ಫ್ಯಾನ್ಸ್‌ಗೆ ಗುಡ್ ನ್ಯೂಸ್ ನೀಡಿದ ಸಂಜನಾ ಗಲ್ರಾನಿ; ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಸ್ಯಾಂಡಲ್‌ವುಡ್‌ ನಟಿ

ನಟಿ ಕಡೆಯಿಂದ ಗುಡ್‌ ನ್ಯೂಸ್‌ವೊಂದು ಕೇಳಿಬಂದಿದೆ. ಸ್ಯಾಂಡಲ್‌ವುಡ್‌ನಲ್ಲಿ 'ಗಂಡ ಹೆಂಡತಿ' ಸಿನಿಮಾದಿಂದ ಖ್ಯಾತಿಯ ಪಡೆದುಕೊಂಡಿದ್ದ ಈ ನಟಿ ಕೆಲ ಸಮಯದ ಹಿಂದೆ ಮದುವೆಯಾಗಿದ್ದರು. ಇದೀಗ ಅವರು ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಆ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ ಅವರು. ಈಗ 5ನೇ ತಿಂಗಳ ಗರ್ಭಿಣಿ ಆಗಿರುವ ಅವರು, 2022ರ ಮೇ ವೇಳೆಗೆ ತಮ್ಮ ಕುಟುಂಬಕ್ಕೆ ಹೊಸ ಮೆಂಬರ್‌ಗೆ ಸ್ವಾಗತ ಕೋರಲಿದ್ದಾರೆ. ಈ ವಿಚಾರ ಗೊತ್ತಾಗುತ್ತಿದ್ದಂತೆಯೇ ಅವರ ಸ್ನೇಹಿತರು, ಸೆಲೆಬ್ರಿಟಿಗಳು, ಫ್ಯಾನ್ಸ್ ಶುಭ ಕೋರಿದ್ದಾರೆ. ಈ ಕುರಿತು ಅವರು ಟೈಮ್ಸ್ ಆಫ್‌ ಇಂಡಿಯಾದ ಜೊತೆಗೆ ಮಾತನಾಡಿದ್ದಾರೆ. 'ಹೆರಿಗೆಗೆ ಇನ್ನು ಕೆಲವು ದಿನಗಳು ಬಾಕಿ ಇರುವ ತನಕವೂ ನಾನು ಆಕ್ಟೀವ್ ಆಗಿರಬೇಕು ಎಂದುಕೊಂಡಿದ್ದೇನೆ. ಈ ರೀತಿ ಕೆಲಸ ಮಾಡುವ ಅನೇಕ ಮಹಿಳೆಯರನ್ನು ನಾನು ನೋಡಿದ್ದೇನೆ. ಅವರೇ ನನಗೆ ಸ್ಫೂರ್ತಿಯಾಗಿದ್ದಾರೆ. ನಾನು ವಾರದಲ್ಲಿ ಮೂರರಿಂದ ನಾಲ್ಕು ದಿನಗಳು ಕೆಲಸ ಮಾಡುತ್ತೇನೆ. ನನ್ನ ಶೆಡ್ಯೂಲ್ ತುಂಬ ಬ್ಯುಸಿ ಇದೆ' ಎನ್ನುವ ಅವರಿಗೆ ಮಕ್ಕಳೆಂದರೆ ತುಂಬ ಪ್ರೀತಿಯಂತೆ. 'ತಾಯಿ ಆಗುವುದನ್ನು ನಾನು ಮುಂದಕ್ಕೆ ಹಾಕುತ್ತಲೇ ಇದ್ದೆ. ಬಹುಶಃ ದೇಹದಲ್ಲಾಗುವ ಬದಲಾವಣೆಗೆಳಿಗೆ ನಾನು ಸಿದ್ಧಳಾಗಿರಲಿಲ್ಲ. ಯಾವಾಗ ಮಗು ಮಾಡಿಕೊಳ್ಳುತ್ತೀಯಾ ಎಂದು ನನ್ನ ಪೋಷಕರು ಯಾವಾಗಲೂ ಕೇಳುತ್ತಲೇ ಇದ್ದರು. ನನಗೆ 34 ವರ್ಷ ವಯಸ್ಸು. ಹಾಗಾಗಿ ತಾಯಿಯಾಗಲು ಇದು ಸರಿಯಾದ ಸಮಯ ಎಂದು ನಿರ್ಧರಿಸಿದೆ' ಎಂದು ಸಂಜನಾ ಹೇಳಿಕೊಂಡಿದ್ದಾರೆ. 2005ರಲ್ಲಿ ತಮಿಳು-ತೆಲುಗು ಸಿನಿಮಾಗಳ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ನಟಿ ಸಂಜನಾ ಗಲ್ರಾನಿ ಅವರು 'ಗಂಡ ಹಂಡತಿ' ಸಿನಿಮಾದಿಂದ ಸ್ಯಾಂಡಲ್‌ವುಡ್‌ನಲ್ಲಿ ಗುರುತಿಸಿಕೊಂಡರು. ಪ್ರಭಾಸ್ ಜೊತೆಗೆ 'ಬುಜ್ಜಿಗಾಡು', ಪವನ್ ಕಲ್ಯಾಣ್ ಅವರ 'ಸರ್ದಾರ್ ಗಬ್ಬರ್ ಸಿಂಗ್', ಶಿವರಾಜ್‌ಕುಮಾರ್ ಜೊತೆಗಿನ 'ಮೈಲಾರಿ' ಸಂಜನಾ ವೃತ್ತಿ ಜೀವನದ ಬಿಗ್ ಹಿಟ್ ಸಿನಿಮಾಗಳಾಗಿವೆ. ಸದ್ಯ ಮಲಯಾಳಂ ಸಿನಿಮಾವೊಂದರಲ್ಲಿ ಅವರು ಬಣ್ಣ ಹಚ್ಚಿದ್ದಾರೆ. 16 ವರ್ಷಗಳಿಂದ ಬಣ್ಣದ ಲೋಕದಲ್ಲಿ ಸಕ್ರಿಯವಾಗಿರುವ ಸಂಜನಾ, ಈಗಲೂ ಸಾಕಷ್ಟು ಅವಕಾಶಗಳನ್ನು ಪಡೆದುಕೊಳ್ಳುತ್ತಿದ್ದಾರೆ.