ರೇಣುಕಾ ಶರ್ಮಾ, ಶಂಖನಾದ ಅರವಿಂದ್ ನಿಧನ: ಕಂಬನಿ ಮಿಡಿದ ನಟ ಜಗ್ಗೇಶ್
ಹಿರಿಯ ನಿರ್ದೇಶಕ ರೇಣುಕಾ ಶರ್ಮಾ, ಶಂಖನಾದ ಅರವಿಂದ್ ನಿಧನವಾರ್ತೆ ಕೇಳಿ ನಟ ಜಗ್ಗೇಶ್ ದುಃಖತಪ್ತರಾಗಿದ್ದಾರೆ.
Admin
0
13
ಮಹಾಮಾರಿ ಕೊರೊನಾ ವೈರಸ್ ಸೋಂಕಿನಿಂದಾಗಿ ನಿರ್ಮಾಪಕ ರಾಮು, ನಿರ್ಮಾಪಕ ಚಂದ್ರಶೇಖರ್ ಸೇರಿದಂತೆ ಚಿತ್ರರಂಗದ ಅನೇಕರು ವಿಧಿವಶರಾಗಿದ್ದಾರೆ. ನಿನ್ನೆಯಷ್ಟೇ ಹಿರಿಯ ನಿರ್ದೇಶಕ ಕೋವಿಡ್-19ಗೆ ಬಲಿಯಾಗಿದ್ದರು. ಇಂದು ಕೂಡ ಸೋಂಕಿಗೆ ತುತ್ತಾಗಿ ಬಾರದ ಲೋಕಕ್ಕೆ ಪಯಣಿಸಿದ್ದಾರೆ.
'ಕವಿರತ್ನ ಕಾಳಿದಾಸ', 'ಅಂಜದ ಗಂಡು', 'ಅನುಪಮ' ಮುಂತಾದ ಚಿತ್ರಗಳನ್ನು ನಿರ್ದೇಶಿಸಿದ್ದ ಹಿರಿಯ ನಿರ್ದೇಶಕ ರೇಣುಕಾ ಶರ್ಮಾ ಮತ್ತು 'ಬೆಟ್ಟದ ಹೂ' ಸಿನಿಮಾ ಖ್ಯಾತಿಯ ಶಂಖನಾದ ಅರವಿಂದ್ ನಿಧನವಾರ್ತೆ ಕೇಳಿ ಕನ್ನಡ ನಟ, ನವರಸ ನಾಯಕ ದುಃಖತಪ್ತರಾಗಿದ್ದಾರೆ.
''ಏನೆಂದು ಅಕ್ಷರ ಠಂಕಿಸಲಿ? ಯಾವ ಅಕ್ಷರದಲ್ಲಿ ಸಾಂತ್ವನ ಹೇಳಲಿ? ಯಾವ ಅಕ್ಷರದಿಂದ ಇವರ ಮನೆಯ ನೊಂದವರ ಸಮಾಧಾನ ಪಡಿಸಲಿ? ಒಂದಂತೂ ಠಂಕಿಸುವೆ ನಿಮ್ಮಗಳ ಜೊತೆಗೆ ನಾ ಕಳೆದ ಸಮಯ ಅವಿಸ್ಮರಣೀಯ. ನಿಮ್ಮ ಆತ್ಮ ರಾಯರಲ್ಲಿ ಲೀನವಾಗಲಿ. ನಿಮ್ಮ ಮನೆಯವರಿಗೆ ಧೈರ್ಯ ಆ ರಾಯರೆ ತುಂಬಲಿ. ಓಂ ಶಾಂತಿ.. ಸದ್ಗತಿ..'' ಎಂದು ನಟ ಜಗ್ಗೇಶ್ ಟ್ವೀಟ್ ಮಾಡಿದ್ದಾರೆ.
ನಟಿ ಹಾಗೂ ರಾಜಕಾರಣಿ ಮಾಳವಿಕಾ ಅವಿನಾಶ್ ಕೂಡ ಶಂಖನಾದ ಅರವಿಂದ್ ನಿಧನಕ್ಕೆ ಕಂಬನಿ ಮಿಡಿದಿದ್ದಾರೆ. ಶಂಖನಾದ ಅರವಿಂದ್ ಅಭಿನಯಿಸಿದ್ದ 'ಬೆಟ್ಟದ ಹೂ' ಚಿತ್ರದ ''ಸನ್ ಲೈಟ್ ಲೆಟ್ ಕಮ್.. ರೇನ್ ಲೆಟ್ ಇಟ್ ಕಮ್..'' ಹಾಡನ್ನು ಉಲ್ಲೇಖಿಸಿ, ಅವರಿಗೆ ಸದ್ಗತಿ ಸಿಗಲಿ ಎಂದು ಮಾಳವಿಕಾ ಅವಿನಾಶ್ ಪ್ರಾರ್ಥಿಸಿದ್ದಾರೆ.
ಚಿಕಿತ್ಸೆಗೆ ಸ್ಪಂದಿಸದೆ ಶಂಖನಾದ ಅರವಿಂದ್ ಸಾವು
ಕೊರೊನಾ ವೈರಸ್ ಸೋಂಕಿಗೆ ಒಳಗಾದ ಶಂಖನಾದ ಅರವಿಂದ್‌ರನ್ನು 13 ದಿನಗಳ ಹಿಂದೆ ವಿಕ್ಟೋರಿಯಾ ಆಸ್ಪತ್ರೆಗೆ ಸೇರಿಸಲಾಗಿತ್ತು. ಮೂರು ದಿನಗಳಿಂದ ಐಸಿಯುನಲ್ಲಿ ಶಂಖನಾದ ಅರವಿಂದ್ ಚಿಕಿತ್ಸೆ ಪಡೆಯುತ್ತಿದ್ದರು. ಇಂದು ಬೆಳಗ್ಗೆ ಅವರನ್ನು ವೆಂಟಿಲೇಟರ್‌ನಲ್ಲಿ ಇರಿಸಲಾಗಿತ್ತು. ಆದರೆ ಚಿಕಿತ್ಸೆಗೆ ಸ್ಪಂದಿಸದ ಶಂಖನಾದ ಅರವಿಂದ್ ಮೃತಪಟ್ಟಿದ್ದಾರೆ. 'ಶಂಖನಾದ', 'ಬೆಟ್ಟದ ಹೂ' ಸೇರಿದಂತೆ 250ಕ್ಕೂ ಅಧಿಕ ಸಿನಿಮಾಗಳಲ್ಲಿ ಅರವಿಂದ್ ಅಭಿನಯಿಸಿದ್ದರು.
