ಸಂಸತ್‌ ಅಧಿವೇಶನ ಮುಕ್ತಾಯ, ಪೆಟ್ರೋಲ್‌-ಡೀಸೆಲ್‌ ದರ ಮತ್ತೆ ಏರಿಕೆ ಸಂಭವ
ಕಳೆದ 1 ತಿಂಗಳಿನಿಂದ ಸಾರ್ವಜನಿಕ ತೈಲ ಕಂಪನಿಗಳು ಪೆಟ್ರೋಲ್‌, ಡೀಸೆಲ್‌ ದರವನ್ನು ಬದಲಿಸಿರಲಿಲ್ಲ. ಆದರೆ ಇದೀಗ ಸಂಸತ್‌ ಅಧಿವೇಶನ ಮುಕ್ತಾಯವಾಗಿರುವುದರಿಂದ ತೈಲ ದರಗಳು ಮತ್ತೊಮ್ಮೆ ಏರಿಕೆಯಾಗುವ ಸಾಧ್ಯತೆ ಇದೆ.
Admin
0
5
ಹೊಸದಿಲ್ಲಿ: ಕಳೆದ ಒಂದು ತಿಂಗಳಿನಿಂದ ಸಾರ್ವಜನಿಕ ತೈಲ ಕಂಪನಿಗಳು ಪೆಟ್ರೋಲ್‌ ಮತ್ತು ಡೀಸೆಲ್‌ ದರವನ್ನು ಬದಲಿಸಿರಲಿಲ್ಲ. ತೈಲ ದರ ಏರಿಕೆ ವಿರುದ್ಧ ಪ್ರತಿಪಕ್ಷಗಳು ಸಂಸತ್ತಿನಲ್ಲಿ ಗದ್ದಲ ಮಾಡುವ ಸಾಧ್ಯತೆ ಇದ್ದುದರಿಂದ ಅದನ್ನು ತಣ್ಣಗಾಗಿಸುವ ಕಾರ್ಯತಂತ್ರವಾಗಿಯೂ ದರ ಏರಿಕೆಯನ್ನು ತಡೆಹಿಡಿಯಲಾಗಿತ್ತು. ಆದರೆ ಇದೀಗ ಸಂಸತ್ತಿನಲ್ಲಿ ಅಧಿವೇಶನ ಮುಕ್ತಾಯವಾಗಿರುವುದರಿಂದ ತೈಲ ದರಗಳು ಮತ್ತೊಮ್ಮೆ ಏರಿಕೆಯಾಗುವ ಸಾಧ್ಯತೆ ಇದೆ. ತೈಲ ಕಂಪನಿಗಳು ನಿತ್ಯ ದರ ಪರಿಷ್ಕರಣೆಯ ನೀತಿಗೆ ಮರಳುವ ನಿರೀಕ್ಷೆ ಇದೆ ಎಂದು ಮೂಲಗಳು ತಿಳಿಸಿವೆ.
ಐದು ರಾಜ್ಯಗಳ ವಿಧಾನಸಭೆ ಚುನಾವಣೆ ಫಲಿತಾಂಶದ ನಂತರ ಕಳೆದ ಮೇ 4ರಿಂದ ದೇಶಿ ಮಾರುಕಟ್ಟೆಯಲ್ಲಿ ತೈಲ ದರಗಳು ಏರುಗತಿಯಲ್ಲಿತ್ತು. ಮೇ 4ರಿಂದ ಇಲ್ಲಿಯವರೆಗಿನ ಅವಧಿಯಲ್ಲಿ ಪೆಟ್ರೋಲ್‌ ದರದಲ್ಲಿ ಲೀಟರ್‌ಗೆ 11.44 ರೂ. ಹಾಗೂ ಡೀಸೆಲ್‌ಗೆ 9.14 ರೂ. ಹೆಚ್ಚಳವಾಗಿದೆ.
ಸಂಸತ್ತಿನ ಮುಂಗಾರು ಅಧಿವೇಶನವು ಜುಲೈ 19ರಂದು ಆರಂಭವಾಗಿತ್ತು. ಹಾಗೂ ನಿಗದಿತ ಅವಧಿಗೆ ಮುನ್ನವೇ ಆಗಸ್ಟ್‌ 11ರಂದು ಮುಕ್ತಾಯವಾಗಿತ್ತು. ಅಧಿವೇಶನ ಆರಂಭಕ್ಕೂ ಕೆಲ ದಿನಗಳ ಮುನ್ನವೇ ತೈಲ ಕಂಪನಿಗಳು ದರ ಏರಿಕೆಯನ್ನು ತಡೆದಿದ್ದವು. ಈ ನಡುವೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಳೆದ ಒಂದು ತಿಂಗಳಿನಿಂದ ತೈಲ ದರಗಳು ಏರಿಳಿತವಾಗುತ್ತಿವೆ. ಪ್ರತಿ ಬ್ಯಾರೆಲ್‌ಗೆ 70 ಡಾಲರ್‌ ಆಸುಪಾಸಿನಲ್ಲಿ ಸದ್ಯಕ್ಕಿದೆ.
