ಸೂರ್ಯನ ಬಿಸಿಲಲ್ಲೇ ಬೇಯಲಿದೆ ಅಡಕೆ; ಬೆಳೆಗಾರರಿಗೆ ನಿಶ್ಚಿಂತೆ: ಸೋಲಾರ್‌ ಯಂತ್ರದ ಮೂಲಕ ಹೊಸ ಆವಿಷ್ಕಾರ!

ಕಿರಣ್‌ ಎಸ್‌.ಜೆ., ಸಂತೆಬೆನ್ನೂರು ಸಂತೆಬೆನ್ನೂರು: ಸೌದೆ ಒಲೆ ಉರಿಸಿ ಬೇಯಿಸಿ, ಒಣಗಿಸುವ ಗೊಡವೆಯಿಂದ ರೈತರಿಗೆ ಇನ್ನು ಮುಕ್ತಿ ಸಿಗಲಿದೆ. ಅಡಕೆಯನ್ನು ಸುಲಭವಾಗಿ ಬೇಯಿಸಿ ಒಣಗಿಸುವ ಸೋಲಾರ್‌ ಯಂತ್ರವೊಂದು ಆವಿಷ್ಕಾರಗೊಂಡಿದ್ದು, ಇದರಿಂದ ರೈತರ ಅರ್ಧದಷ್ಟು ಸಮಯ, ಶ್ರಮ ಉಳಿತಾಯವಾಗಲಿದೆ. ವೃತ್ತಿಯಲ್ಲಿ ಸಾಫ್ಟ್‌ವೇರ್‌ ಎಂಜಿನಿಯರ್‌ ಆಗಿರುವ ಚನ್ನಗಿರಿ ತಾಲೂಕು ಹೊನ್ನೆಮರದಹಳ್ಳಿಯ ಬಿ.ಆರ್‌. ರಘು, ಲಾಕ್‌ಡೌನ್‌ ಸಮಯದಲ್ಲಿ ಅಡಕೆ ಬೇಯಿಸುವ ಮತ್ತು ಕಾಫೀ ಬೀಜ ಒಣಗಿಸುವ ಹೊಸ ಸಿದ್ಧಪಡಿಸಿದ್ದಾರೆ. ಪ್ರಾಥಮಿಕ ಶಾಲೆಯಲ್ಲಿ ಕಲಿತಿದ್ದ ನೀರು, ಬೆಳಕು ಮತ್ತು ಗಾಳಿ ರೀತಿಯ ನೈಸರ್ಗಿಕ ಸಂಪನ್ಮೂಲ ಬಳಸಿ ಶಕ್ತಿ ಪಡೆಯಬಹುದು ಎಂಬ ಮೂಲ ಚಿಂತನೆ ಆಧಾರದಲ್ಲಿ ರಘು ಈ ಆವಿಷ್ಕಾರ ಮಾಡಿದ್ದಾರೆ. ಸೋಲಾರ್‌ ಯಂತ್ರ ರಚನೆ 3*3, 3*4 ಅಡಿ ಸುತ್ತಳತೆಯ ಯಂತ್ರದ ಒಳಭಾಗದಲ್ಲಿ ಅಲ್ಯೂಮಿನಿಯಂ ಲೇಪನ ಮಾಡಲಾಗಿದೆ. ಮೇಲ್ಭಾಗದಲ್ಲಿ ನಾಲ್ಕು ತೆರೆದ ನಿಕ್ರೋಮ್‌ ಶೀಟ್‌ಗಳನ್ನು ಅಳವಡಿಸಿದ್ದು, ಬೆಳಕಿನ ವಕ್ರೀಭವನ ಕ್ರಿಯೆಗಾಗಿ ಮುಚ್ಚಳದಲ್ಲಿ ದಪ್ಪನೆ ಗಾಜು ಅಳವಡಿಸಲಾಗಿದೆ. ಉಷ್ಣತೆ ನಿಯಂತ್ರಿಸಲು ಕಂಟ್ರೋಲರ್‌ ಮತ್ತು ಸೆನ್ಸಾರ್‌ ತಂತ್ರಜ್ಞಾನ ಬಳಸಿಕೊಂಡಿದ್ದು, ಯಂತ್ರದ ಹೊರ ಭಾಗ ಸಂಪೂರ್ಣ ಜಲ ನಿರೋಧಕ ಗುಣ ಹೊಂದಿದೆ. 40 ಕೆಜಿ ತೂಕದ ಒಂದು ಯಂತ್ರ ಸಿದ್ಧಪಡಿಸಲು 15 ಸಾವಿರ ರೂ. ಖರ್ಚು ತಗುಲಿದೆ. ಕಾರ್ಯನಿರ್ವಹಣೆ ಸೂರ್ಯನ ಕಿರಣಗಳ ಬೆಳಕಿನ ವಕ್ರೀಭವನ ಕ್ರಿಯೆಯ ಮೂಲಕ ಅಲ್ಯೋಮಿನಿಯಂ ಹಾಳೆಗಳಲ್ಲಿ ಭಾರಿ ಪ್ರತಿಫಲನ ಉಂಟಾಗಿ, 180 ಡಿಗ್ರಿಯಿಂದ 200 ಡಿಗ್ರಿಯವರೆಗೆ ಉಷ್ಣಾಂಶ ಉತ್ಪತ್ತಿಯಾಗುತ್ತದೆ. ಈ ಯಂತ್ರ ಬಳಸಿ 5 ಕ್ವಿಂಟಾಲ್‌ ಸುಲಿದ ಹಸಿ ಅಡಕೆಯನ್ನು 4 ಗಂಟೆಯಲ್ಲಿ ಬೇಯಿಸಬಹುದು. ಯಂತ್ರಕ್ಕೆ ವಿದ್ಯುತ್‌ ಸಂಪರ್ಕ ಸಹ ಇದ್ದು, ವಿದ್ಯುತ್‌ ಬಳಸಿದಾಗ 3 ಗಂಟೆಯಲ್ಲಿ 5 ಕ್ವಿಂಟಾಲ್‌ ಅಡಕೆ ಬೇಯಿಸಬಹುದು. ಸೋಲಾರ್‌ ಮತ್ತು ವಿದ್ಯುತ್‌ ಎರಡು ಸಂಪರ್ಕ ಬಳಸಿಕೊಂಡರೆ ಕೇವಲ ಎರಡೂವರೆ ಗಂಟೆಯಲ್ಲಿ ಅಡಕೆ ಬೇಯಿಸಬಹುದು. ಯುಪಿಎಸ್‌ ನೆರವಿನಿಂದಲೂ ಯಂತ್ರ ಓಡುತ್ತದೆ. ಸಿಪ್ಪೆ ಸುಲಿದ ಹಸಿ ಅಡಕೆ ಬೆಯಿಸಲು 120ರಿಂದ 130 ಡಿಗ್ರಿ ಮತ್ತು ಕಾಫಿ ಬೀಜ ಒಣಗಿಸಲು 60ರಿಂದ 80 ಡಿಗ್ರಿ ಉಷ್ಣಾಂಶ ಅಗತ್ಯವಿದ್ದು, ಅಡಕೆ ಬೇಯಿಸಲು ನೀರು ಬೇಕಾಗುವುದಿಲ್ಲ. ಯಂತ್ರದ ಅನುಕೂಲ ಸಾಮಾನ್ಯವಾಗಿ ಸೌದೆ ಒಲೆಯಲ್ಲಿ ಬೇಯಿಸಿದಾಗ ಒಂದು ಕ್ವಿಂಟಾಲ್‌ ಅಡಕೆ ಸಿಕ್ಕರೆ, ಈ ಯಂತ್ರದಲ್ಲಿ ಬೇಯಿಸಿದಾಗ 2 ಕೆಜಿ ಅಡಕೆ ಹೆಚ್ಚುವರಿಯಾಗಿ ಸಿಗುತ್ತದೆ. ಎಳೆಯ ಅಡಕೆಗಳು ಕರಗದೇ ಇರುವ ಕಾರಣ ರೈತರಿಗೆ ಹೆಚ್ಚು ಲಾಭ ಸಿಗುತ್ತದೆ. ಈ ಯಂತ್ರದಲ್ಲಿ ಬೇಯಿಸುವ ಅಡಕೆ ಶೇ.70ರಷ್ಟು ಒಣಗಿರುತ್ತದೆ. ಬಳಿಕ ಅತ್ಯಲ್ಪ ಸಮಯದಲ್ಲಿ ಅಡಕೆ ಸಂಪೂರ್ಣ ಒಣಗುತ್ತದೆ. ಹೀಗಾಗಿ ಮಳೆಗಾಲದಲ್ಲಿ ಈ ಯಂತ್ರ ಹೆಚ್ಚು ಉಪಯುಕ್ತ ಎನ್ನುತ್ತಾರೆ ಯಂತ್ರದ ಸಂಶೋಧಕ ರಘು. ಸಂಪರ್ಕ ಸಂಖ್ಯೆ: 9972414251. ಯಂತ್ರದ ವ್ಯಾಪಾರೀಕರಣ ಆಗಬಾರದು. ಪ್ರತಿಯೊಬ್ಬ ರೈತರೇ ಸ್ವತಃ ಈ ಯಂತ್ರ ಸಿದ್ಧಪಡಿಸಿಕೊಂಡು ಅನುಕೂಲ ಪಡೆಯಬೇಕು. ಈ ನಿಟ್ಟಿನಲ್ಲಿಅಗತ್ಯವಿರುವ ಎಲ್ಲಾ ತಾಂತ್ರಿಕ ಸಲಹೆ ನೀಡಲು ನಾನು ಸಿದ್ಧನಿದ್ದೇನೆ. ಬಿ.ಅರ್‌.ರಘು, ಯಂತ್ರದ ಸಂಶೋಧಕ ಇದು ರೈತರಿಗೆ ಉಪಯುಕ್ತವಾಗಿರುವ ಯಂತ್ರ. ಇಂತಹ ಯಂತ್ರವನ್ನು ನಮ್ಮ ತಾಲೂಕಿನವರು ಸಿದ್ಧ ಪಡಿಸಿರುವುದು ಹೆಮ್ಮೆಯ ವಿಚಾರ. ದೊಡ್ಡಮಟ್ಟದಲ್ಲಿ ಯಂತ್ರ ಉತ್ಪಾದಿಸಲು ಯಾವುದಾದರೂ ಸಂಸ್ಥೆ ಮುಂದೆ ಬಂದರೆ ತುಮ್ಕೋಸ್‌ನಿಂದ ಅಗತ್ಯ ಸಹಕಾರ ನೀಡಲಾಗುವುದು. ಆರ್‌.ಎಂ. ರವಿ, ತುಮ್ಕೋಸ್‌ ಅಧ್ಯಕ್ಷ ಮಾಲಿನ್ಯ ರಹಿತ ಯಂತ್ರವನ್ನು ಅನ್ವೇಷಣೆ ಮಾಡಿರುವ ಬಿ.ಆರ್‌.ರಘುಗೆ ಅಭಿನಂದನೆಗಳು. ಯಂತ್ರ ಹೇಗೆ ಕೆಲಸ ಮಾಡುತ್ತದೆ ಎಂದು ನೋಡಲು ರೈತ ಸಮೂಹ ಕಾತರದಿಂದ ಕಾಯುತ್ತಿದೆ. ಸಿದ್ದೇಶ್‌ ಪಟೇಲ್‌, ಪ್ರಗತಿಪರ ಕೃಷಿಕ, ಕಂಚುಗಾರನಹಳ್ಳಿ