ವೊಡಾಫೋನ್‌ ಐಡಿಯಾ ಮುಳುಗಿದರೆ ಎಸ್‌ಬಿಐ ಸೇರಿ 4 ಬ್ಯಾಂಕ್‌ಗಳಿಗೆ ಭಾರಿ ಸಂಕಷ್ಟ

ಮುಂಬಯಿ: ದೇಶದ 3ನೇ ಅತೀ ದೊಡ್ಡ ಟೆಲಿಕಾಂ ಆಪರೇಟರ್‌ (ವಿಐಎಲ್‌) ಭಾರಿ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದು, ದಿವಾಳಿ ಅಂಚಿಗೆ ಬಂದು ನಿಂತಿದೆ. ಒಂದೊಮ್ಮೆ ಕಂಪನಿ ಮುಳುಗಡೆಯಾದರೆ ದೇಶದ ನಾಲ್ಕು ಬ್ಯಾಂಕುಗಳು ಭಾರಿ ಸಂಕಷ್ಟಕ್ಕೆ ಗುರಿಯಾಗಲಿವೆ. ಅದರಲ್ಲೂ ಖಾಸಗಿ ರಂಗದ ಮೂರು ಬ್ಯಾಂಕ್‌ಗಳಂತೂ ಭಾರಿ ಹೊಡೆತ ಅನುಭವಿಸಲಿವೆ. ಇವುಗಳ ಪಾಲಿಗೆ ವೊಡಾಫೋನ್‌ ಐಡಿಯಾ ಸಾಲ ದುಸ್ವಪ್ನದಂತೆ ಕಾಡಲಿದೆ. ವೊಡಾಫೋನ್‌ ಐಡಿಯಾದ ಈಗಿನ ಹೂಡಿಕೆದಾರರು ಹೆಚ್ಚಿನ ಹೂಡಿಕೆಗೆ ಸಿದ್ಧವಿಲ್ಲ. ಜತೆಗೆ ಎಜಿಆರ್‌ ಬಾಕಿ ಸಂಬಂಧ ಸುಪ್ರೀಂ ಕೋರ್ಟ್‌ಗೆ ಕಂಪನಿ ಸಲ್ಲಿಸಿದ್ದ ಅರ್ಜಿಯೂ ವಜಾಗೊಂಡಿದೆ. ಇನ್ನೊಂದೆಡೆ ಹೊಸ ಹೂಡಿಕೆದಾರರು ಬಂದರೂ, ಇವರು ದೊಡ್ಡ ಮೊತ್ತದ ಹಣವನ್ನು ಕಂಪನಿಯ ಹೊಣೆಗಾರಿಕೆಗಳಿಗಾಗಿಯೇ ಹೂಡಿಕೆ ಮಾಡಬೇಕಿದೆ. ಆ ಹಣ ನೇರವಾಗಿ ಸರಕಾರದ ಬೊಕ್ಕಸ ಸೇರಲಿದ್ದು, ಕಂಪನಿಯನ್ನು 5ಜಿಗೆ ಸಿದ್ಧಗೊಳಿಸಲು ಸಾಧ್ಯವಿಲ್ಲ. ಈ ಎಲ್ಲಾ ಹಿನ್ನೆಲೆಯಲ್ಲಿ ಕಂಪನಿ ಭವಿಷ್ಯದ ಮೇಲೆ ಕಗ್ಗತ್ತಲು ಆವರಿಸಿದೆ. ಸದ್ಯ ಕಂಪನಿ ಸಾಲ ಸೇರಿ 1.8 ಲಕ್ಷಕ್ಕೂ ಹೆಚ್ಚು ಮೊತ್ತದ ಹೊಣೆಗಾರಿಕೆಗಳನ್ನು ಹೊಂದಿದೆ. ಇದರಲ್ಲಿ ಸರಕಾರಿ ಹಾಗೂ ಖಾಸಗಿ ಬ್ಯಾಂಕ್‌ಗಳ ಸಾಲವೇ 28,700 ಕೋಟಿ ರೂ. ಇದೆ. ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಸಂಸ್ಥೆಗೆ 11,000 ಕೋಟಿ ರೂ. ಸಾಲ ನೀಡಿದ್ದು, ಅತೀ ಹೆಚ್ಚಿನ ಸಾಲ ನೀಡಿದ ಬ್ಯಾಂಕ್‌ ಎನಿಸಿಕೊಂಡಿದೆ. ಎಸ್‌ಬಿಐನ ಗಾತ್ರಕ್ಕೆ ಈ ಸಾಲ ಅಷ್ಟೇನೂ ಚಿಂತೆಯ ವಿಷಯವಲ್ಲ. ಆದರೆ , ಇಂಡಸ್‌ಇಂಡ್‌ ಬ್ಯಾಂಕ್‌ ಮತ್ತು ಪಾಲಿಗೆ ವಿಐಎಲ್‌ಗೆ ನೀಡಿದ ಸಾಲ ಭಾರಿ ಹೊರೆಯಾಗಲಿದೆ. ವೊಡಾಫೋನ್‌ ಐಡಿಯಾಗೆ ಯೆಸ್‌ ಬ್ಯಾಂಕ್‌ 4,000 ಕೋಟಿ ರೂ. ಸಾಲ ನೀಡಿದ್ದರೆ, ಇಂಡಸ್‌ಇಂಡ್‌ ಬ್ಯಾಂಕ್‌ 3,500 ಕೋಟಿ ರೂ., ಐಡಿಎಫ್‌ಸಿ ಬ್ಯಾಂಕ್‌ 3,244 ಕೋಟಿ ರೂ. ಸಾಲ ನೀಡಿದೆ. ಐಡಿಎಫ್‌ಸಿಯ ಒಟ್ಟಾರೆ ಸಾಲದಲ್ಲಿ ವೊಡಾಫೋನ್‌ ಐಡಿಯಾದ ಪಾಲೇ ಶೇ. 2.9ರಷ್ಟಿದೆ. ಯೆಸ್‌ ಬ್ಯಾಂಕ್‌ ಶೇ. 2.4 ಹಾಗೂ ಇಂಡಸ್‌ಇಂಡ್‌ ಬ್ಯಾಂಕ್‌ ಶೇ. 1.65ರಷ್ಟು ಸಾಲವನ್ನು ವೊಡಾಫೋನ್‌ ಐಡಿಯಾಗೆ ನೀಡಿದ್ದು, ಮೂರು ಬ್ಯಾಂಕ್‌ಗಳ ಪಾಲಿಗೆ ವಿಐಎಲ್‌ ಮುಳುಗಡೆ ದುಬಾರಿಯಾಗಲಿದೆ. ಮಾಧ್ಯಮ ವರದಿಗಳ ಪ್ರಕಾರ ಈಗಾಗಲೇ ಐಡಿಎಫ್‌ಸಿ ಫಸ್ಟ್‌ ಬ್ಯಾಂಕ್‌ ವೊಡಾಫೋನ್‌ ಐಡಿಯಾ ದಿವಾಳಿಯಾಲಿದೆ ಎಂದು ಅಂದಾಜಿಸಿದ್ದು, ಸಾಲದ ಶೇ. 15ರಷ್ಟು ಹಣವನ್ನು ತನ್ನ ಲಾಭದಿಂದ ತೆಗೆದಿಟ್ಟಿದೆ. ಹೀಗಿದ್ದರೂ ಅಪಾಯ ತಪ್ಪಿದ್ದಲ್ಲ. ವೊಡಾಫೋನ್‌ ಸಂಕಷ್ಟದ ಸುದ್ದಿ ಹೊರಬಿದ್ದ ಹಿನ್ನೆಲೆಯಲ್ಲಿ ಎಸ್‌ಬಿಐ ಷೇರುಗಳು ಗುರುವಾರ ಶೇ. 3.3ರಷ್ಟು ನಷ್ಟ ಅನುಭವಿಸಿದರೆ, ಐಡಿಎಫ್‌ಸಿ ಫಸ್ಟ್‌ ಬ್ಯಾಂಕ್‌ ಶೇ. 5 ಹಾಗೂ ಯೆಸ್‌ ಬ್ಯಾಂಕ್‌ ಷೇರುಗಳು ಶೇ. 2 ರಷ್ಟು ನಷ್ಟ ಅನುಭವಿಸಿವೆ.