ಯಜ್ಞ ಮಾಡಿ, ಕೋವಿಡ್ ಮೂರನೇ ಅಲೆ ಭಾರತವನ್ನು ಮುಟ್ಟಲೂ ಸಾಧ್ಯವಿಲ್ಲ: ಸಂಸ್ಕೃತಿ ಸಚಿವೆ ಹೇಳಿಕೆ!
ಜನರು ನಾಲ್ಕು ದಿನಗಳ ಕಾಲ ಯಜ್ಞ ಚಿಕಿತ್ಸೆಯನ್ನು ನಡೆಸಿದರೆ ಕೋವಿಡ್ ಮೂರನೇ ಅಲೆ ಭಾರತವನ್ನು ಮುಟ್ಟಲೂ ಸಾಧ್ಯವಾಗದು ಎಂದು ಮಧ್ಯಪ್ರದೇಶದ ಸಂಸ್ಕೃತಿ ಸಚಿವೆ ಉಷಾ ಠಾಕೂರ್ ಚರ್ಚಾಸ್ಪದ ಹೇಳಿಕೆ ನೀಡಿದ್ದಾರೆ.
Admin
0
9
ಇಂದೋರ್: ಸಾಂಕ್ರಾಮಿಕ ಸೇರಿದಂತೆ ಅನೇಕ ವಿಚಾರಗಳ ಕುರಿತು ವಿವಾದಾತ್ಮಕ ಹೇಳಿಕೆಗಳನ್ನು ನೀಡುವ ಮೂಲಕ ಸುದ್ದಿಯಲ್ಲಿರುವ ಮಧ್ಯಪ್ರದೇಶದ ಸಂಸ್ಕೃತಿ ಸಚಿವೆ , ಕೋವಿಡ್ 19ರ ಮೂರನೇ ಅಲೆಯನ್ನು ತಪ್ಪಿಸಲು ನಾಲ್ಕು ದಿನಗಳ ಕಾಲ 'ಯಜ್ಞ ಚಿಕಿತ್ಸೆ' ನಡೆಸುವಂತೆ ಜನರಿಗೆ ಸಲಹೆ ನೀಡಿದ್ದಾರೆ.
ಇಂದೋರ್‌ನಲ್ಲಿ ಕೋವಿಡ್ ಕೇರ್ ಕೇಂದ್ರ ಉದ್ಘಾಟಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 'ಪರಿಸರದ ಶುದ್ಧೀಕರಣಕ್ಕಾಗಿ ನಾಲ್ಕು ದಿನಗಳ ಕಾಲ ಯಜ್ಞ ನಡೆಸಬೇಕು. ಇದು ಯಜ್ಞ ಚಿಕಿತ್ಸೆ. ಹಿಂದಿನ ದಿನಗಳಲ್ಲಿ ನಮ್ಮ ಪೂರ್ವಜರು ಸಾಂಕ್ರಾಮಿಗಳನ್ನು ತೊಲಗಿಸಲು ಯಜ್ಞ ಚಿಕಿತ್ಸೆಗಳನ್ನು ನಡೆಸುತ್ತಿದ್ದರು. ಈಗ ನಾವು ಪರಿಸರವನ್ನು ಶುದ್ಧೀಕರಿಸಿದರೆ, ಕೋವಿಡ್ ಭಾರತವನ್ನು ಸ್ಪರ್ಶಿಸುವುದಕ್ಕೂ ಆಗುವುದಿಲ್ಲ' ಎಂದು ಹೇಳಿದ್ದಾರೆ.
'ಪರಿಣತರ ಪ್ರಕಾರ ಈ ಅಲೆಯು ಮೊದಲು ಮಕ್ಕಳ ಮೇಲೆ ದಾಳಿ ಮಾಡುತ್ತದೆ. ಇದಕ್ಕಾಗಿ ಸರ್ಕಾರ ಸಂಪೂರ್ಣ ಸಿದ್ಧತೆ ನಡೆಸುತ್ತಿದೆ. ನಾವು ಈ ಸಾಂಕ್ರಾಮಿಕವನ್ನು ಯಶಸ್ವಿಯಾಗಿ ನಿವಾರಿಸುತ್ತೇವೆ' ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕೆಲವು ವಾರಗಳ ಹಿಂದೆ ಉಷಾ ಠಾಕೂರ್ ಅವರು ಕೋವಿಡ್ 19 ನಿರ್ಮೂಲನೆಗಾಗಿ ಇಂದೋರ್ ವಿಮಾನ ನಿಲ್ದಾಣದ ಪ್ರತಿಮೆಯೊಂದ ಮುಂದೆ ಧಾರ್ಮಿಕ ವಿಧಿ ವಿಧಾನಗಳನ್ನು ನಡೆಸಿದ್ದರು. ಅಲ್ಲದೆ ಕೆಲವು ದಿನಗಳ ಹಿಂದೆ ಕೋವಿಡ್ ಕೇರ್ ಕೇಂದ್ರಕ್ಕೆ ಭೇಟಿ ನೀಡಿದ್ದಾಗ ಮಾಸ್ಕ್ ಧರಿಸದ ಕಾರಣಕ್ಕೆ ಟೀಕೆಗೆ ಗುರಿಯಾಗಿದ್ದರು.
ಭಾರತವು ಕೋವಿಡ್ ಎರಡನೆಯ ಅಲೆಯಿಂದ ತತ್ತರಿಸಿದೆ. ಯಾವ ದೇಶವೂ ಕಾಣದಷ್ಟು ವ್ಯಾಪಕವಾಗಿ ಸೋಂಕು ಹರಡಿದೆ. ಇದರ ಬೆನ್ನಲ್ಲೇ ಪರಿಣತರು ಮೂರನೇ ಅಲೆಯ ಬಗ್ಗೆ ಎಚ್ಚರಿಕೆ ನೀಡಿದ್ದಾರೆ. ಮೂರನೇ ಅಲೆಯು ಯಾವಾಗ ಬರುತ್ತದೆ ಎನ್ನುವುದನ್ನು ಹೇಳಲಾಗದು. ಆದರೆ ಅದರ ಸ್ವರೂಪ ಇದಕ್ಕಿಂತಲೂ ಭೀಕರವಾಗಿರಲಿದೆ. ಚಿಕ್ಕ ಮಕ್ಕಳೂ ವೈರಸ್‌ಗೆ ತುತ್ತಾಗಲಿದ್ದಾರೆ ಎಂದು ಹೇಳಿದ್ದಾರೆ.
