಬನೆಗೆ ದೊಡ್ಡ ಹೆಜ್ಜೆಯಾಗಲಿದೆ ಎಂದು ಮೂಲಗಳು ತಿಳಿಸಿವೆ. "ರಕ್ಷಣಾ ಸಾಮಗ್ರಿಗಳನ್ನು ಖರೀದಿಸುವ ಬದಲು ದೇಶೀಯ ಉತ್ಪಾದನೆಗೆ ಒತ್ತು ನೀಡುತ್ತಿರುವುದು ಸರಕಾರದ ಕಾರ್ಯ ವಿಧಾನದಲ್ಲಿ ದೊಡ್ಡ ಬದಲಾವಣೆಯನ್ನು ಸೂಚಿಸುತ್ತದೆ. ರಷ್ಯಾ ಸಹಯೋಗದಲ್ಲಿ ಈ ರೈಫಲ್‌ಗಳನ್ನು ಉತ್ಪಾದಿಸಲಾಗುವುದು. ಉಭಯ ದೇಶಗಳ ನಡುವೆ ರಕ್ಷಣಾ ಕ್ಷೇತ್ರದಲ್ಲಿ ಹೆಚ್ಚಿನ ಸಹಕಾರವನ್ನೂ ಈ ಯೋಜನೆ ಸೂಚಿಸುತ್ತದೆ," ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ. "ರೈಫಲ್‌ ತಯಾರಿಗೆ ಕಚ್ಚಾ ಸಾಮಗ್ರಿ ಅಗತ್ಯವಿರುವ ಹಿನ್ನೆಲೆಯಲ್ಲಿ, ಈ ಯೋಜನೆಯು ರಕ್ಷಣಾ ವಲಯದ ಉದ್ಯಮಗಳು ಮತ್ತು ಸಣ್ಣ ಉದ್ಯಮಗಳಿಗೆ ವ್ಯವಹಾರ ಅವಕಾಶ ಒದಗಿಸುತ್ತದೆ. ಜತೆಗೆ ಹೊಸ ಉದ್ಯೋಗಾವಕಾಶಗಳ ಸೃಷ್ಟಿಗೂ ನೆರವಾಗುತ್ತದೆ," ಎಂದು ಅವರು ತಿಳಿಸಿದ್ದಾರೆ. 2.62/39 ಎಂಎಂ ಕ್ಯಾಲಿಬರ್‌ನ ಅತ್ಯಾಧುನಿಕ ಎ.ಕೆ-203 ರೈಫಲ್‌ಗಳು ಪ್ರಸ್ತುತ ಸೇನೆಯು ಬಳಸುತ್ತಿರುವ ಮೂರು ದಶಕಗಳ ಹಳೆಯ ‘ಐಎನ್‌ಎಸ್‌ಎಸ್‌ಎಸ್‌’ ರೈಫಲ್‌ಗಳ ಸ್ಥಾನವನ್ನು ತುಂಬಲಿವೆ. ಈ ರೈಫಲ್‌ಗಳು 300 ಮೀಟರ್‌ ಗುರಿ ವ್ಯಾಪ್ತಿಯನ್ನು ಹೊಂದಿರುವುದಲ್ಲದೆ, ಹಗರು ಮತ್ತು ಗಟ್ಟಿ ಮುಟ್ಟಾಗಿರಲಿವೆ. ಹೊಸ ತಂತ್ರಜ್ಞಾನದಿಂದ ತಯಾರಿಸಿರುವ ಹಿನ್ನೆಲೆಯಲ್ಲಿ ಯೋಧರ ಬಳಕೆಗೆ ಹೆಚ್ಚು ಅನುಕೂಲಕರವಾಗಿವೆ. ಯೋಧರ ಕಾರ್ಯಕ್ಷಮತೆಯನ್ನು ಇವು ಹೆಚ್ಚಿಸಲಿವೆ ಎಂದು ಮೂಲಗಳು ಹೇಳಿವೆ.