ಮಹಾರಾಷ್ಟ್ರದಲ್ಲಿ 8 ಜನಕ್ಕೆ ಓಮಿಕ್ರಾನ್‌..! ಆದ್ರೆ, ಒಬ್ಬರೂ ವಿದೇಶದಿಂದ ಬಂದವರಲ್ಲ..!

(): ಮಹಾರಾಷ್ಟ್ರದಲ್ಲಿ ದಿನೇ ದಿನೇ ಓಮಿಕ್ರಾನ್‌ ರೂಪಾಂತರಿ ಸೋಂಕಿತರ ಸಂಖ್ಯೆ ಜಾಸ್ತಿಯಾಗುತ್ತಿದ್ದು, ಮಂಗಳವಾರ ಒಂದೇ ದಿನ ಎಂಟು ಮಂದಿಯಲ್ಲಿ ಹೊಸ ರೂಪಾಂತರಿ ವೈರಾಣು ಪತ್ತೆಯಾಗಿದೆ. ಇವರಲ್ಲಿ ಯಾರೂ ವಿದೇಶ ಬಂದವರಲ್ಲ ಮತ್ತು ವಿದೇಶದಿಂದ ಆಗಮಿಸಿದವರ ಜೊತೆ ಸಂಪರ್ಕವನ್ನೂ ಹೊಂದಿಲ್ಲ ಎನ್ನುವುದು ಗಮನಾರ್ಹವಾಗಿದೆ. ಎಂಟೂ ಪ್ರಕರಣಗಳು ಮುಂಬಯಿ ಮಹಾನಗರದಲ್ಲಿಯೇ ದಾಖಲಾಗಿವೆ. ದೇಶದಲ್ಲಿ ಇದುವರೆಗೆ ಒಟ್ಟು 60 ಪ್ರಕರಣ ದಾಖಲಾಗಿವೆ. ಈ ಪೈಕಿ ಮಹಾರಾಷ್ಟ್ರದಲ್ಲಿ 28, ರಾಜಸ್ಥಾನ 17, ದಿಲ್ಲಿ 6, ಗುಜರಾತ್‌ 4, ಕರ್ನಾಟಕ 3, ಆಂಧ್ರ ಪ್ರದೇಶ ಹಾಗೂ ಕೇರಳದಲ್ಲಿ ತಲಾ ಒಂದು ಪ್ರಕರಣ ದಾಖಲಾಗಿವೆ. ಮುನ್ನೆಚ್ಚರಿಕೆಯೇ ಮದ್ದು: ಕೊರೊನಾದ ಹೊಸ ರೂಪಾಂತರಿ ವೈರಾಣು ಓಮಿಕ್ರಾನ್‌ನಿಂದ ಸೋಂಕಿಗೆ ತುತ್ತಾಗುತ್ತಿರುವವರ ಸಂಖ್ಯೆ ಜಾಗತಿಕವಾಗಿ ದಿನೇ ದಿನೇ ಹೆಚ್ಚಾಗುತ್ತಿದೆ. ಅಮೆರಿಕ, ಯುರೋಪ್‌ಗಳಲ್ಲಿ ಆಸ್ಪತ್ರೆಗೆ ದಾಖಲಾಗುತ್ತಿರುವವರ ಪ್ರಮಾಣ ಕೂಡ ಏರಿಕೆ ಕಾಣುತ್ತಿದೆ. ಹಾಗಾಗಿ ಓಮಿಕ್ರಾನ್‌ ಸೋಂಕಿನ ಅನಾರೋಗ್ಯಕ್ಕೆ ಹೆಚ್ಚು ಜನರು ಮುಂದಿನ ದಿನಗಳಲ್ಲಿ ಬಲಿಯಾಗುವ ಸಾಧ್ಯತೆಯಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ) ಆತಂಕ ವ್ಯಕ್ತಪಡಿಸಿದೆ. 'ಓಮಿಕ್ರಾನ್‌ ಸೋಂಕಿತರಲ್ಲಿನ ಅನಾರೋಗ್ಯದ ಲಕ್ಷಣಗಳ ಬಗ್ಗೆ ಸ್ಪಷ್ಟವಾದ ಚಿತ್ರಣ ಸಿಗುತ್ತಿಲ್ಲ. ಜ್ವರ, ಮೈ - ಕೈ ನೋವಿಗೆ ತಕ್ಕಂತೆ ಔಷಧೋಪಚಾರ ಮಾಡಲಾಗುತ್ತಿದೆ. ದೇಹದ ಒಳಗೆ ಓಮಿಕ್ರಾನ್‌ನಿಂದಾಗುತ್ತಿರುವ ಅಪಾಯದ ಸುಳಿವು ವಿಜ್ಞಾನಿಗಳಿಗೆ, ತಜ್ಞ ವೈದ್ಯರಿಗೆ ಸ್ಪಷ್ಟವಾಗುತ್ತಿಲ್ಲ. ಸದ್ಯಕ್ಕೆ ಲಸಿಕೆಯ ಎರಡೂ ಡೋಸ್‌ಗಳನ್ನು ಜನರು ತಪ್ಪದೇ ಪಡೆದು, ಮಾಸ್ಕ್‌ ಧರಿಸಿಕೊಂಡು ಸಂಚರಿಸುವುದು ಸೂಕ್ತ' ಎಂದು ಡಬ್ಲ್ಯೂಎಚ್‌ಒ ಕಿವಿಮಾತು ಹೇಳಿದೆ. 6 ತಿಂಗಳಲ್ಲಿ ಮಕ್ಕಳ ಲಸಿಕೆ: ದೇಶದಲ್ಲಿ ಹೆಚ್ಚಿನ ಸಂಖ್ಯೆಯ ಜನರು ಪಡೆದಿರುವ ನಿರೋಧಕ ಲಸಿಕೆ 'ಕೋವಿಶೀಲ್ಡ್‌' ಅನ್ನು ಉತ್ಪಾದಿಸಿದ ಹೆಗ್ಗಳಿಕೆ ಹೊಂದಿರುವ ಪುಣೆಯ ಸಿರಂ ಇನ್‌ಸ್ಟಿಟ್ಯೂಟ್‌ ಆಫ್‌ ಇಂಡಿಯಾ (ಎಸ್‌ಐಐ) ಮುಂದಿನ ಆರು ತಿಂಗಳಲ್ಲಿ ಮಕ್ಕಳಿಗಾಗಿಯೇ ಕೊರೊನಾ ನಿರೋಧಕ ಲಸಿಕೆಯನ್ನು ಬಿಡುಗಡೆ ಮಾಡಲಿದೆ. ಈ ಬಗ್ಗೆ ಮಾಹಿತಿ ನೀಡಿರುವ ಎಸ್‌ಐಐ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಆದರ್‌ ಪೂನಾವಾಲಾ, 'ಸದ್ಯ ಮಕ್ಕಳಿಗಾಗಿ ಕೊವೊವ್ಯಾಕ್ಸ್‌ ಎಂಬ ಲಸಿಕೆ ಕ್ಲಿನಿಕಲ್‌ ಟ್ರಯಲ್‌ ನಡೆಯುತ್ತಿದೆ. ಈ ಲಸಿಕೆಯು ಕೊರೊನಾ ಹಾಗೂ ಆ ರೀತಿಯ ಸಾಂಕ್ರಾಮಿಕಗಳಿಂದ ಮೂರು ವರ್ಷದ ಮಕ್ಕಳಿಂದ ಶುರುವಾಗಿ ಎಲ್ಲ ವಯಸ್ಸಿನ ಮಕ್ಕಳಿಗೆ ಸಾಕಷ್ಟು ಪ್ರಮಾಣದ ರಕ್ಷಣೆ ನೀಡುವ ಸಾಮರ್ಥ್ಯ ಹೊಂದಿದೆ. ಸದ್ಯಕ್ಕಂತೂ ಮಕ್ಕಳಲ್ಲಿ ಕೊರೊನಾದಿಂದ ಗಂಭೀರ ಅನಾರೋಗ್ಯ ಉಂಟಾಗಿಲ್ಲ. ಓಮಿಕ್ರಾನ್‌ ಏನು ಮಾಡಲಿದೆ ಎಂದು ಸ್ಪಷ್ಟವಾಗಿ ತಿಳಿದಿಲ್ಲ. ಆದರೆ ಮುಂದೆ ನಾವು ಎಚ್ಚರಿಕೆ ವಹಿಸಬೇಕಿದೆ. ಹಾಗಾಗಿ ಆರು ತಿಂಗಳಲ್ಲಿ ಮಕ್ಕಳಿಗಾಗಿಯೇ ಮೀಸಲಾದ ಲಸಿಕೆ ಬಿಡುಗಡೆ ಮಾಡುತ್ತೇವೆ' ಎಂದಿದ್ದಾರೆ. ದೇಶದಲ್ಲಿ ಸದ್ಯ ಈಗ 18 ವರ್ಷ ಮೇಲ್ಪಟ್ಟ ವಯಸ್ಕರಿಗೆ ಮಾತ್ರವೇ ಕೊರೊನಾ ವೈರಸ್ ಸೋಂಕು ನಿರೋಧಕ ಲಸಿಕೆ ನೀಡಲಾಗುತ್ತಿದೆ.