ಪೆಟ್ರೋಲ್‌ ಮೇಲಿನ ಅಬಕಾರಿ ಸುಂಕ ಇಳಿಕೆಗೆ ಯುಪಿಎ ತೈಲ ಬಾಂಡ್‌ ಅಡ್ಡಿ - ನಿರ್ಮಲಾ ಸೀತಾರಾಮನ್‌
ಯುಪಿಎ ಸರಕಾರ 1.44 ಲಕ್ಷ ಕೋಟಿ ರೂ. ತೈಲ ಬಾಂಡ್‌ಗಳನ್ನು ಬಿಡುಗಡೆಗೊಳಿಸಿತ್ತು. ಒಂದು ವೇಳೆ ಈ ತೈಲ ಬಾಂಡ್‌ನ ಹೊರೆ ಇಲ್ಲದಿರುತ್ತಿದ್ದರೆ, ಸರಕಾರ ಪೆಟ್ರೋಲ್‌, ಡೀಸೆಲ್‌ ಮೇಲಿನ ಅಬಕಾರಿ ಸುಂಕವನ್ನು ಇಳಿಸಬಹುದಿತ್ತು ಎಂದು ನಿರ್ಮಲಾ ಸೀತಾರಾಮನ್‌ ಹೇಳಿದ್ದಾರೆ.
Admin
0
6
ಹೊಸದಿಲ್ಲಿ: ಕಾಂಗ್ರೆಸ್‌ ನೇತೃತ್ವದ ಯುಪಿಎ ಸರಕಾರ ತೈಲ ಬಾಂಡ್‌ಗಳನ್ನು ಬಿಡುಗಡೆ ಮಾಡುವ ಮೂಲಕ ತೈಲ ದರಗಳನ್ನು ತಗ್ಗಿಸಿತ್ತು. ಆದರೆ ಆ ತೈಲ ಬಾಂಡ್‌ಗಳಿಗೆ ಸಂಬಂಧಿಸಿ ಸರಕಾರವು ಬಾಂಡ್‌ದಾರರಿಗೆ ಹಣವನ್ನು ಮರು ಪಾವತಿಸಬೇಕಾಗಿದೆ. ಹೀಗಾಗಿ ತೈಲ ದರ ಇಳಿಸಲು ಸಾಧ್ಯವಾಗದ ಪರಿಸ್ಥಿತಿ ಉಂಟಾಗಿದೆ ಎಂದು ಹಣಕಾಸು ಸಚಿವೆ ಸೋಮವಾರ ಹೇಳಿದ್ದಾರೆ.
ಯುಪಿಎ ಸರಕಾರ 1.44 ಲಕ್ಷ ಕೋಟಿ ರೂ. ತೈಲ ಬಾಂಡ್‌ಗಳನ್ನು ಬಿಡುಗಡೆಗೊಳಿಸಿತ್ತು. ಆದರೆ ನಮ್ಮ ಸರಕಾರ ಅಂಥ ತಂತ್ರ ಅನುಸರಿಸುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಯುಪಿಎ ಸರಕಾರದ ತೈಲ ಬಾಂಡ್‌ಗಳಿಗೆ ಸಂಬಂಧಿಸಿ ಕಳೆದ 5 ವರ್ಷಗಳಲ್ಲಿ ಸರಕಾರ 70,195 ಕೋಟಿ ರೂ. ಬಡ್ಡಿಯನ್ನು ಪಾವತಿಸಿದೆ. 2026ರೊಳಗೆ ಬಡ್ಡಿ ರೂಪದಲ್ಲಿ 37,000 ಕೋಟಿ ರೂ.ಗಳನ್ನು ಪಾವತಿಸಬೇಕಾಗಿದೆ. ಬಡ್ಡಿಯ ಹೊರತಾಗಿ 1.30 ಲಕ್ಷ ಕೋಟಿ ರೂ. ಒಟ್ಟಾರೆ ಅಸಲು ಮೊತ್ತ ಬಾಕಿ ಉಳಿದಿದೆ ಎಂದು ಹಣಕಾಸು ಸಚಿವರು ದರ ಇಳಿಕೆಗೆ ಅಸಹಾಯಕತೆ ವ್ಯಕ್ತಪಡಿಸಿದ್ದಾರೆ.
ಒಂದು ವೇಳೆ ಈ ತೈಲ ಬಾಂಡ್‌ನ ಹೊರೆ ಇಲ್ಲದಿರುತ್ತಿದ್ದರೆ, ಸರಕಾರ ಪೆಟ್ರೋಲ್‌-ಡೀಸೆಲ್‌ ಮೇಲಿನ ಅಬಕಾರಿ ಸುಂಕವನ್ನು ಇಳಿಸಬಹುದಿತ್ತು ಎಂದು ನಿರ್ಮಲಾ ಸೀತಾರಾಮನ್‌ ವಿವರಿಸಿದ್ದಾರೆ.
